南音
有別於泉州南音,廣東南音自成一格,係南方「彈詞」嘅一種,同木魚、龍舟、粵謳、板眼都稱之為粵調。廣東南音又叫做地水南音,係廣東「說猶如唱,唱猶如說」嘅獨特說唱曲藝,喺二十世紀初期最盛。瞽師或師娘(盲人樂師/盲人歌女)糅合咗木魚、龍舟等廣東講唱傳統彈唱,歌曲內容多數係抒發個人嘅坎坷遭遇、離愁別緒,經常有自傷自憐嘅主題,令廣東南音別樹一格,所以後期亦被人攞嚟同美國黑人藍調比較。演唱技藝嘅傳授幾乎全靠口授。著名曲目有《嘆五更》、《客途秋恨》、《祭瀟湘》等,而《今夢曲》就喺唯一一本南音曲集。
南音喺十九世紀中葉至二十世紀初妓院、煙館、茶樓上經常聽到嘅現場表演音樂,由於涉及色情場所,歌詞唔少都同男歡女愛、色情題材有關。同時,廣東豪富世家詩酒風流,蓄養瞽師、歌姬、瞽僮以備歌唱。二十世紀二三十年代後,豪戶大宅沒落,加上1935年香港禁娼,地水南音亦開始式微。不過,二十世紀二十年代起,粵劇開始吸納地水南音的講唱方式,逐漸發展為戲台南音,令到南音嘅部份神髓得到傳承。著名嘅南音唱家包括鍾德(盲德)、劉就(盲就)、桂妹師娘、眇姬麗芳、白駒榮、陳鑑、何耀華、盲賢、盛獻三、杜煥等等。
背景
[編輯]南音喺繼木魚、龍舟之後,喺清代乾隆年間興起產生嘅粵語曲藝曲種,主要喺兩廣粵語地區流傳。乾隆二十三年(公元1757年),清政府只准廣州作為全國唯一對外通商口岸,卻帶旺咗廣州、佛山一帶嘅經濟發展。娛樂消費業興旺,吸引咗唔少外地煙花女子嚟廣州謀生。當時廣州嘅風月場所嘅特色喺花舫,集中喺南濠、谷埠、沙面等南海縣屬地,活躍嘅講唱藝人分為揚州幫、廣東幫同潮州幫。
木魚說唱自明代中葉之後發展緩慢,廣州幫只唱木魚和少量小曲,就好難同其他幫派競爭,於是佢哋喺木魚清唱、龍舟邊敲擊邊唱曲嘅基礎上,吸收揚州南詞、潮曲嘅長處,形成新嘅粵語曲種——南音[1]。
地水南音
[編輯]「地水」係卜卦術語,廣東人舊稱盲人做「阿水」,所以主要由盲人所唱嘅南音就被人叫做「地水南音」。以前盲人喺廣東一帶嘅鄉鎮,主要靠占卜算命為生,一啲有音樂天賦嘅盲人兼唱起南音,而且師徒一代代咁傳落去,於是唱南音就變成當時盲人嘅一種謀生手段。佢哋有啲孤身一人,有啲兩人為伴,帶往簡單樂器,唱一啲悲情/詼諧嘅故仔賣唱討錢,或沿門乞唱、或擺地攤求賞錢,而部份唱得比較好嘅,或被富裕人家請到府中唱「堂會」。南音瞽師一般生活坎坷,因此,南音曲詞頗多悲情故事、自憐自傷之詞。
地水南音嘅唱腔一般又分為正綫南音、乙反南音(又叫苦喉南音/梅花腔)、流水南音等唔同唱腔。正綫南音係比較普通嘅南音,苦喉南音嘅音調係最凄慘,流水南音就無過門,唱者要「文不加點」咁一路唱落去,中間無停頓。南音唱法變化多端,唱家唱同一曲每日都可以有唔同唱法。至於「乙反」就係古樂調式,用舊時「上尺工反六五生」為譜。乙反嘅音較低,所以聽起來韻味較苦[2]。
杜煥
[編輯]杜煥(1910 ﹣1979年)畀人認定做香港最後一位正綫地水南音大師。佢喺二十世紀五十年代,每朝喺香港電台《杜煥南音》節目演唱南音,更加不時將當日發生嘅新聞故事作為即興唱作題材,一直唱到1972年,港台因減少播放古老文化節目而停播該節目為止。杜煥以一心三用,左手操拍板、右手彈爭、口中歌唱嘅絕技為人津津樂道。
杜煥喺1972年被香港電台炒魷魚之後,只能靠政府救濟金為生,屈居喺上海街一盲人籠屋,間中或到旺角街頭賣唱討錢。1974年,德國文化協會邀請杜煥演唱〈客途秋恨〉、〈男燒衣〉等曲目,兼且由何臣椰胡伴奏。後來成為「南音箏怪」嘅唐健垣(當時喺中文大學語言學(甲骨文)碩士生 [3] )初遇杜煥,結下兩人日後喺師徒情緣。
