特徵整合論

出自維基百科,自由嘅百科全書
Jump to navigation Jump to search

特徵整合論粵拼dak6 zing1 zing2 hap6 leon6英文feature integration theory)係有關注意力認知心理學理論,描述人嘅心靈感知一個外界刺激嗰陣,點樣將一件物件視為同第啲物件分離嘅個體物件。根據呢個理論,一個人察覺到一件物件嘅過程可以分做兩大階段[1]

  • 注意前階段(preattentive stage):喺呢個階段,人腦會自動噉搜集視野入面嘅各種基本特徵(色水同形狀等),仲未將視野入面嘅嘢分做物件,而且呢個階段嘅認知過程係完全無意識嘅,例:一本紅色封面嘅書由上睇,會俾個腦睇做「一個四方形嘅空間,空間每點都係唔同程度同光暗嘅紅色」[2]
  • 集中注意階段(focused attention stage):喺呢個階段,個腦會將啲特徵分組,每組當做一件物件,例如將「一個白色嘅梯形空間」同「四條打直嘅白色線」睇做「一張由側面望嘅枱」;事實係有研究指,個腦嘅頂葉某啲部份受損會搞到個人唔能夠分誀辨視野入面邊忽屬同一件物件,表示咗人腦的確有功能做「將視野入面嘅物件分組」[1]
特徵整合論嘅流程圖解

實驗[編輯]

有關特徵整合論,有心理學家做過以下嘅實驗,顯示人嘅心靈喺感知到一件物件之前的確會分離噉處理唔同嘅特徵:研究者搵咗班受試者返嚟,再準備咗啲有物件喺上面嘅畫面;佢哋叫受試者睇住個熒幕,將個畫面喺個熒幕上面閃 0.2 秒嘅超短時間,跟住再俾受試者望吓一個空白畫面一陣,最後再問吓受試者個畫面有啲乜嘢物件;結果發現,喺 18% 嘅試驗當中,受試者會回答一啲所謂嘅「混合特徵物件」-例如個畫面實際上有個紅色四方形同一個黃色圓形,受試者成日會話自己「見」到一個紅色圓形同一個黃色四方形;呢個實驗表示,人心靈喺將唔同特徵結合成物件之前,係會獨立分離噉處理唔同見到嘅特徵,撐咗特徵整合論作嘅假說[3]

睇埋[編輯]

[編輯]

  1. 1.0 1.1 Treisman, A. M., & Gelade, G. (1980). A feature-integration theory of attention. Cognitive psychology, 12(1), 97-136.
  2. J. M. Wolfe (1994). "Guided Search 2.0: A revised model of visual search." Psychonomic Bulletin & Review, Vol 1, pp. 202–238
  3. Treisman, A. Cognitive Psychology, 12, 97-136, (1980).