跳去內容

心理學

改拎
出自維基百科，自由嘅百科全書
  提示：呢篇文講嘅唔係心裏學。
1619 年嘅一幅畫；幅畫描述畫家想像中嘅認知模型。

心理學（粵拼：sam1 lei5 hok6；英文：psychology），廣東話日常會嗌 saai6 ko1，係一門主要用科學方法研究人類嘅心智、腦部同埋行為嘅領域。心理學涉及喺多種社會科學上面。雖然有關，但亦有啲唔同。同佢唔同嘅地方（例如經濟學，人類學同社會學）係心理學所針對嘅係個人嘅精神活動同埋行為，而其他所針對嘅就係呢啲活動同埋行為喺社會造成嘅影響、現象、意義…

心理學嘅英文 Psychology 源於希臘文 ψυχή psyche（「靈魂」，「心靈」）同埋 λόγος logos（「學問」），夾埋就係同心靈有關嘅學問。

研究方法

[編輯]

心理測量

[編輯]
内文：心理測量

心理測量（psychometrics）係指用統計學技術量度心理特性嘅一套方法，係心理學研究不可或缺嘅一部份。

心理實驗

[編輯]
内文：心理實驗

有心理學家試過評估心理學研究常用嘅行為量度法，指出行為量度法可以分做三大類[1]：

  1. 行為痕跡（behavioral traces），量度行為過後留低嘅痕跡－例如做智商測驗，睇吓一個人嘅答問題行為（呢種行為源於佢嘅智能）留低嘅答案（痕跡），用答案所出嘅分數做評估；
  2. 行為觀察（behavioral observations），直接目擊同觀察個行為，並且作出一啲量度－例如用攝影機影低啲受試者嘅行為，打後再人手數吓每個受試者做咗一個行為（假設研究者對個行為有明確嘅定義）幾多次；
  3. 行為選擇（behavioral choice），俾受試者作出選擇－例如要受試者玩一場博弈（睇埋博弈論），俾佢哋分錢，再睇吓受試者會唔會喺某啲情況下零舍傾向分多錢俾自己。

舉個例說明，自由回想（free recall）係記憶研究上常用嘅一種實驗方法：喺自由回想測試當中，個研究者會要求個受試者睇一柞字，跟住喺一段時間之後，再叫佢哋盡可能有咁多得咁多噉寫返嗮佢睇咗嗰柞字出嚟。一般嚟講，如果一個受試者對某個字嘅記憶愈強，佢應該愈有可能會記得寫返低嗰個字，而研究者可以做各種量度同操作，睇吓人嘅記憶力會受乜嘢因素影響[2]。用呢個方法做嘅研究發現咗廿世紀心理學上好出名嘅系列位置效應（serial-position effect）－喺回想一串資訊嗰陣，人零舍有可能會記得嗰串資訊最先出現嗰啲同最後出現嗰啲[3]。

心理測時法（mental chronometry）亦係認知心理學上常用嘅心理實驗研究方法。

課題

[編輯]
睇埋：認知同情感

感知

[編輯]
幅圖入面嗰個係後生女人定係阿婆呢？
内文：感知

一個資訊處理體要解難，就實要由外界嗰度吸收資訊，感知（perception）就係指透過感官獲取外界嘅資訊並且處理呢啲資訊嘅能力－視覺幫手接收外界嘅光，聽覺會接收外界嘅聲，嗅覺能夠幫手辨別周圍環境有乜嘢化學物質... 等等，而喺感知系統為個人提供咗「外界有啲乜嘢喺度」嘅資訊之後，腦仲會對呢啲資訊做進一步嘅處理。人最依賴嘅係視覺同聽覺，但第啲動物會同人類有啲唔同，例如狗同狼等嘅犬科動物就比人更加依賴嗅覺[4]。

感知可以由刺激本身嘅物理性質主導，但又可以受到個人嘅認知系統本身嘅特質左右：

  • 認知科學家會研究由下至上（bottom-up）嘅過程，觀察人由接收到光同聲等嘅刺激嗰陣，佢哋啲感官內部發生乜嘢事同埋資訊點樣傳上個腦嗰度；
  • 另一方面，佢哋又會研究由上至下（top-down）嘅過程，睇一個個體嘅神經系統本身嘅特質會點樣影響個體嘅感知；由上至下嘅例子有多種嘅曖昧圖像（ambiguous image），好似係幅附圖噉，幅圖可以睇成一個後生、頭髮黑嘅女人，又可以睇成一個頭髮白嗮嘅阿婆；想像有認知科學家搵班人返嚟做受試者，俾佢哋睇一啲曖昧圖像，要佢哋睇完一幅圖之後即刻答幅圖係乜嘢事物，並且對數據做吓統計分析，睇吓受試者嘅答案會受乜嘢因素影響；實驗顯示，（例如）某啲類型人零舍傾向將附圖睇成後生女，又或者係「如果個人臨睇幅圖之前睇過有老人家喺入面嘅相，會零舍容易將幅圖睇成阿婆」－噉即係表示受試者嘅感知並唔係純粹由收到嘅刺激嘅物理性質主宰嘅，展示咗由上至下嘅感知過程[4][5]。

