芭蕾舞

出自維基百科,自由嘅百科全書
Jump to navigation Jump to search
2007 年邁亞美城市芭蕾舞團所表演嘅《天鵝湖》當中王子同公主共舞嘅一幕
2011 年墨西哥嘅 Escuela Superior de Música y Danza 所表演嘅《胡桃夾子》裏面嘅一幕雙人舞
波蘭國家芭蕾舞團喺 2014 年演嘅《羅密歐與朱麗葉》當中嘅一幕;羅密歐坐喺假死嘅朱麗葉身邊,以為朱麗葉真係死咗而悲痛不已。

芭蕾舞粵拼:baa1 leoi4 mou5英文ballet法文讀音:[balɛ]),簡稱芭蕾,係一種音樂廳舞蹈,源自 15 世紀文藝復興時期嘅意大利[1],後嚟由法國俄羅斯發揚光大,演變成做一種音樂廳舞蹈[1][2]。自從嗰陣時開始,芭蕾舞就廣泛噉喺歐美地區嗰度傳播開去,仲因為多人跳而令到佢嘅技術發展到愈嚟愈複雜,有埋一套佢獨有嘅專業詞彙。到咗現代,芭蕾舞經已成為咗一個國際性嘅演藝,世界各個國家同地區都有組芭蕾舞團表演同教授呢一種藝術,並且將佢哋各自嘅本土文化融入去佢哋嘅芭蕾舞入面,而喺粵港澳地區嘅香港芭蕾舞團廣州芭蕾舞團都算係遠東地區當中比較出名嘅芭蕾舞團。

一齣芭蕾舞劇可以當成一件藝術作品,包含咗編舞(choreography)同音樂等嘅部份:編舞師(choreographer)等嘅人員會負責諗齣芭蕾舞劇應該包含啲乜嘢舞步、要配合啲乜嘢音樂嚟跳、同埋成個過程要表達乜嘢故仔等等嘅內容,而個芭蕾舞團啲芭蕾舞蹈員就會負責將嗰啲舞步跳出嚟。喺英文入面,一般人都興將女嘅芭蕾舞蹈員嗌做「ballerina」,男嘅芭蕾舞蹈員嗌做「danseur」或者「ballerino」,但實際專業人士所使用嘅稱謂會有更加嚴格精細嘅分類。

芭蕾舞大致上可以分做古典同現代兩種:最傳統嗰種芭蕾舞係所謂嘅古典芭蕾舞(classical ballet)[3],通常會配合西人古典樂嚟跳,舞蹈員著嘅服飾可以好華麗複雜又可以好簡樸,通常會運用比較多嘢嘅舞台,而且最重要嘅係,舞步上有嚴格嘅規範;現代芭蕾舞(modern ballet)好多時會偏好用簡單嘅服飾同舞台,而相對嚟講,對舞步嘅規範比較寬鬆[4]

個名點嚟[編輯]

  • 「芭蕾舞」呢個詞最早可以追溯到希臘文嗰度:希臘文當中有「βαλλίζω」(羅馬字ballizo)一詞,意思大致上係「跳舞」或者「跳嚟跳去」噉解[5],打後傳咗去拉丁文入面變成「ballare」呢個字,都係指「跳舞」[6];後嚟呢個字演變咗做拉丁文嘅語言後裔之一意大利文嘅字「ballo」同「balletto」(仲係指「跳舞」噉解);呢個字由意大利文傳到去法文嗰度就變成「ballet」(讀音似廣東話「baa1 lei4」,「芭蘺」);法國喺發揚芭蕾舞上做咗好多嘢,令到英格蘭人跟手喺 1630 年左右直接借咗呢個字過去英文度,用嚟指芭蕾舞。
  • 喺現代嘅英文入面,啲人讀「ballet」一般都會跟返法文入面嗰個讀音,但美國人就興將呢個字讀做「bæˈleɪ」(類似粵音「baa6 lei1」)。
  • 呢個字嚟到大中華地區就俾唐人用「芭蕾」(普通話拼音:bā lěi)呢兩個唐字嚟代表,呢兩個唐字喺各主要唐人話-包括廣東話在內-嗰度讀音都似「ballet」。

簡史[編輯]

內文: 芭蕾舞史
路易十四喺一齣芭蕾舞劇當中扮太陽神阿波羅,1653 年。呢單嘢令佢有咗個花名叫「太陽王」。

由起源至成形[編輯]

