熊皮佬

呢幅圖畫描繪熊皮佬（坐喺度嗰個）聽魔鬼提出交易。

《熊皮佬》（粵拼：hung4 pei4 lou2；德文：Der Bärenhäuter；英文：Bearskin）係《格林童話》有收錄嘅一個童話故事。個故仔嘅情節講到有個後生男人走投無路冇晒錢，為咗有錢開飯焗住要同魔鬼做交易。佢經過七年冇得梳洗嘅日子之後，最後變到好有錢，仲娶到個又靚心哋又好嘅女人做老婆。

內容

《熊皮佬》嘅情節，大致係以下噉嘅。

魔鬼交易

喺好耐好耐以前，有一個好勇敢心哋又好嘅後生仔（主角）。佢走咗去當兵打仗。場仗打完之後，佢卒之可以返屋企，不過佢阿爸阿媽已經過咗身，所以佢就走去搵佢嗰班阿哥細佬，諗住投靠佢哋，點知佢班阿哥細佬完全唔顧兄弟之情。

「我呢度用你唔著呀。你扯啦。」

於是後生仔唯有用膊頭托住自己把槍周圍流浪。行行吓，後生仔搵咗笪荒原坐低，諗：

「慘啦。我冇錢，而且除咗打仗之外就咩都唔識，睇嚟都係餓死收場。」

喺呢個時候，有個著住綠色褸嘅怪男人出現响後生仔面前。

「後生仔呀，後生仔，我知道你需要啲乜。你需要黃金同財物。不如我同你交易吖？我呢件綠色褸個褸袋裏面有無盡咁多嘅錢，想攞幾多就有幾多。我可以送件褸畀你，但係喺嚟緊七年內，你唔准換衫，唔准沖涼，唔准飛髮，唔准修整鬍鬚，唔准剪指甲腳甲，亦唔准唸天主經。你要一路都著住呢件褸。如果你捱到七年咁耐，你就可以又自由又有錢，但如果你喺呢七年間死咗，你嘅靈魂就屬於我。」

—呢個怪男人查實係魔鬼。主角唔想落地獄，但知道自己走投無路，就決定接受魔鬼交易，接過魔鬼件綠色褸。跟住魔鬼送咗一塊熊皮畀佢，叫佢想睏嗰陣就睏喺塊熊皮上面。

「啲人應該會同你改個花名，嗌你做熊皮佬。」

講完，魔鬼就消失咗。

七年之約

熊皮佬摸摸自己個褸袋，發覺個褸袋真係有錢攞到出嚟，而且攞極都仲有。起初熊皮佬第一時間係攞啲錢去嘆世界，有陣時佢又會攞啲錢去接濟吓窮人。喺頭嗰一年，熊皮佬都覺得冇咩唔舒服，不過到咗第二年就開始唔掂—佢啲頭髮長到遮晒佢塊面，佢啲鬍鬚長到好似草叢噉，而且佢耐冇沖涼，個身散發住一陣陣臭味。啲人個個見到熊皮佬都走夾唔唞，佢要出好多錢先至會搵到地方肯收留佢。

熊皮佬繼續努力噉撐落去。到咗第四年嘅一日，熊皮佬去到一間旅館度投宿。旅館主人初頭嫌熊皮佬太臭儀容太惡劣唔想收留，但熊皮佬一路攞錢出嚟，於是旅館主人就有啲唔甘願噉收留熊皮佬，同時又叫熊皮佬唔好畀其他客見到，費事有損佢間旅館嘅聲譽。當晚，正當熊皮佬喺佢間房入面嘆晒氣噉，希望呢七年快啲完之際，佢聽到隔蘺房有喊聲。熊皮佬走去隔蘺房，一開門就見到個阿伯喺度喊。原來阿伯冇晒錢，驚佢同佢嘅三個女要挨餓要睏街。心生同情嘅熊皮佬就出錢幫阿伯。阿伯好感激。

「恩公，我真係唔知點報答你好。不如噉吖？我嗰三個女都生得國色天香㗎。你跟我返屋企揀佢哋其中一個做老婆。」

就係噉，熊皮佬跟阿伯返屋企見阿伯嘅女。呢三個女人的確都生得好靚。不過熊皮佬望落非常污糟，身上仲散發住一陣好難聞嘅除。大女一見到熊皮佬，就嚇到一路尖叫住噉走咗；而二女就係叫熊皮佬唔好埋佢身，話寧願嫁畀隻熊都唔會嫁畀熊皮佬。相比之下，細女個反應就同佢兩位家姐好唔同。

