羅曼語族

羅曼語族lo4 maan6 jyu5 zuk6，又叫羅馬maa5語族同拉丁laai1 ding1語族，屬於印歐語系，係由意大利語族衍生出來嘅現代語族，主要包括由拉丁文變過嚟嘅現代各種嘅語言。講羅曼語族語言嘅人主要包括傳統意義上嘅「歐洲拉丁人」。紀元前後嘅古羅馬帝國瓦解之後，原本統一嘅拉丁文都跟住地域嘅唔同而產生各類方言。呢啲方言就係今日羅曼各種語言嘅雛形。

雖然係咁，現代羅曼語族各種語言同古老嘅拉丁文之間已經存在好大唔同啦。比如，現代羅曼語以冠詞同介詞嚟替代拉丁文複雜嘅格變化；現代羅曼語用助動詞嚟構成複合時態，呢啲都係拉丁文冇具備嘅。

即管都係由拉丁文演化而成嘅，羅曼各種語言之間重係存在比較顯著嘅差別。造成呢啲差別嘅原因包括：歷史傳統嘅互相隔絕、古羅馬帝國治前嘅地域性古文嘅影響、羅馬帝國覆滅後頻繁嘅戰爭同社會變遷，以及文藝復興時期各種地域文化之間嘅衝突同共融，等等。

Romance一詞係拉丁文嘅romanice一詞變過嚟嘅。喺拉丁文入面，呢個詞係romanicus一詞嘅副詞形式，意思係「用羅馬人嘅方式」。

現代羅曼各種語言同古典拉丁文之間嘅主要差別

除羅馬尼亞文之外，其他語言已經冇格變化。

現代羅曼各種語言入面名詞通常淨得有兩種文法性，而拉丁文入面名詞就有三個文法性。咁梗係有特例，比如羅馬尼亞文同意大利文入面就保留咗一啲中性名詞嘅表達，而西班牙文、意大利文同加泰羅尼亞文入面仍然保存住一啲中性嘅代詞。

拉丁文中嘅指示詞喺現代羅曼語入面變成咗冠詞。

拉丁文中嘅將來時已經衰退，喺現代羅曼文中將來時有新嘅構成方式，並結合咗「條件式」呢個新嘅語式。拉丁文入面habere（相當於英文嘅to have）一詞成為構成時態嘅重要助動詞。好多重要時態都係由呢一個詞嘅完成體或未完成體加上動詞嘅對應變位構成嘅。

拉丁文入面嘅「綜合完成時」喺現代羅曼文中變成咗由詞義相當於英文to be或to have嘅助動詞加動詞過去分詞嘅合成時態。但係喺葡文同法文入面，仍然保存咗拉丁文嘅「過去完成時」，而羅馬尼亞文就有兩種完成時態，兩者嘅意義就基本近嗙。羅馬尼亞文入面又保留咗「過去完成時」，淨係用喺直陳式入面，由動詞詞綴-se嚟體現。呢一個詞綴係源於拉丁文虛擬式過去完成時嘅詞綴-isse。

羅曼各種語言入面使用者最多嘅係西班牙文，其後依次係葡文、法文、意大利文同羅馬尼亞文。

喺現代嘅羅曼各種語言入面，拉丁文複雜嘅屈折變化同文法結構已經畀人大大簡化。意大利文、薩丁尼亞文同古典拉丁文最近嗙。

羅曼語族內部嘅各種語言喺語音上彼此好近嗙，地緣接近嘅語言通常都有共通嘅部分。葡文、法文同羅馬尼亞文係羅曼語族入面最具獨特性嘅，而呢三種語言嘅獨特性又唔相同。薩丁尼亞文係羅曼語族入面最為孤立同保守嘅語言。係喺法國南部嘅郎格多克文被認為係最典型嘅西部羅曼文。