芭蕾舞起源喺 15 至 16 世紀(文藝復興時期)嘅意大利宮廷。後嚟意大利貴族嘉芙蓮·德·麥地奇(Catherine de' Medici)嫁咗過去法國,成為法國嘅皇后。麥地奇佢不嬲都愛好藝術,喺佢嘅擁護之下,當時仲係啱啱出咗世冇幾耐嘅芭蕾舞就傳咗過去法國宮廷嗰度。早期芭蕾舞並唔專業,好多時係由啲貴族男人得閒業餘跳嘅,技術麻麻地,又會著住啲浮誇(而且限制跳嗰個人嘅郁動)嘅服裝嚟跳[7]。雖然係噉,法國係當時歐洲最強大嘅國家之一-藝術家人才輩出。於是乎,有咗法國嘅藝術家幫手諗芭蕾舞技法,芭蕾舞就慢慢噉演變成一種專門嘅藝術,進化出好多專業詞彙。因為呢段歷史,現今所使用嘅芭蕾舞專業詞彙好多都係法文入面嘅字[8]

法國宮廷嘅芭蕾舞喺路易十四(Louis XIV;1643-1715)統治期間達到顛峰。路易十四喺 1661 年創立咗皇家舞蹈學院(法文:Académie Royale de Danse)嚟制定有關芭蕾舞嘅準則同埋訓練芭蕾舞老師[9]。喺 1672 年,路易十四委任呂利(Jean-Baptiste Lully)做皇家音樂學院嘅院長,而呢個學院就係巴黎歌劇院芭蕾舞團(Paris Opera Ballet)嘅起源,巴黎歌劇院芭蕾舞團係世界上第一個專業嘅芭蕾舞團,而且到咗廿一世紀都仲係相當有影響力。當時呂利同佢個芭蕾舞師 Pierre Beauchamp 一齊發展芭蕾舞,對後世芭蕾舞嘅發展起咗深遠嘅影響,例如現代學芭蕾舞最先會學嘅五大腳位噉,就係由佢哋諗出嚟嘅。除咗噉,呢個組織仲喺 1681 年創始咗「ballerina」呢個字嘅使用[7]

及後[編輯]

喺 1830 年之後,芭蕾舞喺法國嘅人氣開始衰落,但係就喺丹麥、意大利、同俄羅斯嗰度有繼續發展。後嚟由 Sergei Diaghilev 領導嘅俄羅斯芭蕾舞團 Ballets Russes一戰冇幾耐之前喺歐洲巡迴表演,令到廿世紀嘅人類開始重新對芭蕾舞產生興趣[10],亦都令到芭蕾舞對現代舞等嘅舞蹈有相當影響-例如現代舞當中某啲嘅技法就講到明係基於芭蕾舞嗰啲技法嘅[11]

芭蕾舞喺廿世紀係一種有影響力嘅藝術,而打後歐美地區嘅現代主義運動影響各種嘅藝術,芭蕾舞就自然走唔甩[12]。現代主義嘅影響令到芭蕾舞分裂咗做兩大派:古典同現代。古典芭蕾舞跟從由法國宮廷所演變出嚟嗰套步法同教法,而現代芭蕾舞就喺呢啲方面大幅噉改革,興加入好多古典芭蕾舞唔會有嘅舞步,最後自成一派,而且喺人氣方面同古典芭蕾舞不相伯仲。

風格[編輯]

1953 年喺布里斯本上演嘅一齣《天鵝湖》
一個女芭蕾舞蹈員著住浪漫芭蕾舞興用嘅長芭蕾舞裙。
俄羅斯芭蕾舞蹈員 Artem Ovcharenko 喺《阿波羅》當中扮演太陽神阿波羅。

芭蕾舞有好幾種唔同嘅風格。早期嘅風格分類法係基於地區嘅,例如係將古典芭蕾舞分做俄羅斯芭蕾舞、法國芭蕾舞、同埋意大利芭蕾舞呀噉。遲吓嘅分類法就基於技法嚟分,分做現代芭蕾舞同新古典芭蕾舞等等。

古典[編輯]

