理性主義

十七世紀法國哲學家笛卡兒嘅油畫像

理性主義（粵拼：lei5 sing3 zyu2 ji6，參見英文：rationalism ）係知識論講到嘅一種哲學立場。最基本上，根據理性主義嘅睇法，知識主要係由理性、演繹推理或者先天知識而嚟嘅。呢種思想嘅代表人物有笛卡兒呀噉。

基本概念

睇埋：知識論

笛卡兒："Cogito ergo sum."
呢句說話係拉丁文，係我思故我在嘅意思。

喺十七世紀英倫哲學家洛克嘅經驗主義知識論入面，人嘅觀念可以嚟自兩大來源：

1. 外在：感官，即係包括視覺、聽覺、味覺、嗅覺同埋觸覺嘅感覺，畀人能夠感受周圍嘅世界；
2. 內在：心靈內部嘅思緒等；

知識論上有兩種重要嘅觀點：經驗主義提倡，知識主要，甚至完全，係嚟自經驗嘅；而呢種觀點成日都會攞嚟同理性主義對比，理性主義個基本諗頭係主張，理性、演繹推理或者先天知識等可以係知識嘅重要來源，而有啲知識甚至唔洗依賴感官經驗都可以得到。

科學應用

睇埋：形式科學同數學證明

有關理性主義嘅其中一個重要體現，可以睇睇數學同邏輯等嘅形式科學，點樣純靠理性思考嚟求知。

數學中嘅證明做法就係噉。舉例說明，依家要思考以下嘅命題：

任何一個雙數加咗 2，結果都仍然係雙數。

呢句命題唔洗逐個雙數去檢查，都可以靠定義同推理證明。按照雙數嘅定義，如果 n 係雙數，噉就有某個整數 k，使得：

$n=2k$

如果將 n 加 2，噉就會得到：

$n+2=2k+2=2(k+1)$

由於 k 係整數，k+1 都實係整數。所以 2(k+1) 會係 2 嘅倍數，定義上就係雙數。由此可見，是但一個雙數加咗 2，結果仲係雙數。喺呢個例子中，研究者唔需要將 2 4 6 8 10 ... 逐個數試晒。噉係因為雙數有無限咁多個，逐個逐個檢查，永遠都唔會 check 得晒；但只要掌握咗雙數嘅定義，再用埋演繹推理，就可以證明呢個命題對所有雙數都成立。呢個例子顯示，對於涉及無限咁多個個案嘅數學命題，齋靠逐個例子觀察通常唔足以構成證明；要喺呢種情況下得到嚴謹結論，要靠演繹推理先得。

好似數學證明噉嘅過程，原則上可以完全淨係靠個腦嘅理性同思考嚟做。相對嚟講，研究者亦可以唔用噉樣嘅證明方法，而係將啲數遂個遂個攞嚟睇，睇吓有冇可能出現有個雙數加咗 2 係出到單數嘅，但數有無限個咁多，無論佢攞幾多個數嚟做呢樣嘢，佢都「證明」唔到啲乜。由此可見喺好多情況下，都要用理性主義嘅方法，靠演繹推理，先可以有效噉得到知識。

批評聲音

對理性主義最主要嘅批評，可以歸納成三點：

• 知識唔可以脫離經驗。
• 理性並非絕對可靠，容易受到 錯誤前題 同 認知偏誤 影響。
• 人類理解世界需要理性、經驗、情感、社會、文化幾多方面因素共同作用，而唔係單靠理性。

睇埋

• 經驗主義：廣泛視為理性主義嘅相對。
• 先天知識
• Tabula rasa
• 思想實驗

拎

• （英文）理性主義 vs. 經驗主義，史丹福哲學百科全書