分析-綜合區別

出自維基百科,自由嘅百科全書
18 世紀德國哲學家康德嘅畫像;佢提出咗分析-綜合區別嘅概念。

分析-綜合區別fan1 sik1-zung3 hap6 keoi1 bit6英文Analytic-synthetic distinction)係哲學上有陣時會攞嚟將啲命題分類嘅做法,最先由著名 18 世紀德國哲學家康德提出嘅[1]

概論[編輯]

睇埋:知識論同埋定義

根據呢套分類法,命題可以分做兩大類[2]

  • 分析:指句嘢係真定假取決於句嘢本身嘅意思-有啲陳述望落只要人理解咗佢哋嘅語義就唔需要任何證實;同埋
  • 綜合:指句嘢係真定假取決於句嘢同世界嘅關係;

舉例說明:

  • 三角形冚唪唥都係有三條邊嘅。」呢句嘢屬於分析,因為三角形嚴格嚟講唔係一嚿現實存在嘅物體,而係一個概念-三角形定義上已經包含咗有三條邊
  • 「我阿爸嘅細佬係我阿叔。」呢句嘢阿叔(謂語)嘅概念已經包含咗「我阿爸嘅細佬」(主語)嗰度。
  • 「所有嘅單身漢都係未婚嘅。」呢句嘢屬於分析,因為單身漢定義上就係指未結婚嘅成年男人。
  • 「有心臟生物冚唪唥都有腎臟。」呢句嘢屬於綜合,有心臟嘅生物定義上係有心臟同埋有生命(生物 = 有生命嘅嘢)嘅,但個定義唔肯定包含有腎臟
  • 「我阿爸嘅細佬超重。」呢句嘢屬於綜合,因為阿爸嘅細佬定義上唔包含超重

不過康德呢種分法唔係個個哲學家都贊同:因為自然語言成日有含糊嘅情況,所以亦都有學者否認語義分析命題與綜合命題之間有得明確噉劃分,或者直程否認分析-綜合區別。另外,亦有學者認為應該以連續嘅命題序列代替傳統對分析與綜合嘅截然兩分[未記出處或冇根據]

對比先驗後驗[編輯]

睇埋:先驗同後驗

康德喺佢本名著《純粹理性批判》(德文:Kritik der reinen Vernunft;英文譯名:Critique of Pure Reason)度有講到分析-綜合區別同先驗後驗區別之間嘅關係。如果結合兩套分類法,求知者喺求知過程當中會撞到嘅命題,可以分做四大類[2]

  1. 分析 a priori
  2. 綜合 a priori
  3. 分析 a posteriori
  4. 綜合 a posteriori

一般認為,分析 a posteriori自相矛盾嘅,所以分析命題全部都屬 a priori,不過綜合命題就可以分兩種[2]

  • 綜合 a priori:一個成日畀人引用嘅例子係「兩之間最短嘅距離直線[註 1],好似呢句命題噉嘅好多數學知識,都涉及「由現有概念度推理出新知識」嘅過程[註 2],所以唔係齋係講個概念定義上有嘅特徵-即係話呢啲命題屬於綜合;但同時呢啲命題又往往唔使對現實做觀察就可以得知。
  • 綜合 a posteriori:「佐治五世由 1910 年去到 1936 年在位。」(典型啲人講到「後驗命題」即刻會諗起嗰類命題)

概念史[編輯]

睇埋:純粹理性批判

休謨已意識到呢樣嘅分別,但呢種分別係康得清楚地提出嘅,後來由弗雷格(Frege)畀出咗更明確嘅形式。維特根斯坦喺佢嘅《邏輯哲學論》中指出分析式陳述冇表達任何觀點,都就係冇告訴人們新嘅東西。雖然佢哋唔需要證實,佢哋都唔具有知識性。

睇埋[編輯]

註釋[編輯]

  1. 詳情可以睇歐幾里得幾何
  2. 詳情可以睇數學證明

[編輯]

  1. Leonard Linsky (October 1970). "Analytical/Synthetic and Semantic Theory". Synthese. 21 (3/4): 439-448.
  2. 2.0 2.1 2.2 Kant, Immanuel. (1781/1998). The Critique of Pure Reason. Trans. by P. Guyer and A.W. Wood, Cambridge University Press.