內文: 古典芭蕾舞

古典芭蕾舞(classical ballet)係建基於傳統芭蕾舞技法同詞彙嘅一套芭蕾舞[13][14],亦都係最廣為人知嗰一種。喺視覺上,古典芭蕾舞特徵係重視流暢優美嘅動作、修長嘅線條、同埋對稱性,而且喺舞步上有好嚴謹嘅規範-通常一場古典芭蕾舞表演入面嘅每一個舞步同動作冚唪唥都係由古典芭蕾舞嗰柞基本舞步砌出嚟嘅,所以喺學古典芭蕾舞嗰陣,啲老師會好要求啲學生要學識完美噉做每一個古典舞步。

古典芭蕾舞劇基本上實會有故仔:一場典型嘅古典芭蕾舞劇會分做若干幕,每一幕代表個故仔入面嘅某一段;喺每一幕當中,啲芭蕾舞蹈員會著住相應嘅服裝,喺一個有佈景嘅舞台上面,隨住相應嘅音樂跳出編舞師所指定嘅舞步,用呢啲舞步作為肢體語言,表達個故仔啲角色嘅情感。舉個例子說明,《天鵝湖》(Swan Lake)係一齣舉世聞名嘅古典芭蕾舞劇,多數版本嘅天鵝湖分做四幕,而喺第二幕入面,個故仔講王子喺個湖嗰度同俾邪惡魔法師變咗做天鵝嘅公主邂逅並且一見鍾情;喺呢一幕當中,王子會著住有返噉上下豪華(但依然方便郁動)嘅服裝嚟表達佢係一個王子,而公主多數會著純白色(好似白天鵝噉嘅色水)嘅芭蕾舞裙,舞台佈置會係一個湖景,而跟手王子同公主會伴隨住浪漫嘅音樂一路跳舞一路有互相依偎嘅動作-靠噉嚟表達俾觀眾知「王子同公主喺度墮入愛河」嘅情節。

古典芭蕾舞劇比較出名嘅有《天鵝湖》同埋《胡桃夾子》(The Nutcracker)等等,呢啲膾炙人口嘅芭蕾舞劇到咗廿一世紀都仲係成日俾人攞嚟返炒,而且佢哋嘅故仔仲有俾人改編做[15]

古典芭蕾舞可以按照地區分做法國式意大利式英格蘭式、同俄羅斯式呀噉。好多時,每一款古典芭蕾舞都有佢自己獨有嘅教法,而英國皇家舞蹈學院(The Royal Academy of Dance)用嘅嗰套教法係最廣受探用嘅(香港中國大陸啲芭蕾舞老師多數都係用呢套嘅)。皇家舞蹈學院嗰套結合咗意大利式、法國式、同俄羅斯式嘅教法,形成咗英格蘭式呢種獨有嘅一種風格[10]

浪漫[編輯]

內文: 浪漫芭蕾舞

浪漫芭蕾舞(romantic ballet)係 19 世紀早期(浪漫時期)起源嘅一套芭蕾舞,到咗今日都仲有發展緊[16][17]。呢個時期嘅芭蕾舞開始咗使用腳尖企(en pointe;指個舞蹈員用腳尖企喺度)、以女性舞蹈員做主導、同埋用長啲嘅芭蕾舞裙嚟突顯柔軟同柔弱嘅氣質,而且受到當代盛行嘅浪漫主義(Romanticism)影響,鍾意運用帶有強烈情感嘅主題做佢嘅美學基礎,啲故仔好多時都圍繞住女性靈異生物(即係好似女鬼或者風精等等),同埋佢哋點樣整蠱人類嘅男人。例如係成日俾人攞嚟代表浪漫芭蕾舞嘅《吉賽爾》(Giselle)噉,就有一幕係男主角意外害死咗女主角之後,俾一班生前俾男人呃過嘅女鬼纏繞[18]

一般嚟講都認為,1827 年演嘅《La Sylphide》係史上第一齣浪漫芭蕾舞劇,而 1870 年嘅《Coppélia》就係最後一齣[8]

新古典[編輯]

內文: 新古典芭蕾舞

新古典芭蕾舞(neoclassical ballet)係廿世紀早期開始興起嘅一種古典芭蕾舞分枝[19][20]。喺藝術特色上,新古典芭蕾舞仲係主要運用古典芭蕾舞嘅技法,但喺速度上提高咗、開始冇噉講求對稱性、以及低調咗嘅服裝同舞台設計,好多時鍾意用新古典樂-好似係史特拉汶斯基(Igor Stravinsky)同阿爾伯特·魯塞爾(Albert Roussel)作嘅曲噉,而且嫌古典同浪漫芭蕾舞嗰啲故仔太長太複雜,有啲新古典芭蕾舞劇甚至乎完全冇故仔[20]

