嶺南文化

出自維基百科,自由嘅百科全書

粵文化嘅象徵-木棉花
珠江口虎門大橋;珠江可以話係粵文化嘅生命之源。
18 世紀嘅一幅油畫;入面睇到廣州十三行同西歐各國嘅旗-粵人不嬲都好興同外國人搞生意。

嶺南文化粵拼ling5 naam4 man4 faa3),又叫南粵文化或者珠江文化,係嶺南地區(指五嶺以南嘅地區)獨有嘅地域文化。佢包咗廣東廣西香港、同埋澳門嘅文化。喺純地理上嘅定義嚟講,呢個詞包埋區入面嘅客家文化、潮州文化、同埋廣西嗰啲少數民族文化。但係啲人講「嶺南文化」多數都係指緊呢一頭嘅粵文化-因為粵人一路都係廣東同廣西東部嘅主要族群[1][2]

喺地理上,嶺南係亞熱帶氣候,天氣又暖又潮濕,農地多過同樣係俾山隔開嘅福建,坐正喺珠江呢條大河上面,自古以嚟又靠海搵食同成日同外界搞生意,所以嶺南嘅地方文化偏向係農業文化、海洋文化、同商業文化。再加上佢喺發展嘅過程入面吸收咗好多西歐傳嚟嘅文化,令嶺南文化同其他唐人地區嘅文化好唔同,最明顯嘅係喺七方面:語言、建築、美術、工藝、演藝、文學、同埋飲食文化。除咗呢啲,嶺南仲有好多獨特嘅風俗,好似係執骨嘅習俗噉[3][4][5]

中國社會科學院喺 2006 年深圳咸頭嶺新石器時代遺址嘅考古工作掘到好多紅燒土、陶質生活工具同石器。科學測定話嶺南地區喺 6,000 至 7,000 年前嘅新石器時代中期嗰陣經已有人住,而且仲有一定程度嘅文明。根據呢個發現,珠江文明嘅歷史可以推算到公元前 5,000 年(距離而家 7,000 年前),悠久歷史唔渣過黃河文明同長江文明[1][2]

來源[編輯]

公元前 200 年嘅南越國嘅雕塑;嗰時嘅嶺南地區仲係南越族嘅地頭。
內文:廣東史廣西史

由南越到漢化[編輯]

喺公元前 110 年嗰陣,控制住嶺南地區同而家越南北部嘅古國-南越國[5][6]-俾漢朝帝國擊敗咗,令到呢笪地完完全全噉做咗中原皇朝嘅領土。雖然係噉,嗰時已經有南越族(粵拼:naam4 jyut6 zuk6百越人嘅分枝之一)喺呢一帶度住。後嚟喺 7 至 13 世紀(大唐大宋嗰段時期),因為中原嗰頭俾胡人大規模侵略,搞到有大批古漢人(南越族因為漢化程度唔夠,唔俾人當係漢人)走難去咗嶺南度住[7]。打後嗰幾個世紀,嶺南嘅古漢人同南越人一齊住兼通婚,令到現代粵人普遍都有齊古漢人同南越人嘅血統[8],而且嶺南文化亦都有齊南越文化同唐宋漢文化嘅元素喺入面:好似係今日嘅廣東話噉,佢保留咗少少南越話嘅特徵,但係總體又好近唐宋人講嘅中古漢語,仲攞得嚟讀唐詩宋詞[9][10][11]

喺 15 世紀左右(大明時期)開始,嶺南地區漢化得七七八八,而且因為靠海又近東南亞,做咗大明同西歐人貿易嘅主要港口,吸收大明文化之餘仲學咗好多西歐嘅文化。好似係嶺南畫派噉,就係揉合咗東方嘅國畫同埋西歐嘅水彩畫而變出嚟嘅新風格,粵菜亦都吸收咗啲西人嘅煮嘢方法。由嗰陣時開始,嶺南文化就一路噉發展,喺建築、美術、工藝、演藝、文學、哲學、同生活文化嘅層面都有唔差嘅成就[5]

摩登時代[編輯]

因為嶺南係大清現代中國嘅主要對外港口,華人向海外移民一路都係粵人佔咗多數,令到唐人街好多時都係廣東話做主導。除咗噉,「唐人街」呢個名亦都同粵人移民有啦掕:嶺南漢化得最犀利嘅時期就係大唐統治嗰段時間,有學者話就係因為噉所以粵人(同埋周邊地區嘅民系,好似係福佬人噉)對大唐零舍有歸屬感,興嗌自己做「唐人」,並且將呢種習俗帶咗去外國[12]

喺廿世紀中期開始,英屬香港喺各方面都進步得好快。「東方之珠」嘅成就令到好多粵人都對香港好嚮往。香港嘅廣東話流行文化(包括流行曲港產片)喺嶺南地區有好大嘅影響力,例如係好多住喺中國大陸嘅粵人都鍾意收睇香港拍嘅戲同電視劇,而且仲會學香港人噉用繁體字寫嘢。而喺香港方面,因為香港人同其他亞洲國家嘅商業、文化同學術交流得多,吸納咗好多日本韓國臺灣嘅文化。好多香港人都當食壽司或者其他日本嘢食係家常便飯,仲將「達人」、「駅」、同「の」(意思係「嘅」,粵音係 「zi1」)呢啲日文字加咗入自己嘅日常用語裏面,形成咗所謂嘅「港式粵語[13][14]

總體特色[編輯]

對外開放[編輯]

喺好耐之前,嶺南已經對外開放,南海神廟有波羅國使者嘅雕像,喺西嚟初地仲有達摩祖師嘅遺跡。因為自古以嚟嶺南地區一路同外國做生意,再加上離中原心臟地帶遠,呢一帶好多時都係接觸各國嘅人多過北方人,所以有好多非唐人嘅宗教同思想傳咗入嚟。佛教道教、好幾派嘅基督教回教、同各種自然崇拜喺呢一帶度百花齊放。好似係拜孔孟呢啲中原嘅宗教儀式反而好多時都喺嶺南唔興。除咗噉,嶺南畫派同廣東菜等都吸咗好多西歐文化嘅元素喺入面。呢啲都表現咗粵人肯包容同接納外來文化[5]

睇重商業[編輯]

近呢千幾年嚟,嶺南地區喺好幾個朝代都係做中原皇朝嘅主要對外港口(尤其係對東南亞)。所以粵人好多時都係要靠行船行商搵食,廣州佛山變咗做大商埠,再加埋後起之秀嘅香港,對外行商一路以嚟都係粵人嘅經濟命脈。粵人好多都為咗做生意搬咗去東南亞度住,近嘅去越南或者泰國,遠嘅有啲去到印尼澳洲-令到海外唐人好多時都係粵人佔咗多數。嶺南仲出咗好多人識嘅廣東商幫。呢啲地理文化特色令到粵人偏向務實,講着數,睇重商業發展[5]

傳統語言[編輯]

內文:廣東話

喺嶺南最有人氣嘅語言廣東話(粵拼:gwong2 dung1 waa2),又叫「廣州話」或者「粵語」。嶺南嘅傳統戲曲同民歌多數都係用廣東話嚟去唱同表達嘅。廣東話嘅歷史有得追溯到去公元前嘅南越國時期。當時住喺嶺南嘅係南越族,佢哋講嘅話唔屬於唐話。但係後尾佢哋俾中原王朝統治,跟手唐朝同宋朝嗰時又有大批古漢人搬咗去嶺南住,漢越雜處,令到廣東話慢慢成形做一種有唐話嘅文法同發音,但又保留咗些少南越特色嘅獨特語言:今日嘅廣東話係中古漢語嘅變種。佢明顯似唐話:砌句子啲規則同上海話閩南話、同客家話有好多明顯相似嘅地方;佢仲保留咗好多中古漢語嘅音,讀得到好多唐詩宋詞。之但係廣東話嗰啲日常用語入面都仲見到啲南越話嘅特徵(呢點同越南話好似),好似係喺文法上廣東話有陣時會將修飾語放喺個名詞後面。總括嚟講,現代廣東話保留到唐宋嘅遺風得嚟,又唔會話完全冇晒南越嘅特色[9][10][11]

文字方面,珠江三角洲地區嘅粵文一般都係用漢字加埋粵字寫出嚟嘅,雖然廿一世紀頭開始有人提議用羅馬字母或者諺文嚟寫。

建築[編輯]

喺廣東番禺沙灣鎮,14 世紀起嘅何氏大宗祠;佢嘅色水主要係比較清淡嘅灰白同深綠,有大量浮雕做裝飾,唔用圓柱,而且喺正門之後仲有道儀門,係極之典型嘅古典嶺南建築。
餘蔭山房嘅水池
內文:嶺南建築

古典嶺南建築[編輯]

嶺南建築(粵拼:ling5 naam4 gin3 zuk1)好有地方特色[15][16]。同北方比起上嚟,嶺南地區嘅氣候又熱又濕立立,如果將中原嗰套建築風格直接搬落嚟嘅話,會好容易有溫度唔舒服或者發霉呢類濕滯嘢。所以粵人整咗一套同北方唔同嘅建築風格。古典嶺南建築通常比較輕,而且會用通透同冇噉易發霉嘅材料起,色水會偏好灰白或者係綠呢啲柔和嘅色調。喺結構方面,呢啲建築通常有多層嘅斜坡頂同方形柱,而且因為氣候冇北方咁凍,令到嶺南嘅人鍾意向外面行,所以嶺南民居建築就發展咗好多露台呢類嘅開放式結構,等人有得唞涼。總體嚟講,呢柞特徵令到古典嶺南風格嘅建築物望落都比較輕同涼爽[17]。就算到咗今日,古典嶺南式建築物喺廣州呢啲大城市嘅商店街成日都會見到。

