天鵝湖

出自維基百科,自由嘅百科全書
Jump to navigation Jump to search
2007 年邁亞美城市芭蕾舞團演嘅《天鵝湖》,王子同公主共舞嘅一幕;天鵝湖講述嘅係一個愛情故事。
2008 年一幕小天鵝之舞;小天鵝之舞係多數版本嘅天鵝湖都會有嘅一段,由幾個配角女舞蹈員扮演小天鵝團隊跳。
堪薩斯城芭蕾舞團演嘅《天鵝湖》一幕;邪惡魔法師羅夫巴特喺王子同公主身後做大跳躍,展示作為大奸角嘅霸氣。

天鵝湖》(粵拼tin1 o4 wu4英文Swan Lake俄文Лебеди́ное о́зеро,「lebedínoye ózero」)係一齣古典芭蕾舞劇,由俄羅斯作曲家柴可夫斯基(Pyotr Ilyich Tchaikovsky)作曲[1],史上由俄羅斯嘅波修瓦劇院(Bolshoi Ballet)首次公演於 1877 年[2][3]。天鵝湖初頭並唔受好評,但喺 19 世紀尾柴可夫斯基過身之後,有俄羅斯大編舞師將呢齣芭蕾舞劇重製同改編,跟住喺 1895 年上演嗰個版本就令天鵝湖大受歡迎。時至今日,天鵝湖經已係世上其中一套最出名、最常俾人攞嚟返炒嘅芭蕾舞劇,同胡桃夾子以及睡美人一齊俾人列咗做柴可夫斯基嘅三大傑作[4][5]

天鵝湖取材自俄羅斯嘅一個民間故事,講述悲劇公主奧德特(Odette)嘅故仔。唔同版本嘅天鵝湖喺幕嘅鋪排、編舞、同埋情節嘅某啲細節位可以有些少唔同[2],但共通點係都會用返柴可夫斯基作嘅曲同埋喺故仔上跟返原著個大方向:多數版本嘅天鵝湖有三至四幕,第一幕講述生得靚仔、但性格唔成熟嘅王子齊格佛列德(Siegfried)開舞會慶祝生日,喺舞會當中俾母后催佢結婚;齊格佛列德因為覺得自己冇得自由戀愛而唔開心,然後決定同佢朋友去湖邊打獵散吓心;第二幕就講王子去到湖邊,差啲想搵箭射隻天鵝嗰陣,見到嗰隻天鵝變咗做公主奧德特,得知奧德特受邪惡魔法師羅夫巴特(Von Rothbart)詛咒,變成天鵝,喺某啲時間先可以化做人身,兩個人跟住仲鍾意咗對方;喺跟住落嚟嗰一到兩幕當中,羅夫巴特會嘗試阻礙兩個人嘅戀情,而最後結局視乎版本而定-有版本嘅天鵝湖大團圓結局,講齊格佛列德同奧德特最後合力打低羅夫巴特,解開詛咒,又有啲版本係最後悲劇收場,講奧德特最後俾羅夫巴特捉走[4][6]

編舞方面,多數版本嘅天鵝湖都會有齊格佛列德做嘅獨舞(第一幕基本上實有)同奧德特做嘅獨舞(第二幕基本上實有)等嘅舞段,而且喺第二幕當中,通常都會有班女舞蹈員團隊跳舞,著起白色嘅芭蕾舞裙扮演小天鵝,呢班女舞蹈員所跳嘅就係好出名嘅小天鵝之舞(dance of the cygnets)[7]

角色[編輯]

一般嚟講,天鵝湖芭蕾舞劇有以下嘅角色要演[2][4]

  • 奧德特公主(Princess Odette),又有叫天鵝公主(Swan Princess)或者白天鵝(White Swan):一位受詛咒而變成天鵝嘅靚女公主。
  • 齊格佛列德王子(Prince Siegfried):一位愛上奧德特嘅靚仔王子。
  • 羅夫巴特男爵(Baron Von Rothbart):對奧德特落咒嘅邪惡魔法師。
  • 奧迪妮(Odile),又有叫黑天鵝(Black Swan):羅夫巴特個女,協助羅夫巴特阻礙奧德特同齊格佛列德嘅戀情;通常會著黑色裙,對應著白色裙嘅奧德特。
  • 班勞(Benno,全名「Benno von Sommerstern」):王子個朋友。
  • 女王(The Queen):王子個阿媽,因為希望王子成熟啲而催佢結婚。
  • 胡夫剛(Wolfgang):王子個老師。
  • 王子班朋友、出席王子生日舞會嘅平民同其他賓客、陪同奧德特嘅一眾小天鵝(cygnets)、以及出席舞會嘅貴族... 等等。

