廣彩

香港藝術館收藏嘅廣彩纏枝花卉雙龍耳瓶；佢色水好鮮艷，睇得到西人畫畫風格嘅影響。

廣州織金彩瓷，簡稱廣彩，（粵拼：Gwong² coi²；英文名係「Canton porcelain」或者「Cantonese porcelain」）。佢係一種喺啲白瓷器皿上面彩繪再燒製而成嘅工藝品，出名在色彩絢麗、金碧輝煌、構圖嚴謹、繪工精細，畀人嗌做中國四大名瓷之一。呢種工藝開頭係喺 16 世紀尾橛嘅大明時期，已經有成過四百年歷史。嗰時廣東啲粵人由江西景德鎮嗰度運啲白瓷過嚟，再喺廣州嗰度幫啲瓷器油顏色、加圖案、再燒。喺呢種風格身上睇得到明朝文化嘅影子，但係佢又加咗啲西人嘅風格喺入面，例如係《竹園陶說》就咁樣講：「清代中葉，海舶雲集，商務聚盛，歐土重華瓷，我國商人投其所好，乃於景德鎮燒造白瓷，運至粵垣，加僱工匠，仿照西洋畫法，加以彩繪，於珠江之河南，開爐烘染，製成彩瓷然後售之西商。」

技術同藝術性

廣彩嘅顏料大致有幾種：一係水青，又叫做「廣翠」，好似青花咁嘅色水；二係西紅，同江西景德鎮嘅胭脂紅相似；三係大紅，比較礬紅淺而且鮮；四係大綠，比起江西大綠稍為翠啲；五係麻色，似黃麻皮咁嘅色；六係金彩，金碧輝煌；七係茄色，由西紅同水青配成嘅紫色。喺設計方面，廣彩成日都係「滿地開光」（廣彩廠嗌咁做「斗方」）。有邊、有開光、有地，而主題嗰舊嘢就擺喺正中心嗰度。

喺製作方面，早期嘅廣彩瓷器嘅圖案都係用人手畫構圖同油顏色，好徙時間。後嚟先至用手雕橡膠圖章嘅方法嚟處理廣彩嘅花邊線條：首先會由個大師傅蓋印同駁接印同印之間嘅駁口，再由啲下手工人油顏色。再打後啲，橡膠圖章已經由熱壓方式由畫線稿影像電版直接印出嚟，唔使再靠人手雕。

香港廣彩

廣彩本來係廣州嗰帶搞得最勁，後嚟佢重擴展咗去其他嶺南地區嘅大城市，例如香港就喺廿世紀初開始學廣州搞廣彩。香港嘅廣彩歷史有得追溯到 1928 年，嗰時九龍城隔坑村道起咗間「錦華隆廣彩瓷廠」，打後又喺 1947 年有咗「亞洲彩瓷廠」同「東方廣彩瓷廠」。1960 年代之前，香港嘅廣彩製品都係以餐具同花樽呢件濕碎嘢為主，造型有百幾款，重出口到去美國、西歐、南美、東南亞、大溪地、同馬達加斯加呢啲地方。1960 至 70 年代，歐美國家經濟好發達，對唐人工藝品有唔細嘅需求，香港就開咗成柞彩瓷工廠，嗰時從事彩瓷業嘅工人有過千人。

香港嘅廣彩業喺 1970 年代受咗一次大打擊。嗰時美國開始禁啲含鉛同鎘嘅瓷器餐具入口，令到整個香港廣彩業嘅生意一落千丈：因為廣彩嘅釉上彩係屬於低溫嘅色料，燒爐嘅溫度只係去到攝氏 800 度左右，加上顏料入面嘅玻璃成份含有一氧化鉛，除非用高過攝氏 950 度嘅釉中彩，先至可以將鉛同鎘燒盡，但係咁做啲色水又會變到好暗淡，冇辦法表現廣彩特有嘅鮮艷色彩。

直到 1980 年代，隨住啲人興仿古瓷，先至出現扭轉頹勢嘅機會。仿古瓷製品以陳設觀賞為主，並唔會用嚟做餐具，所以唔使顧慮含鉛量嘅限制，顏料可以好似油畫咁厚厚堆填喺瓷器大魚缸同大花瓶上面。嗰陣仕女戰將等人物嘅厚彩堆金圖案嘅仿古瓷最有人氣，近百年盛行嘅瓷器款幾乎都畀人仿造，可以話係香港廣彩最興旺嘅時期。其中喺摩羅街中心嘅華通陶瓷嘅規模最大，佢喺 1989 年搬咗去仔田灣，2010 年再搬去西環山道繼續開檔。

隨住中國大陸喺 1980 年代實施對外開放嘅政策，香港嘅彩瓷生產線亦都相繼轉入去珠江三角洲一帶，只係保留啲辦事處同樣品間喺香港。到咗廿一世紀，香港重有人堅持用人手畫花，但係家庭式製作嘅瓷器廠只係剩低九龍灣工業中心嘅粵東磁廠。當香港最後一代嘅廣彩老師傅退休之後，本土嘅彩瓷製造好有可能就咁畫上句號。雖然係咁，香港都重有啲瓷藝發燒友喺度嘗試緊將呢種工藝搞落去。

廣彩作品

• 
  廣彩花鳥瓷盤
• 
  廣彩村姑採櫻圖碟
• 
  廣彩蓋罐
• 
  18 世紀荷蘭商人喺廣東買嘅廣彩
• 
  廣東省博物館收藏嘅廣彩風景人物紋帶蓋執壺
• 
  廣東省博物館收藏嘅廣彩人物圖碟

睇埋

• 嶺南文化
• 景德鎮