近世[編輯]

19 世紀起,喺西關陳氏書院俾好多人覺得係好典型嘅古典嶺南建築。而隨著十八、十九世紀更多噉參與世界貿易,世界銀礦、銀幣貿易嘅大量湧入,令廣東呢度成為世界工廠,為其他國家嘅唔同需求,而設計、訂製到出口手作成品。頻密嘅貿易活動帶埋著外來文明,對嶺南建築都有影響,好似祠廟培修碑文就記低咗用墨西哥銀圓畀嘅捐款,宗祠亦有埋用咗西人造型嘅裝飾石雕[18]。外來嘅風潮仲影響埋後邊唐樓啲建築風格嘅發展。

唐樓[編輯]

除咗呢啲古色古香嘅粵式建築,嶺南仲有好多粵西薈萃嘅多層式建築物-唐樓(粵拼:tong4 lau4)。佢哋喺香港同埋澳門呢啲俾西歐文化影響得犀利啲嘅地方周圍都見得到。

嶺南園林[編輯]

內文:嶺南園林

嶺南園林(粵拼:ling5 naam4 jyun4 lam4)係嶺南獨具一格嘅園林設計[19],當中最有代表性嘅要數嶺南四大名園

傳統嚟講,嶺南地區山水靚又臨海,有五嶺阻住,環境同北面嘅中原核心地帶好唔同,所以發展咗一套自己嘅風格唔出奇。嶺南地區又熱又成日打風落大雨,所以粵人起園林嗰陣多數會用庭院式佈局-用建築物將個庭園圍住嗮,令到園林入面嘅花草受到保護,打風落大雨嗰時冇咁易俾啲風雨吹爛打爛,而且仲可以用呢啲植物嘅陰影幫成笪地降溫。地理特徵亦都令到嶺南園林喺規模上面比較細,又唔似得中原嘅園林噉樣俾啲皇家常規制度限住嗮(即係俗語所講嘅「山高皇帝遠」)-佢會揀用木棉樹呢類有本土特色嘅植物同埋用好多木雕同陶瓷呢啲民間工藝品去做裝飾,好似廣州喺廿世紀初起嘅寶墨園就係噉。而且因為佢哋細,好少有山土,所以成日都會「以石為山」-用石頭做假山,例如係餘蔭山房就用咗呢種手法。總體嚟講,呢柞特徵令到嶺南風格嘅園林比較貼近大眾同樸素[20][21]

視藝[編輯]

德國一間博物館收藏嘅象牙波;成個波都淨係用咗一碌象牙鑿出嚟,有成 16 層,啲層仲曉轉。

粵人嘅視覺藝術係由南越人嘅藝術嗰度開始嘅。而喺嶺南地區漢化咗之後,呢啲工藝技術變得更加精湛。到咗今日,嶺南嘅各種工藝品已經去到世界級嘅水平。佢哋嘅產品賣到去全世界好多地方,而且啲產品唔淨只得雕塑:仲有刺繡、彩瓷、剪紙、草蓆、風箏、貼畫、同埋傢俬。除咗噉,粵人一路都有搞美術,出咗幾個獨有嘅美術流派。粵人發明嘅視藝風格當中比較出名嘅有以下呢啲:

廣州牙雕[編輯]

內文:廣州牙雕

廣州牙雕(粵拼:gwong2 zau1 ngaa4 diu1),又叫做「南派牙雕」,係另一樣嶺南地區好有朵嘅工藝品。佢係一種有超過兩千年歷史嘅工藝技術。呢種工藝起源喺秦漢時代嗰陣嘅中原地區,後嚟傳咗去嶺南地區。後尾粵人仲發展咗一套自己嘅風格。呢種雕塑係攞象牙做料,佢用咗大笨象身上最硬嗰部份嚟整出一啲好似玉噉通透但係又硬淨嘅雕塑,而喺氣候溫和嘅嶺南地區,廣州人仲有咗出名精細得嚟又唔會脆嘅「廣州牙雕」,甚至仲叻到成功整出咗俾人嗌做「鬼工」嘅工藝品-象牙波

雖然話牙雕工藝的確係好勁,但係自從喺 1980 年代開始,大笨象俾想攞象牙嘅人係噉捕殺,搞到世界好多地方嘅人都開始覺得用象牙整嘢唔係咁好。國際社會仲話咁快立咗法,唔俾人買賣象牙或者係用象牙做料整嘢。於是乎而家嘅粵人就開始咗去搵一啲代替品-質地似象牙但又唔係象牙嘅料-嚟去傳承呢種古老嘅工藝[22]

喺廣州南越王墓掘出嚟嘅青玉角杯

廣州玉雕[編輯]

內文:廣州玉雕

廣州玉雕(粵拼:gwong2 zau1 juk6 diu1)係粵廣地區嘅民間玉雕工藝。佢有成過二千年歷史-考古學家喺南越王墓發現咗南越人整嘅玉雕[23]。而喺漢化之後,嶺南嘅人有學整大唐嘅玉雕祭祀神器,仲繼承咗大宋嘅七巧色玉技藝。今日嘅廣州玉雕主要用啲嶺南周圍嘅玉材,好似係呈草綠色嘅南方玉噉。呢種風格嘅玉雕出咗名「莊重」、「輕盈」得嚟又「玲瓏剔透」。而且粵人仲發明咗一種叫「留色」嘅特技,雕嗰陣會保留住原本嗰舊玉嘅天然色水,鑿出一啲色彩鮮艷得嚟又自然嘅作品。喺兩廣地區,廣州玉雕最常係用嚟整首飾同埋擺設。粵人仲成功整到「玉球」-一種入面有十幾廿層,用玉造嘅波-呢種特殊嘅工藝品[24][25]

粵繡[編輯]

內文:粵繡

粵繡(粵拼:jyut6 sau3)係粵廣地區嘅刺繡工藝,喺廣州、佛山、番禺、順德東莞、以至台山呢啲地方都有一定嘅支持度。呢種工藝有成千年歷史,最早可以追溯到去公元 9 世紀。嗰陣嶺南地方漢越共處,俾當時控制住中原嘅大唐統治緊,相傳話唐順宗手下就有一個嚟自南海嘅 14 歲女仔,佢喺刺繡方面嘅技術犀利到可以完美噉將《法華經》刺出嚟,啲字仲要係得「粟粒」噉大。嗰陣時之後,嶺南嘅民間就有整刺繡工藝,仲出埋自己嘅風格。喺 16 世紀有講到葡萄牙嘅生意人將嶺南嘅粵繡買咗返去送俾自己嘅國王,仲要俾國王讚。喺跟住嗰幾百年,粵繡就一路發展,賣俾世界好多地方嘅人,做咗喺歐洲嘅貴族同有錢人之間好多人鍾意嘅東方飾物之一[26]

除咗有自己獨特嘅一套針法技巧,粵繡亦都有顯眼啲嘅特徵:佢一般嚟講遠睇都好樣眼,近睇就好精細,紋理清晰,畫面多嘢得嚟又唔會覺得亂糟糟,而且色水好鮮艷。喺嶺南地區,粵繡有得純用嚟做裝飾,但係又有用嚟做生活用品或者係做大戲嘅戲服呢啲實際啲嘅用途[26]

潮州木雕[編輯]

潮州嘅金漆木雕
內文:潮州木雕

潮州木雕(粵拼:ciu4 zau1 muk6 diu1)係喺嶺南好出名嘅工藝。佢係由屬於閩系潮州人搞起嘅,而家吓連粵人都喺度搞。呢種工藝歷史好悠久:喺 11 世紀嗰陣大宋已經有文獻記載呢種工藝,而且有錢人家唔少都鍾意買嚟裝飾自己屋企。去到 16 世紀尾,呢種工藝開始喺民間度普及起上嚟,好多祠堂同廟都會搵金漆潮州木雕做裝飾,仲有好多嶺南以外嘅地方嘅人幫襯。金漆木雕通常會搵啲實淨得嚟又堅韌嘅木頭(好似係樟木杉木油木呀噉)嚟做料,畫完幅草圖之後就由大到細噉去將舊木頭雕做想要嘅樣,成咗形之後至跟手上金漆。

剪紙[編輯]

內文:剪紙

剪紙(粵拼:zin2 zi2)係另一樣喺嶺南好多人整嘅工藝,尤其係佛山搞得零舍叻。呢種工藝喺大宋時期尾嗰陣開始有。佢本嚟只係用嚟做大節日嗰陣用嘅裝飾,後嚟啲人開始拎去賣,令到佢變咗做一種有商業價值嘅工藝品,喺窗花以至鞋花呢啲地方都會有人用。佛山剪紙嘅題材多數係啲平民化嘅嘢,包括神話、動物、吉祥圖案、或者係嶺南風土呀噉,色水好多變,主要係鮮艷嘅紅色,但係就連比較清淡嘅灰同綠都會有。大時大節嗰陣,粵人上下都會用好多唔同大細嘅鮮艷剪紙做裝飾,好有節日氣氛[27]

嶺南盆景[編輯]