喺羅曼諸語言發展嘅歷史入面，最先從拉丁文入面分裂出嚟成為獨立語言嘅係薩丁尼亞文，跟住嘅係東部嘅羅馬尼亞文又同拉丁文脫離，成為獨立語言。第三個重要過程係意大利文同高盧-伊比利亞語言嘅分離。喺呢個時候，法國同伊比利亞半島諸國嘅語言重係具有高度嘅一致性。羅曼語言嘅第四次重大變化係伊比利亞半島嘅語言同法文脫離，慢慢形成非常近嗙嘅兩種現代語言：西班牙文同葡文。之但係喺西班牙東部嘅加泰羅尼亞文就被人覺得係法文同伊比利亞語言嘅中間產物，因為呢種語言融合咗法文、西班牙文同葡文嘅好多特徵。例如，英文入面fear一詞喺葡文入面係medo，喺西班牙文入面係miedo，喺加泰羅尼亞文入面係por，喺法文入面就係peur。

喺羅曼各種語言入面有好多方言，有時好難分得出邊啲係「方言」，邊啲係獨立語言。好多語言之所以有咁顯赫嘅地位係由於佢哋係政府、媒體同學校教育所採用嘅語言，比如法文、西班牙文、意大利文等。之但係好多語言雖然喺地方學校都有教，而且有一定嘅官方地位，但係顯得弱勢好多，比如薩丁尼亞文同羅馬傳語等。有一啲語言就長期受到官方嘅漠視，例如法國南部嘅普羅旺斯文、意大利境內嘅威尼斯文等等。如果講呢啲語言重有生命力嘅話，另外一啲更加弱勢嘅語言，如阿斯圖裏亞斯文、阿拉貢文等，就更加唔使講啦，可能隨時面臨滅絕嘅危險。呢啲語言（或方言）目前淨係喺好細嘅範圍內有人用緊，喺度逐漸萎縮緊。

羅曼各種語言嘅共同特徵

常規

羅曼各種語言嘅文法變化主要靠動詞嘅詞形變化，而唔係靠粘着成分。咁就係對動作嘅側重點係依賴動詞自身嘅變化，而唔係好似英文入面go in嗰種嘅「動詞＋介詞」 嘅結構。咁即係講羅曼語言構詞法嘅重要特徵。

羅曼各種語言通常頻繁咁用兩個助動詞來構成時態，都係從拉丁文嘅不定詞esse同stare變過來嘅，一個用喺描述本質，一個用喺描述狀態。

羅曼文嘅動詞都要照住人稱同數量嘅唔同而進行變位。第三人稱通常有文法性嘅區別，而第一同第二人稱就冇。呢一點同希伯萊文好似，不同就係希伯萊文嘅所有人稱都有性同數嘅變化。

幾乎所有嘅羅曼語言中都重保留住敬詞嘅痕跡，主要體現喺第二人稱單數上。例如法文入面「你」係Tu，而「您」就係Vous。呢個特徵叫佢做羅曼語言嘅「T-V差別」。

所有嘅羅曼語言名詞都有文法性嘅區別，但通常名詞本身冇屈折變化，即係拉丁文入面名詞係有格變化嘅。

喺語音上，羅曼語言通常都拎每個詞嘅重音放喺倒數第二個音節到（喺法文入面，重音係放喺最後一個音節嗰到，因為多數法文詞彙唔要咗拉丁文詞彙嘅最後一個元音），而且羅曼語言通常都會有一啲特殊嘅規定去消除聲門塞音、閉塞輔音等對語言整體美感嘅影響（例如法文入面就有「連讀」嘅規定）。呢啲特徵令所有嘅羅曼語言都具有語素快、語調流暢嘅特點。

書面形式：

• 字母W同K用得好少，通常淨係出現喺人名同外來語入面。
• 字母C同G喺前元音（如i、e等）之前嘅時候通常讀音要軟化，喺後元音（如a、o、u）前就要發較硬嘅軟顎音。

喺大多數羅曼文入面，一啲表示國籍嘅形容詞、表示星期、月份同年份嘅名詞通常第一個字母唔使大寫，咁同日耳曼文唔同。例如，喺法文入面，「中國嘅」寫作chinois，而唔係Chinois。

