台山話

出自維基百科,自由嘅百科全書
台山話
用嘅國家、地區中國 中國廣東省四邑地區及海外華人地區
講嘅人口
系屬
文字漢字
官方地位
官方語言
管理機構
語言代碼
ISO 639-1
ISO 639-3
ISO 639-6
(經已唔用)
tisa

台山話Toi4saan1wa2粵語四邑方言片,係四邑話嘅代表語言。好多情況下台山話就係四邑話嘅代名詞。雖然台山話被分類為粵語嘅一個「方言」,但係實際上佢同廣州話並唔互通,可以被定義為自己嘅一個語言。

分布範圍[編輯]

台山話(四邑話)主要分布喺中國大陸廣東江門市(原稱四邑,後因鶴山加入改稱五邑)嘅新會、台山、開平、恩平四縣(市),以及江門市區、鶴山嘅部分地區,大陸以外嘅華人社區(尤其是北美)。江門市區講帶有好多五邑話發音特點在內嘅白話。

江門五邑介紹[編輯]

江門五邑(台山、新會、開平、恩平及鶴山)流通嘅一般都係四邑粵語同廣州粵語(廣州話)。五邑(舊名四邑)粵語以台山話(台城話)為代表。台山係一個著名僑鄉,海外台山華僑130萬,台山本地區人口110萬。出名嘅藝人,好似Beyond樂隊嘅黃家駒黃家強兄弟,陳百強麥嘉等等都係台山人。

語言特點[編輯]

[1]台山話(四邑話)係粵語各種方言中相當之具有特色嘅一種,同廣州話差異明顯。差異嘅表現喺語音上,亦表現喺辭彙上。

語音[編輯]

同標準粵語一樣,台山話保留咗許多古漢語語音嘅特點。喺某啲方面比標準粵語保留嘅成分更多。例如,佢完整保存咗四種入聲,「北白伯百」四個字音調都唔同(粵語中百、伯同音)。

台山話共有9個音調,參考粵語音調分別記為陰平/陰去(衣/意)、陰上(倚)、陽平(移)、陽上(以)、陽去(易)、中入(百)、陰入(北)、低陽入(伯)、高陽入(白)。採用五度標音法時,呢啲音調嘅調值分別係33、55、11、21、32、33、55、21、32。同粵語相比,調值有所改變,合併咗陰平同陰去,而原來合併為中入音嘅低陽入就保持獨立。

聲調表[2]
聲調 陰平 (中平) 陰上 (高平) 陰去 (中平) 陽平 (低平) 陽上 (低降) 陽去 (中降) 陰入 (高促) 中入 (中促) 低陽入 (低降促) 高陽入 (中降促)
調值 33 55 33 11 21 32 55 33 21 32
粵語調值 55/53 35 33 21/11 13 22 5 3 3 2
編號 1 2 1 3 4 5 6 7 8 9
代號 - * > ' - > '
漢字舉例
拼音(標示調類) yi1 yi2 yi1 yi3 yi4 yi5 bak6 bak7 bak8 bak9
國際音標(標示調值) ji33 ji55 ji33 ji11 ji21 ji32 pak55 pak33 pak21 pak32

此外,台山話重有變調現象,主要包括三種情況:

  • 升變調,將一字嘅調值喺最尾升到最高。除咗陰上同陰入之外,其他音調都可以升變調。除入聲外重有4種可升變調嘅音調,令到實際發音嘅調式增加4種:
  • 33->35 例如:學生33証->學生35[3]
  • 11->15 例如:金錢11->工錢15[4]
  • 21->215 例如:該21(呢/哩)->該215(呢度/哩度)[5]
  • 32->325 例如:話32說->講325

而入聲變調時,會喺最尾一字後尾加上一個e55音節。甚至有時非入聲字變調亦可拉長出一個e55出來,意思不變。例如該2155=該215。 呢種變調應用廣泛,常用於名詞詞尾(包括單音詞)。學者鄧鈞認為相當於現代標準漢語兒化現象。

因爲欸e55呢個字有時跟喺動詞後面做助詞,形式上同升變調相似,亦有類似簡化為音調改變嘅現象,因此需要辨析。例如:跟欸我=跟著我,講得快都會變成跟35我。呢種情況因為欸字有語法含義所以同名詞嘅變調唔多相同。至於兩種形式相似嘅變調係咪有聯繫就未有結論。

  • 高平變調,將一字嘅聲調根據原讀音係咪入聲分別變爲陰上或陰入,調值55。用於某啲辭彙,往往因為台山話嘅33調值部分對應於粵語嘅55調值,因此喺部分辭彙中沿襲音調。例如「上高」(上面)後一字音調同粵語。此外,呢種變調喺標準粵語中亦廣泛存在。
  • 低降變調,將一字嘅聲調根據原讀音係咪入聲分別變為陽上或低陽入,調值21。特點如下:
  • 可用於對現有嘅字進行轉義,例如竇字用於“窩”、“洞穴”等意思或作量詞時使用低降變調,用於其他含義用正常調值32。
  • 有時被變調嘅字意義完全唔變,但喺不同嘅配搭有不同嘅讀法。例如「章魚11」嘅魚字唔變調,「墨魚21」嘅魚字變調。
  • 被變調嘅字可以出現喺詞語開頭。例如:木32工→木21
  • 低降變調後重可以再升變調,例如「買魚215」。

