角色缺憾

出自維基百科,自由嘅百科全書
Jump to navigation Jump to search
公元前 3 世紀嘅阿里士多德雕像;阿里士多德喺佢嘅著作《詩學》入面討論過悲劇缺憾嘅概念[1]

角色缺憾粵拼gok3 sik1 kyut3 ham6英文character flaw)喺敘事學上指由一個角色具有、會令個角色喺個故仔當中犯錯嘅特徵,同角色發展(character development;個角色喺個故仔進展途中喺個性上有所變化[2])息息相關:一般嚟講,一個角色喺故仔開始嗰陣會有某啲角色缺憾,呢啲缺憾會引致佢做一啲錯誤嘅決定,為佢同佢身邊嘅人造成具體嘅負面後果,然後喺故仔嘅中途,佢會有機會或者被迫要改變自己嘅行為,發現改變自己嘅行為之後好咗好多,了解自己之前有個噉嘅缺憾,再學識改變自己嘅行為,而(如果個故仔有大型衝突嘅話)呢個行為上嘅改變好多時會係佢喺高潮嗰陣打低佢個對立角色嘅重要原因[3];而對於奸角嚟講,佢哋嘅角色缺憾往往就會係佢哋最後失敗嘅原因[4][5]

角色缺憾係作故仔上好重要嘅一環:缺憾可以令角色更加複雜,亦都可以令佢哋更加似人-沉迷睹錢嘅警長、怕高嘅英雄、一個要克服自己嘅不安嘅愛情故仔主角等嘅角色因為佢哋嘅缺憾而似現實世界嘅人,而且佢哋嘅缺憾仲可以為故仔製造難關-睇角色克服難關正正就係故仔最精彩之處之一[5]

例子[編輯]

  1. 主角係一個事業心好強嘅人,佢好鍾意佢份工(缺憾),鍾意到唔理佢老婆同仔女,做嘢做到唔出席個仔嘅畢業典禮同自己阿爸嘅生日會(錯誤決定),搞到佢屋企人同佢關係好疏遠(後果),及後主角發現,份工根本俾唔到佢真正嘅滿足感(有機會改變),開始重視同屋企人來往(改變),同屋企人關係好轉,而且亦都得到真正嘅快樂(角色發展)[6]
  2. 主角係一個好聰明但懶散嘅騎士,佢奉行享樂主義,鍾意索女,遇到問題興用武力解決(缺憾)。有日,佢喺同人打交(錯誤決定)嗰陣,俾對方斬斷咗佢隻右手,搞到佢冇得再用武器(後果),其後佢俾生得醜樣但善良嘅女主角救咗;喺打後嘅情節當中,佢一路同女主角相處一路旅行,而且因為冇咗隻手用唔到武器,焗住要靠機智解難(被迫要作出改變);喺呢個過程中,佢學識變成唔再齋靠武力解決問題,仲鍾意咗女主角-開始會欣賞女人嘅內在美(角色發展)[7][8]
  3. 想像以下嘅故仔:王子係一個以貌取人嘅人(缺憾),有次佢對一個醜樣嘅阿婆唔禮貌(錯誤決定),而個阿婆原來係仙子,跟住仲對佢落咒、令佢變成一隻醜樣嘅野獸(後果);後嚟佢因緣巧合,捉到一個老男人,個老男人嗰個心地善良嘅女(女主角)自願噉用自己嘅自由嚟換取阿爸嘅;及後女主角留喺野獸嘅城堡當中(有機會改變),兩人相處之後,野獸受女主角影響學識變得仁慈啲同開放自己嘅心(改變),最後破解仙子嘅咀咒(角色發展)。
  4. 想像以下嘅故仔:主角阿古係一個大賊,一心淨係想專注於佢嘅事業,而且性格有少少冷漠無情(缺憾),佢嘅性格令佢有錢、但生活得好孤單(後果);有一次,阿古因緣際會領養咗三個孤兒,而且焗住要好好噉湊住佢哋,暫時扮演養父嘅角色(被迫要作出改變);及後佢回想起自己嘅童年,原來佢細個嗰陣成日都俾佢阿媽睇唔起,所以先搞到佢咁執著要成功(背景故仔;順帶一提,喺一個角色成長途中,故仔好多時會揭示令到嗰個角色有缺憾嘅背景故仔),最後佢作出改變開始重視同屋企人來往,而且亦都得到真正嘅快樂(角色發展)[9]
  5. 想像以下嘅故仔:主角史高治係一個守財奴(缺憾),好刻薄佢啲員工,又孤寒又唔肯捐錢(錯誤決定),搞到全鎮嘅人都對佢冇乜好感(後果);有一日,佢喺聖誕前夕遇到佢唯一事業夥伴馬里嘅鬼魂,話俾佢知會有三隻幽靈嚟搵佢,每隻幽靈會同佢講一啲嘢;第一隻幽靈同史高治一齊睇佢嘅過去,揭示原來史高治喺細個嗰陣因為俾阿爸阿媽送咗去寄宿學校而好孤單(背景故仔);第二隻幽靈帶史高治去現在,睇到其他人同家人朋友慶祝聖誕好開心(改變嘅誘因);第三隻幽靈帶史高治去睇未來,見到一個唔受歡迎,冇人出席佢葬禮嘅財主佬,仲見到有人因為刻薄財主佬死咗而慶祝,史高治知道呢個會係自己嘅未來,覺得好驚(另一個改變嘅誘因)。第二朝(有機會改變),史高治佢嘗試改變自己嘅行為,捐錢做慈善,仲加人工俾之前受佢刻薄嘅員工(改變),小鎮嘅居民留意佢轉咗死性,對佢有少少改觀;從此之後,變得好人咗嘅史高治同身邊嘅人關係好轉咗,佢個人亦都開心咗(角色發展)[10]

