吳語

出自維基百科,自由嘅百科全書
跳去: 定向搵嘢
吳語喺中國嘅分佈

吳語(粵語:Ng4 jyu5),或者叫做吳方言(粵語:Ng4 fong1 jin4),係吳越民系講嘅話,係中國七大方言之一。之所以叫做「吳語」,係因為佢係「三吳」地區(蘇州、湖州、紹興地區,包括埋太湖流域、寧紹平原)用嘅語言。吳語嘅分佈除咗三吳地區,重有喺江蘇省南部地區同埋浙江省,包括上海以內嘅大部份地區通行。一般認為吳語嘅代表係上海話,不過亦都有人認為蘇州話先至係代表。

截至1997年,全球大概有 7717 萬人用吳語做母語,以使用者人口排名係世界第 10 大語言,喺中國境內僅次於以官話(北方話)為母語嘅人數。2007年,吳語嘅母語使用者人數係 7952 萬人,仍然係世界 100 大語言之一。

吳語嘅詞彙同語法好有特色。好似用吳語寫嘅小說《海上花列傳》,唔識吳語嘅人冇可能明得嗮佢嘅內涵。經張愛玲翻譯之後夾雜咗官話,做到令講官話嘅人明得嗮佢嘅意思。金庸武俠小說系列都用咗好多吳語詞彙,好似係「物事」、「醒轉」呀咁。

語言分區[編輯]

吳語語音同漢語普通話差好遠,兩種話完全唔會明對方噏乜。而且吳語內部有好多種方言,大體可以分做北部吳語同南部吳語兩個大區塊,因為彼此之間有明顯分別,南北嘅吳語冇辦法正常傾計。根據語言嘅特點同通話嘅情況,吳語可以分做六個方言(又叫做「片」):太湖片、台州片、金衢片、上麗片、甌江片同埋宣州片。

學者丁邦新話現代嘅閩語同六朝吳語關係好近,而現代嘅吳語就係嚟自六朝嗰陣嘅北方官話。鄭張尚芳分析過〈越人歌〉,認為古百越人嘅話屬侗台語系。後來古百越人同古漢人兩個族群融合,百越人用自己嘅語音嚟讀漢話詞彙,令到早期嘅吳語同時有侗台語系同漢代漢語嘅特色。而家嘅浙南吳語同閩語都重保留咗好多古吳語嘅特徵。吳其芳亦主張,古吳越語係侗台語系,喺長江下游獨立咁發展,同中原音系唔同。根據對江西東北吳語嘅分析,胡松柏認為,早期隨住吳人南下,影響咗閩語,所以令到閩語保留咗古吳語嘅特徵。

歷史[編輯]

吳語係中國境內最古老嘅語言之一。佢嘅歷史最早可以追溯去到商周時期:就算去到東漢(25 年至 220 年)末年,都重係「南至交州,經歷東甌、閩越之國,行經萬里,不見漢地」嘅局面(註:意思即係閩同吳越地區嘅人嘅漢化程度唔夠,所以唔被當做「漢人」)。上古吳地居民屬於壯侗語族民族。後來漢族南遷,喺古華語嘅衝擊之下、佢哋地方嘅語言逐漸演變做古吳語。元末明初嘅《南村輟耕錄》係一部早用民間射字遊戲嚟記錄吳語音系嘅文獻。由明朝馮夢龍輯編嘅《山歌》睇得出,當時嘅吳語詞彙同埋語法已經奠定咗今日有嘅樣。

喺春秋時代,中國南方出現咗吳、越呢兩個國。吳同越雖然係兩個國,但係語言同風俗相通。春秋時期,吳語同中原諸國用嘅語言唔一樣,所以畀漢人當做蠻夷話。梁啟超曾經提出吳越族嘅講法,認為吳人同越人係同族,同中原嘅華族唔同源。

危機[編輯]

吳語嘅內部差異幾大,而且佢分佈嘅各地方冇標準嘅通用語,令到而家吳語嘅生存環境面臨前所未有嘅挑戰,遠遠冇粵語咁強勢。再加上而家中國大陸嘅推普政策不斷咁打壓吳語。漢語普通話開始取代吳語,尤其係喺浙江北部、上海同蘇南地區,陷入瀕危-呢啲地方嘅人口有一半只係識講普通話。亦都有調查話,呢啲地區有過半嘅青少年甚至完全唔用吳語。浙江南部嘅吳語同西部吳語亦開始受到越來越強嘅打壓。

出面網頁[編輯]