芭蕾舞軟鞋

一對用皮革造嘅芭蕾舞軟鞋；個舞蹈員喺度做緊第五腳位。

2023 年喺香港演藝學院影到嘅相；有人喺度曬乾洗好嘅芭蕾舞軟鞋。

芭蕾舞軟鞋（英文：slippers / soft shoes）係一種輕身而且柔軟嘅鞋，鞋底會有一定彈性，專門設計嚟俾人跳芭蕾舞嗰陣著。一般嚟講，跳芭蕾舞嘅人喺芭蕾舞堂之中實會著住芭蕾舞軟鞋跳舞，而女舞蹈員要上舞台表演嗰時就好多時會改著足尖鞋，方便佢哋做完全嘅腳尖企。

構造

芭蕾舞鞋嘅鞋底多數用皮革造，但嗰浸皮革通常唔會一路延伸到去隻鞋嘅邊邊。鞋底可以係一嚿過嘅，但又有所謂嘅分開鞋底式，即係鞋底分兩嚿，一嚿喺腳踭下而另一嚿就喺腳掌前半橛嘅下面，噉對鞋就更有彈性。芭蕾舞軟鞋鞋底以外嘅部份，材質由軟皮革、帆布以至綢緞等都有。帆布會平啲，但比較易爛。

芭蕾舞鞋多數會有條帶喺腳掌上方，等對鞋冇咁易跳跳吓舞甩出嚟。好多芭蕾舞鞋會用兩條噉嘅帶，而跳芭蕾舞嘅人會將兩條帶以 X 字噉嘅形式打交叉。

選用

一般認為，揀芭蕾舞鞋要跟以下嘅原則：

• 對鞋要有返咁上下緊，如果唔係好容易會跳舞嗰陣撠kik1親；
• 喺款式同色水上，女舞蹈員通常會著粉色嘅軟鞋，而男舞蹈員就通常會著白色或者黑色嘅；
• 芭蕾舞蹈員揀襪褲嗰時，好興揀一啲同自己對鞋一樣顏色嘅，等自己可以做到望落好似冇著鞋跳噉嘅視覺效果；順帶一提，廿世紀中興起嘅現代芭蕾舞好多時唔著襪褲跳，所以令到多咗人用肉色嘅芭蕾舞軟鞋。

睇埋

• 芭蕾舞
• 足尖鞋

拎

• （英文）Bloch.com，舞蹈用品公司 Bloch 嘅官網。