跳去內容

李梓敬

改拎
出自維基百科，自由嘅百科全書
李梓敬
出生日1984年1月22號 喺Wikidata改呢個 （40歲）
出生地香港 喺Wikidata改呢個
國籍中華人民共和國 喺Wikidata改呢個
母校香港李寶椿聯合世界書院、萊斯大學 喺Wikidata改呢個
職業政治人 喺Wikidata改呢個
政黨自由黨、新民黨 喺Wikidata改呢個

李梓敬（1984年1月22號—），人稱「西門梓敬」、「建制戰狼2.0」，係香港激進親中陣營嘅政治人物，前任深水埗區議會又一村選區議員，曾經係自由黨嘅成員，之後為咗參加2020年香港立法會選舉新民黨初選而退黨，2021年當選成為第七屆香港立法會議員。

早年生涯

[編輯]

李梓敬早年就讀喇沙小學、拔萃小學、拔萃男書院（讀到中五）同埋李寶椿聯合世界書院，喺萊斯大學完成經濟學學士學位，然後喺香港城市大學完成法律博士（J.D.）[1][2]。

李梓敬喺大學時期已經開始創業，設立網上平台買賣教科書，並且喺畢業前將企業賣畀一個雷曼兄弟前高層[3][4]。之後，佢再次建立唔同嘅網絡銷售平台，售賣廚具[5]，寵物產品，嬰兒產品等等。[6] 喺2011年，李梓敬加入家族電子零件生意，負責網上銷售同埋網絡營銷[7]。

李梓敬喺美國讀大學嗰陣曾經為2004年美國民主黨總統候選人約翰·克里助選，同埋為民主黨眾議員阿爾‧格林（英文：Al Green (politician)）做過見習生，返到香港後，喺2009年加入自由黨。

參選歷史

[編輯]
2023年嘅李梓敬

喺2015年香港區議會選舉，李梓敬喺又一村選區參選，擊敗社民連候選人周嘉發，當選深水埗區議員[8]。

喺2016年香港立法會選舉入面，佢代表自由黨名單第一參選新界東選區，時任議員田北俊就排名單第二幫佢「抬轎」，但名單最終以20031票落選。

喺2019年香港區議會選舉入面，佢喺又一村選區爭取連任，但因為親中派唔理民意，堅持支持修訂逃犯條例，而選情大受困擾，佢最後輸咗畀獨立民主派人士劉偉聰。

2020年3月，新民黨舉行黨內初選，推舉出選佢哋喺2020年香港立法會選舉新界東地區直選嘅代表，並開放畀黨外人士參與，李梓敬之後去咗參與，[9]喺3月12號，自由黨黨魁鍾國斌就表明要佢退黨[10]，同日晚上，李梓敬宣佈退出自由黨[11]，當時被自由黨黨魁鍾國斌批評佢唔尊重自由黨[12]。佢之後加入新民黨嘅地區結盟組織公民力量[13]，並取得9個新民黨中央委員會同埋青年委員會委員提名，取代時任新民黨議員容海恩出線[14]。不過，政府之後以武漢肺炎疫情為理由，宣布將選舉延期一年，之後北京更未經諮詢同香港人同意，單方面修改香港嘅選舉制度，大幅度削減直選議席嘅比例。

喺2021年9月，佢成為香港特别行政區選舉委員會基層社團委員[15]。之後佢喺李家超無提政綱嘅情況下，有份提名李家超參與2022年香港行政長官選舉[16]。

佢喺2021年香港立法會選舉入面當選。

公職

[編輯]

政治立場同爭議

[編輯]

李梓敬曾經係溫和建制派自由黨嘅成員，但後來佢嘅立場就走向激進建制派，同馬恩國、何君堯等其他激進建制派嘅人越來越埋，時不時出席其他激進親中陣營組織（例如民眾聯席）嘅活動[19]，之後仲退出自由黨改投新民黨。另外，李梓敬亦曾經發表一啲針對美國嘅言論，亦被一啲事實核查組織批評佢發放假新聞。