美國匹茲堡大學音樂系教授榮鴻曾,喺1975年收錄咗杜煥喺上環摩羅街富隆酒樓演唱嘅16首南音歌曲,部份經由中文大學輯錄成唱片《訴衷情》。
後來,喺唐健垣安排下,杜煥喺大會堂劇院演唱,又被邀到中文大學博物館內演唱南音,並且拍攝成一卷八米厘影帶,成為傳統地水南音嘅少數僅存影像紀錄。
1979年,杜煥病逝,傳統盲人派地水南音自此成為絕唱。唐健垣當時喺英國深造音樂博士,一時間杜煥貧病無以為殮,好彩得南音唱家、粵劇名伶阮兆輝奔走安排喪事,又聯繫商業電台舉辦南音、龍舟演唱會,為盲人組織籌款 [4]。
颺舟南音
[編輯]颺舟南音(一般寫作「揚州南音」)一派喺二十世紀二三十年代嘅廣州響負盛名,代表人物喺鍾德(1860年 - 1929年),弟子有盛獻三。盛獻三晚年亦收唐健恒為徒。據梁培熾先生查考,該腔因曲調悠揚跌宕,有『舟搖搖而輕颺』之感,故起名颺舟腔。颺舟一詞較僻,亦同揚州同聲,後人漸漸訛傳爲揚州腔 [5]。颺舟南音七叮一板,比較一般南音三叮一板,嚟得雅緻委婉,而鍾德更以「陰喉」將佢發揚光大[6]。
編撰《今夢曲》
[編輯]孔繼勳(1792-1842),清道光進士,孔子 69 代孫,嶺南太平沙大鹽商。曾經喺翰林院庶常館教習,同曾國藩有師生之誼。孔繼勳對古人嘅法書名畫獨具慧眼妙識,喺一次踏雪游南岳之後,歸來便興建「岳雪樓」,不惜重金將自己所見嘅精品都收購其中。蒐羅之富,一時稱最。岳雪樓唔只喺佢藏書之所,而且亦喺雅集文化名流之地。據說孔繼勳除咗喺呢度宴請名流酬唱之外,重收養咗一班歌女及瞽僮,使之成為曲館。
孔家將擅唱南音的失明藝人鍾德接到岳雪樓,照顧佢起居飲食。雅集之時,文人雅客們修訂鍾德所唱嘅南音舊曲,或爲佢撰寫新曲,共得曲子14首,因曲子都以曹雪芹小說《紅樓夢》爲題材,統稱《今夢曲》,但原來版本早已散失 [7]。
鍾德晚年到咗香港,以《華字日報》總編輯勞緯孟爲首嘅一幫文人喺 1919年爲佢整理、出版咗《今夢曲》,葉瑞伯嘅侄孫葉茗孫參與編輯曲集,南海天放氏、順德老漁撰序或題詩 [8]。
戲台南音
[編輯]跟據廣州粵劇研究者陸豐先生嘅研究,粤曲唱腔嘅舞台語言係喺1921至1927年產生轉變,又因為演唱平喉白,不但可以吸收廣東嘅講唱音樂例如南音、木魚等,目前最早記載結合南音和梆黃曲嘅係1924年由陳小漢之父陳醒漢演唱嘅《芭蕉島》之憶美。也因為演唱平喉白話,粵曲嘅調門也變為降B調 [9]。
影響
[編輯]電影
[編輯]關錦鵬喺電影《胭脂扣》中,亦安排咗飾演妓女如花嘅梅艷芳唱出一段《客途秋恨》,點綴佢初遇十二少嘅場面。
電視劇
[編輯]無綫電視喺1983年拍攝金庸武俠劇《神雕俠侶》時,監製簫笙為飾演男主角楊過嘅劉德華,寫咗一首《神雕大俠》南音歌曲,並且由劉德華主唱,內容主要喺講述楊過充滿波折嘅個人遭遇 [10]。
著名曲目
[編輯]粵調雙絕
[編輯]- 《嘆五更》,何惠群喺順德人,嘉慶年間進士,多才多藝,佢創作嘅《歎五更》成爲粵調三大名曲之一。該曲吸取咗佛教文學嘅《五更轉》、《十二時》等表現手法,寫一個妓女同愛人分開,反複思念愛人,曲子用「五更歎,每個更次歎一次」嘅形式,層層推進,將人物感情抒發得淋漓盡致,曲子情景交融,音調和諧,語言優美,一時風靡城鄉。
