卡塔爾

卡達旗

卡塔爾（Qatar），又譯喀他、卡達，係西亞中東嘅一個酋長國，首都多哈。

名

中文「卡塔爾」係譯自英文嘅Qatar，而Qatar可能嚟自於英文嘅「Qatara」。依家一般相信Qatara係指卡塔爾一個廢棄嘅城鎮「祖巴拉」（الزبارة‎），佢以前係個經濟繁榮嘅港口。

政治

卡塔爾係君主立憲非民主制嘅酋長國，家族世襲，禁止任何政黨活動，唔受國際法院嘅強制管轄權。

外交

卡塔爾係石油輸出國組織嘅早期成員同海灣阿拉伯國家合作委員會嘅創始成員之一，亦都係阿拉伯聯盟嘅成員，雖然係帝制國家，但響軍事上獲得美國支持。

卡塔爾同各種外國勢力嘅互動相當頻繁，允許美軍為咗攻打伊拉克同阿富汗而用佢哋嘅空軍基地。卡塔爾同時同伊朗簽咗一項防務合作協議，令雙方可以共同擁有世界上最大嘅天然氣田。

宗教

遜尼派伊斯蘭教係卡塔爾主要宗教。根據2004年嘅人口普查，71.5%嘅人口係遜尼派穆斯林，大約10%係什葉派穆斯林，8.5%係基督徒，10%係其他宗教。目前無國外嘅宗教團體響卡塔爾舉行公開活動，但響2008年政府批准一尐教堂進行彌撒。

教育

呢幾年，卡塔爾政府非常重視教育。每個兒童可以享受由幼稚園去到高中嘅免費教育。卡塔爾第一間大學係卡塔爾大學，響1973年成立。

體育

同其他中東國家一樣，足球係卡塔爾最受歡迎嘅運動，其次係木球。2010年12月，卡塔爾申辦2022年世界盃成功，將會係中東國家有史以嚟舉辦最大型嘅體育盛事。卡塔爾亦曾經舉辦2006年亞洲運動會、WTA巡迴賽總決賽、2011年亞洲盃足球賽同2011年泛阿拉伯運動會。