佢喺香港LGBT權益問題上亦持保守立場[20]。

投機政治立場被唔同政治光譜人士批評

[編輯]

曾經有一定評論，指李梓敬喺政治立場上為投機主義者，有關批評嚟自唔同政治光譜嘅人士，包括泛民主派同埋溫和建制派。喺2016年香港立法會選舉，李梓敬夥拍持開明建制立場嘅田北俊參選新界東。但落選後佢就走向激進建制，甚至喺2020年香港立法會選舉前夕由自由黨改投新民黨[21]。

泛民主派張秀賢曾經喺自己嘅社交網站批評佢，話佢係『投機政棍、跳樑小丑』，睇見就想嘔，又話佢2016年扮中間派，2020年就扮做激進親中派。[22]羅冠聰亦批評佢昔日喺美國為總統候選人助選，幫當地眾議員做實習生，今日就走去做紅衛兵[23]。

同樣曾經係自由黨成員，而家係中間派（部分人視作溫和建制派）嘅方國珊，喺2020年7月接受訪問時，就批評李梓敬欺師滅祖，話佢好渴望做立法會議員，脫離咗以前喺自由黨時嘅軌跡，變得好『民建聯和工聯會』，同何君堯一樣異類。方又指，自由黨為佢付出咗咁多，但佢就離黨代表新民黨出選，做法令自由黨失望。方國珊認為，從政嘅人應毋忘初心，話李梓敬係真正嘅「政治變色龍」，而都有唔少人係咁諗[24]。

多次被揭發散播不實信息攻擊他人

[編輯]

李梓敬唔止一次被揭發不實信息去攻擊同佢政見唔同嘅人或者佢口中嘅外國勢力。

2020年9月14號，李梓敬喺自己Facebook貼咗《星島日報》一篇文章截圖，圖中顯示文章標題指有研究揭露武漢肺炎疫情早喺武漢爆發之前喺美國傳播，李又反問係咪要向美國政府追討損失。事實查核實驗室就查證到，個篇文章引述研究推測美國可能喺2019年12月尾已經出現武漢肺炎病例，但唔能夠證實12月尾美國有爆發。相反，武漢有學者喺醫學期刊《刺針》上發表嘅論文講述首名確診病人發病日期係2019年12月1號。比較之下，就證實咗李梓敬呢個轉載係假新聞[25]。

另外，喺2021年10月7日，李梓敬喺佢嘅Facebook專頁同YouTube頻道「KOLHK 時事梓引」發布影片「前蘋果記者爆大鑊，何韻詩呃黑暴？」，聲稱前《蘋果日報》記者受訪時「大爆612基金無用」、「揭發黎智英落井下石」，但影片提及《獨立媒體》嘅訪問，受訪者形容612人道支援基金「像一個堅實的後盾」，並無批評612基金「無用」嘅內容。而受訪者當中提及被拖欠，都有講到係因為政府凍結蘋果日報資金所致，並無批評《蘋果日報》或黎智英「落井下石」。影片標題入面，主持張靜茵亦只係引述網民意見同發表個人評論諷刺義務律師，既無蘋果記者爆大鑊，亦無指控何韻詩欺騙。事實檢查實驗室批評，呢段片發佈錯誤訊息同誤導內容[26]。

批評前港姐歐陽巧瑩搏出位

[編輯]

曾經參選港姐，之後離開無綫嘅藝人歐陽巧瑩，喺2020年3月接受媒體訪問時，表示有意參選區議員，以爭取大麻合法化作為政綱，引來李梓敬批評其搏出位。歐陽巧瑩後來回應李梓敬，批評其歪曲事實，卻被大量李梓敬支持者攻擊，而有關影片，亦已超過45萬點擊。[27]

否認新疆種族滅絕、狙擊停用新疆棉嘅品牌

[編輯]

