建制派
建制派（英文：Pro-establishment camp），又叫親北京陣營（Pro-Beijing camp）、親中派/親中陣營（Pro-China camp）、親共派（Pro-Communism Camp）、香港左派，係一個簡單分類法類別之中嘅香港政治派別，香港傳媒、學者同埋泛民主派成日用呢個標籤，泛指啲支持當權派政策嘅人，特別係思想同表態支持中共中央嘅政治人物、政治團體同媒體；喺意識形態上，建制派同泛民主派喺政治立場方面大多數係對立，但部分派別响某些經濟議題上意見同泛民主派一致。相反，建制派內部雖然政治立場大致一樣，但係唔少建制派喺經濟議題上面嘅立場亦會同泛民主派對立；佢哋政見好近似大公報、文匯報、人民日報社論，通常佢哋有訂或者鍾意睇啲左派報紙。
建制派政黨有時又稱為保皇黨，因為有反對聲音指出建制人士投共，好似保護皇帝一樣。
建制派係一頂政治高帽、政治標籤噉，佢哋有嚟自不同背景嘅組織，涵蓋香港主流社會嘅工商界、大財團、工會同埋專業階層等等，但主要係指支持而家香港特別行政區政府嘅政治組織，為佢哋大部分政策保駕護航。
民建聯同埋工聯會係建制派嘅親中代表、主流勢力，獲得唔少屋苑同埋公屋基層支持，而經民聯、新民黨、自由黨、新世紀論壇就主要獲得工商界、大財團同埋部分中產階級支持。
建制派喺2019年區議會選舉大敗，變成區議會嘅少數派，有支持泛民主派、香港本土派、自決派、修憲派嘅網民認為佢哋已經唔再配用「建制派」個名，呢種情況直到2021年公職條例修訂草案三讀通過、泛民主派大批區議員劈炮唔撈之後，先至有所改變。
政治派別
[編輯]建制派包括多個香港政黨、政治組織同一啲獨立人士，依家香港立法會政黨主要包括民建聯、經民聯、工聯會、新民黨、自由黨等。
- 傳統建制派：民建聯、工聯會、港九勞工社團聯會等
- 商界：經民聯、新民黨、自由黨、實政圓桌等
- 地區組織：西九新動力、公民力量、創建力量、港島聯、九社聯、新社聯、專業動力、民生圓桌等
- 激進建制派：新界大聯盟、愛護香港力量、愛港之聲、保衛香港運動、幫幫香港出聲行動、香港青年關愛協會、香港政研會等
- 鄉事派同其他：紫荊黨、香港新方向、新世紀論壇、城鄉會、新界鄉議局同各個鄉事委員會等。
特色同爭議
[編輯]被指隱瞞或者虛報自己係獨立議員
[編輯]有唔少本身屬於建制派嘅政治人物，喺在任區議員期間或者進行地區工作嗰陣，就喺區議會網站等唔同地方聲稱話自己係獨立或者唔會披露自己嘅政治聯繫（呢家嘢，泛民主派叫做假獨立）。
喺2008年立法會選舉期間，梁美芬向外界堅稱自己係獨立、不群不黨嘅專業人士。但喺一次九龍西直選論壇上，就被民主派候選人揭發，佢獲得工聯會支持，仲有會長推薦。而佢最終成功當選。落敗咗，同屬建制派嘅田北辰，喺選舉後直指中聯辦幫梁美芬，梁美芬多數嘅選票都係來自工聯會支持，而之前話自己不群不黨嘅梁美芬，亦推翻自己之前嘅說法，承認自己同中聯辦好熟[1]。
例如，喺2018年11月嘅九龍西立法會補選入面，建制派嘅代表陳凱欣聲稱自己「獨立身分參選」，佢亦堅稱無加入政黨[2]，但係之後媒體就揭發佢借用西九新動力嘅地方做競選活動，畀記者嘅新聞稿又印有西九新動力嘅字眼，電郵仲有民建聯縮寫嘅字眼[3]。
另外，喺第5屆香港區議會選舉前夕，被揭發無申報政黨聯繫嘅就包括陳偉強[4]、葉志偉、許德亮、黃建新、仇振輝、張永森、楊永杰同鄭利明等等（九社聯成員），被部分媒體形容佢哋係隱形建制派[5]。
虛報學歷爭議
[編輯]有部分親中陣營嘅成員，都涉及一啲學歷爭議，例如係葛珮帆、鄭琴淵同柯創盛，被外間（尤其係泛民主派）批評。
以流料攻擊泛民主派
[編輯]有個別親中陣營人士，會用一啲謠言攻擊泛民主派，或者質疑泛民主派嘅政治主張。其中比較有名嘅，有第3屆香港立法會香港島地方選區補選期間以十成按揭謠言攻擊陳四萬，親中陣營立法會議員梁美芬借用公民黨支持外傭居港權謠言攻擊泛民主派[6][7]，以及一啲激進建制派散播英國阻礙香港民主自治制度謠言。
錯誤評論外國選舉制度
[編輯]有啲親中陣營會發表對外國選舉制度嘅評論，但呢啲評論都唔係基於事實或者以偏概全嘅比較：
