青蛙王子

呢幅圖畫描繪小公主巧遇青蛙。

依幅插畫描繪青蛙幫公主執返個波上嚟。

《青蛙王子》（粵拼：cing1 waa1 wong4 zi2；英文：The Frog Prince）係一個好出名嘅童話故事。個故仔响 1812 年畀格林兄弟收錄咗入《格林童話》裏面，而且仲係成本書第一個故事。

呢個故仔响德文入面個名叫 Der Froschkönig oder der eiserne Heinrich—呢個名意思係青蛙王或者鐵亨利噉解。

劇情

《青蛙王子》嘅劇情大綱如下。

好耐好耐以前有位小公主，响國王咁多個女當中，佢係年紀最細同時亦係生得最可人嘅。小公主有一個金波，得閒最鍾意就係攞住個金波玩拋接。有一日，小公主帶住金波去城堡附近嘅樹林玩。正當佢响個井隔離玩拋接玩到興高采烈之際，一個唔覺意就畀個波跌咗落井。公主諗住今次個波執唔返，就開始喊起上嚟。點知响呢個時候，有一隻青蛙出現响佢面前。

「公主，我可以幫你執返個波上嚟，但係我有個條件。」

「你幫我執返個波啦。我畀我粒寶石你吖，或者要我畀頂皇冠你都得。」

「我唔想要寶石或者皇冠。我想你同我做朋友，同我一齊食飯，仲要畀我睏响你張床上面。」

小公主諗都唔諗就應承咗青蛙嘅要求。青蛙二話不說，即刻跳咗落個井裏面，執返個波上嚟。不過小公主一攞返個波，就嗱嗱臨跑返城堡，仲完全忽略青蛙。

青蛙唔肯放棄。佢响晚飯時間走去城堡敲門，仲同國王講晒成件事嘅經過。國王認為自己個女唔守承諾係唔啱嘅，於是就下令叫小公主同青蛙做朋友，要小公主同青蛙同檯用餐。小公主呢餐食得好唔滋味—佢心入面覺得青蛙係一種好核突嘅生物。

食完嘢之後，青蛙就話覺得眼睏，話想睏吓小公主嗰張又軟又舒服嘅床。小公主即場打咗個冷震，唔想畀一隻凍冰冰濕立立嘅核突青蛙睏自己張床，於是佢就將青蛙擺响床最角落頭嗰個位，佢自己就睏另一邊。青蛙跟住就講：

「畀我睏响你隔離個位。否則我就話畀你父皇知。」

小公主嬲起上嚟，就一嘢捉實青蛙，再出盡全身嘅力將青蛙掟向牆度。

「衰青蛙，睇你肯收聲未。」

點知响呢個時候，青蛙變咗做一位英俊嘅王子。小公主一眼就鍾意咗佢。原來王子畀女巫詛咒變咗青蛙，小公主此舉幫佢解開咗詛咒。王子然後仲話第二日會有人嚟接佢，想請ceng2公主跟佢去佢嘅王國玩。

到咗第二日，真係有架馬車嚟咗城堡。坐住架馬車嚟接王子嘅係忠誠亨利（Heinrich）。王子被變成青蛙嘅時候，亨利响自己心口綁咗三條鐵帶抵禦心入面嘅苦痛。亨利接王子同小公主上馬車，架馬車一路行，途中亨利心口嘅鐵帶一路慢慢斷咗，反映亨利個心唔再感受到苦痛。

到咗最後，王子同公主結婚，大團圓結局。

版本

有好多創作品都有由呢個故仔度取材，例子可以睇吓迪士尼嘅《公主與青蛙》（2009）。

有好多版本話公主係惜sek3咗青蛙一啖，先至令青蛙變成王子。到咗廿一世紀初，啲人講故仔嗰陣一般都比較偏向講「公主惜青蛙一啖令佢變王子」多過「公主對青蛙施以暴力令佢變王子」。

睇埋

• 《美女與野獸》
• 《天鵝湖》
• 童話
• 連蟲

拎

• Ben Sir 與青蛙王子（歐陽偉豪），明報月刊
• 青蛙王子 | The Frog Prince | 信守對別人的承諾 - 粵語，用粵語講《青蛙王子》嘅故事，用語上夾雜咗標準官話。
• The Frog-King, or Iron Henry, American Literature （英文），《青蛙王，或者鐵亨利》一個英文譯版。
• Literature / Frog Prince （英文），TV Tropes 講《青蛙王子》呢個故仔。