美國編舞家 George Balanchine 係新古典芭蕾舞嘅先驅,喺 1928 年創作咗《阿波羅》(Apollo)呢個俾人認為係史上第一齣新古典芭蕾舞劇嘅作品,呢齣芭蕾舞劇故仔講述希臘神話入面嘅音樂之神阿波羅同三個繆思相遇-《阿波羅》個故仔同(例如)《天鵝湖》嗰個比起上嚟就顯得好簡單。Balanchine 佢嘅作品喺當時引起咗巨大嘅迴響,仲吸引到好多人仿傚。

雖然芭蕾舞界嘅人好多一講到新古典芭蕾舞第一時間係會諗起 Balanchine,但係新古典芭蕾舞都有第啲出名嘅編舞師,好似係英國編舞師 Frederick Ashton 噉,就出名編寫咗 Symphonic Variations粵文直譯:交響獨舞)呢個作品[21]

現代[編輯]

內文: 現代芭蕾舞

現代芭蕾舞(modern ballet),又有叫當代芭蕾舞(contemporary ballet),係廿世紀中起源嘅一種舞蹈,結合咗芭蕾舞同現代舞嘅元素喺入面。現代芭蕾舞仲會運用古典芭蕾舞嗰柞技法,但係就加咗好多現代舞或者默劇等第啲表演藝術嘅元素喺入面,令到好多評論家都認為嚴格嚟講經已唔可以算係芭蕾舞嘅一種[22][23]:現代芭蕾舞好多時唔著鞋跳、通常冇乜故仔可言、有陣時仲會跟一啲有人聲嘅音樂嚟跳-呢啲特徵都係古典芭蕾舞絕對唔會有嘅嘢。因為噉,現代芭蕾舞俾好多人覺得佢衹不過係一種會用到古典芭蕾舞技法嘅現代舞,多過係一門芭蕾舞。廿一世紀仲有一啲舞蹈種類會將古典芭蕾舞嘅技法結合落去非西方嘅舞蹈嗰度整新舞種[24]

多得現代芭蕾舞,「ballet」呢個字喺西方世界嘅定義經已變到有些少含糊:「ballet」呢個詞開始變成俾人攞嚟形容「任何會局部運用古典芭蕾舞技法嘅舞蹈」-跟手自然亦有咗「古典芭蕾舞」呢個詞,用嚟指返完全建基於傳統芭蕾舞技法嗰種舞蹈。而喺廿一世紀,一個受芭蕾舞訓練嘅舞蹈員好多時都會俾人要求佢識跳傳統嘅古典芭蕾舞得嚟,又要識埋新古典或者現代芭蕾舞。

技法[編輯]

睇埋:芭蕾舞詞彙表

芭蕾舞包含咗好多唔同嘅技法同舞步,一場古典芭蕾舞劇通常所涉及嘅就係一串串用呢啲基本技法同舞步所砌出嚟嘅舞,連現代芭蕾舞都會局部使用呢啲技法,所以學生喺學芭蕾舞嗰陣個老師會要佢哋重複係噉做呢啲技法同舞步,做到熟嗮為止先至可去表演。以下呢幾種係最廣為人知,所有門派都會用嘅芭蕾舞技法[25][26][27]

五大腳位[編輯]

內文: 芭蕾舞腳位
五大腳位嘅圖解;最左手邊係第一腳位,佢隔離嘅係第二腳位,如此類推。
一個芭蕾舞蹈員做緊第五腳位。
一個芭蕾舞蹈員做緊快板,佢肌肉力量強所以跳得好高。
一個芭蕾舞蹈員喺度做緊 90 度嘅獨腳站立,而且仲要係用腳尖企喺度。

無論係跟邊個門派,芭蕾舞學生首先要學識嘅實係五大腳位(The five positions of the feet)。五大腳位係喺 1725 年由 Pierre Beauchamp 制定嘅,指五個雙腳腳板嘅擺法,係古典芭蕾舞當中最緊要最基礎嘅技法之一-芭蕾舞嘅舞步差唔多冚唪唥都係以五大腳位當中其中一個起始同作結嘅。五大腳位大致上如下[25]