內文:嶺南盆景

嶺南盆景(粵拼:ling5 naam4 pun4 ging2)係嶺南獨有嘅盆景藝術風格。呢個風格雖然話去到成 1930 年代先有人正式噉承認佢嘅存在,但係佢其實有成千年歷史,有得追溯去到 11 世紀。嗰時嘅中原皇帝宋哲宗將好出名嘅文人蘇東坡眨咗去廣東呢笪「南蠻之地」。雖然係俾人貶咗,但係據講蘇東坡一到步就即刻大讚嶺南山水植物靚(「嶺南萬戶皆春色」),而佢本人係盆栽發燒友,寫咗好多講盆栽嘅詩。睇返紀錄,粵人喺至少 15 世紀(大明時期)開始民間已經有唔少人鍾意整盆栽藝術。而到咗今日,嶺南盆景已經有咗自己獨有嘅一套風格。除咗會用啲有本土特色嘅植物品種之外,佢嘅特色係講求人工同自然嘅配合:例如係嶺南盆景藝術家好多時會好揼心機落去幫樖植物(自然嗰部份)揀返個同佢夾得埋嘅盆(人工嗰部份);喺處理樖植物啲枝葉嗰陣會好有技巧噉用修剪令到樖嘢跟住個藝術家嘅意願嚟生,生完一輪之後新生出嚟嗰啲枝葉又會啱啱好將修剪嘅痕跡遮住,令到成樖嘢望落好自然。

嶺南書風[編輯]

內文:嶺南書風

嶺南書風(粵拼:ling5 naam4 syu1 fung1)即係粵人寫書法嘅風格。呢種書風一般都俾評論家形容係「大膽」、「浪漫」、又「有風骨」-都算受人景仰,但係佢嘅歷史都幾多波折:喺公元前南越國啱啱俾漢朝打冧嗰陣,嶺南嘅人已經有喺度寫書法。但係嶺南天氣熱辣辣又濕立立,啲紙兩嘢就又霉又爛,搞到早期嗰啲嶺南書法都冇乜留得到落嚟。打後嗰一千年,雖然話嶺南嘅人有響度刻石碑,而考古學家都搵到啲用墨寫嘅書法,但係仲係出唔到特別有料到嘅書法家。要一路去到成 15 世紀,嶺南出咗俾人嗌做「白沙先生」嘅陳獻章,嶺南先至真係叫做有一套俾人認同嘅書法風格。雖然係噉,嶺南嘅書法家都仲係好少可會專攻書法,就連陳獻章佢本人主要嗰份工都係哲學家,而唔係書法家。跟住嗰啲嶺南書法家又多數都係打第啲工做正職嘅-好似係哲學家、詩人、或者畫家呀噉,得閒先會搞書法。雖然係噉,嶺南都出過有朵嘅書法家同書法作品,例如係[28]

  • 陳獻章,1428-1500 年,出身新會,出名寫字嗰陣好好力水;佢曾經用新會圭峰山生出嚟嘅茅草自己整茅龍筆寫書法,而茅龍筆(全名叫「白沙茅龍筆」)家陣已經做咗新會嘅名產。
  • 鄺露,1604-1650 年,出身南海,識好多種唔同體嘅書法;佢嘅詩畫作品《袁崇煥督遼餞別圖詩》係佢喺 1628 年送別佢嘅死黨袁崇煥嗰陣畫寫嘅。據講呢幅作品而家收埋咗喺香港。
  • 張喬,1615-1633 年,喺廣州出世,出咗名又靚又琴棋書畫乜都識嘅大才女,但係得嗰 19 歲就病死咗;佢留落嚟嘅詩畫才品《南園諸子送黎美周北上詩卷》而家收藏咗喺廣州美術館

喺廿一世紀,廣東嘅粵人開始更加認真噉去研究嶺南書風,睇個勢似係想搞大佢[29]

廣彩[編輯]

香港藝術館收藏嘅《廣彩纏枝花卉雙龍耳瓶》;佢色水好鮮艷,睇得到西人畫畫風格嘅影響。
內文:廣彩

廣彩(粵拼:gwong2 coi2),全名叫做「廣州織金彩瓷」,係一種喺白色瓷器上面加彩繪燒出嚟嘅工藝品。佢出咗名色彩絢爛,畫工又精細。呢種工藝出現喺 16 世紀尾嘅大明時期,當時啲粵人由江西景德鎮嗰度運啲白瓷過嚟,再喺廣州嗰度幫啲瓷器油顏色、加圖案、再燒製。喺佢身上睇得到明朝文化嘅影,但係又加咗啲西人嘅風格喺入面,例如係《竹園陶說》就噉樣講:「清代中葉,海舶雲集,商務聚盛,歐土仲華瓷,我國商人投其所好,乃於景德鎮燒造白瓷,運至粵垣,加僱工匠,仿照西洋畫法,加以彩繪,於珠江之河南,開爐烘染,製成彩瓷然後售之西商」[30][31]

廣彩後嚟仲擴展咗去嶺南嘅其他大城市,例如香港就喺 1930 年代開始學廣州噉搞廣彩。香港人開咗好幾間廠整廣彩,啲成品仲出口去到美國、西歐國家、南美、東南亞、大溪地、同馬達加斯加呢啲地方。到咗廿一世紀,香港嘅廣彩業因為大陸嘅粵廣地區開始識整廣彩而開始冇乜點再搞,但係都仲有啲瓷藝發燒友喺嗰度嘗試緊將呢種工藝搞落去[32]

圖庫
《東戰場的烈焰》;佢係由高劍父喺 1930 年代畫嘅。

廣式傢俬[編輯]

內文:廣式傢俬

廣式傢俬(粵拼:gwong2 sik1 gaa1 si1)係嶺南獨有嘅整傢俬風格。佢喺大明時期嗰時發源,運用咗嶺南嘅本土木材、唐宋時代嘅漢人傢俬、再加啲西歐藝術風而整出嚟嘅一種新風格。佢嘅用料主要係紫檀木黃花梨酸枝木、同雞翅木呢類木材,通常每件傢俬都係用一舊大嘅木頭一嘢過鑿出嚟,令到每件廣式傢俬都淨係有一種木,而且好少可會有接駁嘅痕跡。呢種傢俬仲會有啲西方傢俬嘅曲線同埋大面積高浮雕,借咗啲西人嘅巴洛克(Baroque)式同洛可可(Rococo)式花紋,又會有啲好似潮州木雕噉嘅粵式圖案雕刻,同埋鍾意鑲好多啲好似係貝殼、雲石、陶瓷、琺瑯、或者玻璃畫呢類嘅裝飾物上去,形成咗唐西合璧。到咗廿一世紀,廣式傢俬已經做咗嶺南嘅其中一樣特產,其他華人同外國人都會幫襯[33][34]

嶺南畫派[編輯]

內文:嶺南畫派

嶺南畫派(粵拼:ling5 naam4 waa2 paai3)係喺 19 世紀尾開始有嘅一個畫畫流派。雖然佢歷史唔算係好久遠,但係就好有自己嘅特色。佢係由俾人嗌做「嶺南三傑」嘅高劍父高奇峰、同陳樹人搞起嘅。呢個流派係建基喺歷史悠久嘅國畫上面,再加埋西人嘅水彩畫風演變出嚟嘅一個風格。呢個風格嘅畫講重留白,而且因為運用咗由西歐引入嚟嘅水彩技術同印象派(Impressionism)思潮,會有一啲好鮮豔嘅顏色同埋用光嘅表達手法,同「蕭條淡薄」嘅國畫起到強烈嘅對比。好似係高劍父畫嘅《東戰場的烈焰》,佢就用咗水彩油嘅鮮紅色嚟代表戰火,再加埋位置上巧妙噉留咗白,令到畫面白色嘅位置似煙又似雲,等睇畫嗰個人有得自由噉去想象幅畫嘅內容[35][36]

高州角雕[編輯]

內文:高州角雕

高州角雕(粵拼:gou1 zau1 gok3 diu1)係嶺南喺 1960 年代開始有嘅工藝品。佢一開頭就好受歡迎,賣到去港澳同日本,甚至乎係包埋英國在內嘅廿九個國家同地區。佢係用各種水牛或者係山羊嘅角做料嚟作雕塑,有啲會將隻角切做細絲或者薄片,整出好多唔同嘅樣。

演藝[編輯]

一個表演者喺三藩市華埠嗰度彈粵樂好興用嘅秦琴。

既然嶺南地區講嘅話咁獨特又咁有歷史,呢一帶啲人唱嗰啲歌仔自然都會有獨到嘅風格。自從幾個世紀之前開始,嶺南地區已經有咗好多唔同嘅戲曲,好似係大戲廣東漢劇、同埋採茶戲呀噉。當中大戲個勢最勁,有好多海外嘅粵僑都鍾意聽,有時甚至乎連粵僑以外嘅華僑都聽埋一份。廣東話有自己嘅一套民歌,當中《南海潮》好多人都覺得係嶺南嘅象徵。嶺南演藝仲唔止有呢啲比較古老傳統嘅嘢:由廿世紀中期開始,香港出咗好多用廣東話嚟表達嘅流行歌同戲。呢啲歌甚至連喺西方世界都有人捧場。總體嚟講,嶺南嘅表演藝術可以話係極之豐富多元。

民歌[編輯]

內文:廣東話民歌

嶺南嘅民歌都好多樣化。由公元前嘅南越時期嗰陣,啲平民已經喺度作歌唱歌。到咗今日,嶺南地區已經有好多種唔同民歌。淨係講廣東話民歌就已經至少有珠三角嘅鹹水歌、跳禾樓祭祀唱嘅賣雞調、興婚禮嗰陣唱嘅高棠歌、俾湘贛地區影響咗嘅粵北民歌、廣州同東莞嗰帶興嘅粵調(分做粵謳板眼南音木魚歌、同龍舟歌五種)、同埋好多嘅兒歌(好似係好多粵人細個都唱過嘅《小蜜蜂》)。當中嘅賣雞調就有研究民族音樂嘅學者話佢有得追溯到去南越時期:賣雞調傳統係喺祭靈雞嗰陣唱嘅,而呢種祭祀係由古百越人稻作文化嘅拜雀圖騰演變出嚟嘅,所以講得上係文化上嘅活化石。呢啲類型嘅民歌喺嶺南地區都仲有好多粵人唱同周圍廣播[37]