新疆維吾爾族人被指受到中共嘅大清洗，受到迫害、強迫勞動、宗教歧視等議題，喺2014年起開始受到關注。而喺2021年3月新疆棉花風波，多個國際品牌發表聲明批評中國強迫新疆維吾爾族人勞動，因此唔再用新疆棉花。事件引起全球唔少關注，但係包括李梓敬嘅一啲香港激進親中共派，就對呢啲品牌進行狙擊。

喺3月28號，李梓敬就聯同黃嘉榮、潘國山等公民力量嘅成員，去到H&M香港嘅辦事處遞交請願信。李梓敬否認新疆有強制勞動同埋種族滅絕嘅情況，又批評H&M抹黑中國人權。不過，潘國山就被影到當時著咗Nike（另一個表明停用新疆棉嘅品牌）嘅波鞋[28][29]。

東京奧運期間攻擊港隊成員伍家朗

[編輯]
内文：第32屆奧林匹克運動會同香港相關嘅活動事件 § 伍家朗波衫事件

2021年7月24號，正值東京奧運，同屬激進親中派穆家駿喺自己嘅Facebook專頁上，攻擊羽毛球港隊成員伍家朗，話佢著黑衫出賽，質疑佢係咪唔想代表中國香港出戰[30]。之後穆家駿亦得到李梓敬嘅和應，李梓敬更加將矛頭指向伍家朗出賽時點解無著由另一贊助商FILA所提供，印有區徽嘅球衣。唔少網民，民主派人士，甚至部分親中派人士都批評穆家駿同伍家朗嘅言論。伍家朗回應事件，話自己無獲授權印區旗落去，又話自己一直以代表香港自豪，希望大家留意運動員表現，而唔係件衫度[31]，佢又批評穆家駿「鬧還鬧，唔該搞清楚件事先鬧啦」[32]。最終，伍家朗喺賽事落敗，有部分評論就認為，李梓敬同穆家駿令到當時嘅伍家朗，以致港隊其他成員嘅心理質素受到影響，係港隊落敗嘅元兇[33]。

呼籲杯葛麥當勞

[編輯]

喺2021年9月，麥當勞香港因應脆香雞翼斷貨一排之後重新上架，而藉住歌曲《跌嘢唔好搵》嘅歌詞去做宣傳，不過咁啱9月25號有個女警執行職務嗰陣跌咗落海失蹤（後證實殉職），李梓敬聲稱麥當勞用呢首歌係嘲諷緊呢單嘢，甚至鼓勵聯同內地網民一齊杯葛麥當勞[34]，搞到麥當勞要澄清返[35][36][37]。

對於呢種做法，保安局局長鄧炳強曾經喺立法會批評呢啲中傷、污衊、醜化同埋抵制持不同政見嘅商業機構，又譴責「起底」、杯葛、欺凌，甚至騷擾同呢啲商業機構有關嘅人[38]。

質疑入侵烏克蘭嘅可能性

[編輯]

2022年2月，李梓敬響佢嘅Twitter發文，諷刺兼貿疑西方話俄羅斯就快入侵烏克蘭嘅可信性。不過無幾耐，俄羅斯真係入侵烏克蘭。李梓敬好快就刪咗呢篇文章，仲潛埋水添[39]。

Twitter帳號被揭追蹤色情賬戶

[編輯]

喺2022年5月，Facebook專頁追蹤黨媒發現，李梓敬嘅Twitter追蹤咗多個色情賬戶，部分更上載咗裸露照片，李梓敬回應事件嘅時候就話係為咗增加自己Twitter嘅Follower數目，賬戶多難考究，而且問心無愧，係媒體抹黑佢哋[40]。

