比較語言學

比較語言學（參見英文：comparative linguistics）係歷史語言學嘅一個分支，透過比較唔同嘅語言推斷佢哋之間嘅歷史血緣關係。比較語言學家會比較唔同語言嘅詞彙同句法等特性，從而判斷佢哋之間有咩「血緣關係」同埋探究佢哋喺歷史上出現過咩演變。

基本概論

内文：語言演變同歷史語言學

比較語言學係語言學下嘅學科。呢個領域嘅學者主要係透過有系統噉比較唔同語言嘅詞彙、語音同語法結構，去重建佢哋嘅共同祖先語言，同埋了解語言點樣隨時間演變。

重要概念

比較語言學上重要嘅概念有以下呢啲：

• 語言距離：指兩隻語言變體之間「爭幾遠」；一般認為，兩隻語言變體要相距有返咁上下遠，先可以算係各自成一隻語言。詳情可以睇互通程度。
• 互通程度：語言變體之間可以有嘅一種關係，成日畀人攞嚟界定兩隻語言變體「係各自成一隻語言定方言」；想像家陣想剖析兩隻語言變體 A 同 B，語言學家搵若干個識講同聽 A 但未試過學 B 嘅人返嚟，跟住又搵若干個識講同聽 B 但未試過學 A 嘅人返嚟，然後再叫兩組嘗試用 A 同 B 溝通，再睇吓佢哋能唔能夠明對方噏乜－如果佢哋明對方噏乜，A 同 B 就算係同一種語言嘅方言，而如果佢哋聽唔明對方噏乜，A 同 B 就算係各自成一隻語言。
  • 例如英文同德文都屬日耳曼語言但頗此之間唔互通，而英式英文同美式英文雖然有明顯差異，但能夠互通。
  • 現實世界嘅語言，有時未必係「一係互通一係唔互通」咁簡單，可能會例如 50% 互通噉。
• 方言連續體：指一拃喺互通程度上「連續」嘅語言變體；想像有一拃語言變體分佈喺一笪地區，佢哋彼此之間喺正對方隔離嘅變體有高嘅互通度，地理上相距愈遠嘅變體互通度就愈低，而且有啲變體彼此之間仲要互通度係 0% 咁滯。
• 語系，又有叫「語族」：想像家陣有一個群體嘅人，佢哋喺語言上好均一，成個群體是但攞兩個人嚟睇，佢哋嘅母語都係互通嘅；而家佢哋因為戰亂等嘅原因，其中一部份嘅個體遷徙咗去第度，變咗做兩個群體；因為語言演變嘅關係，過咗幾個世紀之後兩者講嘅話變到好唔同，變到唔再互通，但兩隻話仲係會有好多相似嘅地方；如果有若干隻語言，佢哋係好似上述個例子噉由同一隻語言變出嚟嘅，佢哋就算係屬同一個語系。
  • 下圖係日耳曼語族嘅分類樹狀圖，圖入面包括咗英文同德文等。

研究方法

睇埋：比較法 (語言學)同方言學

比較語言學家成日都會用比較法嚟研究語言演變。使用比較法，係透過對兩種或以上嘅語言作出逐項比較，將佢哋嘅各特徵逐個逐個噉攞嚟對比，然後向後推斷，重構原始語言嘅特性。所謂特徵可以包括好多方面，例如：

• 語音特徵：例如某啲輔音、元音喺唔同語言之間點樣對應。
• 詞彙特徵：即係詞語嘅形式同意思之間嘅對應關係，例如唔同語言入面手、腳等基本詞彙有冇明顯相似。
• 形態特徵：例如詞形變化、語法標記等，幫助學者理解唔同語言喺結構上有咩共同點。
• 句法特徵：例如句子嘅語序有幾相似，有陣時亦會納入比較。

相關學科

• 歷史語言學
• 語源學
• 社會語言學
• 語言類型學

另見

• 進化
• 迷因
• 文化進化

引述

參考文獻：

• Lehmann, Winfred P. (1993). Theoretical Bases of Indo-European Linguistics. London: Routledge. ISBN 9780415082013.