足尖鞋
足尖鞋（粵拼：zūk zīm ha̖ai；英文：pointe shoes）係一種為女芭蕾舞蹈員特別設計嘅芭蕾舞鞋，俾好多人認為係芭蕾舞用具當中其中一種最易認、最廣為人知嘅。呢種鞋最大嘅特徵係喺腳尖嗰個位零舍加強咗，會用厚啲嘅布料甚至乎木等硬淨啲嘅材料嚟造（正常嚟講，芭蕾舞鞋係用絲綢同真皮等軟淋淋嘅材料造嘅），用途在於幫著住呢種鞋嘅舞蹈員做完全嘅腳尖企（en pointe）做一段長啲嘅時間。
足尖鞋通常唔擺得好耐：一個舞蹈員會著呢啲鞋，通常係因為要上台表演或者特登喺度勁練習做腳尖企；即係話一個舞蹈員一著親呢啲鞋，就實會係噉勁做腳尖企－將自己全身嘅重量施嗮落去對鞋嘅腳尖位度，所以一對足尖鞋好多時著得嗰十零廿個鐘頭已經開始爛；相比之下，一對普通嘅芭蕾舞鞋喺正常情況下，起碼可以著到成兩三個月[1]。
歷史
[編輯]睇埋：芭蕾舞史
足尖鞋源於浪漫芭蕾舞（romantic ballet）盛行嘅 1820 年代[2]，當時意大利名芭蕾舞蹈員瑪麗塔里奧尼（Maria Taglioni）開始咗嘗試做腳尖企，而因為當時仲未有足尖鞋呢家嘢，佢就自己郁手改造自己對軟鞋，將棉花塞入去對鞋嘅腳尖位嗰度，等自己做腳尖企嗰陣腳趾冇咁辛苦。打後腳尖企開始盛行，成為正規芭蕾舞技巧嘅一部份，正式令到芭蕾舞界研究整足尖鞋。而遲吓到咗 1862 年，足尖鞋嘅製作技術成熟，大致上成為咗廿一世紀見到嘅樣[3]。