參考

[編輯]
  1. ↑ CityU HK. "What is JD?". CityU HK. 原先內容歸檔喺2021-02-25. 喺2020-06-15搵到.
  2. ↑ 〈政情：李梓敬法律博士畢業 讀得輕鬆全靠住得近〉。東方日報。2019-05-21。原著喺2019-10-31歸檔。喺2019-10-31搵到。
  3. ↑ "Fortune 100 Businessman Nick Themelis on a New Mission". 原著喺2013-12-23歸檔. 喺2018-08-16搵到.
  4. ↑ 〈李梓敬博客〉。原著喺2018-08-18歸檔。喺2018-08-18搵到。
  5. ↑ 〈「小中産」遷出豪宅 為服務基層〉。原著喺2018-08-17歸檔。喺2018-08-17搵到。
  6. ↑ 〈李梓敬博客〉。原著喺2018-08-18歸檔。喺2018-08-18搵到。
  7. ↑ 〈貼地中產？》父母擁5公司 李梓敬唔逼囝囝去Playgroup〉。原著喺2018-08-17歸檔。喺2018-08-17搵到。
  8. ↑ 〈2015區議會選舉結果(深水埗)〉。原著喺2018-06-12歸檔。喺2018-06-11搵到。
  9. ↑ 〈【01獨家】新民黨擬推李梓敬選新東　取代容海恩　李：下周有決定〉。
  10. ↑ 〈李梓敬參加新民黨初選　鍾國斌：如不退黨中常委將開會革黨籍〉。原著喺2020-07-03歸檔。喺2020-03-13搵到。 {{cite web}}: Cite has empty unknown parameter: |1= (help)
  11. ↑ 〈【立會選舉】參與新民黨初選　李梓敬宣布退出自由黨〉。原著喺2020-08-09歸檔。
  12. ↑ 彭焯煒, 林劍, 陳嘉洛 (2020-03-12)。〈【立法會選舉】李梓敬報名新民黨初選 自由黨鍾國斌：研革除黨籍〉。《香港01》 (香港中文)。
  13. ↑ 〈【立法會選舉】李梓敬「轉會」公民力量避談自由黨：感激過往栽培〉。
  14. ↑ 彭焯煒、翟睿敏。〈【立法會選舉】新民黨初選　李梓敬取9提名「入閘」　葉劉獲豁免〉。
  15. ↑ 〈一文睇清1448名新選委全名單〉。《香港文匯網》 (中文)。喺2022-08-11搵到。
  16. ↑ 〈一文看清李家超786張提名〉。《信報網站 hkej.com》。喺2022-09-02搵到。
  17. ↑ 〈組織架構 - 香港再出發大聯盟 - 官方網站〉。www.hkcoalition.com。喺2023-11-09搵到。
  18. ↑ 〈香港再出發大聯盟團結各界〉。www.takungpao.com.hk。喺2023-11-09搵到。
  19. ↑ 劉錦華 (2020-05-23)。〈港版國安法｜稱助港經濟繁榮 民眾聯席：港短期會有動盪〉。《香港01》 (香港中文)。
  20. ↑ 〈英駐港領事館掛彩虹旗　李梓敬批干預內政：煽動性傾向條例強立法〉。HK01。喺2021-04-05搵到。
  21. ↑ 彭焯煒。〈專訪｜直言離中間路線因無市場　李梓敬否認投機：與自由黨無介蒂〉。
  22. ↑ https://www.facebook.com/TommyCheung0416/posts/3203151799728498/. 喺2020-07-26搵到. {{cite web}}: Missing or empty |title= (help)
  23. ↑ 〈【Emily】李梓敬：過國安法即舉報羅冠聰 阿聰反斥：昔美國助選 今變紅衛兵〉。原著喺2020-07-26歸檔。喺2020-07-26搵到。
  24. ↑ 〈【立法會選舉2020】方國珊擬6度戰立會｜貼地民生自成一派唔玩政治｜「欺師滅祖」轉贈李梓敬〉。原著喺2021-01-18歸檔。喺2020-07-26搵到。
