互通程度
互通程度嘅概念，受到唔少語言學家批評：正常嚟講，語言學家唔會否定人類講嘅語言有龐大嘅多樣性，唔會否定（例如）英格蘭話同德國話之間喺文法等多方面上都爭好遠；但廿一世紀初嘅語言學界已經確定，齋靠互通程度有陣時做唔到完全清楚噉劃分語言，會有方言連續體（下面詳講）等嘅概念問題。
背景[編輯]
首先，想像語言變體（variety）嘅概念，假設所有人都淨係講佢哋母語，英格蘭人嘅母語講嘢方式（英格蘭話）同德國人嘅（德國話）有分別，同時英格蘭人嘅母語講嘢方式又同美國人嘅有分別，而且美國唔同地區嘅人講嘅「英格蘭話」都可以有啲些微嘅差異；同一道理，德國唔同地區嘅人講嘅「德國話」都可以或多或少噉有差異。語言變體就係泛指任何「攞個地方或者群體嘅人，佢哋講嘢嘅方式」－英式英格蘭話、美式英格蘭話同德國話... 等冚唪唥都係語言變體[2]。
語言變體帶出埋語言距離（linguistic distance）嘅概念[3][4]：
| 「 | 直覺上認為，英式英格蘭話同美式英格蘭話係有啲差異，但差異相對細，而呢兩隻語言變體之間嘅差異，明顯細過（例如）英式英格蘭話同德國話之間嘅差異。語言距離指緊嘅，正正就係『兩隻語言變體之間爭幾遠』－相距近表示差異細，而相距遠表示差異大[註 2]。
|
」 |
評估方法[編輯]
要衡量語言距離，有啲語言學家會用比較形式化嘅做法，即係直頭走去睇啲語言嘅文法規則同埋字典，由所得數據度評估兩隻語言有幾相似。另一方面，又有啲語言學家選擇採取比較實驗性質嘅做法。而家想像以下噉嘅做法：
- 要研究兩隻語言變體 A 同 B；
- 搵若干個識得講同聽 A 但未試過學 B 嘅人做受試者；
- 同時又搵若干個識得講同聽 B 但未試過學 A 嘅人做受試者；
- 要兩組受試者分別噉聽另外嗰隻語言變體講嘢嘅錄音－錄音可以包括淨係單字或者成句句子嘅錄音[註 3][5]；
- 叫每位受試者
－做咗上述噉嘅實驗之後，研究者就可以計啲數值出嚟，反映「主觀噉講，啲受試者覺得呢拃語言變體有幾相似」同埋「對使用 A 嘅人嚟講，B 有幾易明」。
呢啲數值跟住就會畀人攞嚟將語言分類：如果有兩隻語言變體佢哋係明對方噏乜嘅（例如英式英格蘭話同美式英格蘭話），佢哋就算係同一種語言嘅方言，而如果佢哋係聽唔明對方噏乜嘅（例如英式英格蘭話同德國話），佢哋就算係各自成一隻語言[6]。
不過就算兩隻語言變體唔互通，佢哋依然有可能屬同一個語族。例如英格蘭話同德國話都屬日耳曼語言（Germanic）。下圖係日耳曼語言嘅分類樹狀圖，圖入面包括咗英格蘭話（English）同德國話（German）等。
.png)
概念問題[編輯]
.png)
互通程度畀唔少人攞嚟分「兩隻語言變體係咪各自成一隻語言」，但呢種做法受到唔少語言學家批評：
- 現實世界嘅語言，有時未必係「一係互通一係唔互通」咁簡單，可能會（例如）50% 互通，好似西班牙話同葡萄牙話噉被指係有咁上下嘅互通度，但又明顯唔完全 100% 相通[7]；
- 有語言學家指，互通呢家嘢未必係對稱嘅－可能有兩隻變體，識講 A 嘅人會聽得明 B，但一個人就算完全熟嗮 B 都聽唔明 A。
- 想像有兩隻語言變體 A 同 B，兩者唔互通，不過進一步研究發現，一個以 A 做母語嘅人能夠响幾日內學識 B 而且達到近乎母語噉嘅熟練程度，都表示兩隻語言變體查實好相似[8]。
方言連續體[編輯]
方言連續體（dialect continuum）係一種已經被實際觀察到嘅語言現象。
而家想像有一笪地方，笪地同廣東差唔多一樣咁大，而笪地上面有 4 座大城市 A B C D，語言學家想研究呢笪地方嘅語言，於是佢哋就喺每座城市度搵咗班人返嚟，要佢哋做語言互通程度嘅測試（睇返上面講到嘅步驟），佢哋結果發現
- A 話同 B 話有頗高嘅相似度，兩隻變體大約 80% 互通；
- B 話同 C 話有頗高相似度，兩隻變體大約 80% 互通，但同時 B-C 差異冇 A-C 差異咁大，A-C 之間係得嗰 60% 互通；
- C 話同 D 話有頗高相似度，兩隻變體大約 65% 互通，但同時 A-D 差異極大，互通度差唔多係 0% 咁滯；
－呢種噉嘅情況，就係所謂嘅方言連續體。有一拃語言變體，彼此之間喺正對方隔離嘅變體有高嘅互通度，而地理上距離愈遠嘅變體互通度愈低，有部份嘅變體彼此之間互通度係 0% 咁滯；而想像有個好有語言天份嘅人（佢乜語言都學到）去呢笪地方旅居，佢逐個逐個城市去遊歷，而假設佢去到每座城市都會喺幾日內學識當地講嘅話，然後就去隔離嗰座城市做同樣嘅嘢，佢唔會遇到任何一次「突然撞到隻佢完全聽唔明嘅語言」噉嘅情況，但如果佢攞住旅程起點同旅程終點嗰兩隻話嚟睇，嗰兩隻話好可能唔會有任何嘅互通度[9][10]，好似德國話－分佈偏及德國、奧地利、瑞士以至比利時等多地－就被指有噉嘅情況[1]:p. 2。
