九龍城
九龍城（Kowloon City或者Kau Lung Shing）係香港一地，亦係一墟，喺新九龍，今係九龍市區內。佢西北係九龍寨城，西係衙前塱，西南係珓杯石，北係衙前圍。
舊時東南係九龍灣，有龍津碼頭出海。由香港政府開拓九龍城，墟市村落拆咗，改成市區，另有部份，再喺香港日治時期，拆區擴建啟德機場。
今日九龍城，市區同衙前塱連成一片，成爲九龍城市區。市區南北約莫賈炳達道同太子道之間，西邊到聯合道，成一梯形。另加北面賈炳達道公園及九龍寨城公園，界至東頭村道。
行政上歸九龍城區。
歷史
[編輯]九龍城一帶響九龍灣邊，原本係曬鹽之地，大宋時期已經叫官富場，有官兵駐守。
南宋最後嘅皇帝宋帝昰同埋宋帝昺，都喺九龍城避過難。家下宋皇臺，露明道上帝古廟遺址都同呢段歷史有關。
響英國一八四二年正式得到香港島之後，大清即刻加強九龍防衞，就響家下九龍城個地方，起咗個九龍寨城。個寨城響衙前塱北面，衙前圍西南，侯王廟東南，珓杯石北面。個城係大清駐官九龍之地。寨城東南有龍津碼頭，所以個城到碼頭之間就變咗個市，好多人聚居，是爲九龍城。 九龍城呢度，以大街爲主要街道，店舖林立。
後尾英國一八九八年租咗新界，按約，大清官員可駐留九龍寨城，自由出入。一八九九年四月十六號，香港總督卜力喺九龍城外升旗接收儀式。另大埔亦有升旗儀式。接收前後期間，新界以屏山爲首嘅村民反抗，成新界六日戰。香港官員懷疑新安縣官搞事，就順手趕走埋城官。香港政府喺碼頭附近立九龍城差館。亦開條西貢道入西貢。
九龍城以東，何啟同區德，填九龍灣，建啟德濱。後尾大部份轉做啟德機場，而近九龍城濱邊，爲三角地，卽啟德道、三德路、西貢道之間，成爲市區。而啟德道對出，係舊有嘅龍津碼頭。
香港政府拆九龍城墟市村道，連同衙前塱，化成九龍城市區。起咗好多街，東面以西貢道爲界，西面以嘉林邊道爲限。南面係英皇子道，卽今太子道，北面係賈柄達道。區內街名，全以呢帶村名而名。政府想搬走寨城內人，騰空建市區。但因爲主權問題，同中國政局不穏，反反覆覆，並唔成功。
喺香港日治時期，日軍擴展啟德機場，移平原機場側邊嘅地方，並建新明渠，九龍城亦不倖免。啟德濱三角地移平，折走西貢道，西貢道到龍城道，卽今啟德道，條條街南面都拆，沙埔道、石鼓壟道縮短，最近西貢道嘅隔坑村道，同西貢道一樣，從此消失。龍津碼頭沒於填地之下。九龍寨城牆，拆咗來填海。
交通
[編輯]連接港鐵宋皇臺站。
住居
[編輯]現時亦有南亞人士居住[未記出處或冇根據]。