一講起廣東話民歌一定會提、人稱「廣東非官方省歌」嘅《南海潮》(粵拼:naam4 hoi2 ciu4)嘅歌詞,用漢字同粵拼寫分別係:

漢字
紅霞滿灑粵天東破曉,
蒸蒸日上序華章,
紅棉紫荊又添千百朶,
欣欣萬世象。
我見江潮依然推起那舢板,
卻是穿過玉宇瓊樓新靚景,
我叫海潮波濤不要這洶湧,
隔住一片萬里大洋歸心切。
粵拼
hung4 haa4 mun5 saa2 jyut6 tin1 dong1 po3 hiu2,
zing1 zing1 jat6 soeng5 zeoi6 waa4 zoeng1,
hung4 min4 zi2 ging1 jau6 tim1 cin1 baak3 do3,
jan1 jan1 maan6 sai3 zoeng6.
ngo5 gin3 gong1 ciu4 ji1 jin4 teoi1 hei2 naa5 saan1 baan2,
koek3 si6 cyun1 gwo3 juk6 jyu5 king4 lau4 san1 leng3 ging2,
ngo5 giu3 hoi2 ciu4 bo1 tou4 bat1 jiu3 ze5 hung1 jung2,
gaak3 zyu6 jat1 pin3 maan6 lei5 daai6 joeng4 gwai1 sam1 cit3.

大戲[編輯]

溫哥華嘅大戲表演;嗰一頭有好多粵僑住,所以有唔少人捧場。
內文:大戲

大戲(粵拼:daai6 hei3),正式啲嗌做「粵劇」,可以話係廣東話傳統演藝嘅代表[38]。佢知名度高到俾人列咗入非物質文化遺產名錄。大戲起源最遲係喺 16 世紀頭,但係有好多歷史學家話佢可以追溯到成 13 世紀尾嘅南宋時期:嗰時嘅中原戲曲跟住向南走難嘅漢人一齊落咗嚟,後嚟再受西歐音樂形響咗而變成今日嘅大戲。到咗今日,大戲已經進化咗做一種結合咗唱做念打、音樂、同埋戲服嘅舞台藝術。簡單啲講,大戲嘅技巧包括咗:「唱」-指「唱功」,係講緊個大戲演員要識唔同嘅唱腔,仲要配合自己演緊嗰個角色去揀返個啱嘅唱腔;「做」係指「做功」,要配合自己個角色嚟去表演,好似係手勢、臺步、走位、同抽象表演呢啲功架;「念」係指「念白」,要識得透過好好控制講對白嘅語氣同神情嚟去表達自己演緊嗰個人物;「打」係指「武打」,即係要喺講打交嗰啲橋段嗰陣做舞水袖、揈水髮、玩扇、或者係耍棍呢類大動作[38]

配樂[編輯]

喺音樂方面,大戲會用成四廿幾種唔同樂器去搞配樂。呢柞樂器好多都係東方人普遍都會用嘅,好似係古箏或者琵琶呀噉。之但係呢柞樂器有啲都會有地方特色,例如係大戲用嘅梆子有分大中細,而且係空心長方形,叫做「南梆子」,唔似得北方噉用淨係得一種大細嘅實心梆子。自從喺 19 世紀開始,大戲仲開始咗採用啲西人嘅樂器,好似係小提琴[38]

行當[編輯]

大戲嘅行當(指演員個造型)有三部份:化妝、戲服、同頭飾。大戲演員嘅化妝通常係白底,會畫到對眉長一長仲向上翹嚟表示威嚴,再喺白底上面加第啲色,而加咩嘢色喺舊時嗰陣就睇佢演啲乜嘢人物-紅色代表血性忠勇,黑色代表剛耿忠直,白色代表奸惡陰險呀噉。大戲戲服早期嗰陣係用明朝嘅衫做板嘅,跟住嗰幾百年嘅大清時期俾京劇影響咗,開始用大清嘅衫。除咗呢啲嘢,頭飾亦係大戲演員一個好樣眼嘅特徵,女角會有好多簪、釵、梅花石、耳邊花、鳳冠呢類有傳統女性味嘅做裝飾,而男角嘅頭飾就偏向用嚟表達佢哋嘅職業,好似係太子盔、紥巾、帥盔、駙馬盔呢啲[38]

講古[編輯]

睇埋:廣府民間故事

講古(粵拼:gong2 gu2)係嶺南民間好興嘅一種民俗活動,係藝人(一般會嗌做「講古佬」)用廣東話對小說或者民間故事進行二次創作同演講嘅一種語言藝術。廣東由 16 世紀(明朝)嗰陣由江蘇嗰頭傳入咗講古佬呢個職業。嗰時有好幾個粵人拜咗吳越講古大師柳敬亭做祖師,開始咗廣東嘅講古藝術。廣東嘅講古佬多數只係靠好簡單嘅道具(例如係扇同醒木),將啲文學作品用平民化得嚟又有韻律性同節奏感嘅語言講出嚟,仲會借鑒一啲傳統戲曲入面嘅技巧等個故仔變得更加精彩。早期嘅廣東講古佬多數只係喺寺廟門口對香客講啲「勸世文」,後嚟會自己搭啲「講古寮」或者係喺街頭開街邊檔講古,再唔係就喺茶樓度講。由廿世紀開始,廣州嗰一帶啲文化公園同文化宮仲開始咗開固定嘅「說書台」,而且電台仲會有說書嘅欄目-除咗請啲講古藝人講之外,仲會請啲出名嘅話劇演員同文藝工作者播講各種嘅故仔[39]

幾百年嚟,廣東多咗好大柞民間故事,仲俾人輯錄咗做書[40]

廣東音樂[編輯]

高胡,又叫做「粵胡」,係一種粵式樂器。大戲同廣東音樂度成日會用到。
內文:廣東音樂

廣東音樂(粵拼:gwong2 dung1 jam1 ok6),又叫做「粵樂」,可以話係嶺南音樂入面最出位嘅一種。佢係喺廣州一帶發源、主要由粵人帶起嘅一種傳統中樂風格。總體上,廣東音樂音色出咗名清脆明亮、節奏活潑歡樂、以器樂小品為主、大多數樂曲都係一氣呵成。另一樣有粵特色嘅地方係,佢俾大戲嘅音調影響咗,有好多樂曲都係由大戲嘅過場音樂或者係嶺南嘅民歌演變出嚟嘅。直至廿一世紀,廣東音樂入面比較出名嘅樂曲有[41]

  • 旱天雷
  • 三潭印月
  • 餓馬搖鈴
  • 漢宮秋月
  • 雨打大蕉
  • 賽龍奪錦
  • 娛樂升平
  • 平湖秋月

廣東音樂有一點同其他中樂風格唔同嘅係,廣東音樂出到一批專職嘅作曲家寫歌。喺唐人歷史上,音樂方面嘅職業普遍都低賤一啲,例如琵琶女係妓藉,係一種「賤戶」,搞到多數民系嘅傳統音樂都係舊時曲牌,好少可會有作者署名;相比之下,歐洲人-無論西歐定東歐-喺呢方面好唔同,好似奧地利莫札特俄羅斯柴可夫斯基都入得到宮廷嘅[42],音樂職業一啲都唔低賤。廣東音樂呢一點有少少俾歐洲影響到,音樂人嘅地位比較高,有好似嚴老烈何氏三傑等嘅作曲家出到頭,有得喺啲作品嗰度署名[41]

除咗噉,廣東音樂仲有自己嘅一套樂器,好似係粵胡秦琴、同二弦,又會用色士風呢啲由西方傳入嚟嘅樂器,當中廣東音樂有所謂嘅「三架頭」-高胡、琵琶、同揚琴-係廣東音樂最基本嗰三件樂器[41]

流行曲[編輯]

內文:粵語流行曲

喺廿世紀中期開始,英屬香港喺好多地方都發展得好快,香港人整咗好多戲同電視劇,入面啲歌都係用廣東話嚟唱嘅。但係真係要數專係用廣東話嚟唱歌就要去到 1970 至 80 年代。嗰時香港出咗鄭君綿鄧寄塵周聰陳寶珠蕭芳芳呢柞歌手。佢哋唱嘅粵語流行曲(粵拼:jyut6 jyu5 lau4 hang4 kuk1)題材好多樣-有講情情塌塌嘅,又有啲講友情嘅。而且呢啲歌全世界都好多人聽,賣到去成個遠東地區-包括咗日本、韓國、臺灣、同東南亞-甚至乎係去到西方世界。英文度仲開始有咗個詞,專係指粵語流行曲嘅-「Canto-pop」,又或者叫做「HK-pop」。呢啲歌令到廣東話做咗普通話以外最多人知嘅唐話。但係由 1990 年代尾開始,HK-pop 喺個市場度開始唔夠 J-pop (日本)同 K-pop (韓國)砌,到咗家陣都仲係未見到乜嘢起色。

[編輯]

