學者

一六四一年一幅油畫，描繪畫師想像中嘅學者形象。

學者hok6 ze2，參見英文：scholar，係一類人士，會響大學或者第啲高等學府入便從事學術研究、教學。每位學者通常會專注於某一個或者幾個學科領域。佢哋可以喺大學、研究所、智庫、圖書館、博物館等機構工作，主要任務係生產新知識、撰寫學術論文、參與學術會議，或者教書。學者往往會攞博士學位，因而擁有博士嘅頭銜。

傳統上，學者畀人感覺係嚴肅、深居簡出，但喺現代社會，越嚟越多學者亦會參與面向公眾嘅知識傳播，透過社交媒體、科普或者演講嚟向大眾解釋學術知識。

概念定義

睇埋：知識同知識分子

雖然學者呢個稱號未有一套嚴格定義，但普遍都包含住追求真理、持續學習、批判思考等嘅價值觀。

喺工作上，學者通常會長期從事學術研究、教育同埋知識傳播等嘅工作，屬於專業一種。學者嘅主要工作內容視乎佢所屬嘅學科同機構而異，但一般都會包括以下幾方面：

• 研究：進行學術研究，提出研究問題並且用數據解答之、撰寫學術文，喺期刊等嘅地方發表成果；
• 教書：喺大學等嘅地方教授課程，培養學生嘅學術能力，指導學士、碩士、博士研究；
• 學術交流：參加研討會、撰寫報告、評論同書評等，推動學科發展；
• 學術服務：譬如係擔任期刊嘅編輯；

等等。

領域區別

睇埋：硬同軟科學同科學領域

唔同領域嘅學者，由於研究對象同方法唔一樣，喺思考方式上都有明顯差異。

• 科學領域嘅學者，例如物理學家、生物學家，通常強調經驗主義同實證：佢哋會透過實驗、觀察、數據分析去驗證假說，講求研究結果要可否證同埋再現得到。佢哋思考時多數用歸納法，由具體數據推導出普遍定律。
• 人文學科嘅學者，例如哲學家、歷史學家，則時常會較強調詮釋。佢哋關心嘅好多時係文化同人類嘅體驗，思考方式較傾向依賴定性研究同埋批判理論等。例如歷史學家分析史料嗰時，要考慮埋當時社會嘅背景、作者立場及語境，而唔淨只係數據上嘅因果關係。

批評聲音

内文：象牙塔同球狀乳牛

學者雖然喺知識嘅生產同教育方面有重要作用，但社會上都有唔少人批評佢哋，話佢哋生活喺象牙塔入便，意思係話學者群體過份專注理論研究、學術討論，而同現實社會脫節。

亦有人製作咗後現代主義生成器呢個自然語言生成程式，用嚟批評某啲學者撰寫論文嗰陣言之無物，淨係喺度用術語扮高深。

技能

• 學術研究
• 學術寫作
• 方法學

睇埋

• 公眾科學
• 自閉學者