此外,重存在一啲零散嘅變調現象。台山話嘅變調研究目前重未充分,處於歸納階段,關於幾時用邊種變調,重未有好明確嘅總結。

台山話將古音以t為聲母嘅字(如)變成零聲母,因此會有大量零聲母嘅字。當呢啲字跟住一個鼻音音節時,就會連讀成一個音節。另外重有一啲類似嘅音變。

此外,某啲字詞往往有文白兩種讀音,而部分字詞嘅發音沿襲或仿照粵語發音而唔係跟循本地發音。

文法[編輯]

台山話喺文法方面一個突出嘅特點,就係人稱代詞單複數嘅表達。同標準粵語以及現代標準漢語唔同,佢唔用詞尾(粵語「哋」,標準漢語「們」)區分,而喺通過變調、變音等內部屈折來表示。另外,指示代詞中表示「呢」同埋「呢度」嘅「該」,表示「嗰」同埋「嗰度」嘅「恁」亦通過屈折來區分[6]

  • 人稱代詞:我ŋɔi33(單)→我ŋɔi21(複);你ni33(單)→你niεk21(複);佢k'ui33(單)→佢k'iεk21(複);另有一個「非特指第三人稱」代詞,相當於「人哋」或者「第個」:惗niεk55,可以單獨用,亦可以組成「人惗」,意思一樣,無單複數。注意佢個發音除音調外同複數嘅「你」相同但意思完全唔同。
  • 指示代詞:該k'ɔi21=呢 → 該k'ɔi215=呢度;恁nen21=嗰 → 恁nen215=嗰度
  • 疑問代詞:乃nai21=邊 → 乃nai215=邊度

疊用形容詞方面,台山話可以將兩個字重疊,其中一個升變調,以表示程度。一般第一個字變調,表示程度加強;第二個字變調,表示程度減弱。例如「紅紅」可以表示「非常紅」(紅1511)或者「有啲紅」(紅1115),取決於邊一個字有變調。

兜字係台山話特有量詞,粵語同標準漢語都叫「棵」。粵語量詞「啲」被細分成兩個,倷(nai55)同埋伱(nit55)程度唔同,前者要比後者表示更多嘅數量,至於「啲多」就變成「伱子」(nit55du35

句法方面,大部分同粵語相同,但下面呢個係台山話特有嘅句型:

  • 我都聽唔見句。(我一句都聽唔到)

辭彙[編輯]

以下詞彙為台山話部分特有詞彙同埋俗語:

  • 打暴:第一次
  • 法嚹:窿嚹,法字讀陽上(21)。
  • 險過老鼠噬貓鼻:俗語,形容極度危險。
  • 斧頭唔大柄大:俗語,形容某件事情次要部分嘅開銷比主要部分重高。
  • 三個狗仔數過夜:俗語,比喻做嘢慢。
  • 跟著好人做好人,跟著生婆學拜神:生21婆,即神婆,幫人做法事或者算命看相等等嘅女人。
  • 喃譕佬撞到狗—冇細符:歇後語,喃譕佬,指專門幫人做法事嘅道士或和尚;冇細符=冇辦法,同粵語冇晒符,但喺度細字語帶雙關。
  • 未見過大蛇屙屎,生雞漏蛋—少見多怪:歇後語,生雞指冇閹到嘅公雞。(粵語亦有大蛇屙尿一說,但呢個較為完整)

代表語言及方言[編輯]

台山話(四邑話)係以台山台城鎮為中心嘅,越偏離呢個中心嘅發音就越接近於粵語粵海片(廣州話)。因此,鶴山同埋江門市區嘅口音更接近廣州話。台山話嘅代表語言係台城話,發音同白話嘅區別比其他台山話更加大。

花絮:日月潭[編輯]

台山話中日同月兩個字好容易造成混淆,但呢兩個字並唔同音,甚至差別唔算好細。但係由於各地方言嘅差異,開平赤坎片方言中嘅「月」字啱啱同台山水步片方言中「日」字同音。咁啱喺開平市操這兩種口音嘅人都好多。於是「三個月」嘅個字常因連讀省略,同「三日」混淆。遇到呢個情況,請務必要對方講清楚,中間係咪有個「個」字,因爲「三個日」係唔啱語法嘅。呢度對初學者來講係一個可能會遇到嘅「潭」(氹),故名為「日月潭」。

[編輯]

  1. 呢節主要參考咗鄧鈞(開平赤坎人,湖南省語言學會會員)主編嘅《開平方言》一書,本書主要闡述開平方言赤坎片嘅方言,但大多數同時適用於標準台山話。呢本書由湖南電子音像出版社2000年3月出版,無ISBN號,國內出版號ISRC CN-F10-00-0008-0/A•H
  2. 台山話嘅入聲同所有地方嘅入聲一樣,都有-p、-t、-k三種韻尾。
  3. 實際發音等同粵語陰上音
  4. 實際發音類似粵語陽上音,即本例中錢字嘅粵語音調
  5. 實際發音類似標準漢語上音
  6. 由於台山話各方言片差異幾大吓,因此喺度列出嘅發音僅供參考。就以人稱代詞來講,各地嘅差異就非常明顯。但基本規律係一樣嘅,屈折嘅方式亦大體一致。