內文:港產片

港產片(粵拼:gong2 caan2 pin3)即係香港人做導演拍嘅。呢柞戲多數都係用廣東話嘅,但係都有啲國語片。香港喺廿世紀初頭已經有喺度整啲默片,但係嗰時啲港產片質素唔高,好少可話賣到去外國。要去到成廿世紀中後期,香港出咗李小龍許冠傑、同周星馳呢柞出名嘅演員港產片先至正式上到去國際舞台。嗰時港產片連西方都有人睇,但係佢個勢同粵語流行曲一樣:由 1990 年代尾開始,港產片喺國際市場度嘅競爭力開始下滑,而家仲未有回升嘅跡象。

文學[編輯]

嶺南地區有自己一套文學風格。好似係噉,詩呢家嘢好講語言嘅音韻。嶺南有噉多獨特嘅話,就當然會有自己一套詩詞。而廣東話喺詩詞方面嘅歷史好悠久,佢係唐宋嘅中古漢語嘅變種,有成千年歷史,有好多大唐同大宋時期嘅詩詞都係要用廣東話嚟讀先至會好聽。而嶺南東部地區好多人用嘅客家話同潮州話度都仲見到好多上古漢語-仲古老過中古漢語嘅唐話-嘅影。總括講句,嶺南地區嘅文學文化可以話係源遠流長。

粵詩[編輯]

內文:粵詩

唐詩宋詞公認咗係古華夏史上最出色嘅詩詞作品之一。而今日嘅嶺南就保留咗一種好啱用嚟讀唐詩宋詞嘅話-廣東話。現代廣東話係現存噉多種唐話入面其中一種最近中古漢語嘅,讀起中古時代嘅唐詩宋詞上嚟好多都好押韻,保留到好多喺中古漢語入面成日都聽到嘅入聲-即係用 p 、 m 、 k 做尾嘅音[9][10][11][43]

唔單止係噉,嶺南嘅人喺超過一千年前開始已經喺度作詩作詞。大唐其中一個最有料到嘅大詩人張九齡(678-740 年)就係嶺南出身嘅-佢喺韶州曲江(今日嘅廣東韶關)出世。張九齡係嗰時嘅廣州都督個仔。據講佢好細個嗰陣已經好醒目,後尾仲坐埋宰相個位。佢一世人寫咗好多詩,當中佢嗰十二首《感遇》,俾人列咗喺《唐詩三百首》嘅開頭。繼張九齡之後,後嚟嶺南喺 9 世紀嘅唐朝尾又出咗個朵冇張九齡咁大,但係都叫有啲名氣嘅邵謁陳陶。當中邵謁出咗名寫起詩上嚟唔用花巧修辭,好樸素。好似係佢寫嘅《歲豐》:

邵謁《歲豐》
皇天降豐年本憂貧士食。
貧士無良疇安能得稼牆?
工傭輸富家日落長太息。
為供豪者糧役盡匹夫力。
天地莫施恩施恩強者得。

自從嗰時開始,粵人就一路都有寫詩詞,出咗唔少有影響力嘅詩人,而且仲有咗嗰名叫嶺南詩派(粵拼:ling5 naam4 si1 paai3[44]

嶺南三家[編輯]

內文:嶺南三家

嚟到摩登時代,嶺南喺 17 世紀嘅時候出咗寫實主義嶺南三家(粵拼:ling5 naam4 saam1 gaa1)-屈大均陳恭尹、同梁佩蘭呢三個詩人。佢哋好多時都係寫詩去歌頌反抗滿清嘅明朝將領或者係描繪當時嘅平民俾清政府壓榨得有幾慘。好似係屈大均喺廿八歲北上去旅行嗰陣有感而發寫嘅《魯連台》,就會令讀嗰個人覺得個景有啲淒涼:

屈大均《魯連台》
一笑無秦帝,飄然歸海東。
誰能排大難,不屑計奇功。
古廟千秋月,荒臺萬木風。
從嚟天下士,只在布衣中。

口語粵詩[編輯]

嶺南詩派出咗名革新。除咗呢啲古雅啲嘅作品,再近期啲嘅嶺南詩人仲好夠膽去搞新諗頭-喺 19 世紀,嶺南開始有詩人用口語化嘅廣東話嚟去寫詩[45]。當中最有代表性嘅應該要數廣東惠陽出身嘅廖恩燾(1863-1954 年)。佢嘅作品《嬉笑集[46]裏面嘅詩就好明顯睇得出係用咗口語化嘅廣東話,一啲都唔會俾人有文縐縐嘅感覺。好似係佢寫嘅《秦始皇》就好通俗大眾:

廖恩燾《秦始皇》
荊軻嚇失佢三魂,好在良官冇搬親。
野仔執番條爛命,龜公害盡幾多人。
監生點解嚟陪葬,臨死唔知仲拜神。
萬里噉長城一座,後嚟番鬼當新聞。
六國吞埋擸吓鬚,安心就噉著龍袍。
收齊爛鐵燒銅像,堆起新書透火爐。
過海點嚟求味藥,當天仲去貼張符。
既然慌到江山冧,生仔唔該叫阿胡。

粵謳[編輯]

內文:粵謳

粵謳(粵拼:jyut6 au1),又叫「越謳」或者「解心」,係一種好重要嘅廣東話民歌,亦係廣東文學嘅一種詩體,曾經係成個唐人民歌界嘅奇葩,亦都有好豐富嘅文學性[47]。粵謳嘅歌曲用咗近似廣東話白話嘅語言嚟去描述貼近人民日常生活嘅嘢,多數會寫男女之間嘅感情,又有寫妓女嘅可憐身世同感情波折,有啲甚至仲夠膽諷刺當時嘅官府,俾人話佢好代表粵人嘅民系性格-創新、大衆、遠儒、實用。招子庸嗰兩首《解心事》係粵謳當中比較有代表性嘅:

(一) 「心各有事,總要解脫為先。心事唔安,解得就了然。苦海茫茫多數是命蹇,但向苦中尋樂便是神仙。若係愁苦到不堪,真係惡算,總好過官門地獄更仲哀憐。退一步海闊天空就唔使自怨,心能自解,真正係樂境無邊。若係解到唔解得通就講過陰隙過便。唉,凡事檢點,積善心唔險,你睇遠報在嚟生,近報在目前。」

(二) 「心事惡解,都要解到佢分明。解字看得圓通,萬事都盡輕。心事千條就有一千樣病症。總係心中煩極講不得過人聽。大抵痴字入得症深都係情字染病。唔除痴字就係妙藥都唔靈。花柳場中最易迷卻本性,溫柔鄉裡總要自出奇兵。悟破色空方正是樂培,長迷花柳就會墜落愁城。唉,須要自醒,世間無定是楊花性,總係邊一便風嚟就向一便有情。」

最傳統嘅粵謳寫嘅題材主要係啲青樓妓院、兒女私情等等,傳統粵謳係民歌同文人創作嘅合體,所以白話得嚟,又有啲文人情趣。清末時產生新粵謳,因爲晚清國家局勢嘅大變,代表到呢個轉變嘅關鍵作品係《顛地鬼》兩首,自此粵謳眼界走出妓院,開始關心時事時局。原本傳統粵謳因爲文人化,而多少脫離民間,新粵謳因爲關注時事、關心民生心聲,又再一次回歸民間[48]

代表新舊粵謳嘅,可以從「解心」呢個詞嘅釋義睇到。舊粵謳嘅解心,意思係解脫心事、安放人情,新粵謳嘅解心,意思係話解說心思,「解下作者究竟想講咩時事」。舊粵謳嘅代表詩人係招子庸,而新粵謳嘅代表作者係廖恩燾[48]

喺廿世紀初,粵謳入面有啲仲出名到西人都有興趣,俾人譯咗做英文,而澳門又整咗個葡文版。

竹枝詞[編輯]

內文:竹枝詞

竹枝詞係用七言絕句嘅形式嘅一種文學寫作。據清朝王士禎同學生劉大勤嘅對答,竹枝詞係愛嚟專歌詠風土,內容偏向瑣碎同詼諧,一般要求有啲風趣,係同絕句完全唔同嘅[49]。而最先開始用竹枝詞嚟描述嶺南風情嘅,係唐朝詩人皇甫松同宋朝楊誠齋等文人。嶺南竹枝詞喺元朝、明朝嗰陣就叫「竹枝詞」,後嚟夾埋地名以顯地方特色。廣州地區嘅竹枝詞,除咗叫「嶺南竹枝詞」,仲有「廣州竹枝詞」、「珠江竹枝詞」、「羊城竹枝詞」、「南海竹枝詞」、同「番禺竹枝詞」等。喺清朝中葉後,竹枝詞採用得更廣泛,類別亦愈分愈細,有專詠一地、一事、一物嘅竹枝詞,例如專詠西關八座橋嘅「西關八橋竹枝詞」、專詠荔枝嘅「嶺南荔枝詞」、「羊城七夕竹枝詞」、專詠賣花買花嘅「花田竹枝詞」、「花渡頭竹枝詞」、「廣州撈蜆竹枝詞」、同專詠娼妓嘅「羊城青樓竹枝詞」。而入粵嘅王士禎、杭世駿李調元阮元、同彭玉麟等高官大吏,都有寫低唔少以嶺南風物為題嘅竹枝詞,推動咗竹枝詞嘅創作[50]

飲食文化[編輯]

