美女與野獸

  想搵第二個意思嘅話，請睇美女與野獸 (搞清楚)。

依幅 2011 年嘅插圖描繪畫畫人想像中嘅美女同野獸。

《美女與野獸》（粵拼：mei5 neoi5 jyu5 je5 sau3；法文：La Belle et la Bête；英文：Beauty and the Beast）係個好出名嘅童話故事，已知最早嗰個版本出自 1740 年，係由法國一位小說家作嘅。

《美女與野獸》個故仔講嘅主要係一個靚女（美女）同一隻核突野獸之間嘅愛情故事。喺最早嘅版本當中，美女嘅阿爸係一個商人，有日佢唔覺意走咗入一座有魔法嘅城堡，喺城堡嘅花園度摘咗朵玫瑰花諗住攞去送畀自己個愛女，點知城堡嘅主人（野獸）喺依個時候出現而且仲因為朵花畀人摘咗而大發雷霆，要求美女嚟佢城堡度住。美女自願噉前往城堡，而佢喺城堡住咗一排之後，發現野獸份人查實心哋唔壞，然後佢仲同野獸墮入愛河。

《美女與野獸》影響力巨大：依個故仔打後畀人改編埋做歌劇、芭蕾舞劇同電影等嘅作品，例如家傳戶曉嘅迪士尼動畫片《美女與野獸》就係取材自依個童話故事嘅；廿世紀嘅歐美人成日都會攞個故仔嚟做故仔書畀細路睇；到咗廿一世紀初，個故仔已經成為咗史上最出名最廣傳嘅童話故事之一。

情節大要

依幅插圖描繪想像中「美人要留喺城堡，兩父女道別」嘅情境。

《美女與野獸》有好多個版本，而且個故仔仲有畀人改編做好多第啲媒體嘅作品。以下依段劇情大綱，跟嘅係 1740 年嗰個原著版本。

美人嘅背景

話說好耐好耐之前，有個喪咗偶嘅商人同佢啲仔女住喺一間大屋入面，佢有 6 個仔同 6 個女，啲女個個都生得好靚，當中年紀最細嗰個女係咁多姊妹裏面最靚嘅，因而畀人嗌做美人，或者叫阿 Belle（大致粵拼：beu1）－依隻字係法文靚噉解。美人唔淨只生得靚，而且心哋好好又有家教鍾意睇書，相比之下美人啲家姐就個個都又自私又貪靚，而且仲好妒忌美人生得靚過佢哋。

有一日，商人收到消息話佢手下啲商船隊因為遇到風暴而冚唪唥沉嗮。冇嗮錢嘅商人家族，就焗住要賣咗佢哋間大屋，搬去一座樹林入面嘅細茅屋嗰度住，佢哋仲要周圍打工搵錢謀生。美人啲家姐個個反應都係喺度呻san3依樣呻嗰樣，但善良嘅美人就下定決心想幫佢屋企人，因而好努力噉做嘢。

誤入城堡

過咗幾年之後，商人收到風話佢其中一架商船安全噉返咗港口。商人好興奮想去港口接貨，臨出門口之前佢仲問佢啲仔女想唔想要咩禮物。美人啲家姐諗住自己屋企有返錢，就個個都開口話想要珠寶或者最靚嘅裙。相比之下，美人唯一嘅要求係想佢阿爸安全噉返屋企。不過愛女心切嘅商人好堅持想搵份禮物送畀美人。美人見佢阿爸咁堅持，就話自己想要一份好簡單嘅禮物－佢想要一朵玫瑰花。商人到咗港口之後，發現佢架商船的確係返咗嚟，但係佢焗住要將啲貨交畀佢嘅債主嚟到還佢爭落嗰啲債。商人咩錢都冇得淨，於是就死死地氣噉出發返屋企。

商人行行吓遇到風暴蕩失路，誤打誤撞搵到一座神秘嘅城堡。座城堡靜英英噉一個人都冇，但商人唔想打緊大風都留喺室外，於是就走咗入城堡裏面。一到咗城堡裏面，佢發現啲餐檯上面擺滿嗮各式各樣嘅佳餚同美酒，彷彿好似座城堡嘅主人想招呼佢噉。商人又攰又肚餓，就坐低又飲又食，話想接受城堡主人嘅招待，飲完食完仲瞓著咗。第二朝天光，商人醒咗就喺城堡周圍行－有少少當正咗座城堡係佢自己屋企噉，冇幾耐佢就發現城堡嘅花園種咗好多玫瑰。佢諗起美人話咗想要玫瑰，於是就將佢見到最靚嗰朵摘咗落嚟諗住帶返屋企。就喺依個時候，一隻兇神惡煞嘅野獸出現喺商人面前－野獸就係城堡嘅主人，佢因為商人偷佢啲玫瑰而大發雷霆，威脅話要殺咗商人。嚇到冇咗半條命嘅商人即刻求野獸原諒，話自己摘花只係出於想個女開心。野獸聽到之後，就話肯畀商人返屋企送朵玫瑰畀美人，不過商人要坦白噉同佢啲女講清楚成件事，而佢其中一個女要自願噉前往城堡嚟住。如果唔係，佢就會用魔法殺咗商人。

商人為咗保住自己條命，話會接受野獸嘅要求。野獸聽到好開心，送咗一拃金銀珠寶同靚衫畀商人帶返屋企。心情沉重嘅商人帶住啲禮物返屋企，第一件事係將朵玫瑰花送畀美人（同時美人啲家姐個個掛住睇啲金銀珠寶同靚衫），跟住商人老老實實噉向佢啲仔女講清楚嗮成件事。一家人就開始傾要點做－首先開口嘅係美人啲阿哥，佢哋提議要擸架生去城堡度打野獸，打到隻野獸唔敢傷害佢哋阿爸；美人啲家姐就話成件事源於美人要求玫瑰花所以係美人衰，美人應該去城堡贖罪；然後商人嘅反應就係叫佢啲仔女全部都唔准行近座城堡。不過美人就好淡定，自願噉話自己想去城堡見野獸。於是到咗第二日，商人就心不甘情不願噉帶住美人去城堡。

