賣懶

賣懶係舊時細路過年嘅習俗。傳統上，年三十晚食完團年飯後，細路會攞住燈籠、香同紅雞蛋行出街，大唱「賣懶！賣懶！賣到年三十晚！」，行到好遠之後上炷香，再食埋隻紅雞蛋就賣完懶返屋企。有啲地方嘅賣懶習俗融合咗落另一個習俗派財神度，要將一張寫住「懶」字嘅紅紙混埋入寫住「財神」字嘅紅紙，搵機會搏懵當「財神」派畀人，成功派出就代表賣懶成功。

中國民初陳伯陶嚮《東莞縣志》記載，東莞啲細路賣懶係要拎著隻鴨蛋。