土地公塑像（桃園市土地公文化館藏）
土地公（粵拼：tou2 dei2 gung1）係一個道教神祇，大中華地區以至越南同柬埔寨等地都好多人拜，例如香港人傳統上都好興拜土地公。喺民間信仰入面，土地公係地方嘅保護神，係一位有福德嘅善鬼神，雖然土地神喺道教諸神當中地位比較低，但就係同平凡人最親近嘅神祇之一。喺傳統文化入面，祭祀土地神就等於祭祀大地，多數係為咗祈福、求財、保平安、保農業豐收。每個月初二同十六嘅作牙日係土地神嘅祭祀日。
土地公，視乎唔同地方嘅文化差異，會有唔同嘅嗌法，有好多個名，例如係福德正神、福德老爺、福德爺公、土地公公、土地爺爺、土地公伯、土地伯、土地伯公、大伯公、土地神、土地爺、地主（子）公、后土、社神、社公、社君... 呀噉。當中琉球人係嗌佢做土帝君嘅。
曲阜孔府奉祀嘅后土神
汕頭達濠下尾福德古廟
福德老爺、福德老爺夫人像
台中市北屯區水景福隆宮配祀嘅福德正神
新北市三峽區李梅樹墓園嘅后土石碑
一般嚟講，土地神係基層神明，只係負責做地方嘅行政神，保護鄉里安寧平靜。亦有學者認為土地公屬於城隍之下，專門掌管鄉里死者嘅戶籍，係地府嘅行政神。
閩南人傳統認為，土地神可以保佑農業收成，保佑商人做生意順利，保佑旅客旅途平安，甚至仲保護埋墳墓免受邪魔侵擾。土地神係功能性好強嘅神。一般講法話，土地神係地方嘅守護神，鄉里之神，仲有財神噉嘅性質。
有啲地方嘅人認為，如果百里侯肯為土地公加官晉爵，加冕授階，戴上官帽之後嘅福德正神，晉升到相當於(縣)城隍爺嘅位階。2011年5月，花蓮縣吉安鄉慶豐村嘅土地公，由當時任花蓮縣長傅崐萁將佢晉升為城隍爺。
.jpg)