廣東菜廚師炒起餸上嚟火候十足。

飲飲食食係人生存落去一定要做嘅嘢,所以佢係一種包含嗮科技、自然、同人文嘅文化遺產。嶺南唔單止有獨特嘅地理環境,而且仲成日同外界嘅人做嘢,會發展咗自己一套嘅飲食文化一啲都唔出奇。嶺南地區背住座山,對住個海,有成 3368 公里長嘅海岸線,天氣又暖又濕立立,成日都出太陽-無論係捉魚定係種菜都會好好收成。咁好天然條件,嶺南嘅人就有得用好多唔同嘅食材嚟煮嘢食,好似係屈大均(17 世紀)嘅《廣東新語》就有噉講:「天下所有食貨,粵東幾盡有之,粵東所有之食貨,天下未必盡也。」呢啲文化仲有得追溯到去好耐之前嘅南越時期:喺超過一千年前,自從南越國冧咗之後,有唔少漢人都會去嶺南地區做官或者長住,佢哋唔止將嗰時嘅中原飲食文化帶咗去嶺南,寫嘢嗰陣仲會跟手提吓嶺南嘅本土飲食風俗。好似係響 9 世紀幫唐昭宗做司馬嘅劉恂噉,佢喺嶺南度做咗一輪嘢,寫咗《嶺表錄異》嚟記錄嗰一帶嘅風土人情。呢本嘢入面有講到當地人嘅飲食習慣,提咗佢哋鍾意食「蠔蠣」同「水牛肉」呀噉。

廣東菜[編輯]

粵人傳統喺朝頭早嗰陣鍾意食油炸鬼
粵人成日都食叉燒
廣東菜成日都見到嘅冷盤-燒味拼盤
內文:廣東菜

廣東菜(粵拼:gwong2 dung1 coi3),正式啲嗌做「粵菜」,係指廣東同港澳一帶嘅粵人獨有嘅傳統餸菜同埋煮餸方法[51][52]。廣東菜有幾個特別嘅地方。首先,佢喺用料方面好開放,雖然佢話就話主要係用豬肉牛肉禽肉、同水產,但係查實佢無論係魚蝦蟹定係各種飛禽走獸(甚至乎係昆蟲)都有機會用-幾乎乜都可以攞嚟煮餸。所以粵人嘅飲色文化入面仲有咗「野味」呢個詞語,專係用嚟形容一啲另類啲嘅食材,好似係老鼠狸貓呀噉。喺口味方面,廣東菜嘅口味主要係「清鮮嫩爽」,除咗「甜酸苦辣鹹」之外仲會講求「」。調味嗰陣睇仲配合食材原本嘅味嚟煮,唔鍾意太辣嘅嘢,亦都偏好落少啲香料-呢幾樣嘢令到佢同四川菜形成到好強烈嘅對比。廣東菜入面嘅餸菜多數都淨係會落少少豉油米酒澱粉八角、或者肉豆蔻嚟去調味,間唔中或者會加啲五香粉白胡椒粉,淨係煮內臟嗰陣會係噉咦落重啲蒜頭呢類香料。佢哋為咗保留食材原本嘅味道,好興用清蒸。所以廣東菜啲味一般都唔會好濃。喺烹調方面,廣東菜有成廿一種烹調方法噉多,除咗頭先提咗嘅清蒸,廣東菜仲好叻用、同呢啲方法。佢哋煮嘢好講究火侯、鑊氣、同埋「即炒即食」,會要求整出嚟嘅餸菜有齊「色香味形」。

出名餸菜[編輯]

飲茶文化[編輯]

香港嘅一間茶樓;粵人飲茶通常都會嗌返幾碟點心,飲早茶嗰陣仲興食粥。
內文:飲茶

粵人出嗮名鍾意飲茶(粵拼:jam2 caa4)。喺嶺南地區,飲茶係一種飲食文化,但同時亦都係一種民俗文化:粵式茶樓唔單止有自己一套嘅飲食風格,飲茶同時仲係粵人嘅一種傳統禮節。粵人喺有客人嚟探自己嗰陣,好多時候第一樣要做嘅就係「奉上一杯靚茶」,而「請飲茶」基本上就係佢哋表示熱情嘅方式。粵人嘅飲茶文化仲有一柞專屬嘅詞語,好似係「搭檯」、「茶友」呀噉-已經係一種次文化。

傳統嚟講,粵人無論朝頭早、晏晝、定係夜晚都可以去飲茶。飲早茶通常係老人家多,佢哋好多時喺朝早五點零六點晨運完之後就會成班茶友一齊去茶樓度搵張檯坐埋一圍,一路飲茶一路食點心一路傾閒偈。稍為晏少少嘅九點幾時段,有唔少後生仔後生女就會陪自己嘅阿爺阿嫲飲茶。下午茶嗰陣啲嘢食同做法同早茶差唔多,但係就比較多係成家人一齊飲。而夜晚嗰陣嘅茶樓通常會有雅座同包廂-好多時就會有啲大型啲嘅聚會,呢個時候啲人嗌嘅嘢食亦都會偏向豪華啲。但係無論係邊種飲茶,開頭嗰陣要做嘅嘢都係「開茶」-搵張檯坐低,揀自己想飲啲乜嘢茶,再叫個伙記「沖茶」,茶嚟咗之後就會嗌點心,成班人仲會一路飲飲食食一路傾閒偈,最後食完就埋單。

點心[編輯]

內文:點心

點心(粵拼:dim2 sam1)係粵人飲茶嗰陣一定會有嘅嘢食。「點心」呢個詞語最早喺 11 世紀出現。《唐書》入面就有噉樣講:「唐鄭為江淮留侯,家人備夫人晨僎,夫人謂其第曰:治妝未畢,我未及餐,爾且可點心。」呢句嘢嘅意思係話一家人準備食早餐,仲未開飯,女主人同佢細佬講話佢仲未梳好妝,叫佢等一陣,食住啲小食醫肚先。而點心呢類嘅食物歷史好悠久,早喺公元前 500 年中原地區已經有記載民間有啲類似嘅小食,後嚟再傳咗去嶺南同慢慢噉演變做今日嘅點心。粵式點心好多時係用蒸籠嚟上嘅。佢哋有好多種,可以細分做蒸點、炸點、包、腸粉呀噉。點心係粵式飲食文化不可或缺嘅一個組成部份-廣東同香港呢啲地方都有廚藝學校會開班專係訓練點心師傅

涼茶[編輯]

香港嘅一間涼茶舖
內文:涼茶

涼茶(粵拼:loeng4 caa4)係嶺南獨有嘅一種嘢飲[53][54]。嶺南地區又熱又濕,而且粵人又鍾意食埋嗮啲煎炸嘢,搞到佢哋成日都話咁易就熱氣。於是民間興起咗用啲藥性寒涼又消暑嘅草藥煲水,然後再攤凍嚟飲-呢啲清涼又有補身效用嘅嘢飲就係涼茶。涼茶有好多唔同款,比較多人識嘅有廿四味五花茶雪梨茶感冒茶、同埋火麻仁呀噉。佢哋喺嶺南地區好有人氣。廣州同埋港澳地方都開咗好多專係賣涼茶嘅涼茶舖,無論大人定係細路都有人幫襯。呢三個地方嘅政府甚至仲喺 2006 年成功噉爭取令到中國國務院將涼茶列做國家級非物質文化遺產。

糖水[編輯]

內文:糖水

糖水(粵拼:tong4 seoi2)係嶺南飲食嘅其中一個特色,泛指一啲液態嘅粵式甜品。糖水嘅歷史源頭而家已經查唔到,但係廣州嗰一帶似乎係喺仲未漢化嗰陣已經有啲類似糖水嘅嘢,而 10 至 13 世紀嘅南宋時期亦都有文獻提過佢哋嘅市集有賣一啲叫做「涼水」嘅甜味嘢飲。同北方地帶嘅甜湯比起上嚟,糖水一般都會杰啲,所以粵人通常都會講「食糖水」而唔係「飲糖水」。喺嶺南地區,糖水有好多款,通常係用嚟喺晚餐做飯後甜品或者做消夜。佢哋熱食或者凍食都得,而且粵人食糖水仲會睇時令:夏天會食綠豆沙清熱,而冬天會食芝麻糊。喺嶺南地區,除咗用嚟食,糖水仲有喺傳統習俗入面擔當一啲角色:廣東人喺結婚新郎新婚拜完天地之後就會坐喺床邊,等主婚人請好命婆將親友送嚟房度嘅紅綠筷子撒向帳前帳頂度,跟手個好命婆就會捧住蓮子羹餵新郎新婚食,有「連生貴子」噉嘅意思。

酒文化[編輯]

嶺南嘅酒文化好耐歷史。考古學家發現喺新石器時代嗰陣,嶺南地區嘅人已經有整生果酒,而南越國嘅遺物當中亦都搵到有用嚟裝酒嘅容器。後嚟喺 11 世紀嘅宋朝時期,出咗名鍾意飲酒嘅文人蘇東坡俾人貶咗去嶺南之後冇幾耐就寫咗嶺南第一本講釀酒嘅書-《東坡酒經》。喺 15 世紀嘅大明統治之下,嶺南嘅釀酒業開始全面噉發展,開咗好多酒行會館,好似係佛山酒行會館就出咗名因為水質好、米料夠所以出到好酒。到咗今日,嶺南已經出緊好多唔同嘅酒。嶺南米酒係嶺南嘅一種名產;廣東十大名酒亦都好有人氣,尤其係當中嘅玉冰燒個勢特別勁。而傳統上,嶺南喺婚禮同埋佛山嘅秋色祭亦都會用到嶺南釀嘅酒。

喺 2014 年,佛山開咗間嶺南酒文化博物館嚟介紹嶺南嘅酒文化[55]

圖庫[編輯]

功夫[編輯]