注意力

[編輯]
内文：注意力

注意力（attention）係一系列嘅認知過程，涉及一隻動物由接收到嘅外界資訊當中篩選一部份出嚟集中處理，並且忽略嗰啲唔係集中處理緊嘅資訊：一隻動物（包括人類）嘅腦無時無刻都喺度接收緊極大量嘅資訊，多到冇可能一吓過處理得嗮；好多時，為咗要有效噉解決佢生存所需要解決嘅問題，隻動物要集中處理同佢生存最有啦掕嗰啲資訊，同時又焗住要忽略嗰啲同佢生存冇咁有啦掕嘅資訊[6][7]。喺對注意力嘅研究上，認知科學家一般都興將注意力想像成一種有限嘅資源，由個腦嘅某啲系統決定要點樣分配落去唔同嘅資訊源嗰度[8]，而個腦當中塊額葉同塊頂葉之間嘅網絡（fronto-parietal network；睇埋腦葉）同注意力零舍有關[9][10]。

根據廿一世紀初嘅研究，人腦嘅注意力系統大致上可以分做三大子系統，而呢三個系統之間嘅互動就控制住專注同持續注意力等嘅注意力相關功能[9]：

  1. 負責令個人意識到周圍資訊嘅警覺（alertness）系統；
  2. 負責將注意力資源由一樣嘢移去第樣嘢嗰度嘅導向（orientation）系統；
  3. 負責處理衝突（例如有兩個刺激同時要求注意力）嘅執行控制（executive control）系統。
一隻狼用眼𥄫實佢有興趣嘅物件；定義上，注意力集中點係個心靈資訊處理能力嘅集中之處，一隻動物用眼－收集資訊嘅器官－望實一件物件表示，佢將自己嘅注意力集中喺嗰件物件上。可以睇眼動追蹤。

記憶

[編輯]
内文：記憶

記憶（memory）係指個腦將啲資訊入碼、儲起、同埋喺有需要嗰陣提取（retrieve）出嚟用嘅能力：喺野外，一隻動物需要記住（例如）傾向有嘢食嘅地點、傾向有獵食者出現嘅地點、以及打前見過嘅同類當中「邊啲信得過邊啲出賣過自己」等等嘅資訊－記憶對於動物（包括人）嘅體驗嚟講至關重要，記憶功能令一隻動物曉由接收到嘅資訊當中揀一部份儲起，並且喺要用嗰陣將呢啲資訊提取返出嚟用[11][12]。喺人當中，記憶仲係人際關係、語言學習同埋人格同一性嘅根本[13]。

一個人類認知系統當中嘅記憶可以按「有冇得用口頭報告返出嚟」分做有意識（explicit）同冇意識（implicit）兩種，又有得按「會維持幾耐」分做短期記憶（short-term memory；頂櫳維持幾分鐘）同長期記憶（long-term memory；可以維持到成幾廿年）兩大種[14]：記憶嘅開端係感官，啲感官嘅神經細胞會以電流同化合物訊號等嘅型式將啲感官收到嘅資訊傳去個腦嗰度，而工作記憶（working memory）跟手會負責暫時儲住個腦用緊嘅資訊，呢啲資訊當中有一啲可能會俾個腦儲起做長期記憶，並且對隻動物嘅行為產生更加深遠嘅影響[14]；另一方面，工作記憶又會幫手提取一啲由打前儲起咗嘅長期記憶嗰度得到嘅資訊。長期記憶仲有可能會透過一啲冇意識嘅途徑產生[15]。

紀律組織

[編輯]

