心理語言學

心理語言學（參見英文：psycholinguistics）係跨學科研究一種，結合語言學同心理學。心理語言學旨在探討語言同心理之間嘅關係，尤其講到人腦處理語言背後嘅認知過程。心理語言學會研究人腦點樣學語言、嬰孩點樣學講嘢、以及係人類點樣理解同產生語言，亦會研究例如人閱讀嗰陣佢哋嘅腦入便發生緊乜嘢事。呢啲研究強調科學方法，好多時會用到心理實驗噉嘅方法。

領域定位

内文：語言學同心理學

睇埋：腦神經學

心理語言學結合語言學同心理學，亦不時會掕到腦神經學。呢個領域可以分成幾個範疇，包括語言習得、語言同記憶之間嘅關係、仲有係閱讀嘅心理學... 等等。研究人腦理解語言，講到人腦點樣聽語言、以及點樣理解語義同句法等；研究人腦產生語言，就會講到人類講說話嗰時腦入便有咩運作；語言習得包括第一語言習得同第二語言習得，前者講到人類喺嬰幼兒時期點樣由照顧者度學習母語，而後者就講到已經有母語嘅人（可以係大人又可以係細路）點樣學第二語言。

心理語言學亦有同第啲語言學領域搞合作。心理語言學同神經語言學有相當嘅重疊：心理語言學似心理學，偏重行為同認知層面，會量度例如反應時間同記憶等嘅變數，而神經語言學就比較似腦神經學，研究語言嘅行為同認知背後腦部有咩活動，會用到神經造影等嘅技術觀察腦部活動。除此之外，心理語言學研究亦有機會掕到社會語言學同語言哲學。

實驗方法

紅色嗰笪係人腦嘅顳葉。呢個腦區會唔會喺人聽說話嗰陣特別活躍呢？

内文：心理實驗

心理語言學會用到好多研究方法。

心理語言學成日會做實驗，尤其係心理實驗。心理語言實驗可以用到眼動追蹤（用儀器量度人眼嘅郁動）、事件相關電位（簡單講係腦部對某啲刺激嘅電反應）同埋 fMRI（可以話畀研究者知邊個腦區活躍中）。行為實驗就包括反應時間測試等等，目的好多時係要測量人腦處理語言需要用幾耐時間、或者出錯嘅機率有幾高呀噉。

例如詞庫決定作業（LDT）係心理語言學嘅常用實驗法，可以用嚟研究人類點樣識別詞語：研究者會畀實驗參加者逐一見到一啲字母串；參加者要有咁快得咁快判斷出一串字係唔係真嘅詞語（真係喺語言入便存在）。如果係真詞，佢就要撳係，否則就要撳唔係。用英文做例嘅話，見到 "apple" 就應該撳係，見到 "plape"（偽詞）就要撳唔係。呢種實驗通常會量度受試者嘅反應時間，研究者透過量度參加者對唔同字母串嘅反應快慢，可以推論出背後嘅認知機制。例如有研究發現啲人對常用詞反應會快過冇咁常用嘅詞，反映使用次數會影響詞語處理速度。又例如研究者可以睇吓意思上有關嘅合成詞（如 "toothbrush" 指牙刷）係咪真係會比唔啦更嘅組合（如 "bookchair"）更快被認出，然後研究者仲可以加入語境同形態素結構等等嘅變項，深入了解人類點樣識字詞、理解詞義。

語言習得

母語習得：呢幅相影到一個蘇蝦仔喺度聽佢阿媽講嘢；細路喺生命頭嗰幾年一路聽住身邊嘅照顧者講嘢，聽吓聽吓就會學識照顧者講嘅語言，照顧者嘅語言就會係佢哋嘅母語。

内文：語言習得

睇埋：母語

語言習得專門研究人類點樣學識語言，主要屬於心理語言學，亦會掂到教育學同腦神經學：人類同其他動物最大嘅分別之一，在於人類似乎天生就有能力學語言。研究語言習得嘅學者關注人類學語言時會用到咩認知機制、呢啲機制喺人生咩階段發揮作用、各種嘅語言 input 會點影響學習成效，亦會研究唔同背景下學習語言嘅差異。

