跳去內容

神經心理學

出自維基百科，自由嘅百科全書
相中人係瑞士嘅神經內科專家米高法拉利，佢手上揸住人腦兩個半球嘅模型。

神經心理學（參照英文：Neuropsychology）係心理學下嘅學科，關注腦同神經系統其餘部份點樣影響人嘅認知同行為，當中認知包括咗記憶、注意力同埋言語等嘅功能。依個學科嘅研究，會使用腦電圖同功能磁振造影等嘅方法量度腦活動，再對啲數據做統計分析，睇吓邊啲腦活動同心理功能特別有關[1]。

基本上，神經心理學可以分兩大範疇：

喺實踐上，好似大學或研究機構等機構嘅學術研究、醫院等嘅臨床環境、以至法醫環境等等，都有機會用到神經心理學知識。而且針對自閉症譜系同過度活躍症等障礙[註 1]嘅研究，都會用到神經心理學。

學科定位

[編輯]
内文：心理學同神經科學

神經心理學屬於科學，會跟科學方法做事。可以視為心理學下嘅子領域，但係又同神經科學有相當嘅重疊位。

同一般嘅心理學研究相比，神經心理學更強調行為或心智現象背後有乜嘢神經基礎：

比較緊乜 一般心理學 神經心理學
研究範圍 認知、情緒、人格等嘅心理功能 集中睇腦同各心理功能之間有咩關係。
研究方法 問卷、心理實驗、面試研究 以上方法，加埋 fMRI 同 EEG 等嘅神經造影方法。
臨床做法 心理治療同心理輔導為主 對腦損傷同神經系統疾病個案嘅評估、診斷同復康

不過，呢啲界線都唔係絕對嘅，兩者喺研究設計同臨床服務上不時會互補。

神經科學依個學科，廣泛噉由唔同面向研究腦同神經系統，包括晒由分子、生物同運算等咁多唔同層次做嘅研究，即係研究神經元之間嘅互動，涉及生物化學[註 2]，又或者研究神經網絡層面嘅現象，都屬於神經科學。神經科學研究有機會用到神經心理學，但係唔一定[3]，即係話神經心理學可以視為神經科學嘅子領域。

心理學、神經心理學、神經科學之間嘅分界，可以噉樣想像：

  • 假設有一份研究，純粹由心理學角度出發，探討記憶嘅形成同提取：研究者好可能會做實驗，要求參加者記住一系列詞語、圖像或者語句，然後喺唔同時間點，測試佢哋記憶嘅準確度或者反應時間，從而推論短期記憶、長期記憶或者工作記憶之間嘅差異[4]。呢啲研究主要依靠實驗方法，分析人處理緊啲咩資訊，包括係資訊點樣編碼、儲存、提取，但唔會直接探討背後嘅神經機制。
  • 假如研究者要由神經心理學角度做，就需要引入同腦活動有關嘅變量：例如比較海馬體呢個腦區出現病變嘅患者，對比健康嘅人，睇兩者喺記憶功能上有乜嘢差異，從而推斷呢個腦區對記憶形成或者記憶提取係咪重要；又或者例如用功能磁振造影，觀察參加者學習新詞語嗰陣邊啲腦區會有最強嘅活化。呢類研究既 kip1 住咗心理層面對認知嘅觀察，同時又留意腦部嘅功能，屬於典型嘅腦與行為研究路線[5]。
  • 至於神經科學層面，就會進一步聚焦於神經系統嘅內部運作：呢啲研究好可能會講到細胞同生物化學層面嘅嘢；神經科學家可能會使用紀錄個別神經元活動嘅技術，觀察海馬體之中個別細胞或者細胞組嘅活動，又或者係用光遺傳學嚟操控特定嘅神經元群組，睇吓改變咗呢啲細胞嘅活動模式會唔會影響記憶。呢種研究唔再以行為表現做主要指標，而係直接分析神經元層面嘅生理變化，完全脫離咗心理學。[6][7]

有關層面呢個概念，可以睇睇分析層次同埋創發等概念嘅相關討論。

神經分析

[編輯]
内文：神經造影同神經解剖學

定義上，神經心理學成個學科嘅目標就係想探究心理特性同腦之間有咩啦掕。研究實會用到反映腦特性嘅變量。

神經造影係一大類嘅技術，特徵係可以用嚟觀察人類腦部喺結構或功能上嘅活動狀況。神經心理學成日會用到腦電圖（EEG）同功能磁振造影（fMRI）等嘅技術：腦電圖會透過頭皮嘅電極，即時記錄神經元群體嘅電活動，尤其是用嚟觀察腦活動嘅時間歷程，比如係唔同事件會觸發咩腦電變化呀噉[8]；功能磁振造影就係透過測量唔同腦區嘅血嘅氧濃度變化，間接推斷邊啲區嘅神經活動強啲，例如要研究語言理解嗰時，研究者可以一路叫受試者做聆聽理解，一路用功能磁振造影監住佢個腦，假如某啲腦區做聆聽理解嗰時會零舍活躍，就好可能表示呢啲腦區同語言理解嘅功能有關[9]。


呢幅相入便嗰個受試者（瞓喺度嗰個），喺度準備俾研究者用功能磁振造影掃佢個腦。


神經心理研究有陣時亦會用到病變研究[10]：研究者可以搵一啲某啲腦區有病變嘅病人返嚟，然後又搵一班健康嘅人返嚟做對照組，比較兩者喺心理特性上有咩差異，技術化啲講即係自變數為有冇病變而應變數就係研究緊嘅心理特性；舉個例，假如研究者想知道海馬體喺記憶中扮演咩角色，佢哋可以搵一組海馬體受損嘅病人，又搵一組健康嘅人做對照[註 3]；若果發現海馬體受損者喺記憶儲存階段出現明顯困難，但對照組就冇任何呢方面嘅困難，就可以推斷，海馬體與記憶儲存有關。