機構

[編輯]
睇埋：心理學組織一覽

1920年，愛德華·克拉帕雷德（Édouard Claparède）同皮埃爾·博韋（Pierre Bovet）成立咗一個新嘅應用心理學組織，叫做「國際心理技術應用於職業指導大會」，後嚟改名為「國際心理技術大會」，最後成為國際應用心理學會（International Association of Applied Psychology, IAAP）。 IAAP被視為最古老嘅國際心理學會。[16] 而家至少有65個國際組織係專門處理心理學嘅唔同範疇。[16] 喺應對男性主導嘅情況下，美國嘅女性心理學家喺1941年成立咗「全國女性心理學家委員會」，呢個組織喺二戰後改名做「國際女性心理學家委員會」，再喺1959年改為「國際心理學家委員會」。有啲協會，例如黑人心理學家協會（Association of Black Psychologists）同「亞裔美國心理學協會」，係為咗推動非歐裔種族喺呢個行業入面嘅參與。[16]

國際心理科學聯盟（International Union of Psychological Science, IUPsyS）係一個由各國心理學會組成嘅世界聯盟。IUPsyS喺1951年由聯合國教育、科學及文化組織（UNESCO）資助成立。[17] 之後，世界各地嘅心理學系係以歐美嘅模式為主，開始快速發展。[17] 自1966年以嚟，聯盟出版咗《國際心理學期刊》（International Journal of Psychology）。 IAAP同IUPsyS喺1976年達成協議，每四年舉辦一次大會，兩者輪流舉行。[16] IUPsyS認證咗66個國家心理學會，仲有至少15個其他類似組織存在。[16] 當中最古老同最大嘅係美國心理學會（American Psychological Association, APA），佢嘅會員數量由1945年嘅5,000人增長到而家嘅100,000人。[18] APA包括咗美國心理學會分部（54個分部），自1960年以嚟，呢啲分部逐漸增加，涵蓋咗更多嘅專業領域。有啲分部，例如社會問題心理學研究會（Society for the Psychological Study of Social Issues）同美國心理-法律學會（American Psychology–Law Society），最初係獨立組織。[16]

泛美心理學會（Interamerican Psychological Society）成立於1951年，目標係推廣心理學喺西半球嘅發展。佢舉辦咗泛美心理學大會，喺2000年嘅時候有1,000名會員。歐洲專業心理學協會聯合會（European Federation of Professional Psychology Associations）成立於1981年，代表30個國家嘅心理學會，共有100,000名會員。另外仲有至少30個國際組織，代表唔同地區嘅心理學家。[16]

有啲地方嘅政府會法律規定邊啲人可以提供心理學服務，或者自稱為「心理學家」。[19] 美國心理學會定義，心理學家係指擁有心理學博士學位嘅人。[20]

界限

[編輯]

早期實驗心理學家將自己同超心理學區分開嚟，後者喺19世紀末期好受歡迎（包括威廉·詹姆斯等學者嘅興趣）。有啲人認為超心理學係「心理學」嘅一部分。超心理學、催眠術同通靈係早期國際大會嘅主要議題。但呢啲領域嘅研究者最終喺1900–1905年嘅時候被排斥，差唔多完全畀大會排除咗。 超心理學喺日本帝國大學曾經持續咗一段時間，出版物包括福來友吉嘅《透視同念寫》，但喺1913年後基本上都被忽視咗。

作為一個學科，心理學一直以嚟都努力避免畀人指控係軟科學。科學哲學家湯馬士·庫恩喺1962年嘅批評指出，心理學整體處於一個未有明確典範嘅狀態，缺乏類似成熟硬科學（例如化學同物理學）中嘅整體理論框架。[21] 因為有啲心理學領域係依賴調查同問卷中嘅自我報告研究方法，批評者認為心理學唔係一個客觀嘅科學。懷疑者指出，個性、思維同情感唔能夠直接測量，往往係根據主觀自我報告推斷出嚟，呢個可能會有問題。實驗心理學家已經設計咗多種方法，間接測量呢啲難以捉摸嘅現象學實體。[22][23][24]

學界內部仍然存在分歧，有啲心理學家較偏向研究個體獨特嘅經歷，而呢啲經歷唔能夠單憑作為大規模人口統計數據點嚟理解。內外界嘅批評者指出，主流心理學越嚟越受「經驗主義崇拜」主導，研究人員限制自己使用源自物理科學嘅方法，從而縮窄咗研究嘅範圍。女權主義嘅批評認為，科學嘅客觀性聲稱掩蓋咗（歷史上）主要由男性研究者所推動嘅價值同議程。珍·格林肖（Jean Grimshaw）例如指出，主流心理學研究透過控制行為，實際上推動咗一個父權制嘅議程。

相關領域

[編輯]

商學應用

[編輯]

睇埋

[編輯]

