柬埔寨

柬埔寨位置

柬埔寨（高棉話：），全名係柬埔寨王國，以前叫高棉，係響東南亞中南半島嘅一個國家，首都係金邊（Phnom Penh），陸地面積大約177,000平方公里，人口超過1400萬，鄰國有泰國、老撾同埋越南。

柬埔寨國王係西哈莫尼（Norodom Sihamoni，2004年10月開始在位），總理係洪森（Hun Sen，1985年1月開始在位）。人口以高棉族最多，第二係越南人，第三係華人。

簡史

1世紀至6世紀，柬埔寨係扶南一部分。去到6世紀至9世紀，柬埔寨係真臘一部分。

9世紀到15世紀，高棉族建立咗吳哥王朝，勢力範圍遍及大部份東南亞地區。最後因為畀當時嘅泰國同越南圍攻，慢慢沉寂落嚟。輾轉到咗19世紀，柬埔寨變咗法國嘅殖民地；到第二次世界大戰爆發，柬埔寨落入日本手上成年幾。戰後嘅1953年11月，柬埔寨宣佈獨立，不過好快又墮入赤柬極權統治、越南入侵、國家內戰等等困局，到1990年代中後期先至開始恢復元氣。

經濟發展

由2001年到2004年，柬埔寨藉由成衣業同埋旅遊業嘅強勁帶動，平均經濟發展率達到6.4%。2007年，經濟發展率更加係超過9%。不過，人口平均年齡比較細、教育水平比較低、無乜生產力，都係呢個國家未來經濟發展嘅隱憂。