分類[編輯]

大細缺憾[編輯]

角色缺憾可以按照「會唔會喺故仔當中為角色帶嚟具體麻煩」分做「大」同「細」兩類[11]

  • 細缺憾(minor flaw):係指一啲唔會喺故仔當中引致具體不良後果嘅缺憾,例如「講嘢有啲唔清楚」或者「鍾意發白日夢」等等;細缺憾可以用嚟令一個角色多啲特徵同更加令讀者觀眾印象深刻,而且可以係大缺憾嘅反映(例如講嘢唔清楚反映咗佢極之內向怕醜,而佢嘅內向怕醜喺情節當中引致具體嘅不良結果),所以受人歡迎嘅角色往往都梗會有啲細缺憾。
  • 大缺憾(major flaw):即係一啲會喺故仔入面引致具體嘅不良後果嘅缺憾,例如如果有個角色鍾意發白日夢鍾意到因為發白日夢而疏忽職守,引起故仔當中嘅主要衝突嘅話,就算係大缺憾。

好壞缺憾[編輯]

角色缺憾又可以按「會唔會令讀者觀眾同情」分做「好」同「壞」兩類[12]

  • 「好」係指一個缺憾雖然會搞出麻煩,但係依然能夠令讀者觀眾覺得個角色值得同情,所以讀者觀眾會想支持佢,例如「因為正義感強而有少少衝動」、「因為受過傷害而唔信任其他人」、「缺乏自信」、「享樂主義」(只要佢嘅享樂主義唔會對其他人造成傷害)... 等等一般都屬於「好」缺憾,唔會令讀者觀眾覺得佢哋係壞人;
  • 「壞」係指一個缺憾唔淨只會惹麻煩,仲好可能會令讀者觀眾覺得個角色心地唔好,覺得佢係一個奸角;喺上述嗰柞例子當中,有缺憾嘅角色都係主角-佢哋嘅缺憾雖然惹麻煩,但未至於令讀者觀眾覺得佢哋係無藥可救嘅壞人;而家想像有個角色,佢嘅缺憾係「鍾意殺人」,喺故仔途中無端端殺死一個完全無辜嘅路人-通常讀者觀眾就會覺得佢係奸角,唔係會想睇佢成長,而係會想睇佢對手收拾佢;一般嚟講,犯下謀殺強姦等嚴重罪行嘅角色都唔會得到讀者觀眾嘅同情[5]

悲劇缺憾[編輯]