  • 第一腳位(first position):兩腳腳踭掂住,而腳尖就指住相反方向,雙腿要直一直。
  • 第二腳位(second position):似第一腳位,但係兩腳腳踭要分開,彼此之間維持大約髖關節噉闊嘅距離。
  • 第三腳位(third position):同第一腳位類似,但係雙腳嘅腳踭要互相平行,大致上去到另一隻腳板嘅中間位置;呢個係比較少用嘅一個腳位,因為成日俾人以為係一個做得衰嘅第一或者第五腳位。
  • 第四腳位(fourth position):兩隻腳板平行但腳尖指住相反方向,腳尖要去到另一隻腳踭噉遠,兩隻腳板相距大約一隻腳板嘅距離。
  • 第五腳位(fifth position):係五大腳位當中最難做嗰個;同第四腳位類似,唯一嘅分別係兩隻腳板要掂住。

除咗呢五大腳位,仲有由烏克蘭裔芭蕾舞蹈員 Serge Lifar 發明嘅第六同第七腳位等等。

慢板[編輯]

慢板(adagio;呢個字喺意大利文入面係「慢慢嚟」噉解)係啲學生上芭蕾舞堂成日會做嘅一種運動,指啲學生慢慢(但要流暢)噉做出芭蕾舞嘅舞步[26][28]:無論級別,喺一堂古典芭蕾舞堂入面,個老師通常都會花唔少時間要啲學生企係條練功扶手隔離,一隻手掹住扶手,並且緩慢噉做出某啲特定嘅舞步;噉做嘅目的係要個學生首先精確噉掌握好個舞步,掌握好先至試吓用表演嗰陣會用嘅速度做出嗰個舞步,而且慢慢噉做出古典芭蕾舞嗰啲(好多時好講求體力嘅)舞步仲有助提升個學生嘅平衡力同力量。一個成功噉掌握到個舞步嘅學生會曉流暢又精確噉做出個舞步,兼且仲達到穩陣嘅平衡感同埋強而有力噉企到喺度。芭蕾舞老師跟手就可以按照一個學生喺做各種舞步慢板嗰時嘅表現評定佢掂唔掂。

快板[編輯]

快板(allegro;呢個字喺意大利文入面係「開心」噉解)係指一啲又快又充滿能量嘅舞步,可以分做好多種,而涉及親個舞蹈員跳起嘅舞步冚唪唥都屬於快板[26][29]。喺一堂芭蕾舞堂當中,呢類舞步通常係臨尾先至練嘅,因為啲學生通常都係喺課堂嘅尾聲嗰陣最處於熱好身嘅狀態。當啲學生要練快板嗰時,個老師會叫啲學生做細啲(法文:petit)嘅快板,跟住再要佢哋試吓做一啲幅度大啲嘅快板,最後要啲學生試吓挑戰自己嘅極限,睇吓自己喺跟足音樂嘅情況之下可以跳到幾高。

快板舞步喺一定程度上有男女之別:女舞蹈員跳親快板比較多係跳一啲幅度細,但講求雙腳速度快同靈敏嘅細快板,目的係展示陰柔又纖細嘅敏感性;而男舞蹈員做親快板就會比較多係做動作大啲(法文:grande)嘅快板,呢啲快板好多時會要求個舞蹈員跳得有噉高得噉高,而個目的係展示個舞蹈員嘅肌肉力量-陽剛嘅強健性[29]

獨腳站立[編輯]

內文: 獨腳站立

獨腳站立(Arabesque;呢個字喺法文入面係「阿拉伯式」噉解)係一種常見嘅舞步,指個舞蹈員用其中一條腿支撐住成個身體,而另一隻腿就抬高去身體後面,條抬高咗嘅腿可以係伸直又或者係屈曲咗嘅,所抬高嘅角度由 20 度左右嘅低角以至大過 90 度角都有,手嘅位置就唔定[30]。獨腳站立目的係要令成個身體形成一條由膊頭一路延伸落去抬起咗嗰條腿嘅腳趾尾嗰度嘅線,達到一種美學上嘅效果。一個專業嘅芭蕾舞蹈員會記得自己嘅「最大獨腳站立」-指佢喺唔犧牲流暢度同精確度之下做獨腳站立隻腳可以去到幾高。

腳尖企[編輯]

