植物智能

植物智能（英文：plant intelligence）係指植物展示嘅智能。

記憶

一樖捕蠅草嘅葉

植物有一定嘅記憶能力。已知嘅植物冚唪唥都缺乏專門處理記憶嘅器官（指腦或者某啲形式嘅神經系統），所以古典嘅科研一般都認為植物係冇記憶能力嘅，但廿一世紀初嘅研究開始挑戰呢種諗法。研究發現，植物有神經傳遞素，而且動作電位（action potential；簡單講就係神經細胞傳嘅一種訊號）會對植物嘅反應同光合作用有影響。而且植物仲至少曉喺短時間之內儲住啲資訊－即係話某程度上具有短期記憶能力。

喺植物記憶嘅研究上，捕蠅草（Venus flytrap）係一個常見嘅研究對象。捕蠅草源於美國東部嘅亞熱帶濕地嗰度，佢哋所住嘅地方嘅泥土一般都係冇乜養份嘅，但係就進化出捉動物嚟食嘅能力，主要食昆蟲。捕蠅草嘅葉正常情況下係打開嘅，而當塊葉上面嘅毛（每邊三條）感覺到昆蟲踩喺上面嗰陣，會一嘢合埋挾住隻蟲，等佢走唔甩，跟手塊葉就會分泌啲消化液出嚟監生消化咗隻蟲佢。喺呢個過程當中，捕蠅草用咗一種特殊嘅機制：佢唔可以吓吓一感覺到啲毛受刺激就合埋同開始消化，因為噉會搞到佢塊葉會喺受啲唔係昆蟲嘅嘢（例如係跌落嚟嘅樹葉）刺激到嗰陣合埋，嘥嗮啲時間同消化液；所以捕蠅草嘅毛有種特殊機制，要有兩條毛喺 30 秒之內都受到刺激（即係有啲嘢喺塊葉上面郁）嗰陣，塊葉先會合埋，呢個機制表示樖捕蠅草起碼要喺第二條毛受刺激嗰一刻以某啲型式記得第一條毛喺少過 30 秒之前受過刺激－算係一種原始嘅記憶能力。