遜尼派

遜尼派（Sunni，亞拉伯話： أهل السنة والجماعة），係伊斯蘭教入面最多人嘅一個主流派系，全名係「遜奈和大眾派」，意思係「遵守遜奈嘅人」，佢哋又叫自己做「正統派」，穆罕默德死咗之後，佢哋主張哈里發應該係推舉合適嘅人嚟做，同什葉派主張要有合乎血統嘅人承傳相反，因而形成佢哋同什葉派之間對立嘅關係。佢哋以《古蘭經》同六大聖訓作為佈道、立法同行教嘅根據，喺9世紀制定咗一套四大學科，即係聖訓學、經注學、教法學同教義學四個學科系統出嚟。後來因為對護教主義某啲觀點嘅爭論，又分出咗唔同嘅學派出嚟。其中一個艾什爾里派喺11世紀中葉仲成為塞爾柱王朝嘅官方宗教，同蘇菲派合一之後，成為世界上最多穆斯林信嘅一個伊斯蘭教派，而中國嘅穆斯林就主要屬於哈乃斐學派。

起源

公元7世紀由亞拉伯人穆罕默德喺麥加創立伊斯蘭教，但最初受到麥加貴族壓迫，於是走到去麥地那成立一個宗教社團叫做「烏瑪」，經過長年鬥爭之後，烏瑪最終進佔麥加，最後成個亞拉伯半島亦變為伊斯蘭教嘅世界。

但喺穆罕默德死咗之後，由於無指定承繼人，同時亦無講點樣推舉領袖，於是好多人因為各種原因，例如信仰理解分歧、政治利益等原因，先後分裂出哈里哲派同什葉派出嚟，加上帝國不斷擴張，單單一本《古蘭經》已經唔可以滿足各種實際生活需要，因而各自開始發展出一套教法同聖訓學，作為對《古蘭經》嘅補充。到9-10世紀終於完成六大聖訓集。

但對於好多問題，尤其是哈里發職能同佢嘅制度、亞里功過等問題仍然好有爭議，為咗要令各方達成一致，「遜尼派」就咁慢慢形成。

而到咗11世紀，遜尼派正式確立艾什爾里派教義作為正式教義，之後又引入蘇菲派思想充實信仰內容，最後成套教義終於完全建立。

參考

主要參考書

• 《伊斯蘭教》 金宜久著 宗教文化出版社 ISBN 7801230868/G29
• 《亞拉伯通史》 商務印書館 ISBN 710001865X
• 《伊斯蘭教史》 金宜久著 江蘇人民出版社 ISBN 7214041480
• 《伊斯蘭教史》 王懷德、郭寶華著 ISBN 7227007855