奸角
.jpg)
奸角，或者叫反派，係文學或者影視作品專做壞事嘅角色，同忠角相反。奸角好多時都會同主角作對，最後都無好收場[1]。
嗌法
[編輯]奸角呢個概念嘅叫法：
- 粵港地區會用嘅中文：
- 奸角，粵拼：gaan1 gok3
- 反派，粵拼：faan2 paai1*3
- 英文：villain
基礎
[編輯]典型嘅反派角色有以下幾個特徵：
- 邪惡嘅外表：樣貌兇惡、猙獰可怕或者猥瑣；亦有啲反派個樣生得好睇，會利用自己嘅外表嚟引誘其他人，令對方放低戒心。
- 邪惡嘅性格：瘋狂、殘忍、嗜血、妒忌心重，見到人受苦或者失意反而覺得開心。
- 邪惡嘅力量：擁有極具殺傷力嘅武器、能夠使用危險嘅魔法，或者可以指揮大批手下、軍隊等。例子可以睇吓黑暗魔王嘅概念。
- 邪惡嘅行為：可能包括隨意殺人、目中無人、大肆破壞、危害公共安全，甚至破壞社會秩序。
亦要留意，某啲特徵喺現代可能已經成為陳腔濫調。
類型
[編輯]睇埋：固定角色
反派角色有好多類型。
悲劇反派[2]係指一啲本質唔算壞，但因為命運、創傷、誤會或者錯誤信念而走向邪惡嘅角色。佢哋往往喺善與惡之間掙扎，內心有脆弱同矛盾。例如一啲因失去親人而復仇、最終被仇恨吞噬嘅人物，就屬於典型悲劇反派。呢種角色能夠引起觀眾同情，反映人性灰色地帶。
致命女郎係一種以美貌、誘惑同操控為主要手段嘅女性反派形象。佢哋聰明、冷靜、危險，利用感情或者慾望去達成目的。致命女郎象徵住權力與誘惑嘅結合，喺文化上反映咗社會對女性魅力與威脅嘅矛盾想像。[3]
指定反派 (暫譯) [註 1]係指喺虛構作品中嘅某啲反派角色，查實並冇實質或者充分嘅惡行表示佢哋真係反派，但由於作者唔識點寫塑造角色，夾硬將某個角色標籤為反派，仲將情節寫到要觀眾同其他角色討厭佢。呢種情況反映作者冇為角色提供令人信服[註 2]嘅動機或背景。