- 《客途秋恨》,同《歎五更》被譽爲粵調雙絕。1977年,日本人波多野太郎經考據後喺《東洋大學大學院紀要》第十四集內披露,《客途秋恨》係南海才子葉瑞伯創作。葉瑞伯曾經喺道光年間到廣西做生意,途中同一名女子相愛。後遇苗亂,兩人失去聯繫,葉瑞伯於是創作《客途秋恨》嚟懷念情人。呢個說法後來得到譚正壁、譚尋所寫嘅《木魚歌.潮州歌敘錄》(1982年)認同,以及畀葉瑞伯後人證實 [11]。20世紀20年代,編劇家黃少拔以該曲爲基本線索,將男女主角附會爲才子繆蓮仙,改編成粵劇《客途秋恨》。並根據劇情需要,刪改咗《客途秋恨》作爲主題曲。粵劇名家白駒榮首演該劇,並演唱咗主題曲《客途秋恨》,嗰首曲好鬼流行。
其他名曲
[編輯]- 《祭瀟湘》[12]
- 《哭𤄙湘》
- 《晴雯別園》
- 《男燒衣》
- 《女燒衣》
- 《霸王別姬》
- 《梁天來七屍八命》
- 《失明人杜煥憶往》
鹹濕曲目
[編輯]南音多數喺色情場所演唱,所以唔少曲目都係涉及男歡女愛,呢類曲目又有「老舉南音」俗稱。雖然呢啲曲目內容淫褻,但係要全面研究瞽師南音,呢一部份不可或缺。
- 《陳二叔》,全曲講女子〈姣出水〉,因為思春,叫佢近身女傭搵男人,女傭就去搵陳二叔返嚟。曲中大部份係講男女主角敦倫細節。
- 《爛大鼓》,快板淫曲
在世南音唱家
[編輯]注
[編輯]- ↑ 〈佛山文化廣電新聞局有關南音介紹〉. 原著喺2007年5月1號歸檔. 喺2007年9月16號搵到.
- ↑ http://gzl.gz.gov.cn/ndgz/view.asp?id=734 文化在民間.南音 – 輕撥低唱,曲中弦上說凄凉
- ↑ http://www.operasiu.com/tong/re_proftong.htm 互聯網檔案館嘅歸檔,歸檔日期2014年4月13號,. 唐公小傳
- ↑ http://www.dbi.org.hk/xingqing/Issue05/NanYing_1.htm 互聯網檔案館嘅歸檔,歸檔日期2008年1月29號,. 搶救杜煥地水南音
- ↑ http://sueopera.com/board/viewtopic.php?t=29 互聯網檔案館嘅歸檔,歸檔日期2016年3月4號,. 粵曲發展簡述
- ↑ 〈「楊州南音」腔調與傳人〉,《粵調.樂與曲》
- ↑ http://www1.nanfangdaily.com.cn/b5/www.nanfangdaily.com.cn/southnews/tszk/nfdsb/gzzz/fxgz/200708230372.asp[失咗效嘅鏈] 嶺南鹽商聖人後 風雅曾築岳雪樓
- ↑ http://sueopera.com/board/viewtopic.php?t=29 互聯網檔案館嘅歸檔,歸檔日期2016年3月4號,. 粵曲發展簡述
- ↑ http://sdlib.shunde.gd.cn/dfwx/sdyj/mjrsdyx.htm[失咗效嘅鏈] 順德圖書館:順德民間藝術對粵劇的影響
- ↑ Return of Condor Heroes 1983 TVB Plot Cantonese Opera, YouTube
- ↑ 黎鍵(2007)《粵調.樂與曲》第86頁
- ↑ 〈盲德 ﹣﹣祭𤄙湘〉. 原著喺2013年1月16號歸檔. 喺2010年3月25號搵到.
- ↑ 魯金(1994)《粵曲歌壇話滄桑》第192頁