「佢啲個人衛生可能... 未必係咁好，但係佢肯噉樣嚟幫我哋一家，應該都係個好人嚟嘅ge2。」

細女決定肯嫁畀熊皮佬。熊皮佬聽到好開心（不過佢塊面畀頭髮遮實晒，在場其他人睇唔到佢表情）。然後，熊皮佬就除咗自己隻戒指落嚟，將隻戒指一嘢𢱕dap6到一分為二，其中半隻戒指寫低細女個名，另外嗰半就寫低自己個名。熊皮佬將有細女個名嗰半畀自己袋住，而有自己個名嗰半就畀未來老婆袋住。

「係噉嘅，我有事要做，嚟緊三年要一路周圍去，唔可以留低同你住。如果三年過咗我都未返，我應該係死咗。到時你自己去搵第個男人做老公啦。仲有，得閒為我祈吓禱添吖。」

講完，熊皮佬就走咗。細女心入面期待自己未來老公返嚟嘅大日子。同時，佢嗰兩位心哋唔好嘅家姐就猛咁講刻薄嘢，講到熊皮佬好似係隻禽獸噉。

「因住呀，如果你交隻手畀佢，佢會用佢啲爪搲we2你㗎。」

「因住呀，熊人jan2鍾意食甜嘢，話唔定會食咗你落肚呀。」

「不過話唔定場婚禮會好好睇呢。有得睇熊人jan2跳舞喎。」

細女默默噉忍受兩位家姐嘅冷言冷語，而熊皮佬就喺幾年間一路穿州過省，用佢嘅錢接濟咗唔少窮人，有好多受佢接濟嘅人都為佢祈禱。

到咗最後，七年嘅漫長時光終於過去。熊皮佬返到去當初遇到魔鬼嘅荒原。魔鬼見到熊皮佬真係死唔去，就死死哋氣噉兌現承諾，攞水嚟畀熊皮佬沖涼，仲幫埋熊皮佬梳頭同剪指甲腳甲。搞掂晒呢啲嘢，魔鬼就消失咗。

最終結局

熊皮佬梳理到一乾二淨，望落仲好似當堂英俊咗。充滿自信嘅佢就著返件靚衫，坐住一架由四隻白馬拉嘅馬車，去見佢嘅新娘。

阿伯初頭唔認得熊皮佬，以為熊皮佬係啲乜嘢大將軍，而大女同二女就爭住幫佢斟酒同招呼佢食嘢。細女都一樣唔認得熊皮佬，淨係坐咗喺度一句聲都唔出—細女仲記得同熊皮佬嘅約定。熊皮佬開口：

「阿伯，我想娶你嘅其中一個女做老婆。」

大女同二女一聽到就好興奮，即刻衝入房著起最靚嘅裙。而就喺呢個時候，熊皮佬攞佢嗰一半戒指出嚟—寫咗細女個名嗰半隻戒指。細女見到簡直唔敢相信。

「我就係你嘅未來老公熊皮佬。我終於可以變返做人喇。」

然後熊皮佬就上前，攬實細女同惜sek3咗細女一啖。到咗最後，熊皮佬同細女結婚，兩個人過住永遠幸福快樂嘅日子。

個故仔仲有些少下文：女主角兩位家姐見到原來熊皮佬咁靚仔又咁有錢，知道自己走咗寶，悲憤之下佢哋一個投井自盡，另一個就走咗去吊頸。嗰晚，魔鬼嚟熊皮佬屋企敲門。

「唔該晒呀，熊皮佬。我本來諗住淨係要你個靈魂嘅，點知而家得到兩個靈魂喎wo4！」

寓意

魔鬼：「唔該晒呀，熊皮佬。我得到兩個靈魂，都係多得你咋！」

睇埋：美女與野獸

好多人都認為， 呢個故仔嘅寓意係叫人要

「睇人唔好淨係睇外表。」

—呢點可見於女主角同佢嗰兩位家姐之間嘅差異：女主角嘅兩位家姐第一次見到熊皮佬嗰陣就嫌棄佢，但一等到熊皮佬變返正常之後，兩個人就係噉獻殷勤；相比之下，女主角揀老公嗰陣，就由始至終都比較關注未來老公份人心哋好唔好。到咗最後，兩位家姐下場係畀魔鬼帶走，而女主角就得以嫁畀一個又英俊又有錢嘅男人。

睇埋

• 《格林童話》
• 《乜皮都有》
• 《驢皮妹》

拎

• Bearskin （英文），《熊皮佬》一個英文譯版。
• Literature / Bearskin （英文），電視橋段網講《熊皮佬》呢個故仔，有講個故仔用咗邊啲橋段。