對立角色
.jpg)
對立角色，日文稱之為敵役，係創意寫作相關嘅概念，角色一種，指故事入便同主角作對嘅角色，佢哋好多時會係奸角，但係都唔一定。對立角色嘅設定，對推進情節嚟講非常重要。
基礎概念
[編輯]廿一世紀初一般認為，好睇嘅故事通常都離唔開衝突。冇衝突嘅故事，幾乎實會變成流水帳：主角做咩都順風順水，讀者同觀眾一路睇一路就冇晒興趣；因此喺典型嘅敘事結構之中，通常都要有返個對立角色，呢個角色負責逆主角而行—佢喺目標、價值觀等方面同主角有所抵觸，因而同主角起衝突，令到主角需要作出選擇、解決難題。好多作品仲會有多個對立角色。佢哋係推動情節嘅重要力量[1]。
對立角色唔洗一定係邪惡嘅，但一定要令主角無法原地踏步。
事實係對立角色個英文名（參見英文：antagonist ），本身係嚟自希臘文中 anti- 呢個詞元件，意思就係反、反對、逆向等嘅意思。[2]
對比奸角
[編輯]對立角色同奸角係兩個唔同嘅概念。奸角係指邪惡、唔合乎人類道德價值嘅角色。相比之下，對立角色純粹係同主角作對[3]。虛構故事成日會將主角描寫成英雄，會對抗邪惡，所以佢哋嘅對立角色好多時都係周圍殺人放火嘅惡人，對呢啲作品嚟講，對立角色同奸角係同一樣嘢。不過亦有作品會採用更複雜嘅做法。
例如係日本漫畫《死亡筆記》噉。喺故事之中，夜神月係主角，佢利用死亡筆記去私刑式「執行正義」。同佢對抗嘅 L ，係故事入面典型嘅對立角色，佢嘗試阻止夜神月，所以係對立角色。但喺道德層面上，L 反而被認為係代表住法律、公義同理性，屬於忠嘅對立角色。
又例如係莎士比亞嘅悲劇《馬克白》噉，馬克白係故事嘅主角，成個故事都係由佢嚟帶動嘅，但故事講佢為咗謀權而弒君，仲一路謀殺咗好多人，逐步走向暴政同瘋狂。諸如馬克德夫等同佢作對嘅角色，雖然喺劇中係對抗主角嗰一方，但一般都會被視為更正義、更具道德正當性。呢種情況下，主角反而邪惡過其對立角色[4]。
奸角同對立角色有分別就表示，喺某啲虛構作品或者劇作之中，設奸角為主角，俾讀者觀眾由奸角嘅角度睇嘢，可能會更有趣味。
寫作使用
[編輯]對立角色同主角一樣，要做出各種嘅決定同行動。而由於佢哋定義上就係同主角作對嘅，呢啲決定同行動會對主角造成阻滯。
亦有部份作品會選擇採用無對立角色嘅做法，用第啲方法阻礙同挑戰主角。例如彼思電影《玩轉腦朋友》第一集就被指係近似呢種情況，冇任何一個角色明顯係同主角作對嘅[5]。對於無對立角色嘅故仔，有一種見解主張，呢啲故事係以某啲力量為對立角色，譬如講主角喺大災難下求存嘅災難片，就可能係以場災難本身，作為同主角作對嘅力量[6]。
睇埋
[編輯]引述
[編輯]- ↑ Gunderman, Hannah C. (May 2017). "Blurring the Protagonist/Antagonist Binary through a Geopolitics of Peace: Star Trek's Cardassians, Antagonists of the Alpha Quadrant". The Geographical Bulletin. 58 (1): 52–53.
- ↑ "Antagonist". Online Etymology Dictionary. 喺28 November 2010搵到.
- ↑ Truby, John (2008). The anatomy of story: 22 steps to becoming a master storyteller (第1版). New York: Farrar, Straus and Giroux. pp. 46–47. ISBN 978-0-86547-993-7. OCLC 281139315.
- ↑ "Macbeth Antagonist". 原著喺2025年12月11號歸檔. 喺2025年11月22號搵到.
- ↑ Movie Analysis: "Inside Out" — Characters，留意呢篇文有少少將奸角同對立角色當咗做同義詞。
- ↑ "The Elements of Literature". roanestate.edu. 原著喺30 December 2017歸檔. 喺29 April 2013搵到.
拎
[編輯]- （英文）對立角色相關橋段
