跳去內容

母語

改拎
出自維基百科，自由嘅百科全書
母語習得：呢幅相影到一個蘇蝦仔喺度聽佢亞媽講嘢；細路喺生命頭嗰幾年一路聽住身邊嘅照顧者講嘢，聽吓聽吓就會學識照顧者講嘅語言，照顧者嘅語言就會係佢哋嘅母語。

母語，又叫第一語言，語言學簡寫 L1 [註 1]，係指一個人仲係蘇蝦仔嗰陣，由屋企人或者照顧者嗰度學識講嘅語言，通常只有一隻。呢種學習過程係唔使有意識噉諗嘅。母語嘅相對係第二語言。

喺概念上，母語同祖裔語言好接近，祖裔語言大致上可以理解為祖輩所講嘅母語。一個人嘅祖裔語言通常會係佢母語，但係都唔一定：喺廿一世紀初，唔少父母都嫌自己嘅母語學嚟冇用，所以唔肯同仔女講自己母語，令到仔女嘅第一語言變咗唔係祖裔語言。

嗌法

[編輯]
睇埋：語言同自然語言

喺各語言入邊，母語呢個概念嘅名如下：

而祖裔語言就係

概念釐清

[編輯]
睇埋：第二語言

界定母語

[編輯]
内文：語言習得

講講母語，語言學簡稱：L1，呢個概念嘅定義：

母語係一個人人生第一隻用嘅語言：單憑日常觀察經已可知，蘇蝦仔喺生命頭嗰幾年，會一路聽住身邊嘅大人講嘢，甚至觀察大人傾偈；互動到咁上下，個細路就會慢慢牙牙學語學識講；佢响呢個時候學識講嘅語言，就係佢嘅 L1 [1]:p. 7。

母語一般唔包括書寫語言：寫嘢同講嘢係兩種好唔同嘅過程，語言學上會分開嚟分析；例如一個人可以講嘢完全冇問題，但唔識讀寫，即係文盲，又或者係讀寫有困難，例如讀寫障礙；而唔識講嘢嘅聾啞人士可以寫嘢寫得好流暢。上述呢個母語定義，著重嘅係講嘢。例如有學者就噉講：

對於人類嚟講，口語係主要嘅，而書面語就係次要嘅。所有語言都有口語，但係得一部份有得寫低。所有人細個嗰陣都會學講嘢，但係有好多人都唔會學識寫字。對細路嚟講，學講嘢係自動嘅，而學寫嘢就一定要有意識噉學。[2]:1.1

响依個定義之下，就算一個細路好早就學某隻語言，都唔表示隻語言係佢嘅母語：想像依家有一個粵藉華人細路，佢喺加拿大卑詩省長大，佢屋企係講粵語嘅，佢同父母以及第啲長輩講嘢一直都係以粵語為主嘅；同時個細路好細個就有接觸開英文，兩三歲返幼稚園嗰陣已經上英文堂，最後佢大個咗能夠純熟噉講同寫英文[註 2]。响呢個情況下，英文雖然佢好早就學，但係佢學英文嘅途徑唔係喺生命早期，透過聽屋企人講嘢以及同屋企人互動，所以英文依然唔算係佢母語[3]。

祖裔語言

[編輯]
睇埋：遺產語言

祖裔語言呢個概念，同母語頗為相似。一個人嘅祖裔語言大致可以理解為佢祖先嘅母語，通常但唔一定會係佢母語。

舉個例說明，想像有個蘇蝦仔，暫且叫佢做明仔，明仔對上五代祖先都係以粵語做母語嘅粵藉華人；明仔屋企亞爺亞嫲嗰代就移咗民過加拿大卑詩省；明仔家人唔重視粵語，覺得粵語學嚟係浪費時間，其後明仔父母為咗想佢學英文學好啲，就選擇咗喺屋企都淨係用英文同明仔交流，唔肯喺明仔面前講粵語；明仔自細就好少可接觸粵語，等到佢大個咗，佢就淨係識英文，完全唔識粵語[4]。對於明仔嚟講，英文算係佢嘅母語，因為佢喺生命早期由屋企人嗰度學嘅語言的而且確係英文，不過佢嘅祖裔語言依然係粵語[5]。

值得一提嘅係，事實上有唔少父母都嫌自己嘅母語學嚟冇用，唔肯用母語同仔女講嘢，搞到啲仔女 L1 變咗唔係祖裔語言，大個咗就唔識得同亞爺亞嫲傾偈。呢種現象喺廿一世紀初廣受關注。詳情可以睇睇語言威望、雙層語言、語言磨蝕同語言重振等嘅概念。

學習過程

[編輯]

有唔少語言學專家都著力研究學第二語言同學母語之間有乜嘢分別[6]。

首先，母語學習通常主要係由屋企人或照顧者做嘅，當中照顧者包括父母、幫手湊孫嘅亞爺亞嫲等等​——​細路學母語，唔使人特登教，照顧者成日喺佢身邊用母語講嘢，個細路聽聽吓就會學識用母語講嘢​——​相比之下，學第二語言就傾向會係形式化噉做嘅，會由老師等嘅人員教細路學。因為噉，一個人學母語嘅過程係由內隱知識主導嘅。

SLA 同 FLA 會有以下呢啲分別[6]:5.2.1：

  • 學母語正常嚟講唔會跟咩教學大綱；
  • 有人用廿一世紀初嘅英文做 FLA 研究，觀察家長點樣同學緊講嘢嘅細路講嘢，發現家長成日都唔改正細路嘅語法，淨係改正啲唔真確嘅內容​——​即係話家長同細路講嘢嗰時，重視嘅係信息唔係形式[註 3]。用粵語語法諗嘅話，想像有個亞嫲同個學緊講嘢嘅孫仔講嘢[6]:B5.3：
    孫仔：嗰嚿係士多啤梨。（完全語法正確嘅句子）
    亞嫲：唔係呀，嗰嚿係蘋果。（改正唔真確嘅內容）
    孫仔：嗰係蘋果。（錯語法嘅句子）
    亞嫲：啱喇，嗰嚿係蘋果。（唔改正個細路嘅語法）

呀噉。

相關嘅文

[編輯]

註釋

[編輯]
  1. ↑ 取自英文，解 first language。原則上可以理解成 ｢Language 1｣，但係英文其實唔會咁講，淨係會講 ｢first language｣；寫成 ｢L1｣（但係解 ｢first language｣）其實係數學嘅做法。
  2. ↑ 或者精確啲講，佢係講英格蘭話同寫英文。
  3. ↑ 英文原文嗰句係："They are message-focused, not form-focused."

來源

[編輯]
  1. ↑ Gass, Susan; Selinker, Larry (2008). Second Language Acquisition: An Introductory Course. New York, NY: Routledge.
  2. ↑ Bright, W. (2005). Henry Rogers, Writing systems: A linguistic approach. Written Language & Literacy. 8(1), 72-76.
  3. ↑ The Decline Of 'Mother Tongue' In Our Generation. Medium.
  4. ↑ Passing on the ancestral language (PDF)
  5. ↑ The ancestral language of half the world reveals our shared culture. New Scientist.
  6. 1 2 3 Johnson, K. (2008). An introduction to foreign language learning and teaching 互聯網檔案館嘅歸檔，歸檔日期2023年6月10號，.. Pearson Education.
由「https://zh-yue.wikipedia.org/w/index.php?title=母語&oldid=2460740」收