- 2016年11月，屈穎妍曾經喺親中派堅料網發表《大哥蒙難了》一文，當中指喺美國276張選舉人票就做總統，比起689票（梁振英喺2012年香港特首選舉得票）少，但佢就並無提及當時香港選委會入面，唔計35名立法會直選議員同5名區議會（第二）功能組別議員，其他選委會成員都係喺只得幾十萬人有份嘅小圈子入面產生，但美國選舉人係由全國人民選出，而且只能按照所屬州份嘅普選結果投票[8]。
- 2022年8月，葉劉淑儀曾經公開指控英國議會制度封閉，每區得7－8萬選民，比起香港立法會選區少，幾萬票就贏，以票數計算民意授權，英國國會議員比所有香港立法會議員低。不過香港嘅特首選舉或立法會功能組別選舉，不論係喺北京未經諮詢或香港人同意強行修改之前或之後，都有人只得幾百票，甚至冇競爭對手下當選，但葉劉淑儀就未有提及，言論被一啲泛民主派人士批評[9][10]。
香港親中陣營同香港政府遭受報應嘅觀點
[編輯]由2014年雨遮革命開始，香港社會兩極化，當有一啲親中陣營（建制派）同香港政府公務員（特別係香港警察）面對一啲不幸新聞嘅時候，有一啲非建制派聲音就會認為佢哋遭受報應，歡迎事件嘅發生。
暴力行徑爭議
[編輯]親中派支持者，特別係嚟自激進派系嘅，都有暴力襲擊持唔同政見人士，甚至係記者嘅歷史。英屬香港時期，工聯會就曾經發動六七暴動嘗試奪權，而主權移交後，有啲親中派支持者會喺示威活動期間民主派支持者，甚至係襲擊記者（特別係一啲立場同佢哋相左嘅）。呢啲行為引起社會上一啲批評，但有時呢啲人就被指得到香港警察嘅保護，亦因為咁警察備受一啲批評。
相對
[編輯]參考
[編輯]- ↑ 〈梁美芬承認與中聯辦稔熟 批田北辰盲目相信知名度〉。《明報》。2008-09-25。
{{cite news}}: CS1 maint: url-status (link) - ↑ 〈眾新聞 | 陳凱欣稱「獨立身分參選」：傳媒沒空間搭建平台宣揚港獨〉。《眾新聞》 (中文)。原著喺2021-06-24歸檔。喺2021-06-18搵到。
- ↑ 李奕鳴 (2018-10-27)。〈【九西補選】新聞稿印西九新動力 陳凱欣：借用部分會址作競選辦〉。《香港01》 (香港中文)。喺2021-06-18搵到。
- ↑ 〈【地區政治系列】公民黨余德寶：對抗蛇齋餅糭外，還有法團...... | 獨媒報導〉。《獨立媒體》。2015-01-29。喺2021-06-17搵到。
- ↑ 〈【區選隱形建制派】李偲嫣戰友、拆佔旺路障政協紛出戰 九龍西最少26「獨立」建制參選人 | 立場報道 | 立場新聞〉。《立場新聞 Stand News》。原著喺2021-06-24歸檔。喺2021-06-18搵到。
- ↑ 〈梁美芬发声明 驳汇报遭抹黑_大公资讯_大公网〉。web.archive.org。2015-06-14。歸檔時間2015-06-14。喺2021-06-20搵到。
{{cite web}}: CS1 maint: bot: original URL status unknown (link) - ↑ 〈我們對於梁美芬、謝偉俊為個人政治利益誤導公眾感到憤怒！〉。www.facebook.com (英文)。喺2021-06-20搵到。
- ↑ 〈大哥蒙難了 - Kinliu〉。web.archive.org。2016-11-20。歸檔時間2016-11-20。喺2022-08-07搵到。
{{cite web}}: CS1 maint: bot: original URL status unknown (link) - ↑ 〈【議會制度封閉】另外，英方再放寬BNO簽證申請予97後出生港人，曾擔任入境處處長的葉劉淑儀，批評英國違反承諾，又指雖然有人才選擇離開香港，但相信只要本港逐步通關就能吸引人才〉。www.facebook.com (英文)。喺2022-08-07搵到。
{{cite web}}: CS1 maint: url-status (link) - ↑ 〈葉劉淑儀指中方反制美方措施不影響香港 另批英再放寬BNO簽證違中英聯合聲明〉。《有線寬頻 i-CABLE》 (香港中文)。2022-08-07。喺2022-08-07搵到。
