概念

樹就樖樖都唔同樣，但佢哋有某啲共通點，呢啲共通點形成樹嘅概念。

概念（粵拼：koi3 nim6；參見英文：concept ）呢個詞，哲學同認知科學等嘅學科成日都會提及，大致係指緊人類對某一樣嘢具有抽象同普遍化嘅理解同諗法，屬於構成知識嘅重要元件。

基本定義

内文：廣義化同狹義化

睇埋：語義學

概念可以按照層次分級。上層嘅叫做上位概念（英文：superordinate ），下層嘅叫做下位概念（英文：subordinate ）。一般人日常將事物分類嘅時候，最容易用嘅係基本層次。舉個例，比如櫈就係一個基本層次概念，佢嘅上位概念係傢俬，下位概念就可以係木櫈。

概念可以係精確嘅，但都唔一定。例如人腦建立樹呢個概念嗰時做嘅嘢，可以想像成係根據多個例子，從中抽取共通特徵再做簡化，而簡化過程就有助人類進行更高層次嘅思考。某個概念代表嘅意思，係由佢實際或者可能對應嘅例子所「實現」，呢啲例子可以係現實世界入面嘅物件，亦可以係其他抽象概念。

亦可以睇睇語言學講到嘅上位詞同下位詞。

數學表述

睇埋：運算學習論

學習嘅過程，被指係可以想像成概念嘅形成過程。數學化噉講，可以用以下嘅思路嚟諗：

• 概念係指若干個個案嘅抽象化，例如人腦睇咗好多件相似嘅物件，嗰柞物件件件都唔同樣，不過佢發覺嗰啲物件冚唪唥都有葉同樹幹等嘅特徵，於是佢個腦就產生咗樹嘅概念；
• 家陣想像 $X\ni (x_{1},x_{2},x_{3}...x_{n})$ 呢個集包含咗 n 件需要將佢哋分類嘅物件（例：X 當中有啲係樹有啲唔係），個腦要將呢啲物件分辨邊啲係樹邊啲唔係－output 有 1（係）同 0（唔係）兩個可能值；
• 一個概念 C 係 X 嘅一個子集，分類後 C 會包含所有 output 值係 1 嘅 x_i（所有屬於樹嘅個案）而 X 當中唔屬 C 嘅 x_i 嘅 output 值冚唪唥都會係 0（所有唔屬於樹嘅個案）。

睇埋

• 認知科學
• 原型理論
• 概念混成
• 能指同所指

文獻

• Fodor, Jerry; Lepore, Ernest (1996). "The red herring and the pet fish: Why concepts still can't be prototypes". Cognition. 58 (2): 253-270.