城堡生活

商人同美人到咗城堡，野獸就開嗮大禮噉迎接佢哋，仲放埋煙花。商人離開咗城堡之後，野獸就開始勁送禮物畀美人－有靚衫又有美食，而且佢仲同美人傾咗好耐偈。美人第一個感覺係有啲驚訝，因為野獸冇佢想像中咁野蠻。

野獸晚晚都會開口向美人求婚，但美人次次都婉拒。每晚美人婉拒咗野獸嘅求婚之後，都會發夢見到一個生得好靚仔嘅王子，仲會喺夢入面同王子墮入愛河。美人腦海入面聽到隻仙子叫佢唔好以貌取人，但佢唔聽，諗住靚仔王子係畀野獸韞咗喺城堡某處。決心想搵王子嘅美人開始晚晚都走去探索座城堡，搵到好多充滿魔法嘅房－圖書館有數唔嗮嘅書，美人仲發現一排排施咗法嘅玻璃窗會「播」舞台劇。除此之外，佢又搵到好多馬騮同鸚鵡等嘅動物喺度扮演僕人嘅角色，但一路都搵唔到佢夢見嗰個王子。

跟住落嚟嗰幾個月，美人一路都喺野獸嘅城堡過住好似公主噉嘅生活，有著唔嗮嘅靚衫同食唔嗮嘅美食。不過住到咁上下，美人開始掛住屋企人，於是就哀ai1野獸畀佢返去見吓屋企人。野獸畀佢返，但要求佢喺兩個月之後返城堡－要 ik6 sek1 li4 兩個月冇多冇少。美人樂意應承咗，跟住野獸就送一隻魔法戒指畀佢－美人戴住隻戒指瞓，一醒就已經返咗屋企。美人一返到屋企，首先見到嘅係佢啲家姐，佢啲家姐見到佢著住野獸送畀佢嘅靚裙就心有不甘，而且美人返屋企嗰陣咁啱得咁橋係佢啲家姐要搞結婚，美人啲未來姐夫個個都喺度掛住望美人，就搞到美人啲家姐更加妒忌。美人阿爸同阿哥見到美人好開心，仲想美人留低唔好咁快返城堡。記得自己應承咗野獸嘅美人，有啲唔情願噉決定留耐啲陪佢阿爸同阿哥。

最尾嘅結局

兩個月後，美人發夢夢見野獸喺城堡嗰度孤獨噉死咗，心驚嘅佢於是就嗱嗱臨返城堡。一返到城堡，佢就發現野獸瞓咗喺地下奄奄一息。美人見到噉嘅情境覺得好心痛，發覺佢自己根本就鍾意咗野獸。跟住佢就嗱嗱聲郁手攞水同照顧野獸，想睇吓可唔可以令野獸好返。當晚，美人仲應承肯同野獸結婚。

依幅插圖描繪想像中「美人遲咗返城堡，返到就發現野獸瞓咗喺地下不醒人事」嘅情境。

然後第二朝美人醒嗰時，見到自己身邊嘅野獸就嚇咗一跳－野獸變咗身做佢夢見嗰嗰靚仔王子。正當美人不知所措之際，一隻仙子同一個神秘嘅女人出現喺佢哋面前，個女人原來係王子嘅阿媽，王子阿媽第一個反應係有啲失望－因為美人唔係貴族出身。

然後王子就講明成件事嘅來龍去脈：王子嘅阿爸死得早，王子嘅阿媽就將王子交畀另一隻仙子照顧，隻仙子查實係邪惡嘅，邪惡仙子喺王子成年之後嘗試色誘王子，王子一拒絕佢就發爛渣，施法將王子變咗做隻醜樣嘅野獸；王子要搵到真愛，先可以打破個魔咒。

最後，搵到真愛嘅王子同美人結婚，兩個人幸福快樂噉生活落去。

相關嘅文

• 洛可可（Rococo）：《美女與野獸》啲衍生作品（由故仔書至迪士尼動畫片）都好興用洛可可式嘅外觀設計，包括啲角色嘅服裝以至建築風格都係噉；噉係因為個故仔源自 18 世紀嘅法國，而嗰個時期嘅法國好盛行洛可可風格嘅美學，於是依啲衍生作文就成日都用洛可可式外觀，嚟反映返個故仔係源自依個時期嘅法國嘅。
• Fantastique：依隻字大致係法文「奇幻」噉解，指法國文化入面嘅一種虛構故仔文類，最大特徵係會講超自然力量（例如仙子嘅魔法噉）入侵人類嘅世界，為人類帶嚟恐懼同無助嘅感覺。
• 斯德哥爾摩綜合症：有啲人主張，話美人查實有斯德哥爾摩綜合症。
• 變身同仙子
• 《藍鬍鬚》
• 《青蛙王子》
• 《熊皮佬》
• Rebirth 型情節

拎

• （英文） "The Story of the Beauty and the Beast"，原作《美女與野獸》嘅英文翻譯。
• （英文） "The story of beauty & the beast; the complete fairy story translated from the French by Ernest Dowson" on Internet Archive，另一個英文翻譯版。
• （英文） Oxford Storyland Readers Level 8: Beauty and the Beast，依本《美女與野獸》英文版故仔書，對象係小學生，而且唔預啲學生母語係英文，啲英文比較淺。