學術研討會

一位研究者（企喺度嗰個人）喺研討會上向其他研究者講解自己做緊嘅研究。

學術研討會（參見英文：conference），又叫學術會議，係一種學術性質嘅聚會，俾相同領域嘅學者同研究者聚埋一齊討論佢哋做緊嘅研究。搞研究會目標係要分享最新研究成果、討論學術問題，並促進學術交流。呢類會議可以涵蓋各種學科，例如人文、社會科學、自然科學、工程學等都可以有研討會搞，為學術界提供一個交流知識、建立合作關係嘅平台。

學術研討會一般會包括論文發表、專題討論、工作坊，以及主題演講等嘅環節，由著名嘅學者分享行內最前沿嘅研究。參加者可以透過發表自己嘅研究論文、由同行學新知識，亦可以獲得對自己研究方向嘅反饋，甚至尋找合作夥伴。

學術研討會可以分為國際會議同本地（或區域性）嘅會議。

做法

睇埋：學術研究

做法通常係噉：

• 喺學術界，每個研究者都一定會對某幾個課題特別有興趣，而一場研討會會有個主題，目的係想將研究相關課題嘅研究者聚埋一齊，大家分享自己做緊嘅研究同諗緊嘅新諗法；
• 舉辦研討會嘅單位通常都係對嗰個課題好有研究經驗嘅研究者，佢哋會喺某啲地方公佈「要搞研討會」，想參加研討會嘅研究者就可以去佢哋個網頁度或者用電郵方式，提交自己研究嘅摘要；
• 主辦方會睇晒啲提交嘅摘要，然後決定邊啲研究值得喺研討會上面討論，最後就會訂定個時間表，列明「研討會當日邊幾份研究會做發表同埋每份發表嘅時間」呢啲資料。

普遍認為，研討會係做學術研究嘅人交流諗法嘅其中一個重要途徑。

騙局

内文：掠奪型研討會

騙局研討會，歐美又有稱之為「掠奪型」研討會，係指一啲以學術交流為名，實際上冇咩學術價值嘅假研討會。

呢啲研討會通常會大量群發電郵請人投稿，甚至無需審查就接受論文，學者同學生諗住佢哋係正規嘅研討會，而且可以輕易出到文，於是就投稿。一去到研討會參加者就會發現研討會質素低，報告內容隨便，甚至研討會地點臨時更改。由於研討會投稿通常會收錢，搞騙局研討會嘅人就可以靠呢種手段嚟呃人錢。

環節

• 匯報
• 海報環節
• 研究海報

睇埋

• 學術寫作

連結

• （香港繁體） 學術會議及研討會，香港中文大學