語言習得可以分為兩大研究方向：第一語言習得（簡稱 FLA）同第二語言習得（簡稱 SLA）：

• 第一語言，又叫母語，係指人喺嬰兒期接觸並且自然學識嘅語言 。母語未必真係出世嗰刻父母講嘅語言，而係個細路喺語言能力發展最關鍵時期（嬰幼兒期）主要接觸到嘅語言，而細路一路聽住身邊嘅大人講嘢，聽吓聽吓就會學識講自己嘅母語。母語習得通常發生喺生命頭幾年，過程係自然、自動、唔需要明確教學嘅，細路只要喺語言豐富嘅環境長大，就可以無師自通學識講，甚至後來識讀同寫。
• 第二語言習得就係指人學習非母語語言（第二語言、第三語言... 等）嘅過程，通常喺童年後期、青年期甚至成人期先開始。第二語言學習可以係自然發生嘅，譬如啲人移民去其他地區，靠日常接觸慢慢學識當地嘅語言，亦可以係喺學校或語言班當中有系統咁學。SLA 同 FLA 有明顯差異唔同，譬如成人學習者冇咁容易學識原音同句法，未必達得到母語者嘅水平。不過，成人有其他優勢，例如認知能力成熟、學習策略豐富等。

語言習得研究唔只係學術上有價值，仲有好多實用價值。喺教育方面，了解語言學習嘅原理有助人設計更有效嘅語言教學法，無論係教小朋友學母語、還是教外語學習者。而喺言語治療領域，語言習得研究有助識別語言發展異常，例如自閉症相關嘅語言問題等。

喺社會層面，語言習得研究可以幫助制定語言教育方面嘅政策、推動語言多樣性呀噉。

語言同腦

睇埋：顳葉同語言相對論

喺廿一世紀初嘅心理語言學，語言相對論係一個極具爭議同影響力嘅諗法。語言相對論最基本嘅主張係話，基本主張係：人嘅語言會影響甚至限制佢點樣思考同理解世界。

根據強版本嘅語言相對論，語言唔單止影響思維，甚至會決定一個人可以諗乜。換句話講，如果某隻語言冇詞語去表達某個概念，講呢隻語言嘅人可能根本無法諗個概念。不過，心理語言學界普遍接受嘅係弱版本，即係語言影響思維，但唔係完全決定思維。

提出語言相對論嘅學者曾經舉例，話某啲語言冇時態，啲詞語唔會視乎「件事係幾時發生嘅」而變樣，所以講呢啲語言會以唔同方式去理解時間。不過，佢哋呢啲例子後來受到質疑。不過就算係噉，及後嘅研究都證實咗，語言確實對注意力、物件分類、顏色知覺同空間表達等嘅認知過程有影響，例如俄語將深藍同淺藍分開用唔同詞嚟講，講俄語嘅人喺識別顏色嗰陣可能反應會快啲。

領域關係

主要語言學領域嘅研究，好多時都會用到心理學知識，問一啲類似心理語言學嘅研究問題。

• 語音學：（例）「人類點樣喺腦入面處理唔同嘅語音？」
• 音系學：（例）「一隻語言嘅使用者，會唔會對合乎佢哋隻語言嘅語音組合規則嘅語音反應快啲？」
• 構詞學：（例）「人類識唔識拆解複雜詞？」
• 句法學：（例）「人類理解句子結構係咪靠某啲特定嘅認知機制？」
• 語義學：（例）「人點樣喺句子中快速整合詞義？」
• 社會語言學

睇埋

• 認知心理學：心理語言學成日會由認知心理學借概念同研究方法。
• 教育心理學：教育心理學可能會用到語言習得研究，探討點樣教人學語言。
• 閱讀研究
• 語義網絡
• 原型理論
• 先天定後天

文獻

• （英文） Steinberg, D. D., & Sciarini, N. V. (2013). An introduction to psycholinguistics. Routledge，（書名中譯：心理語言學入門）本科等級嘅心理語言學教科書乙本。

外拎

• （英文） LING2034 Psycholinguistics，香港大學語言學系提供嘅心理語言學課程。