文化

文化（粵音：man4 faa3）係指人類所創造嘅精神財富，好似文學、藝術、教育、科學、禮貌、節日等等。喺考古學上就指同一歷史時期嘅遺跡、遺物嘅綜合體。同樣嘅工具、用具、製造技術等係同一種文化嘅特徵。有時文化指嘅係文明。

一個群體嘅文化，包括佢哋啲成員需要識嘅規範同習俗，而呢啲規範同習俗係「如果一個人唔識得守，就會畀個群體當佢係外人」嘅。例如一個人如果要做粵文化嘅一分子，就應該要識得講粵語、識得講「得閒飲茶」以及係識聽同講好多嘅粵語俗語... 等等^[1]。

雖然早喺原始社會時期，人類就已經形成咗第一次分工，產生咗農業民族同埋畜牧民族，但早期文化都係喺農業民族中產生嘅，因為畜牧民族要逐水草而居，居無定所，唔容易產生大規模嘅聚居，對文字冇迫切需要；而農業民族容易形成大部落，興修水利需要大量協同工作嘅人群，所以最早嘅大國家同埋奴隸制都係產生於農業民族。有咗大國家同埋奴隸制至可以產生大批聚集嘅有閑階級，佢哋發明咗文字，促使形成腦力勞動同埋體力勞動嘅人類第二次分工。從而產生狹義嘅文化（廣義嘅文化指所有人類嘅活動，都可以叫作文化）。

文化嘅概念

文化一詞起源自拉丁文嘅動詞「Colere」，意思係耕作土地（故此園藝學嘅英文係Horticulture），後引申為培養一個人嘅興趣、精神同埋智慧。文化概念係英國人類學家愛德華•泰勒喺1871年提出嘅。佢將文化定義為「包括知識、信仰、藝術、法律、道德、風俗以及作為一個社會成員所獲得嘅能力同習慣嘅複雜整體」。此後，文化嘅定義層出不窮，克萊德•克拉克洪喺1950年代尾搜集咗超過200個文化嘅定義。

文化喺漢語中實際係「人文教化」嘅簡稱。前提係有「人」至有文化，即係文化係討論人類社會嘅專屬語；「文」係基礎同埋工具，包括語言同埋文字；「教化」係呢個詞嘅真正重心所在：作為名詞嘅「教化」係人群精神活動和同埋物質活動嘅共同規範（同時呢個規範喺精神活動同埋物質活動嘅物件化成果中得到體現），作為動詞嘅「教化」係共同規範產生、傳承、傳播以及得到認同嘅過程同埋手段。

對文化嘅一啲觀點

唔同學科對文化有唔同理解。

從哲學角度解釋文化，認為文化從本質上講係哲學思想嘅表現形式。由於哲學嘅時代同地域性從而決定文化嘅唔同風格。一般嚟講，哲學思想嘅變革引起社會制度嘅變化，伴隨住對舊文化嘅鎮壓同埋新文化嘅興起。

從存在主義嘅角度，文化係對一個人或一班人嘅存在方式嘅描述。人存在喺自然之中，同時亦存在喺歷史同埋時代之中；時間係一個人或一班人存在喺自然之中嘅重要平臺；社會、國家同埋民族（家族）係一個人或一班人存在喺歷史同埋時代之中嘅另一個重要平臺；文化係指人喺呢種存在過程中嘅言說或表述方式、交往或行為方式、意識或認知方式。文化唔單只用嚟描述一班人嘅外在行為，文化特別包括作為個體嘅人嘅自我嘅心靈意識同埋感知方式。一個人喺返到自己內心世界嗰時嘅一種自我嘅對話、觀察嘅方式。

文化嘅核心係佢嘅符號系統，例如文字。各文字體系有相應嘅認知心理。

特點

通過對唔同文化嘅比較研究，至可以瞭解文化嘅特點。

首先文化係共有嘅，係一系列共有嘅概念、價值觀同埋行為準則，係令個人行為能力成為集體可以接受嘅共同標準。文化同社會係有密切關係，冇社會就會冇文化，但亦有啲冇文化嘅社會。喺同一個社會裏面，文化都唔一致。例如，喺任何社會裏面，男同女嘅文化就有唔同。此外，唔同年齡、職業、階級等之間都有次文化嘅差異。

文化係學返嚟嘅，而唔係通過遺傳而天生具有嘅。生理嘅滿足方式係由文化決定嘅，每種文化決定呢啲需求點樣得到滿足。從呢個角度睇，唔包括人嘅靈長目動物都有各種嘅文化行為，但係呢啲文化行為只係單向嘅文化表現好似食白蟻嘅方式、警戒嘅呼喊聲等。同人類社會中龐大複雜嘅文化象徵體系相比，就顯得有啲微不足道。

參考：濡化

文化嘅基礎係象徵符號。其中最重要嘅係語言同埋文字，但亦包含其他表現方式例如圖像（好似圖騰旗幟）、肢體動作（好似握手，吐脷）、行為解讀（送禮）等。幾乎可以話整個文化體系係透過龐大無比嘅象徵體系深深植入人類嘅思維之中，而人亦透過呢套象徵符號體系理解，解讀呈現喺眼前嘅種種事物。因此點樣解讀各種象徵符號喺嗰個文化嘅實質意義，點樣解讀象徵符號更成為人類學，語言學等社會學科詮釋人類心智嘅重要方式之一。此外，文化作為相互關係嘅整體而呈現出一體化嘅趨勢。

文化進化

文化進化（cultural evolution）係指社會同文化好似生物進化噉，隨時間演變。

文化進化嘅概念將進化論上嘅諗頭廣義化，用嚟解釋文化嘅演變：文化可以定義為「能夠影響人嘅行為、可以喺人之間傳播嘅資訊」^[2]，每一吓文化傳播都有可能成功，而成功嘅機會率視乎嗰嚿文化資訊嘅特徵而定，例如好笑嘅笑話比較大機會會令聽嗰個人開心同埋想將個笑話講俾第個人聽，所以成功傳播嘅機會率會高啲；即係話一嚿文化資訊同一個基因（gene）一樣，「表現好就有得被複製（由一個人嘅腦傳去第個人嘅腦）」，於是有唔少社會學家就主張，進化論上嘅概念可以應用嚟分析文化嘅演變，形成咗文化進化嘅理論^[3]。

分類

睇埋

引咗

↑ Yim, O., & Clément, R. (2019). "You're a Juksing": Examining Cantonese–English code-switching as an index of identity. Journal of Language and Social Psychology, 38(4), 479-495.
↑ J., Richerson, Peter (2005). Not by genes alone : how culture transformed human evolution. Boyd, Robert, 1948-. Chicago: University of Chicago Press.
↑ Mesoudi, Alex (2011). Cultural Evolution: How Darwinian theory can explain human culture and synthesize the social sciences. Chicago, IL: University of Chicago Press.

[1] Yim, O., & Clément, R. (2019). "You're a Juksing": Examining Cantonese–English code-switching as an index of identity. Journal of Language and Social Psychology, 38(4), 479-495.

[2] J., Richerson, Peter (2005). Not by genes alone : how culture transformed human evolution. Boyd, Robert, 1948-. Chicago: University of Chicago Press.

[3] Mesoudi, Alex (2011). Cultural Evolution: How Darwinian theory can explain human culture and synthesize the social sciences. Chicago, IL: University of Chicago Press.

[1]

[2]

[3]