林哲玄

  提示：呢篇文講嘅唔係林哲。

林哲玄（英文：David Lam），係香港建制陣營（專業界親中派）政治人同外科醫生，天津市政協委員，「醫護誠信同行」主席，現任香港立法會議員（醫療衛生界功能界別）。

政治同社會問題立場

佢支持23條立法，曾經喺爭取民主嘅香港反送中運動期間支持香港警察，又喺武漢肺炎香港疫情期間初期反對醫護為爭取封關而罷工並曾經參與聯署謹向內地援港醫療隊致敬。佢認為作為醫護人員，應堅守全心照顧病人嘅誓言，底線係唔好影響對病人嘅照顧。佢曾經質問一啲醫護人員，係咪唔夠防護裝備就可以落更唔使理，當時就畀杏林覺醒成員、立場偏黃的公立醫院心臟科專科醫生黃任匡反駁，話醫護人員保護自己乃係專業操守，爭取防護裝備旨在保護病人，而防備唔足夠，責任在於政府。正如地盤工人開工時冇頭盔戴，鑽地工人開工時冇護耳罩，大家亦唔會怪責工人。黃任匡又批評，林哲玄噉樣係抹黑同業、逼害港人。

醫療議題方面，佢曾經話要推動醫療重返社區，畀醫院專責專科工作，又支持引入包括中國大陸在內嘅海外醫生。

選舉經歷

喺2021年9月，佢成為香港特别行政區選舉委員會醫學及衞生服務界委員。

2022年，佢喺李家超無提政綱嘅情況下，有份提名李家超參與2022年香港行政長官選舉。

其他事件

美國外科醫學院會員資格被取消

林曾經做過美國外科醫學院嘅會員，但隨著西方國家關注中國人權問題，美國實行咗一連串對中國嘅制裁，林喺2022年9月22號被學院以佢係中國公民為理由，拒絕續佢嘅會員身份，以符合美國方面制裁嘅命令。無耐後，林喺Facebook發曬老脾話係美國將佢踢出醫學院，話人美國「虛偽」，而且聲稱自己會同有關方面「劃清界線」咁話。

出面網頁

• 林哲玄嘅官方網站
• 林哲玄嘅facebook頁
• 〈香港特別行政區立法會 -林哲玄議員〉 (繁體中文)。香港特別行政區立法會。
• 〈香港特別行政區立法會 - 議員資料庫〉 (繁體中文)。香港特別行政區立法會。