腳尖企(en pointe;呢個字喺法文入面係「用腳尖」噉解)係一種技法,指個舞蹈員跳舞嗰陣淨係腳尖掂地[26]-即係齋用腳趾支撐住成個身體嘅重量,目的係要令個舞蹈員望落好似無重量噉,達到一種輕盈嘅美感,喺女舞蹈員當中零舍常見。跳芭蕾舞所用嗰啲鞋係有特別設計嘅,經過強化所以能夠撐住個舞蹈員成個身體嘅重量。喺教芭蕾舞嘅過程當中,老師好多時會首先要啲學生做「半腳尖企」(demi-pointe),即係要啲學生試吓淨係腳板前半橛掂地,等佢哋腳板同腳趾有返噉上下強壯先至要佢哋做更加講求體力嘅腳尖企。

腳尖旋轉[編輯]

內文: 腳尖旋轉

腳尖旋轉(pirouette;呢個字喺法文入面係「旋轉」噉解)係另一種常見嘅舞步[31][32],指個舞蹈員腳尖企或者半腳尖企喺度,一隻腳掂地,而另一條腿抬起,再 360 度轉一個或者多個圈,通常都係用第四或者第六腳位做起始嘅,可以按照做旋轉嗰陣條腿抬高嘅角度或者對手嘅位置再細分做幾種。喺學芭蕾舞嘅過程當中,腳尖旋轉通常都係起碼去到中階嘅學生先會做嘅,噉係因為佢屬於相常之高難度嘅一種舞步(尤其係轉多過一個圈嗰種),要求個學生有極之勁嘅核心肌同埋平衡力,俾人形容做「芭蕾舞蹈員冚唪唥都想做到最好嘅大師級舞步」[33]。亦都因為噉,腳尖旋轉係比較高階啲嘅芭蕾舞考試當中差唔多實會考嘅一種舞步。

門派[編輯]

瓦加諾娃嘅相;1910 年影嘅。

啲人要學芭蕾舞,主要可以跟幾派學法:

法國派[編輯]

法國派芭蕾舞教學法可以話係所有芭蕾舞訓練嘅基礎。路易十四喺 1661 年創立皇家舞蹈學院,間接幫咗手制定一柞到咗廿一世紀芭蕾舞界(無論邊個流派)都仲會用嘅技法。而喺 1980 年代,俄羅斯芭蕾舞蹈員兼編舞者 Rudolf Nureyev 改革咗法國派,令到芭蕾舞界開始重新對法國派教法產生興趣[34]。法國派嘅教法特徵係技術上要求精確、流暢、同埋優雅,而且步法上又快又精細。法國派嗰種又快又細嘅步法好多時會造到個舞蹈員好似喺舞台上面漂移緊噉嘅視覺效果[35],而且喺做某啲舞步(port de bras 同 the épaulement)嗰陣會圓過俄羅斯式嘅[36]

瓦加諾娃方法[編輯]

內文: 瓦加諾娃方法

瓦加諾娃方法(Vaganova method)係一種源自俄羅斯芭蕾舞嘅芭蕾舞訓練法,由俄羅斯芭蕾舞老師 Agrippina Vaganova(中譯「瓦加諾娃」)所創。瓦加諾娃佢本來係一個芭蕾舞蹈員,後嚟喺 1916 年退休,改行做芭蕾舞老師,後尾仲喺 1934 年嗰陣寫出咗《The Fundamentals of Classical Dance》(粵文:古典舞嘅基礎)呢本書,呢本書俾好多後人引用,成為咗一本經典。瓦加諾娃方法結合咗浪漫時期嘅法國芭蕾舞嘅方法,又由意大利方法嗰度攞咗啲嘢,形成佢自己嘅一套風格[35][37][38]

瓦加諾娃方法到咗今日都仲有好多人用。佢嘅特色包括咗:呢種芭蕾舞教學法詳細得好交關,講到明每一個技法舞步要喺學芭蕾舞嘅邊一個階段教、要集中教幾耐、以及喺每個階段嘅學生應該有幾著重嗰個技法等;瓦加諾娃方法亦都強調要啲學生為咗正確噉跳啲舞步出嚟而發展力量、彈性、同埋耐力,而且對於手同腿嘅運用同樣噉重視,認為噉先至可以做到視覺上和諧嘅舞步;瓦加諾娃仲表示過認為大雙人舞(Grand pas de deux;指通常一男一女嘅兩個舞蹈員一齊跳嘅五部份舞)可以展示嗮所有重要嘅芭蕾舞技法,所以跟呢種方法嘅學生好多時喺要畢業嗰陣會俾老師要求跳一場大雙人舞[37]