內文: 悲劇缺憾

悲劇缺憾(tragic flaw / fatal flaw;希臘文:ἁμαρτία,「hamartia」)係源自古希臘戲劇嘅一個概念。根據現代敘事學嘅詮釋,悲劇缺憾係指一個會引致悲劇收場嘅角色缺憾:一個一般嘅角色缺憾會搞到個角色有麻煩,而個故仔跟住落嚟就會講佢點樣克服個缺憾導致嘅困難,然後成長為一個更完善嘅人,最後開心收場;而一個悲劇缺憾會搞到個角色因為佢嘅錯誤而重大失敗永不翻身(通常係死亡),最後個故仔悲劇收場[13],讀者觀眾了解到呢個缺憾可以引致嘅悲慘下場,對個角色產生同情[註 1][14]

例子
  1. 主角愛德華係一個好重視誠實公正嘅人(一個作為悲劇缺憾嘅性格特質),佢身為一個貴族,幫國王做嘢,成日要同其他-用各種陰謀詭計爭權嘅-貴族周旋;有一次,佢知道咗皇后做過嘅一單嚴重犯法嘢,亦都知道如果單嘢爆咗出嚟,皇后雖然貴為皇后都恐怕要殺頭;主角出於佢嘅誠實公正,講俾皇后知佢知呢單嘢,諗住皇后只會靜靜雞走佬(失誤,hamartia);點知皇后做嘅嘢唔係走佬,而係發茅,派人暗殺自己老公(國王),然後將佢老公手下嘅好多人(包括主角)捉嗮收監,仲乘勢將主角處死(失誤引致嘅悲慘下場)。成個故仔係一齣悲劇,而愛德華嘅誠實公正係一個引致悲劇嘅角色缺憾[15][16]
  2. 主角維特係一個好奇心重嘅人,鍾意做奇怪嘅科學實驗(悲劇缺憾);佢為咗滿足佢嘅好奇心,尋求一啲黑暗嘅秘密(失誤,hamartia);佢最後製作出一隻科學怪人,隻怪獸周圍殺人,佢嘗試獨力收拾隻怪獸,但最後失敗死亡(失誤引致嘅悲慘下場)。
  3. 蝴蝶夫人》(Madame Butterfly):故仔講 19 世紀尾嘅日本,一個天真(悲劇缺憾)後生日本人女仔「蝴蝶」甘心改信基督教並嫁俾美國男人平卡頓(失誤,hamartia),因而俾屋企人逐出家門(當時嘅日本人好反基督教);平卡頓因為蝴蝶好似一隻蝴蝶噉又靚又柔弱而對佢有好感,但佢查實只係想玩吓蝴蝶,暗中打算遲啲再去搵個美國女人做正式老婆,後嚟平卡頓返咗去美國,而冇幾耐蝴蝶仲生咗佢嘅仔;蝴蝶獨力一路湊住個仔一路等佢老公返嚟,三年後,平卡頓帶住佢個美國老婆返日本,知蝴蝶生咗個仔之後想帶個仔返美國,而乜都冇嗮嘅蝴蝶最後自殺(失誤引致嘅悲慘下場)[17]

瑪麗蘇[編輯]

內文: 瑪麗蘇

瑪麗蘇(Mary Sue)喺文學寫作上泛指冇缺憾嘅角色。「瑪麗蘇」一詞源自 1973 年出版嘅一個星空奇遇記(Star Trek)戲仿故仔:喺呢個故仔入面,作者嘅原創角色瑪麗蘇係一個年僅 15 歲就成為星空艦隊嘅中尉(一個相當高嘅軍階)嘅天才,受到全體角色嘅愛戴,佢有能力獨力幫成隊人解決困難(搞到其他角色完全冇機會表現),而且最後仲贏到諾貝爾和平獎;瑪麗蘇因為意外死咗之後,大家因為太愛戴佢,而將佢死嗰一日定做全國哀悼日-總括嚟講,瑪麗蘇係一個完美嘅角色,喺故仔入面從來冇犯過錯,仲令到呢個故仔完全變咗以佢做中心[18]。呢個惡搞故仔嘅作者原意在於指出同人小說常見嘅「完美角色」現象,而打後「瑪麗蘇」呢個詞俾人廣泛噉採用,用嚟指一啲極度完美、冇缺憾嘅故仔角色[註 2][19][20]