名詞複數嘅構成

喺一啲羅曼文入面，名詞複數係由名詞單數詞尾加字母s構成嘅，呢啲係喺拉丁文入面賓格名詞嘅複數形式變過嚟嘅，用咁嘅方式構成名詞複數嘅羅曼語言包括葡文、西班牙文、加泰羅尼亞文、普羅旺斯文同法文。之不過都有一啲語言嘅名詞複數係由詞尾嘅元音字母變化嚟構成嘅，呢個特徵就係喺拉丁文入面主格名詞嘅複數形式變過嚟。屬於呢一類別嘅語言有意大利文和羅馬尼亞文等。

比較級嘅構成詞

羅曼各種語言嘅比較級構成詞有兩種，一種係喺拉丁文詞彙plus變過嚟嘅，一種就係喺magis呢個詞變過嚟嘅。採用前一種構成方式嘅語言包括法文（plus）同意大利文（più）；而採用後一種構成方式嘅就有包括葡文（mais）、西班牙文（más）、加泰羅尼亞文（més）、普羅旺斯文同羅馬尼亞文（mai）等。

數字「16」

喺羅曼語言入面，「16」呢個數字喺計數體系入面地位非常特殊。除咗羅馬尼亞文之外，羅曼語言普遍用「1+10」，「2+10」……結構表示11-15，用「10+7」，「10+8」……結構表示17-19。而16作為兩組之間嘅分界線，喺各語言入面表達方法唔同，其中法文、加泰羅尼亞文、意大利文等用「6+10」；而葡文和西班牙文等就用「10+6」。

助動詞體系

有啲羅曼語言用表達「有」呢個含義嘅助動詞（相當於英文嘅to have）嚟構成複合時態（比如法文入面嘅「愈過去時」等），而有啲語言就對動詞做出區分，有啲動詞用have嚟構成，有啲就要用be嚟構成。淨係用have構成嘅語言包括加泰羅尼亞文、葡文、西班牙文同羅馬尼亞文等。而撈亂使用兩個助動詞嘅語言就包括法文、意大利文同普羅旺斯文等。

喺後一類羅曼語言入面，用be嚟構成嘅複合時態嘅動詞經常係成日用嘅不及物動詞，呢種動詞經常講嘅係唔可以確定目標或講明狀態嘅動作。例如「嚟」、「去」、「變成」等等。而大多數動詞重係要用have嚟構成複合時態。

變體

混雜語言同語言變體

近代西方國家嘅全球殖民活動搞到羅曼語言嘅傳播超出咗歐洲本土而擴展到世界各地。西班牙文、葡文同法文嘅影響力好大。呢啲語言喺外國嘅傳播過程入面同其他語言融合，就產生咗同母語好大唔同嘅各類混雜語言同語言變體。下邊列出咗一啲重要嘅羅曼語言變體：

法文變體

• 海地法文，係美洲國家海地嘅官方語言。
• 安替列法文，主要喺美洲嘅多米尼加同聖露西亞講多。
• Kreyol Lwiziyen，喺美國路易斯安那州講多。
• 毛里裘斯法文，喺毛里裘斯嘅法文變體。
• 塞舌爾文，喺塞舌爾地區嘅法文變體，同英文、法文都係塞舌爾嘅官方語言。
• Lanc-Patuá，主要喺巴西嘅阿瑪帕州講多，係法文同葡萄牙文結合產生嘅變體。呢種語言變體主要係喺講法文嘅南美國家圭亞那以及加勒比海嘅法國殖民地移民創造嘅。
• 越南法文，主要係喺東南亞嘅原法國殖民地越南、老撾等國。

葡文變體

• Angolar，主要係喺聖多美島講多。
• Fá d'Ambô，係喺赤道畿內亞講多。
• Crioulo，係喺佛得角巴溫蘭托島講多。
• 達曼-印度-葡文，係喺印度嘅達曼同弟烏地區講多。
• 弟烏-印度-葡文，係喺印度嘅達曼同弟烏地區講多，差唔多已經滅絕。
• Forro，係喺聖多美島講多。
• 馬來葡文，係喺馬來西亞嘅一啲地方講多。
• Kristi，係喺印度柯爾雷地區嘅一啲村莊講多。
• Lunguyê，係喺普林西比島講多，差唔多已經滅絕。
• Patuá或Macanese，澳門葡文，係喺中國嘅澳門地區講多。
• 帕皮阿門托文，係喺尼德蘭安德列斯群島同阿魯巴島講多，係葡文同西班牙文、荷蘭文混雜語言。
• 蘇里南文，係喺南美國家蘇里南講多，係英文同葡文嘅混雜語言。
• 斯里蘭卡-印度-葡文，係喺斯里蘭卡嘅一啲瀕海城市講多。
• 畿內亞葡文，係喺非洲國家畿內亞比紹同塞內加爾一啲地區嘅混雜語言。