  25. ↑ 〈【錯誤】研究指 COVID-19 在武漢爆發前已在美國傳播？ | 事實查核實驗室 Factcheck Lab | 立場新聞〉。《立場新聞 Stand News》 (英文)。原著喺2020-10-28歸檔。喺2020-11-03搵到。
  26. ↑ 〈李梓敬頻道影片簡介稱前《蘋果》記者「大爆612基金無用」，與《獨媒》訪問內容不符｜Factcheck Lab 事實查核實驗室〉。《Factcheck Lab 事實查核實驗室》 (香港中文)。2021-10-15。喺2022-04-24搵到。
  27. ↑ 〈港獨黃絲女，外遊被困秘魯，老屈 TVB，結果被 TVB 大踢爆？前港姐歐陽巧瑩博出位，推大麻合法化，仲要選議員？〉。原著喺2021-09-14歸檔。喺2021-09-14搵到。
  28. ↑ 〈天下圍中︱李梓敬踩場促H&M道歉 同場潘國山穿Nike鞋 ｜ 蘋果日報〉。《Apple Daily 蘋果日報》 (香港中文)。原著喺2021-03-27歸檔。喺2021-03-28搵到。
  29. ↑ 〈【新疆棉風波】公民力量到H&M抗議 李梓敬稱產品質素低劣、白色內衣「著幾次就黃」 | 獨媒報導〉。《香港獨立媒體網》。喺2021-03-28搵到。
  30. ↑ 〈強烈譴責羽毛球港隊成員伍家朗穿著沒有區旗標識的黑色衫代表中國香港出戰！！！！其他隊員參與混雙比賽都是穿著印有區旗的整齊隊服！如果不想代表中國香港，請選擇退賽！〉。《穆家駿 Nicholas Muk - Facebook》。2021-07-25。原著喺2021-07-25歸檔。喺2021-07-25搵到。
  31. ↑ 〈伍家朗冀大家專注留意運動員表現而非衣服 - RTHK〉。news.rthk.hk (臺灣中文)。喺2021-07-25搵到。
  32. ↑ 〈【東京奧運】黑衣作賽遭建制派狙擊 伍家朗：無球衣贊助 未獲授權印區旗 | 立場報道 | 立場新聞〉。《立場新聞 Stand News》。原著喺2021-07-25歸檔。喺2021-07-25搵到。
  33. ↑ 《穆家駿 李梓敬 累 伍家朗輸波 黃世澤幾分鐘評論 20210728》 (英文)，喺2021-08-02搵到
  34. ↑ 〈宣傳被質疑諷女警殉職 麥當勞：深表歉意 李梓敬：要佢哋跪低，通知內地網民先有用 | 立場報道 | 立場新聞〉。《立場新聞 Stand News》。原著喺2021-09-29歸檔。喺2021-09-29搵到。
  35. ↑ 向樂高 (2021-09-27)。〈麥當勞以「跌咗嘢」宣傳雞翼回歸被疑諷女警墮海　公司澄清無含意〉。香港01。
  36. ↑ 〈麥當勞以「跌咗嘢」宣傳雞翼捱批 建制聲言罷食 麥記致歉：無其他含意〉。明報。2021-09-28。喺2021-09-28搵到。
  37. ↑ 阿鬼 (2021-09-28)。〈網傳麥當勞出post稱跌咗嘢唔搵佢　激嬲藍絲狂洗版、建制籲杯葛〉。winandmac。喺2021-09-28搵到。
  38. ↑ 〈立法會五題：網上煽動及號召攻擊商業機構行為〉。www.info.gov.hk。喺2021-09-29搵到。
  39. ↑ 〈【Emily】俄羅斯侵烏 李梓敬潛水 烏克蘭朋友保家園暫別 伍家謙淚湧 - 20220226 - 港聞〉。《明報新聞網 - 每日明報 daily news》 (繁體中文)。喺2022-02-27搵到。
  40. ↑ HK, Channel C. (2022-05-02)。〈被揭追蹤色情Twitter賬戶 李梓敬：賬戶多難考究 | Channel C〉。channelchk.com (繁體中文)。喺2022-05-03搵到。

出面網頁

[編輯]
維基同享有多媒體嘅嘢：
Dominic Lee
維基語錄收錄咗同呢篇文相關嘅摘錄： zh:李梓敬
由「https://zh-yue.wikipedia.org/w/index.php?title=李梓敬&oldid=2048556」收