故仔大綱[編輯]

天鵝湖一般會分做四幕四個景(東歐以外)或者三幕四個景(包括俄羅斯在內嘅東歐),結局有多個可能性:天鵝湖本嚟係悲劇收場嘅,但有唔少版本將個結局改做開心大團圓結局[4]

典型版本[編輯]

序幕[編輯]

有啲版本會有序幕,通常展示奧德特公主遇上邪惡魔法師羅夫巴特,俾佢落咒變成天鵝[8]

第一幕[編輯]

背景:皇宮前一個華麗嘅庭院

(Scène: Allegro giusto)王子齊格佛列德喺度同佢老師、朋友、同一班平民搞佢嘅生日舞會(Waltz: Tempo di valse)。佢哋玩得好開心之際,女王(齊格佛列德嘅阿媽)出現,女王覺得佢個仔成日淨係掛住玩,唔得成熟,並且開口,要齊格佛列德喺第二日嘅皇宮晚會嗰度揀個女人結婚(Scène: Allegro moderato;有啲版本仲會加一段係,女王搵咗幾個女人返嚟俾佢個仔揀)。齊格佛列德有啲唔開心,覺得自己冇得自由戀愛,跟住佢個朋友班勞同佢老師嘗試做啲等齊格佛列德開心返啲。喺黃昏嗰時(Sujet),班勞見到一群天鵝喺天上面飛過,提議佢哋一齊去打獵(Finale I)。於是齊格佛列德就攞住把出發去打獵[2]

第二幕[編輯]

背景:明月映照嘅夜晚,一個森林當中、一座小聖堂嘅廢墟旁嘅一個湖畔

齊格佛列德同佢班朋友走散咗,嚟到湖畔,同時一群天鵝降落(Scène: Moderato)。齊格佛列德攞起把弩,瞄準想射隻天鵝(Scène: Allegro moderato),但隻天鵝跟住嗰一刻變身-變成靚女嘅奧德特公主(Scène: Moderato)。初頭,奧德特因為齊格佛列德想射佢而覺得驚,但齊格佛列德見狀即刻擺低把弩,應承唔郁手傷奧德特;然後奧德特向齊格佛列德解釋,佢同佢班同伴因為俾邪惡魔法師羅夫巴特詛咒,日頭會變成天鵝,要等到夜晚喺有魔咒嘅湖畔嗰度先可以化返成人身(而個湖據講係由奧德特阿媽嘅眼淚形成嘅)。要破個詛咒衹有一個方法:要有個從來未談過戀愛嘅人發誓永遠愛奧德特,個咒先解到。呢個時候,羅夫巴特突然間出現(Scène: Allegro vivo),齊格佛列德想對羅夫巴特郁手,但奧德特阻止佢-如果羅夫巴特死咗,個咒就會永遠解唔到[2]

2007 年一場天鵝湖表演第二幕其中一段;奧德特企中間,班小天鵝圍住佢跳舞。

羅夫巴特跟住消失,而奧德特同佢班同伴就喺湖邊唞(Scène: Allegro, Moderato assai quasi andante)。同時,齊格佛列德一嘢打爛佢把弩,同奧德特互相鍾意咗對方,而齊格佛列德暗中決心想要得到奧德特信任,幫佢解咒。然後冇幾耐,天光,奧德特同佢嘅同伴就變返做天鵝,焗住要返去個湖嗰度[2]

第三幕[編輯]

