現代芭蕾舞

出自維基百科,自由嘅百科全書
Jump to navigation Jump to search
一個跳現代芭蕾舞嘅舞蹈員

現代芭蕾舞粵拼jin6 doi6 baa1 leoi4 mou5英文modern ballet),又有叫當代芭蕾舞contemporary ballet),係廿世紀中起源嘅一種舞蹈,結合咗古典芭蕾舞現代舞嘅元素喺入面。現代芭蕾舞會運用古典芭蕾舞嗰柞技巧,但相對於幾乎純粹用古典芭蕾舞技巧嘅古典芭蕾舞嚟講,現代芭蕾舞會加入好多現代舞或者默劇等第啲表演藝術嘅元素喺入面,形成一種唔似得古典芭蕾舞噉規範化嘅舞種,而且因為現代芭蕾舞表演當中傳統芭蕾舞技巧嘅重要性低咗,所以好多藝術評論家都認為,嚴格嚟講現代芭蕾舞經已唔可以算係芭蕾舞嘅一種[1][2]

現代芭蕾舞有好多反叛性嘅特徵(呢點似現代舞):現代芭蕾舞好多時唔著鞋跳(古典芭蕾舞實會著軟鞋跳)、通常冇乜故仔可言(古典芭蕾舞劇實會有故仔)、有陣時仲會跟一啲有人聲嘅音樂嚟跳(古典芭蕾舞會用純音樂,舞蹈員唔會出聲,所以係冇人聲嘅演藝)。因為上述嘅特徵,現代芭蕾舞俾一啲評論家覺得佢衹不過係一種會用到古典芭蕾舞技巧嘅現代舞,多過係一門芭蕾舞[1]。廿一世紀仲有啲舞蹈種類會將古典芭蕾舞技巧結合落去非西方嘅舞蹈嗰度整新舞種[3]

多得現代芭蕾舞,「ballet」呢個字喺西方世界嘅定義經已變到有些少含糊:「ballet」呢個詞開始變成俾人攞嚟形容「任何會局部運用古典芭蕾舞技巧嘅舞蹈」-跟手自然亦有咗「古典芭蕾舞」呢個詞,用嚟指返完全建基於傳統芭蕾舞技巧嗰種舞蹈。而喺廿一世紀,一個受芭蕾舞訓練嘅舞蹈員好多時都會俾人要求佢識跳傳統嘅古典芭蕾舞得嚟,又要識埋新古典或者現代芭蕾舞[1]

睇埋[編輯]

[編輯]

  1. 1.0 1.1 1.2 Ballet, modern dance separated by blurred line. The Washington Post.
  2. Finch, Terry. "The history and style of contemporary ballet". Terry Finch.
  3. Kourlas, Gia (2016-09-02). "Hiplet: An Implausible Hybrid Plants Itself on Pointe". The New York Times.

[編輯]