橋段

出自維基百科,自由嘅百科全書
Jump to navigation Jump to search
喺《愛麗絲夢遊仙境》呢個故仔入面,主角愛麗絲跟住隻兔仔走咗入去一個仙境嗰度。「主角因為某啲力量去咗一個異世界」係一個好多奇幻科幻故仔都用過嘅橋段。《尋秦記》同《數碼暴龍》都用咗呢條橋段。

橋段粵拼kiu4 dyun6英文:trope),或者就噉叫粵拼kiu4*2),係指緊喺啲創作-無論係小說漫畫、定係大戲等-當中重複噉樣出現嘅一啲諗頭同埋規律[1][2],一個作者作故仔嗰陣使用橋段嘅目的係要喺個作品入面達到某一啲特定嘅效果。例如係「一見鍾情」(Love at first sight)[3],就係一個喺愛情故事入面成日出現嘅橋段,指緊個故仔嘅男女主角一見面就即刻墮入愛河嘅情節,一個作者寫愛情故事嗰陣用呢個橋段目的可能係為咗想令到讀者覺得好浪漫

橋段呢家嘢有好有壞:好似係一見鍾情呢條橋段噉,有唔少出名嘅故仔都用咗佢,例如係《天鵝湖》呢個舉世聞名嘅芭蕾舞噉,喺好多個版本嘅《天鵝湖》入面,王子同俾邪惡魔法師變咗做天鵝公主識咗對方之後冇幾耐就對對方產生好感,好多觀眾對呢個情節都好受落;另一方面,又有人覺得一見鍾情呢條橋段好老土,唔鍾意啲故仔用呢條橋段[4]

分析點樣喺寫作嗰陣使用啲橋段係文藝創作理論當中好緊要嘅一環[5]

分類[編輯]

橋段有幾個大類,包括咗但係唔淨只有:

模式化人物[編輯]

一個典型嘅痴線科學家;痴線科學家係一種公認嘅模式化人物橋段。
內文: 模式化人物

模式化人物(Stock character)係指緊一啲喺多個作品入面都有出現嘅人物大類[6],啲觀眾或者讀者好多時一眼就會認得出「呢個人係屬於嗰個模式嘅人物」。絕世高手就係一種喺武俠故仔入面成日出現嘅人物類型,例子有《射鵰英雄傳》系列嘅五絕、《三俠五義》之中嘅南俠展昭同北俠歐陽春、仲有係《中華英雄》入面嘅南神掌同北腿王等等。絕世高手喺武俠故仔入面可以有好多作用:例如係出場教主角一啲新招等主角可以變強,又或者係喺個故仔入面出場並且俾個奸角打低,用來突顯主角個敵人有幾勁;痴線科學家(Mad scientist)係另一種常見嘅人物類型,喺《科學怪人》等嘅科幻作品入面出場,佢哋嘅作用都好多樣化:可能係負責整啲犀利嘅架生俾主角用,又或者係做埋嗮啲怪實驗整咗隻怪獸出來-於是成個故仔就會圍繞住個主角點樣收拾隻怪獸。

模式化人物喺作故仔嗰陣相當有用,因為佢哋可以令到啲觀眾或者讀者一眼就大致上估到某一個人物係會做啲乜嘅,有陣時啲故仔又可以惡搞呢啲模式化人物[6]

設定[編輯]

內文: 設定 (敘事學)

設定(Setting)係指緊個作品嘅故仔發生嘅時代同地方[7]。以科幻做例子,科幻故仔好多時都係設喺遙遠嘅未來嗰度嘅,好似係《星球大戰》噉,個故仔入面有好多人類喺短期之內應該都整唔到出來嘅科技,所以一般都覺得呢類故仔係發生喺遙遠嘅未來嗰度嘅;但係又有啲科幻故仔係設喺現代或者「稍為」嘅未來嗰度嘅,好似係倪匡嘅《衛斯理》系列噉,個主角衛斯理生活喺現代世界,但係成日撞到啲身懷先進科技嘅外星人古裝劇嘅設定又係好多樣化,例如係喜劇皆大歡喜》噉樣,係設喺大明時期嘅,而西人拍戲寫小說嗰陣就好興將古裝劇設喺中世紀歐洲等嘅時空。「遙遠嘅未來」同「大明時期」等等就係設定性嘅橋段。

一般來講都認為,設定嘅重要性在於佢會為個故仔設下一啲規則,講明乜嘢可以發生乜嘢唔可以[8],令到成個故仔更加有理可循,例如係如果拍套設喺古羅馬時代嘅古裝戲,個故仔一般就唔可以有或者坦克等嘅現代武器出現,因為嗰個時代仲未有呢啲嘢。如果個作者想個故仔有呢啲現代武器出現,噉佢就實要諗啲特別嘅理由出來,好似係個故仔可能講現代人坐時光機返咗去古羅馬時代等等。

情節[編輯]

一隻日本幽靈嘅圖;幽靈係一種人物性橋段,而「有隻幽靈返來揾害過佢嘅人報仇」係一種恐怖故仔成日用嘅情節性橋段。
內文: 情節

情節(Plot)係指緊個故仔入面某啲特定嘅事件,而呢啲事件會對跟住落來個故仔嘅發展有明顯嘅影響。基本上都認為,一個好嘅故仔要有一連串嘅「因為情節 A,所以情節 B,於是乎令到情節 C 發生...」嘅因果過程,而且成個過程係要能夠令到啲觀眾或者讀者覺得佢合理嘅[9]。頭先提咗嘅一見鍾情同「主角走咗入去一個異世界」等都係故仔常用嘅情節性橋段。佢哋都對個故仔跟住嘅發展有顯著嘅影響:男女主角一見鍾情之後愛上咗對方可能會嘗試拍拖,而愛情故事好多時就係要講男女主角拍拖,並且展現佢哋點樣克服戀情上遇到嘅困難-例如係父母反對-最後終成眷屬;主角走咗入去個異世界之後可能會遇到各種嘅危險,於是成個故仔就係講主角點樣克服呢啲危險,並且透過克服呢啲難關來成長做一個心智上更加成熟嘅人-《數碼暴龍》多部動畫嘅故仔就係噉樣。

睇埋[編輯]

橋段類型[編輯]

[編輯]

  1. Miller (1990). Tropes, Parables, and Performatives. Duke University Press. p. 9.
  2. Cuddon, J. A.; Preston, C. E. (1998). "Trope". The Penguin Dictionary of Literary Terms and Literary Theory (4 ed.). London: Penguin. p. 948.
  3. Health & Science: Love at first sight may not be as implausible as it seems
  4. Love At First Sight
  5. Childers, Joseph; Hentzi, Gary (1995). "Trope". The Columbia Dictionary of Modern Literary and Cultural Criticism. New York: Columbia UP. p. 309.
  6. 6.0 6.1 Kamesha Jackson (2010). "stock character". In Ronald L. Jackson II. Encyclopedia of Identity. Sage Publications.
  7. Levin, Donna (1992). Get That Novel Started. Cincinnati, OH: Writer's Digest Books.
  8. Lodge, David (1992). The Art of Fiction. London: Martin, Secker & Warburg Ltd.
  9. Ansen Dibell, Ph.D. (1999-07-15). Plot. Elements of Fiction Writing. Writer's Digest Books. pp. 5 f. ISBN 978-0-89879-946-0. Plot is built of significant events in a given story – significant because they have important consequences. Taking a shower isn't necessarily plot... Let's call them incidents ... Plot is the things characters do, feel, think or say, that make a difference to what comes afterward."

[編輯]