喺廿世紀尾至廿一世紀初嘅西方文壇,瑪麗蘇係廣受人厭惡嘅角色。敘事學同相關領域嘅學者指出,瑪麗蘇最大嘅問題係「冇缺憾」:瑪麗蘇常見於同人小說(呢啲故仔通常由冇受過寫作訓練嘅人寫),亦可以出現喺由專業作家寫嘅故仔當中;瑪麗蘇冇任何會搞到佢哋作出錯誤決定嘅缺憾,頂嗮櫳都淨係有啲濕碎缺憾(睇返上面細缺憾);於是瑪麗蘇嘅存在就搞到個故仔缺少咗精彩故仔需要有嘅一樣嘢-「主角因為佢嘅缺憾犯錯,搞到佢同佢身邊嘅人有麻煩,然後佢喺故仔中途學識克服自己嘅缺憾,最後有所成長[註 3][21]。順帶一提,敘事學者一般認為瑪麗蘇嘅存在往往係因為寫同人小說嘅作者想將自己置身喺個故仔世界入面,所以作一個完美角色出嚟代表佢自己,滿足佢自己嘅幻想[18]

註釋[編輯]

  1. 有人會做進一步嘅分野,指出希臘文 hamartia 指嘅係個角色犯嘅一件重大錯誤,而唔係佢本身性格上嘅缺失。
  2. 英文 Mary Sue 係女人名。喺西方文壇,啲人會用 Marty Stu 或者 Gary Stu 等發音相近嘅男人名嚟指冇角色缺憾嘅男性角色。
  3. 不過有人認為,用咗 Mary Sue 同 Marty Stu 嘅作品當中都有成功個案。

睇埋[編輯]

[編輯]

  1. Bremer, J.M. "Hamartia." Tragic Error in the Poetics of Aristotle and in Greek Tragedy. Amsterdam, Adolf M. Hakkert, 1969.
  2. Gerke, Jeff (2010), Plot versus Character: A Balanced Approach to Writing Great Fiction, Cincinnati: Writer's Digest Books. p. 79.
  3. Bell, James Scott (2004), Write Great Fiction: Plot & Structure, Cincinnati: Writer's Digest Books. p. 142.
  4. Ultimate List of 100 Character Flaws for Writing.
  5. 5.0 5.1 5.2 How to Craft Impactful Character Flaws. well-storied.
  6. Married to the Job. TV Tropes.
  7. Ser Jaime Lannister. Sparksnotes.
  8. Brilliant, but Lazy. TV Tropes.
  9. MELATI, V. P. (2014). An Analysis on Gru’s Personality Changes in “Despicable Me” Film (Doctoral dissertation, University of Muhammadiyah Malang).
  10. Davis, Paul (1990). The Lives and Times of Ebenezer Scrooge. New Haven, CT: Yale University Press.
  11. 123 Ideas For Character Flaws – A Writer's Resource.
  12. Good Flaws, Bad Flaws. TV Tropes.
  13. Tragic Flaw. Literary Device.
  14. Fatal Flaw. TV Tropes.
  15. What Might Aristotle Think About Game of Thrones?.
  16. 'GAME OF THRONES': NED'S SENSE OF DUTY IS HIS TRAGIC FLAW, SAYS SEAN BEAN.
  17. Van Rij, Jan (2001). Madame Butterfly: Japonisme, Puccini, and the Search for the Real Cho-Cho-San. Stone Bridge Press.
  18. 18.0 18.1 Segall, Miriam (2008). Career Building Through Fan Fiction Writing: New Work Based on Favorite Fiction. Digital Career Building. Rosen Publishing Group. p. 26.
  19. Mary Sue.
  20. Chander, A., & Sunder, M. (2007). Everyone's a superhero: A cultural theory of" Mary Sue" fan fiction as fair use. California Law Review, 597-626.
  21. Walsh, Ricard (2018). "T&T Clark Companion to the Bible and Film". Bloomsbury Companions. Bloomsbury Publishing: 77.