詠春嘅發揚人葉問係粵人。
蝴蝶雙刀係洪拳同各種粵式功夫高手興用嘅兵器[56]
內文:廣東南拳廣西南拳

嶺南嘅人由中世紀後半橛開始就有創作好多打交技巧,但係嗰陣時啲門派好亂,分得唔清唔楚,要去到 18 至 19 世紀先至有清晰嘅門派可言。嗰時嘅大清政府管唔掂個國家,搞到好似廣東廣西呢啲邊界地方好多賊仔同海盜喺度搞搞震。於是粵人為咗保護自己同埋屋企人,就開始興學打交。呢個潮流令到嶺南嗰頭開咗成柞功夫館,而且粵人仲順手執咗吓佢哋啲打交技巧,將佢哋已經識嘅技術整理分類好-兩廣嘅南拳門派(指長江以南地區嘅功夫流派)就成咗形。嗰陣時粵人仲出咗好多好似廣東十虎呢類嘅傳奇性嘅高手同英雄,當中以黃飛鴻最出位,好多港產片同電視劇都有拍佢嘅事跡[57]

總體嚟講,嶺南嘅功夫派別主要特色係講究啲橋(指上身)法要多變同埋個馬(指下身)要扎得又穩又闊,會用大嗌嚟助威,好少可會跳躍或者起腳,冇乜華麗嘅大動作,講究實用-有務實嘅嶺南特色[58]。到咗今日,嶺南嘅功夫流派有[59]

廣東南拳[編輯]

廣西南拳[編輯]

哲學思想[編輯]

內文:嶺南儒學

嶺南甚至仲有自己嘅一套儒學流派。由 11 世紀開始,宋明理學就越嚟越多人研究,好快就連日本、韓國、同埋越南嘅儒學者都搞埋一份。喺 12 世紀嗰陣,崔與之(號「菊坡」)創立咗菊坡學派,令到嶺南開始有咗屬於自己嘅一套儒學思想體系。打後嗰幾百年,嶺南嘅哲學就一路有發展,出咗一班幾有料到嘅思想家。

嶺南學派[編輯]

內文:嶺南學派

嶺南學派(粵拼:ling5 naam4 hok6 paai3)可以講得上係嶺南哲學入面最有代表性嘅一個流派[60]。佢係一班嶺南出身嘅文人喺 15 世紀嗰陣開嘅一個宋明理學流派,佢嘅代表人物係廣東新會出身嘅哲學家陳獻章(外號叫「白沙先生」)。佢寫嘅哲學文家陣好詳細噉樣收錄咗喺《陳獻章集》入面。喺呢啲文入面,陳獻章表達咗佢嘅思想,佢主要係主張「自得」同「以心為主」。總體嚟講,呢個學派係借咗儒家嘅人本精神,但係又會好似道教噉樣睇仲講人同自然之間嘅關係,甚至可以話係有啲俾西人嗰種睇重問問題嘅諗嘢方式影響咗。

六祖慧能[編輯]

內文:六祖慧能

嶺南喺佛學上都有啲成就。中國南禪嘅出名祖師六祖慧能就係出身喺廣東呢一帶嘅,而《六祖壇經》係中國第一部列入佛教正典嘅著作。今日唐人嘅禪宗係以廣東發源嗰派南禪為主,而另外發展嘅北禪相比之下影響力就冇咁強。

傳統節慶[編輯]

花街
紐約市唐人街有好多粵僑;佢哋過年會喺度舞南獅。

粵人有好多傳統節慶。當中有啲係其他東方人都會慶祝嘅,例如係盂蘭節噉,就連日本人同好多東南亞族群都會慶祝。但係粵人好多時會有一啲獨有嘅習俗:好似係過年嗰陣行花市呢家嘢喺粵人以外嘅唐人族群好少見。粵人又會特別睇重某啲節日,好似係佛誕噉:因為傳統粵人都係信佛多,所以佛誕會大搞,但係反而唔會點樣理孔聖誕。總括嚟講嘅話,嶺南嘅傳統節慶有:

唐式節慶[編輯]

粵式過年傳統:
  • 行花街;粵人傳統喺過年嗰時零舍鍾意買花返屋企;呢樣嘢粵人以外嘅唐人基本上唔會做。粵人呢種習俗仲令到廣州有咗「花城」呢個外號。
  • 醒獅(又叫做「南獅」)
  • 年例(廣東西邊嗰頭興)
其他唐式節日:

地方節慶[編輯]

地方神靈誕辰

宗教信仰[編輯]

香港元朗屏山洪聖宮入面嘅南海神洪聖像

同其他東北亞族群好似嘅係,粵人傳統嚟講乜都會拜:佛教(主力係大乘佛教)、道教、好多派嘅基督教回教、同埋好多自然崇拜喺呢一頭都有唔少嘅信徒。以一個東方地區嚟講,嶺南特別多經海路由西面傳入嚟嘅宗教-佛教、唔同派嘅基督教、同埋回教;噉亦都係反映咗粵人傳統上特別多同外面嘅世界交流。

大乘佛教[編輯]

比起拜孔孟,粵人多數都係鍾意拜佛或者拜觀音多啲。呢樣嘢係沿襲咗大唐嘅文化-唐係中國史上最睇重佛教嘅朝代。唐三藏印度學完佛之後返咗去大唐,將佢學到嘅嘢周圍教俾嗰時嘅漢人,啲漢人加咗啲自己嘅嘢落去,做出咗有漢文化風格嘅大乘佛教。大乘派嘅佛廟喺嶺南地區周圍都係,而且佛誕同埋觀音誕呢啲都係屬於喺粵文化入面都幾重大嘅節日。

北宋嗰陣盛極一時嘅禪宗佛教流派雲門宗就係喺韶州雲門山(今日嘅廣東乳源)發源嘅[61]

道教[編輯]

喺嶺南嘅主要宗教入面,得道教係經陸路由北面嘅中原地區傳入嚟嘅。道教思想喺度有唔少影響力,好似係拜城隍、拜土地公、拜華光大帝、或者係風水文化呀噉,都係由道教嗰度搞出嚟嘅。喺呢方面,嶺南都有啲自己嘅風格,會拜一啲有本土特色嘅神:黃大仙多數係粵人先會拜嘅;而且粵人仲好興去拜啲好似南海神洪聖媽祖呢一類嘅海神-同內陸地區唔同,反映咗粵人傳統興經海路搞生意嘅文化。

遠儒文化[編輯]

嶺南文化俾學者話佢有遠儒文化嘅特徵[5]。呢點可能同嶺南傳統係中原帝國邊界地區同埋大唐嘅影響有關(大唐係重佛多過重儒嘅):雖然儒學喺嶺南都有些少影響力,但係孔廟喺區內依然係少見過佛廟道觀好多。

其他教[編輯]

除咗大乘佛教同埋道教呢類有東方色彩啲嘅教之外,基督教同埋回教喺嶺南都有一定數量嘅追隨者。喺 15 到 16 世紀嗰陣,嶺南係大明嘅主要對外港口,有唔少西歐嘅商人會喺呢一頭設置自己嘅基地,噉西歐嘅基督教教派(即係天主教新教,但仲有其他細啲嘅教派)會跟手傳埋入嚟一啲都唔奇。而喺再早啲嘅時期,嚟自阿拉伯波斯嘅商人都有喺嶺南一帶度搞生意,佢哋嘅回教自然跟住佢哋一齊入埋嚟。

圖庫

其他民俗[編輯]

粵商[編輯]

內文:粵商

粵商(粵拼:jyut6 soeng1)係指一啲由粵人組成嘅商幫。響歷史上近呢二千年嚟,嶺南(尤其是喺廣州嗰頭)喺好幾個朝代都係做中原皇朝嘅對外港口[62],令到粵人有咗一種好強嘅商業文化,出咗好似廣州十三行呢類出名嘅商幫,而且仲有一套自己嘅行商之道[63]:粵商出咗名會當關公係財神噉拜,喺行商手法上會講實用,做生意嗰陣會避開政治嘢,注重結果同實利多過虛名,低調唔鍾意出風頭,硬係驚俾人打劫所以會講「財不可以露眼」,而且知足又自強。到咗今日,粵人仲係傳承緊粵商文化,好似係廣州、香港、佛山、同深圳呢啲嶺南主要城市都係大商埠,會搞好多金融工業生意:好似係香港噉,直到 2016 年,香港嘅全球金融中心指數(Global Financial Centres Index,簡稱 GFCI)去到成 748 -係全世界第四,只係低過倫敦同紐約市少少[64]

象徵物[編輯]

木棉花[編輯]

內文:木棉花

木棉花(粵拼:muk6 min4 faa1)好多時都俾人覺得係最代表到嶺南嘅。嶺南嘅木棉文化有得追溯到去南越時期:據講公元前 200 年嗰時,南越國嘅國王趙陀曾經送咗樖木棉樹俾統治緊中原嘅漢皇朝嚟表示敬意-即係話喺嗰時嶺南嘅人已經有用緊木棉嚟代表自己鄉下。到咗今日,木棉已經係粵文化入面好重要嘅象徵物,成日都喺粵人作嘅詩歌或者散文度出現,好似係《南海潮》呢首民歌就用咗「紅棉」嚟代表粵文化。亦都有粵人攞木棉樹嚟同英雄比較,話佢樹幹又大又粗,又成日生得高過嗮周圍啲樹,仲就噉幫佢改咗個花名叫「英雄樹」。

木棉家陣已經做咗嶺南文化大城廣州嘅市花

喺西化嘅香港,木棉文化都有啲影響力。好出名嘅粵語流行歌手羅文有作咗首叫《紅棉》嘅歌,專係講木棉嘅。除咗噉,喺香港公園紅棉路婚姻註冊處係香港人嘅結婚熱門地點。

洋紫荊[編輯]

