東南亞

東南亞
土地面積	4,500,000平方公里
人口	636,471,439（2016年）
人口密度	135.6人／平方公里
國家	11 汶萊 柬埔寨 東帝汶 印尼 老撾  馬來西亞 緬甸 菲律賓 星加坡 泰國 越南
屬地	2 聖誕島 安達曼尼科巴群島
生產總值（2016年）	2.557兆美元
人均生產總值（2016年）	4,018美元
時區	UTC+5:30（安達曼-尼科巴群島）至UTC+9（ 印尼）

東南亞嘅位置

東南亞係亞洲嘅一個分域。佢位於亞洲嘅東南部，而嗰度因為響板塊邊緣，所以地震同火山活動頻繁。該處亦都有好多羣島同列島。

東南亞民族以南島民族同馬來族占主導位置，區域內居民多數信奉伊斯蘭教同佛教。當中印尼係全球穆斯林最多嘅國家，泰國係世界最大嘅佛教國家，而菲律賓係東半球最多天主教徒嘅國家。

除咗東帝汶，區域內10國家組成咗東南亞國家聯盟（ASEAN，簡稱「東盟 」）組織。

成個東南亞包括以下嘅國家：

• 中南半島
  • 越南
  • 泰國
  • 老撾
  • 緬甸
  • 柬埔寨
• 南洋群島
  • 印尼
  • 汶萊
  • 新加坡
  • 東帝汶
  • 菲律賓
  • 馬來西亞

發展現況

東南亞各國經濟差異好大：

• 新加坡繁榮發達，生活水平達已經達到發達國家水平，經濟活動以服務業、金融業、航運業、物流業、旅遊業為主，近年積極發展高科技產業同教育。

• 汶萊雖然人均國內生產總值同發達國家相若，主要以石油、天然氣出口為主，但係財富同中東產油國一樣只係集中喺少數富裕階層。

• 馬來西亞同泰國經濟發展水平係亞洲前列，經濟以工業、製造業、旅遊業同農業為主，近年積極發展航運業、服務業、金融業同物流業。馬來西亞嘅高速公路網絡係發展中國家之中最發達嘅地方之一，泰國擁有世界數一數二嘅農牧企業正大集團。其中，吉隆坡國際機場同曼谷蘇萬那普國際機場係亞洲區航班樞紐之一。

• 菲律賓、印尼同越南經濟相對落後，偏重旅遊業、基礎製造業同農漁業為主。其中有好多菲律賓人去中東產油國、東亞、港澳台、歐洲等地做傭工；印尼亦有好多人去馬來西亞、新加坡、香港同中東產油國做務工；越南人主要去台灣同中國大陸珠三角地區做務工。

• 緬甸、柬埔寨、老撾同東帝汶屬於不發達國家（第三世界），緬甸、柬埔寨同老撾主要經濟係旅遊業同農業，人出均GDP好低。其中緬甸唔同種族同宗教之間間中有衝突，影響發展；東帝汶主要經濟係漁業同少量石油出口。

人口

人口分佈圖

成個東南亞面積大約有450萬平方公里。2018年，一共有6.55億人生活喺東南亞，當中有五分之一生活喺全球人口最密集嘅爪哇島島嶼。

印尼人口大約2.68億，係全球第四。另外，目有近3000萬華人生活喺東南亞，主要遍佈喺聖誕島、印尼、馬來西亞、新加坡、汶萊、菲律賓、泰國、越南等地。

語言

以下列表係東南亞各個國家嘅官方語言同主要語言。

國家/地區	官方語言	其他主要語言
汶萊	馬來語、英語	華語、泰米爾語
柬埔寨	高棉語	泰語、越南語、占語、華語等
東帝汶	德頓語、印尼語、葡萄牙語
印尼	印尼語	爪哇語、巽他語、馬都拉語、米南佳保語、布吉語、班查語、峇里語等（印尼擁有超過700種語言，係全球第二語言最多樣化嘅國家）
老撾	老撾語	泰語、越南語、苗語等
馬來西亞	馬來語、英語	華語、泰米爾語等。
緬甸	緬甸語	撣語、克倫語支、若開語、孟語、景頗語、庫基-欽語支等
菲律賓	菲律賓語、英語	西班牙語、阿拉伯語、維薩亞斯語支等。
星加坡	英語、馬來語、漢語官話、泰米爾語	其他漢語語支語言、印尼語、泰盧固語、印地語、旁遮普語、爪哇語等。
泰國	泰語	華語、馬來語、苗語、克倫語、撣語、老撾語等。
越南	越南語	高棉語、華語、苗語、占語等
聖誕島	英語	華語、馬來語
可可斯 (基林) 群島	英語	馬來語
安達曼-尼科巴群島	印地語、英語	泰盧固語、泰米爾語、孟加拉語等

宗教

菲律賓	羅馬天主教（80.6%）、回教（6.9%～11%）、基督新教福音派（2.7%）、基督堂教會（2.4%）、其他基督教教派（3.8%）、佛教（0.05% ~ 2%）、泛靈信仰（0.2% ~ 1.25%）、其他（1.9%）
越南	越南民間信仰同無宗教（73.2%）、佛教（12.2%）、羅馬天主教（6.8%）、高臺道（4.8%）、新教（1.5%）、和好教其他 （0.1％）
柬埔寨	上座部佛教（國教，97.9%）、伊斯蘭教（1.1%）、基督教（0.5%）、其他（5%）
老撾	上座部佛教（66%）、泛靈信仰（30.7%%）、基督宗教（1.5%）、伊斯蘭教（0.1%）、猶太教（0.1%）、其他（1.6%）
泰國	上座部佛教（國教，94.5%）、回教（4.29%）、基督教（1.17%）、其他（0.7%）
緬甸	上座部佛教（88%）、基督宗教（6.2%）、回教（4.2%）、印度教（0.5%）、泛靈信仰（0.8%）、其他（0.2%）、無信仰（0.1%）
馬來西亞	回教（61.3%）、佛教（19.8%）、基督宗教（9.2%）、印度教（6.3%）、其他（3.4%）
星加坡	佛教（33%）、回教（14%）、無宗教（18%）、基督教（18%）、道教和民間信仰（10%）、印度教（6.4%），錫克教或其他（0.6%）
印尼	回教（87.18%）、基督新教（7%）、羅馬天主教（2.91%）、印度教（1.69%）、佛教（0.72%）、儒教（0.55%）、其他（0.45％）
汶萊	回教（79%）、佛教（8%）、基督宗教（9%）、其他（4.7%）
東帝汶	羅馬天主教（97.57%）、回教（0.24%）、基督新教（1.96%）、其他（0.23%）
巴布亞新畿內亞	羅馬天主教（27%）、路德教會（20%）、基督教聯合教會（12%）、基督復臨安息日會（10%）、五旬節派（9%）、福音派（7%）、聖公會（3%）、其他基督宗教教派（8%）、其他（4%）
印度 安達曼-尼科巴群島	主要係印度教，其他宗教有回教、基督宗教、鍚克教、佛教同耆那教
聖誕島	回教（19.4%）、佛教同道教（18.1%）、基督宗教（8.9%）、不信仰宗教者（15.2%）、其他信仰者（38.4%）
可可斯 (基林) 群島	回教（85%）、其他（15%）
南海諸島	大乘佛教、基督宗教，回教，儒家、道教同無宗教

出面網頁

• "South East Asia - Department of Foreign Affairs and Trade" (英文). 澳洲外交貿易部.