切凱蒂方法[編輯]

內文: 切凱蒂方法

切凱蒂方法(Cecchetti method)由意大利芭蕾舞蹈員 Enrico Cecchetti(中譯「切凱蒂」)所創,切凱蒂佢又係芭蕾舞蹈員,退咗休之後教芭蕾舞,打後仲創制咗切凱蒂方法呢種到咗家吓都仲好多人用嘅芭蕾舞教學法。呢種教學法出咗名會運用人體解剖學嘅知識嚟教啲學生學芭蕾舞-切凱蒂方法有諗到人體解剖學嘅原理,會要求學生每個禮拜定時定候噉做某啲特定嘅運動嚟鍛鍊某幾舊(對跳芭蕾舞嚟講零舍緊要嘅)肌肉,精確到好似運動科學噉嘅樣。除此,呢種教法嘅特色仲包括強調平衡、輕柔感、同埋力量[35][39]。現今古典芭蕾舞常用嘅嗰八種手部運行(port de bras;一種練對手臂點喺跳舞嗰陣郁嘅運動)都係由切凱蒂方法嗰度嚟嘅。

到咗廿一世紀,切凱蒂方法喺世界各地都有俾人採用。

巴蘭奇方法[編輯]

巴蘭奇同美國芭蕾舞蹈員 Suzanne Farrell(佢後嚟嘅情人)一齊表演堂吉訶德嘅一幕;1965 年影嘅。
內文: 巴蘭奇方法

巴蘭奇方法(Balanchine method)係美國芭蕾舞大師 George Balanchine(中譯「巴蘭奇」)喺紐約市芭蕾舞團做嘢嗰陣所創嘅一種芭蕾舞教學法,當中巴蘭奇參考咗佢喺俄羅斯學芭蕾舞嗰時學到嘅技法。呢種教學法出咗名會以極快嘅速度做出慣性嘅舞步,強調線條,最大嘅特色係身體擺位嘅方法好反傳統[40][41]:用呢種風格嘅舞蹈員要有好高嘅柔軟度,好多時會繃緊雙手甚至隻腳嘅肌肉,而且仲好興將手腳擺喺不平衡嘅位置。因為佢嘅極端性,用巴蘭奇方法學芭蕾舞嘅學生比較容易喺練舞嗰陣整親。

巴蘭奇俾好多人認為係美國芭蕾舞嘅代表,所以有好多個美國嘅芭蕾舞團,好似係邁亞美城市芭蕾舞團同美國芭蕾舞學校(School of American Ballet)呀噉,都會用巴蘭奇方法嚟教芭蕾舞。

出名嘅芭蕾舞劇[編輯]

睇埋:芭蕾舞劇一覽

睇埋[編輯]

參考[編輯]

  • Anderson, Jack (1992). Ballet & Modern Dance: A Concise History (2nd ed.). Princeton, NJ: Princeton Book Company, Publishers. ISBN 0-87127-172-9.
  • Au, Susan (2002). Ballet & Modern Dance (2nd ed.). London: Thames & Hudson world of art. ISBN 0-500-20352-0.
  • Bland, Alexander (1976). A History of Ballet and Dance in the Western World. New York: Praeger Publishers. ISBN 0-275-53740-4.
  • Darius, Adam (2007). Arabesques Through Time. Harlequinade Books, Helsinki. ISBN 951-98232-4-7
  • Gordon, Suzanne (1984). Off Balance: The Real World of Ballet. McGraw-Hill. ISBN 0-07-023770-0.
  • Kant, Marion (2007). Cambridge Companion to Ballet. Cambridge Companions to Music (1st ed.). Cambridge,UK: Cambridge University Press, Publishers. ISBN 978-0-521-53986-9.
  • Kirstein, Lincoln; Stuart, Muriel (1952). The Classic Ballet. New York: Alfred A Knopf.
  • Lee, Carol (2002). Ballet In Western Culture: A History of its Origins and Evolution. New York: Routledge. ISBN 0-415-94256-X.