內文:洋紫荊

洋紫荊(粵拼:joeng4 zi2 ging1)可以話係香港嘅象徵。佢喺 1880 年嗰陣俾一個神父發現,後嚟喺 1908 年俾學界判定係新嘅品種,喺 1965 年正式做埋香港嘅市花。而喺 1997 年主權移交之後,洋紫荊圖案仲出現咗喺香港嘅特區區旗嗰度。始終香港係出咗好大柞好似係戲、電視劇、同流行歌呢類嘅文化產物嚟宣傳粵文化,令到香港俾好多粵人覺得佢係現代粵文化嘅代表。因為噉,洋紫荊有時會俾人覺得同粵文化好有關係,例如係《南海潮》呢首歌度都有提咗「紫荊」嚟去代表粵人同埋粵文化。

香港嘅金紫荊廣場有座好大嘅金色洋紫荊雕像,係香港嘅地標之一。

三板[編輯]

內文:三板

三板(粵拼:saam1 ban2),又叫做「舢板」,係南中國海沿岸度成日都會見到嘅一種木造嘅平底艇仔。呢種艇仔粵人、福佬人、越南人、同埋好多東南亞民族都會用。佢哋通常係三米半到四米左右,好多時會加個篷,仲住得人。好多漁民會住喺三板度方便佢哋做嘢,令到好似係廣州同香港呢啲嶺南嘅沿海城市成日都會有一大柞三板泊嗮喺個港口度,係好有本地特色嘅景象。三板喺粵人作嘅歌或者拍嘅戲度耐唔耐就會蒲頭,令到好多人覺得佢係嶺南文化嘅象徵物之一。

《南海潮》呢首民歌入面都有提咗「舢板」。

睇埋[編輯]

廣州越秀公園嘅五羊雕塑;五羊傳說話上古時代嗰陣,廣州因為連年嘅旱災搞到啲人民嘅生活好困難。有一日,有五個仙人騎住唔同毛色嘅仙羊降臨。佢哋將旱災變走,又將五隻仙羊留低先至返上天。到咗今日,廣州有咗個花名叫「羊城」。

嶺南風俗[編輯]

相關文化[編輯]

其他[編輯]

[編輯]

  1. 1.0 1.1 王哲. (2012). 广东西樵山: 珠江文明的 “灯塔”. 资源导刊: 地质旅游版, (12), 62-63.
  2. 2.0 2.1 曾骐. (2012). 珠江文明的灯塔: 南海西樵山古遗址. 广西师范大学出版社.
  3. 唐孝祥. (2003). 试论近代岭南文化的基本精神 (Doctoral dissertation).
  4. 梁凤莲. (2003). 岭南文化的历史与现实视界 (Doctoral dissertation).
  5. 5.0 5.1 5.2 5.3 5.4 5.5 刘益. (1997). 岭南文化的特点及其形成的地理因素. 人文地理, 12(1), 44-46.
  6. Loewe, Michael (1987). "The Former Han Dynasty". The Cambridge History of China, Volume 1: The Ch'in and Han Empires, 221 B.C.–A.D. 220. Cambridge: Cambridge University Press.
  7. 广. 原著喺2017年8月9號歸檔. 喺2017年8月9號搵到.
  8. 廣府文化與百越族文化的關係
  9. 9.0 9.1 9.2 Chen, M., & Newman, J. (1984). From Middle Chinese to Modern Cantonese (Part I). Journal of Chinese Linguistics, 12(1), 148-97.
  10. 10.0 10.1 10.2 Chen, M. Y., & Newman, J. (1984). From Middle Chinese to Modern Cantonese (Part 2). Journal of Chinese Linguistics, 334-388.
  11. 11.0 11.1 11.2 Chen, M. Y., & Newman, J. (1985). From Middle Chinese to Modern Cantonese (Part 3). Journal of Chinese Linguistics, 122-170.
  12. 廣東唐人洋雜碎
  13. Bauer, R. S. (1985). The expanding syllabary of Hong Kong Cantonese. Cahiers de linguistique Asie orientale, 14(1), 99-111.
  14. Bauer, R. S., Kwan-Hin, C., & Pak-Man, C. (2003). Variation and merger of the rising tones in Hong Kong Cantonese. Language Variation and Change, 15(2), 211-225.
  15. 唐孝祥. (2003). 近代岭南建筑美学研究 (Vol. 2, No. 0, p. 0). 中国建筑工业出版社.
  16. 何镜堂, & 王扬. (2003). 当代岭南建筑创作探索 (Doctoral dissertation).
  17. 淺談嶺南民居的嶺南建築特色
  18. 人文大師下午茶.蕭鳳霞教授談 「珠江流域的世界聯繫: 一個歷史視角與文化布局」 互聯網檔案館歸檔,歸檔日期2020年7月19號,. 國立臺北教育大學 蔣馥蓁博士記錄整理,經主持人簡美玲教授審訂 2019-06-26
  19. . 原著喺2017年7月30號歸檔. 喺2017年5月7號搵到.
  20. 吴大荣, & 瞿燕. (2003). 浅谈岭南园林植物特色 (Doctoral dissertation).
  21. 陆琦. (1999). 岭南传统园林造园特色 (Doctoral dissertation).
  22. 民輝:骨代牙 廣州牙雕的輝煌與傳承. 原著喺2020年3月16號歸檔. 喺2017年5月14號搵到.
  23. 西汉南越王墓玉器(图)
  24. 琢玉人用心雕刻精緻孤品
  25. . 原著喺2020年3月16號歸檔. 喺2017年6月25號搵到.
  26. 26.0 26.1 『锦绣岭南』四大名绣之粤绣艺术展
  27. 佛山剪纸专题网站[失咗效嘅鏈]
  28. 嶺南書法與書法家
  29. 舞廣州評如潮 嶺南詩書風骨浪漫. 原著喺2020年3月16號歸檔. 喺2017年5月25號搵到.
  30. 黃聖芝. (2014). 廣彩外銷瓷研究. 臺北藝術大學美術學系碩士班美術史組學位論文, 1-183.
  31. 贺海燕. (2005). 广彩瓷器 (Doctoral dissertation).
  32.  . 原著喺2017年4月18號歸檔. 喺2017年5月14號搵到.
  33. 廣式家具與嶺南文化
  34. . 原著喺2020年3月16號歸檔. 喺2017年6月25號搵到.
  35. 嶺南畫派-折衷中外融合古今
  36. Croizier, R. C. (1988). Art and Revolution in Modern China: the Lingnan (Cantonese) school of painting, 1906-1951 (Vol. 29). Univ of California Press.
  37. 嶺南民歌知多少?
  38. 38.0 38.1 38.2 38.3 Yung, B. (1989). Cantonese opera: performance as creative process. Cambridge University Press.
  39. 數廣東最出名的10大講古佬. 原著喺2017年8月16號歸檔. 喺2017年8月16號搵到.
  40. 谭达先, ‎徐佩筠 (1980). 廣東民間故事. 香港世界出版社.
  41. 41.0 41.1 41.2 万钟如. (2012). 广东音乐的大众文化属性. 人民音乐, (3), 56-56.
  42. Maes, 140; Taruskin, Grove Opera, 4:664.
  43. . 原著喺2021年11月21號歸檔. 喺2017年5月22號搵到.
  44. 嶺南詩派略論
  45. . 原著喺2017年5月22號歸檔. 喺2017年5月22號搵到.
  46. 粵典文庫-嬉笑集
  47. 廣府文化的奇葩——粤謳
  48. 48.0 48.1 李婉媚. 《清末民初的粵語書寫》. 香港三聯書店
  49. 施蛰存:中唐诗话·六〇 刘禹锡:竹枝词九首 爱思想 2016-01-11 另見《師友詩傳錄》
  50. 粵海鉤沉 愛書堂 搜編自 廣府文化.
  51. Klein, J. A. (2007). Redefining cantonese cuisine in post-Mao Guangzhou. Bulletin of the School of Oriental and African Studies, 70(3), 511-537.
  52. Pennington, J. A. (1996). Cuisine: A descriptive factor for foods. Terminology. International Journal of Theoretical and Applied Issues in Specialized Communication, 3(1), 155-169.
  53. 芹澤知広. (2015). 広東文化としての中国薬草茶. 総合研究所所報, 23, 55-67.
  54. Lo, K. C., & Li, L. (2012). The Superficial Knowledge of Hong Kong's Traditional Herbal Tea Culture. 香港中醫雜誌.
  55. 廣東最大酒文化博物館揭牌 豐富嶺南酒文化內涵
  56.  . 原著喺2017年8月20號歸檔. 喺2017年8月20號搵到.
  57. 俠小說壇二虎 序裡的廣東十虎. 原著喺2016年8月17號歸檔. 喺2017年6月25號搵到.
  58. 岭南南派武术技术特征的文化研究
  59. Sensei/Renshi Nathan Chlumsky (2015). Inside Kungfu: Chinese Martial Arts Encyclopedia. Lulu.com. ISBN 13-2911-942-8.
  60. 陈献章. (1987). 陈献章集. 卷二与张延实主事六十九则, 165-193.
  61. 洗宗. (1989). 《 雲門宗》 簡介. 嶺南文史.
  62. . 原著喺2020年4月28號歸檔. 喺2017年7月10號搵到.
  63. Cheng, Y. H., & Huang, P. Y. (2008). A Review of the Research on the Culture of Cantonese Merchants [J]. Journal of Guangdong University of Business Studies, 3, 013.
  64. "The Global Financial Centres Index 19". Long Finance. March 2016. 原著喺2016年4月8號歸檔. 喺2017年7月10號搵到.

出面網頁[編輯]