背景:皇宮嘅舞殿

皇宮開舞會,賓客一個個嚟到。女王帶六個公主嚟,要齊格佛列德揀一個做老婆(Entrance of the Guests and Waltz)。喺呢個時候,羅夫巴特扮裝,帶住佢個女奧迪妮(個樣變到同奧德特好似)到場(Scène: Allegro, Allegro giusto)。六個公主嘗試跳舞引齊格佛列德注意(Pas de six),但齊格佛列德淨係留意到奧迪妮(Scène: Allegro, Tempo di valse, Allegro vivo);喺多個版本當中,奧德特會喺呢個時候出場,喺窗外嘗試叫齊格佛列德小心但失敗。然後齊格佛列德-諗住奧迪妮就係奧德特-會向在座嘅人宣布想同奧迪妮結婚,而羅夫巴特大笑,俾齊格佛列德知道自己衰咗。心知不妙嘅齊格佛列德跟住就快馬趕去湖嗰度[4]

2007 年一場天鵝湖表演第三幕其中一段;羅夫巴特(中間著黑色衫嘅男人)帶住奧迪妮(著黑色裙嘅女人)到場,齊格佛列德(右邊著灰白色衫嗰個)喺眾多賓客面前準備同奧迪妮跳舞。

第四幕[編輯]

背景:湖畔

奧德特好唔開心,佢班同伴嘗試安慰佢。齊格佛列德趕到湖邊,係噉向奧德特道歉。奧德特唔怪佢,但而家個咒解唔到。喺傳統嘅悲劇收場當中,奧德特唔想再做天鵝,於是選擇自殺,心愛奧德特嘅齊格佛列德選擇陪佢一齊跳入湖嗰度死。此舉打破咗羅夫巴特嘅魔法,令到奧德特班同伴變返做人類,而羅夫巴特就死亡。最後嗰段會係奧德特班同伴望住齊格佛列德同奧德特一齊升上天堂,永遠喺愛當中團聚[4]

2016 年堪薩斯城芭蕾舞團演嘅天鵝湖第四幕一段;齊格佛列德同奧德特喺度跳雙人舞,同時羅夫巴特(右邊著黑色衫嗰個男人)喺後面𥄫實佢哋。

原版大綱[編輯]

描繪 1877 年原版天鵝湖芭蕾舞劇嘅一幅畫

以下係 1877 年原版天鵝湖嘅大綱[9]

第一幕:齊格佛列德同佢班朋友以及平民一齊喺度慶祝齊格佛列德成年禮。女王喺呢個時候嚟到,叫佢個仔快啲結婚,想確保齊格佛列德唔會因為娶來路不明嘅女人而令家族蒙羞。女王話搞緊個舞會,要齊格佛列德喺到時出席嘅貴族閨女當中揀個做老婆。成年禮之後,齊格佛列德同佢朋友班勞見到天上有群天鵝飛過,決定去打獵。

第二幕:齊格佛列德同班勞一路跟住群天鵝去到湖邊,但群天鵝唔見咗。一個戴住皇冠嘅女人出現,並且接近齊格佛列德同班勞。個女人叫奧德特,自稱係頭先嗰群天鵝嘅其中一隻,並且解釋成件事:奧德特阿媽係一個好嘅仙子,嫁咗俾個騎士,奧德特阿媽過咗身之後,佢阿爸再娶;而奧德特個後母係一個女巫,想殺咗奧德特,但奧德特阿爺救返佢,帶奧德特嚟呢個(由佢嘅眼淚形成嘅)湖嗰度住。奧德特同佢嘅朋友有能力變身成天鵝,於是就喺個湖嗰度暫住,避開奧德特個後母。根據奧德特,當佢結婚嗰時,個女巫就唔會再有能力傷害佢。齊格佛列德話噉快就鍾意咗奧德特,但奧德特驚個女巫會傷害齊格佛列德。

第三幕:女王搞嘅舞會開始,一眾貴族閏女喺城堡嘅舞殿嗰度跳舞,想引起王子齊格佛列德嘅注意,但齊格佛列德唔肯揀個做老婆。喺呢個時候,男爵羅夫巴特同佢個女奧迪妮到場,齊格佛列德覺得奧迪妮生得好似奧德特(但班勞唔係噉覺得)。齊格佛列德開始同奧迪妮跳舞,對奧迪妮產生好感,最後宣布想同奧迪妮結婚。喺嗰一刻,羅夫巴特變身成一隻惡魔,奧迪妮大笑,而一隻戴住皇冠嘅天鵝出現喺窗嗰度。齊格佛列德嚇到跑咗去城堡外面。