[編輯]

  1. 1.0 1.1 Anderson, Jack (1992). Ballet & Modern Dance: A Concise History (2nd ed.). Princeton, NJ: Princeton Book Company, Publishers.
  2. Jonas, Gerald (1998). Dancing: the Pleasure, Power, and Art of Movement. San Val.
  3. Kirstein, Lincoln; Stuart, Muriel (1952). The Classic Ballet. New York: Alfred A Knopf.
  4. What Exactly Is Contemporary Ballet?. Dance Magazine.
  5. Liddell, Henry George; Scott, Robert. "A Greek-English Lexicon". Perseus Digital Library.
  6. Chantrell, Glynnis (2002). The Oxford Essential Dictionary of Word Histories. New York: Berkley Books.
  7. 7.0 7.1 Clarke, Mary; Crisp, Clement (1992). Ballet: An Illustrated History. Great Britain: Hamish Hamilton. pp. 17–19.
  8. 8.0 8.1 Homans, Jennifer (2010). Apollo's Angels: A History of Ballet. New York: Random House. pp. 1–4.
  9. "The Art of Power: How Louis XIV Ruled France ... With Ballet". 2017-03-15.
  10. 10.0 10.1 Greskovic, Robert (1998). Ballet 101: A Complete Guide to Learning and Loving the Ballet. New York, New York: Hyperion. pp. 46–57.
  11. "Ballet And Modern Dance: Using Ballet As The Basis For Other Dance Techniques". Student Resources.
  12. Wulff, Helena (1998). Ballet Across Borders: Career and Culture in the World of Dancers. Oxford: Berg. p. 44.
  13. Grant, Gail (1982). Technical Manual and Dictionary of Classical Ballet. New York, US: Dover Publications.
  14. What Is Classical Ballet?. TutuTix.
  15. "The Nutcracker and the Four Realms Press Kit". wdsmediafile.com.
  16. Romantic Ballet. Victoria and Albert Museum.
  17. Garafola, L. (1997). Rethinking the Sylph: New Perspectives on the Romantic Ballet. Wesleyan University Press.
  18. Ashton, Geoffrey (1985), Giselle, Woodbury, New York: Barron's.
  19. Neoclassical Ballet.
  20. 20.0 20.1 Scholl, Tim (1994). From Petipa to Balanchine: Classical Revival and the Modernization of Ballet. London: Routledge.
  21. Symphonic Variations. Royal Opera House.
  22. Ballet, modern dance separated by blurred line. The Washington Post.
  23. Finch, Terry. "The history and style of contemporary ballet". Terry Finch.
  24. Kourlas, Gia (2016-09-02). "Hiplet: An Implausible Hybrid Plants Itself on Pointe". The New York Times.
  25. 25.0 25.1 Ballet Terms for Beginners. TutuTix.
  26. 26.0 26.1 26.2 26.3 Hammond, S. N. (2000). Ballet basics. McGraw-Hill Humanities, Social Sciences & World Languages.
  27. Grant, G. (2012). Technical manual and dictionary of classical ballet. Courier Corporation.
  28. Adagio. BalletHub.
  29. 29.0 29.1 Allegro. BalletHub.
  30. Arabesque. BalletHub.
  31. Lin, C. W., Chen, S. J., Su, F. C., Wu, H. W., & Lin, C. F. (2014). Differences of ballet turns (pirouette) performance between experienced and novice ballet dancers. Research quarterly for exercise and sport, 85(3), 330-340.
  32. Denardi, R. A., & Corrêa, U. C. (2013). Effects of instructional focus on learning a classical ballet movement, the pirouette. Journal of Dance Medicine & Science, 17(1), 18-23.
  33. Ballet Terms - Pirouette Tips.
  34. "Ballet Methods: What Are They? | TutuTix". TutuTix.
  35. 35.0 35.1 35.2 "Different Ballet Methods". www.ottawaballetschool.com.
  36. "The Paris Opéra Ballet School". Dance Spirit. 2010-01-01.
  37. 37.0 37.1 Agrippina, I., & Vaganova, A. (1969). Basic principles of classical ballet: Russian ballet technique. Courier Corporation.
  38. Pawlick, C. E. (2011). Vaganova today: the preservation of pedagogical tradition. University Press of Florida.
  39. Beaumont, C. W., & Idzikowski, S. (2003). The Cecchetti method of classical ballet: Theory and technique. Courier Corporation.
  40. Levin, D. M. (1976). Balanchine's formalism. Salmagundi, (33/34), 216-236.
  41. Walczak, B., & Kai, U. (2008). Balanchine the teacher: fundamentals that shaped the first generation of New York City Ballet dancers. University Press of Florida.

[編輯]