西班牙文變體

• 查瓦卡諾文
• 帕蘭切羅文
• 帕皮阿門托文（混雜咗西班牙文、葡文同荷蘭文）
• 雅尼托文

人造語言

拉丁文同羅曼諸語言都促進咗人造語言嘅發展。例如，著名嘅世界語、拉丁國際語、新佛蘭卡文等人造語言就係大量羅曼語言嘅特徵嚟構成自己嘅文法同詞彙體系。

羅曼語族語言一覽

由於羅曼語言係喺拉丁文衍生出嚟嘅，喺歷史發展嘅過程入面經歷咗非常複雜嘅變化，所以對於羅曼語族內部各種語言派別嘅劃分歷來存在爭議，到而家為止都冇確鑿嘅定論。下面係羅曼語族各種話及方言嘅詳盡一覽：

• 伊比利亞-羅曼語支
  • 葡萄牙-加利西亞文
    • 葡文
    • 加利西亞文
  • 阿斯圖里亞斯文
    • 米蘭迪斯文（僅係喺葡萄牙境內幾個面積狹小嘅地區講多，係一種古老嘅語言）
    • 埃斯特雷馬杜拉文
  • 西班牙文
    • 拉地諾文（係喺西班牙嘅猶太人社區講多）
  • 阿拉貢文
  • 莫紮勒布文（15世紀後期滅絕）
  • 加泰羅尼亞文
    • 西加泰羅尼亞文
      • 西北加泰羅尼亞文
      • 巴倫西亞文
    • 東加泰羅尼亞文
      • 中央加泰羅尼亞文（含巴塞隆拿方言）
      • 北加泰羅尼亞文（魯西榮語）
      • 巴利阿里文
      • 奧格里文
• 奧克文
  • 加斯科涅文
    • 阿拉涅文
  • 利穆贊文
  • 奧弗涅文
  • 朗克多格文
  • 普羅旺斯文
    • 尼薩德文
  • 奧本克文
• 高盧-雷蒂亞語支
  • 法文
  • 皮卡爾文
  • 瓦龍文
  • 諾曼第文
    • 盎格魯-諾曼文（已滅絕）
  • 尕羅文
  • 弗朗什-孔泰文
  • 香檳語文
  • 洛林文
• 雷蒂亞各種語言
  • 弗留利文
  • 拉迪恩文
  • 羅馬傳語
• 意大利各種語言
  • 意大利文
  • 高盧-意大利文
    • 皮埃蒙特文
    • 利古里亞文
      • 摩納哥文
    • 倫巴第文
    • 威尼斯文
  • 西西里文
  • 科西嘉文（同意大利文嘅托斯卡納方言好近嗙）
• 薩丁尼亞文
• 達爾馬提亞文（已滅絕）
• 伊斯特羅文
• 東羅曼語支
  • 羅馬尼亞文（喺摩爾多瓦叫做摩爾多瓦文）
  • 阿羅馬尼亞文
  • 梅格蘭尼文
  • 伊斯特羅-羅馬尼亞文

影響

睇埋：英文同英文純化

英文史上深受羅曼語言影響，尤其係拉丁文同法文影響英文影響得最深：喺歷史上，英格蘭同其他歐洲地區一樣，受到羅馬帝國嘅文化（包括拉丁文）薰陶，不時會由拉丁文攞字詞嚟用，例如英文裡邊

Linguistics（IPA：/lɪŋˈɡwɪstɪk/）

呢隻字詞係指緊語言學，隻字就係出自拉丁文 lingua（語言噉解；IPA：/ˈlin.ɡʷa/）一詞；除此之外，英文又受過法文同意大利文影響，（例如）由法國引入芭蕾舞嗰陣借用（有好多法文字詞喺入邊嘅）芭蕾舞詞彙。