第四幕:奧德特喊住噉話俾佢班同伴知,齊格佛列德冇守愛嘅承諾。跟住齊格佛列德嚟到湖邊,奧德特嘅同伴離開,叫奧德特一齊走,但奧德特想留多一陣,見齊格佛列德最後一面。同時,個湖開始颳起風暴。齊格佛列德嚟到奧德特面前囈奧德特原諒佢,但奧德特唔接受佢原諒,想走。喺呢個時候,齊格佛列德一嘢攞走奧德特個皇冠,掟個皇冠入湖度,想夾硬佔有奧德特。化成咗隻貓頭鷹嘅女巫攞走個皇冠。跟住奧德特因為失去皇冠嘅法術保護而開始死亡,跌入齊格佛列德嘅懷抱入面。然後個湖湧起大浪,一嘢將齊格佛列德同奧德特吞噬。最後個景係湖變返平靜,一群天鵝降落喺湖水面。

原版 1877 年天鵝湖並唔受歡迎,例如好多人都覺得個故仔嘅結局有少少無厘頭,而且齊格佛列德喺第四幕嘅行為似個奸角,所以就有咗後嚟嘅改版[9][10][11]

睇埋[編輯]

參考書[編輯]

  • G. Abraham, ed. Tchaikovsky: a Symposium (London, 1945/R, R 1970 as The Music of Tchaikovsky. London: W.W. Norton, 1974).
  • C. W. Beaumont. The Ballet called Swan Lake (London, 1952).
  • Brown, David. Tchaikovsky: The Man and His Music. London: Faber & Faber, 2006. 108–119.
  • Brown, D. (1984). Tchaikovsky's Mazeppa. The Musical Times, 125(1702), 696-698.
  • Norris, George. Stanford, the Cambridge Jubilee and Tchaikovsky (London, 1980).
  • Nuzzo, Nancy B. "Swan Lake: a chronology; The sleeping beauty: a chronology; other Tchaikovsky ballets." Dance magazine, 55 (June 1981), 57–58.
  • Pudelek, Janina. "Swan Lake" in Warsaw, 1900. Dance Chronicle, 13 (1990–1991): 359–36.
  • Robinson, Harlow. "Review: Untitled." The Slavic and East European Journal, 31 (1987): 639–640.
  • Wiley, Roland John. Tchaikovsky’s Ballets: Swan Lake, Sleeping Beauty, Nutcracker (Oxford, 1985, 2/1991).

[編輯]

  1. Chaĭkovskiĭ, Modest Ilʹich; Newmarch, Jeaffreson; Rosa Harriet (1906). The life & letters of Peter Ilich Tchaikovsky. J Lane. p. 735.
  2. 2.0 2.1 2.2 2.3 2.4 2.5 C. W. Beaumont. The Ballet called Swan Lake (London, 1952).
  3. Chaĭkovskiĭ, Modest Ilʹich; Newmarch, Jeaffreson; Rosa Harriet (1906). The life & letters of Peter Ilich Tchaikovsky. J Lane. p. 735.
  4. 4.0 4.1 4.2 4.3 4.4 4.5 All you need to know about Tchaikovsky's Swan Lake. Reader's Digest.
  5. The Immortal Swan Lake. Dance Informa.
  6. Kant, Marion, ed. (2007). The Cambridge Companion to Ballet. Cambridge Companions to Music. Cambridge and New York: Cambridge University Press. p. 164. ISBN 978-0-521-53986-9.; 'Old style' date March 4.
  7. 4 Little Swans. National Public Radio's All Things Considered, May 13, 1997. "The dancers who perform that famous chorus line in Swan Lake always strive to look as though they're dancing as one unit. Jean Battey Lewis reports on the amusing ways dancers keep it all together, remember all the steps, and look just alike while visions of stardom dance in their heads. The American Ballet Theater is starting its season with several performances of Swan Lake this week."
  8. Swan Lake. The Ballet Bag.
  9. 9.0 9.1 Cohen, S. J. (1982). Next week, Swan Lake: reflections on dance and dances. Wesleyan University Press.
  10. History of Tchaikovsky's Swan Lake.
  11. How Swan Lake Became the Greatest Ballet in the World. History Hit.

[編輯]

後台嘢[編輯]

影片[編輯]

音樂[編輯]

  • Swan Lake: Scores at the International Music Score Library Project (IMSLP).
  • Free sheet music of Danse Napolitaine from Cantorion.org.