心理測試

[編輯]
内文：神經心理測試
睇埋：心理測量

神經心理學志在剖析腦活動同心理特性之間嘅關係。噉就表示佢哋有必要量度心理特性。喺神經心理學上，常用嘅工具包括咗各種嘅神經心理測試，好似係智商測試噉，就可以量度人普遍嘅認知同解難能力[11]。

舉例說明，威斯康辛咭片分類測驗（WCST）係臨床上常見嘅一種測試。喺呢個測試之中，受試者要面對一系列咭片，試圖將佢哋分類。不過分類嘅規則唔會事先講明—參加者要根據系統提供嘅回饋（即係電腦顯示正確或錯誤）慢慢推敲出目前嘅分類原則為何。呢項測試主要評估人嘅「心靈彈性」或者「規則轉換」能力，尤其係執行功能方面嘅能力：一開始，受試者會習慣咗用某一種準則去分類，例如按顏色、形狀或者數字分；佢哋連續答啱咗若干次之後，測試就會突然暗中改變規則，於是佢哋就焗住要重新調整策略。受試者要出幾多次錯誤先察覺變化同成功轉換，一般認為係反映緊佢哋對規則變化嘅適應程度同認知上有幾靈活。[12]

範例：電腦化嘅 WCST
手上嗰張咭（右下角）有兩個紅色十字，佢同 1（一個紅色圓形）喺顏色上吻合，同 2（兩個綠色星形）喺數字上吻合，同 4（四個黃色十字）喺形狀上吻合。想像喺測試頭嗰十題，受試者要揀同手上張咭同一樣色嘅咭，而第十一題就出現規則改變，改為要揀同手上張咭同一樣形狀嘅咭。
手上嗰張咭（右下角）有兩個紅色十字，佢同 1（一個紅色圓形）喺顏色上吻合，同 2（兩個綠色星形）喺數字上吻合，同 4（四個黃色十字）喺形狀上吻合。想像喺測試頭嗰十題，受試者要揀同手上張咭同一樣色嘅咭，而第十一題就出現規則改變，改為要揀同手上張咭同一樣形狀嘅咭。 

神經層次

[編輯]

對神經系統嘅研究，可以考慮好多層面嘅現象：

一般嚟講，神經心理學較少剖析分子同細胞層面嘅嘢。

睇埋

[編輯]

註釋

[編輯]
  1. ↑ 亦有人會主張，應該當佢哋係神經多樣特徵至啱。
  2. ↑ 可以睇睇神經傳遞素同動作電位等嘅概念。
  3. ↑ 由於 confounding 方面嘅憂慮，兩組最好喺性別同年紀等嘅因素上都相約。

引述

[編輯]
  1. ↑ Neuropsychology; Overview，佢哋噉講："Neuropsychology is the study of the relationship between brain function and behavior."
  2. ↑ National Academy of Neuropsychology. "NAN definition of a Clinical Neuropsychologist". National Academy of Neuropsychology website. 原著喺26 November 2011歸檔. 喺7 December 2011搵到.
  3. ↑ "Neuropsychology". American Psychological Association. 喺2025-10-14搵到.
  4. ↑ Gazzaley, A., & Nobre, A. C. (2012). Top-down modulation: bridging selective attention and working memory. Trends in cognitive sciences, 16(2), 129-135.
  5. ↑ Gazzaniga, M.S., Ivry, R.B. and Mangun, G.R., 2006. Cognitive Neuroscience. The biology of the mind.(2014).
  6. ↑ O'Keefe, J., & Dostrovsky, J. (1971). The hippocampus as a spatial map. Brain Research, 34(1), 171-175.
  7. ↑ Deisseroth, K. (2011). Optogenetics. Nature Methods, 8(1), 26-29.
  8. ↑ Niedermeyer E.; da Silva F.L. (2004). Electroencephalography: Basic Principles, Clinical Applications, and Related Fields. Lippincott Williams & Wilkins.
  9. ↑ Sharoh, Daniel; van Mourik, Tim; Bains, Lauren J.; Segaert, Katrien; Weber, Kirsten; Hagoort, Peter; Norris, David G. (15 October 2019). "Laminar specific fMRI reveals directed interactions in distributed networks during language processing". Proceedings of the National Academy of Sciences of the United States of America. 116 (42): 21185–21190. Bibcode:2019PNAS..11621185S. doi:10.1073/pnas.1907858116. PMC 6800353. PMID 31570628.
  10. ↑ Adolphs, Ralph (2016-06-15). "Human Lesion Studies in the 21st Century". Neuron (英文). Pubmed Central. 90 (6): 1151–1153. doi:10.1016/j.neuron.2016.05.014. PMC 5656290. PMID 27311080.
  11. ↑ "Neuropsychological Testing and Assessment". Cleveland Clinic. 喺2025-10-14搵到.
  12. ↑ Heaton, R. K. (1981). Wisconsin card sorting test. Psychological Assessment Resources.
  13. ↑ Longstaff, Alan; Revest, Patricia (1998). Molecular Neuroscience. Garland Science.
  14. ↑ Martin, A. R., Wallace, B. G., Fuchs, P. A. & Nicholls, J. G. (2001). From Neuron to Brain: A Cellular and Molecular Approach to the Function of the Nervous System. 4th Ed. Sinauer Associates.
  15. ↑ Hemmen J. L., Sejnowski T. J. (2006). 23 Problems in Systems Neuroscience. Oxford University Press.

拎

[編輯]
由「https://zh-yue.wikipedia.org/w/index.php?title=神經心理學&oldid=2338134」收