有語言學家指，方言連續體係否決「齋靠互通程度可以將語言分好嗮類」呢個諗法嘅主要理由。攞返上面 A B C D 個例子，齋靠互通程度嚟分嘅話：
- A 同 B 係同一隻語言嘅方言，B 同 C 係同一隻語言嘅方言，C 同 D 係同一隻語言嘅方言，所以 A B C D 冚唪唥都係同一隻語言嘅方言；
- A 同 D 唔互通，唔可以算係同一隻語言；
－上述兩點之間出現咗明顯嘅矛盾。因為噉，廿一世紀初嘅語言學家將語言分類嗰陣，唔會一味齋靠互通程度－如果兩隻語言變體唔互通，佢哋有可能係同一個方言連續體嘅一部份，亦有可能係各自成一隻語言；跟住語言學家就會去考慮埋第啲因素，再決定要點樣將啲語言變體分類[1]。
睇埋[編輯]
註釋[編輯]
攷[編輯]
- ↑ 1.0 1.1 1.2 Hammarström, H. (2008). Counting languages in dialect continua using the criterion of mutual intelligibility. Journal of Quantitative Linguistics, 15(1), 34-45.
- ↑ Bryant, J. B. (2009). Language in social contexts. The development of language, 192-226.
- ↑ Li Wei (2000). The bilingualism reader, Psychology Press. "... linguistic distance is a notion which still remains problematic (for a discussion, see Hinskens, 1988), it does seem possible to place languages along a continuum based on formal characteristics such as the number of cognates in languages or sets of shared syntactic characteristics..."
- ↑ Chambers, J.K., Trudgill, P., 1980. Dialectology. Cambridge University Press.
- ↑ Morton, J., 1969. Interaction of information in word recognition. Psychological Review, 76, 165-178.
- ↑ Gooskens, Charlotte; van Heuven, Vincent J.; Golubović, Jelena; Schüppert, Anja; Swarte, Femke; Voigt, Stefanie (2017). "Mutual intelligibility between closely related languages in Europe" (PDF). International Journal of Multilingualism. 15 (2): 169-193.
- ↑ Jensen, J. B. (1989). On the mutual intelligibility of Spanish and Portuguese. Hispania, 72(4), 848-852.
- ↑ Jones, A. A. (1998). Towards a Lexicogrammar of Mekeo (An Austronesian Language of West Central Papua), Volume 138 of Pacific Linguistics: Series C. Research School of Pacific and Asian Studies, Australian National University, Canberra.
- ↑ Bloomfield, Leonard (1935). Language. London: George Allen & Unwin. p. 51.
- ↑ Crystal, David (2006). A Dictionary of Linguistics and Phonetics (6th ed.). Blackwell. p. 144.
拎[編輯]
- Harold Schiffman, "Linguists' Definition: mutual intelligibility". University of Pennsylvania.
- Common words between languages.