驢皮妹

插圖：驢皮公主著住件驢皮披肩，漏夜逃離家園。

《驢皮妹mui1》（法文：Peau d'Âne，英文：Donkeyskin）又或者叫《驢皮公主》，係法國作家沙略·佩羅寫嘅童話故事，响1695年首次出版，個故仔主題上屬於唔自然戀情。

《驢皮妹》呢個故事嘅主角係一位公主。佢父王想夾硬娶佢做老婆。為咗逃避痴咗線嘅父王，公主著住一件用驢嘅毛皮造嘅披肩逃走。公主變咗驢皮妹，去咗第個王國度做女僕。後嚟有一日佢畀王國嘅王子睇中，最後仲做咗呢位王子嘅老婆搵到真愛。大團圓結局。

呢個故仔段情節，同《格林童話》當中嘅《千種皮》近乎一樣咁滯。

主角個名

以下講講女主角個名係點譯過嚟粵文嘅。

就噉字面解，原著故仔個呔圖嘅意思係驢皮。喺個故仔裡便，呢隻字詞係啲人幫（著住驢皮嘅）女主角改嘅花名。譯到嚟粵語，就可以譯做驢皮妹mui1—喺粵語入便，妹呢隻漢字可以有起馬三款讀法，以下嘅羅馬化係用粵拼：

• mui2—阿妹、細妹；
  
• mui4—妹妹當中第一隻妹字；
  
• mui1—例子有妹仔同埋𡃁妹等嘅字詞；
  

當中 mui1 呢款讀法，成日都畀人攞嚟同女仔改花名：啲人幫一個女仔改花名嗰時，好多時都係叫佢做乜乜妹mui1噉嘅，當中乜乜會係個女仔嘅某啲特性，例如一個好勤力嘅女仔就可能會畀身邊嘅人叫佢做勤力妹噉。驢皮係原著故仔入便啲人幫女主角改嘅外號，所以就可以對應粵語驢皮妹。

情節大要

《驢皮妹》情節大致係噉嘅。

話說好耐好耐以前有一位國王同一位生得好靚嘅皇后，兩公婆育有一位公主。國王同皇后擁有一隻識得屙黃金嘅驢，所以一家三口生活富足。不過好景不常，有一日皇后患病死咗，臨死前叮囑老公：

「如果我死後你想再娶，應承我：你娶返嚟嗰位新太太，一定要生得同我一樣咁靚。」

响跟住落嚟嗰幾年，國王一路都意志消沉，眾大臣連番噉搵美人返嚟畀國王揀新老婆，但國王一路都搵唔到美貌可比佢已故老婆嘅女人。

直至有一日，國王望住佢個親生女—公主大個咗，而且生得同佢嗰個母后一樣咁靚。

插圖：國王意志消沉，佢班大臣個個喺度勸佢快啲搵個新皇后。 插圖：國王意志消沉，佢班大臣個個喺度勸佢快啲搵個新皇后。

公主面對父王向自己求婚，就走去搵神仙教母教路。神仙教母諗計，叫公主向國王提出一啲無理要求，要國王達到呢啲無理要求先肯嫁。於是公主就去同父王講：

「呀... 如果你想娶我，你要幫我準備三條裙，第一條要有齊晒天上有嘅顏色，第二條要好似月亮咁銀白，第三條要好似太陽咁掁眼。除此之外，我想你殺咗隻金驢，再用佢塊毛皮嚟整件披肩畀我。」

「好！」

（公主心諗）「啲噉嘅裙邊有可能整得到出嚟。父王佢又實唔會殺金驢嘅，佢最後一定會死死哋氣認輸。」

點知下定決心嘅國王搵勻晒全國最擅長編織嘅織女返嚟，真係整到三條裙。跟住佢又二話不說郁手殺死金驢，整咗件驢皮披肩送畀公主。神仙教母見到噉嘅情況，就送咗個魔法箱畀公主，魔法箱裝晒三條靚裙喺裡便，然後佢就叫公主著住件驢皮披肩漏夜靜靜雞走人。

插畫：國王擁有一隻神驢，神驢屙出嚟嘅唔係糞便，而係黃金。 插畫：國王擁有一隻神驢，神驢屙出嚟嘅唔係糞便，而係黃金。  插畫：驢皮妹著住塊驢皮，走去農場做打雜。農場養咗隻貓（右下角）。 插畫：驢皮妹著住塊驢皮，走去農場做打雜。農場養咗隻貓（右下角）。

驢皮公主一路走，走咗去第個王國，最後喺一座農場度搵到地方落腳。公主喺嗰度做嘢，畀人改咗個花名叫驢皮妹。有一日，驢皮妹喺自己間房度試著父王送畀佢嗰三條靚裙，點知期間畀呢個王國嘅王子見到。王子即刻中意咗驢皮妹，開口要求想食驢皮妹焗嘅蛋糕。

驢皮妹焗蛋糕嗰陣，唔覺意畀自己隻戒指跌咗入蛋糕裡便。打後王子搵到隻戒指，仲話淨係會娶啱啱好戴得落呢隻戒指嘅女仔。於是乎，王子就四圍去搵後生女試戴隻戒指，最後輪到驢皮妹試戴嗰陣時，驢皮妹一戴就戴得落仲 fit1 晒。而喺呢個時候，神仙教母出場，向王子同埋王子嘅父王母后解釋晒成件事嘅來龍去脈。王子知道發咗咩事，就馬上向驢皮妹求婚。驢皮妹亦答應咗。

响王子同驢皮妹嘅婚禮上，周圍啲國家都有派皇室人員出席。驢皮妹响婚禮上見返佢父王，發現父王原來已經恢復正常，仲娶咗位好靚嘅新太太。

大團圓結局。

睇埋

• 《千種皮》
• 《熊皮佬》
• 《灰姑娘》，《驢皮妹》最後講王子搵驢皮妹嗰段，被指係同《灰姑娘》好相似。

拎

• 文學 / 驢皮妹 （英文），電視橋段網講呢個故仔，有討論個故仔用咗咩橋段。