參考資料

[編輯]
  1. ↑ Lewandowski, Gary; Strohmetz, David (2009). "Actions can speak as loud as words: Measuring behavior in psychological science". Social and Personality Psychology Compass. 3 (6): 992–1002.
  2. ↑ "Recall (memory)". Encyclopædia Britannica.
  3. ↑ Baddeley, Alan D., "The Psychology of Memory", pp. 131–132, Basic Books, Inc., Publishers, New York, (1976).
  4. ↑ 4.0 4.1 Mechelli, A., Price, C. J., Friston, K. J., & Ishai, A. (2004). Where bottom-up meets top-down: neuronal interactions during perception and imagery. Cerebral cortex, 14(11), 1256-1265.
  5. ↑ Parkkonen, L.; Andersson, J.; Hämäläinen, M.; Hari, R. (2008). "Early visual brain areas reflect the percept of an ambiguous scene". Proceedings of the National Academy of Sciences of the United States of America. 105 (51): 20500–20504.
  6. ↑ How Psychologists Define Attention. Verywell Mind.
  7. ↑ Chavajay, P.; Rogoff, B. (1999). "Cultural Variation in Management of Attention by Children and Their Caregivers". Developmental Psychology. 35 (4): 1079–90.
  8. ↑ Anderson, John R. (2004). Cognitive Psychology and Its Implications (6th ed.). Worth Publishers. p. 519.
  9. ↑ 9.0 9.1 Posner, M. I.; Petersen, S. E. (1990). "The attention system of the human brain". Annual Review of Neuroscience. 13(1): 25–42.
  10. ↑ Corbetta, M. (1998). Frontoparietal cortical networks for directing attention and the eye to visual locations: Identical, independent, or overlapping neural systems?. Proceedings of the National Academy of Sciences, 95(3), 831-838.
  11. ↑ Lauralee Sherwood (1 January 2015). Human Physiology: From Cells to Systems. Cengage Learning. pp. 157–162.
  12. ↑ Schwarzel. M. & Mulluer. U., "Dynamic Memory Networks", Cellular and Molecular Life Science, 2006.
  13. ↑ Eysenck, M.W. (2012). Fundamentals of cognition. New York: Psychology Press.
  14. ↑ 14.0 14.1 Thompson, R. F., & Kim, J. J. (1996). Memory systems in the brain and localization of a memory. Proceedings of the national academy of sciences, 93(24), 13438-13444.
  15. ↑ Chun, M. M., & Jiang, Y. (2003). Implicit, long-term spatial contextual memory. Journal of Experimental Psychology: Learning, Memory, and Cognition, 29(2), 224.
  16. ↑ 16.0 16.1 16.2 16.3 16.4 16.5 16.6 Wade Pickren & Raymond D. Fowler, "Professional Organizations", in Weiner (ed.), Handbook of Psychology (2003), Volume 1: History of Psychology.
  17. ↑ 17.0 17.1 Irmingard Staeuble, "Psychology in the Eurocentric Order of the Social Sciences: Colonial Constitution, Cultural Imperialist Expansion, Postcolonial Critique" in Brock (ed.), Internationalizing the History of Psychology (2006).
  18. ↑ C. James Goodwin, "United States", in Baker (ed.), Oxford Handbook of the History of Psychology (2012).
  19. ↑ 例如，請參閱2013年奧勒岡州法律675章 喺有關心理學實踐嘅法規 Portuguese Web Archive嘅歸檔，歸檔日期21 May 2016。
  20. ↑ Judy E. Hall and George Hurley, "North American Perspectives on Education, Training, Licensing, and Credentialing", in Weiner (ed.), Handbook of Psychology (2003), Volume 8: Clinical Psychology.
  21. ↑ T.S. Kuhn, The Structure of Scientific Revolutions, 1st. ed., Chicago: Univ. of Chicago Pr., 1962.
  22. ↑ Beveridge, Allan (2002). "Time to abandon the subjective–objective divide?". Psychiatric Bulletin. 26 (3): 101–103. doi:10.1192/pb.26.3.101.
  23. ↑ Peterson, C. (23 May 2009). "Subjective and objective research in positive psychology: A biological characteristic is linked to well-being" 互聯網檔案館嘅歸檔，歸檔日期30 July 2022.. Psychology Today. Retrieved 20 April 2010.
  24. ↑ 賈克·潘克塞普（Jaak Pankse pp），1998年，Affective neuroscience: The foundations of human and animal emotions 〈存档副本〉。歸檔時間2015年9月18號。喺2024年10月21號搵到。{{cite web}}: CS1 maint: bot: original URL status unknown (link)，紐約：牛津大學出版社，第9頁。

拎

[編輯]
由「https://zh-yue.wikipedia.org/w/index.php?title=心理學&oldid=2213639」收