九龍寨城

出自維基百科,自由嘅百科全書

九龍城寨,1915年影
1989年由飛機上影嘅九龍城寨

九龍寨城粵拼gau2 lung4 zaai6 sing4)係香港九龍城區入面一座圍城,喺1993年拆咗。九龍寨城又被人叫做九龍城寨gau2 lung4 sing4 zaai6),亦有人寫做九龍城砦(「砦」通「寨」),因為舊時九龍城寨嘅城池只係用石頭起出嚟,所以以前啲人鍾意叫呢度做城砦,即九龍城砦。喺香港史上,呢個地方曾經係一個引起好多政治爭論嘅敏感地方,又曾經係一個出名「三不管」嘅神秘地帶。喺1987年香港政府宣佈清拆城寨,引起社會關注,最後落實分三期進行清拆,而家九龍城寨已經變咗做一個公園,叫做九龍寨城公園

九龍城寨喺九龍灣中心,由鯉魚門南行嘅都一定會經過,而且重係沿海重要嘅戰略地點,不過喺20世紀二三十年代因為填海啟德機場,九龍灣就唔再係海港。

清拆前嘅九龍城寨其實並唔係 「三不管」 狀態,而係一笪有郵差、警察巡邏同政府供電嘅地方[1]:33:57

地理[編輯]

九龍寨城原本面積達70畝地(約47,000平方米)[2],而佢東南部本來係九龍灣西北海岸,即係今日太子道東一帶。但其後起啟德機場令佢變成一個內陸地區。香港日治時期,城寨嘅城牆俾日軍拆嗮,周邊一帶後嚟都被劃入英屬香港嘅九龍城發展區,寨城範圍進一步收窄到賈炳達道以北,得返衙門一帶約莫2畝半咁多地方,當地居民後期起樓都限住喺呢個範圍入面起。

[編輯]

九龍城寨原名叫九龍寨城,後來由於香港政府喺劃分區域時,將九龍寨城周圍嘅地方都全部叫咗做「九龍城」,後來為咗唔想混淆,於是就將九龍寨城改為九龍城寨,等佢可以同「九龍城」分返開。

[編輯]

城寨來由[編輯]

九龍城寨歷史最早可以追溯到宋朝,原本係防衞海盜嘅據點,為咗防止海盜,喺1810年就起咗座九龍寨炮台[3]。去到清初康熙年間,為咗方便防守同官衙做嘢,就開始起城池,而九龍城寨就因為咁喺1846年起咗出嚟[4]。而喺經歷過鴉片戰爭之後,九龍城寨嘅戰略地位就變得更加重要。起寨城經過好多波折,中間打風打到城毁。

變成鬼城[編輯]

到咗1898年,英國希望租借深圳河以南同離島所有島嶼,於是要求簽署《中英展拓香港界址專條》,將呢一帶同九龍半島香港島一樣變成英國殖民地。但大清國方面堅持唔畀九龍寨城列入租地範圍,結果就令九龍城寨具有大清國對香港宣示主權嘅呢個獨特地位。城寨變成清朝官員做嘢嘅地方,即係有啲似領事館咁。

不過由於城寨地方細,所以駐喺城寨衙門入面嘅清朝官員幾乎都係啲唔話得事嘅細官,官細之餘重無軍隊,得幾個捕快,於是喺1899年,英國曾經想將城寨接管,於是派咗啲英軍入去,入面啲官立即嚇到走夾唔抖。結果城寨成為英屬香港境內一座無政府狀態嘅圍城。

但係喺1900年7月17號,李鴻章路經香港,同當時嘅港督卜力見面,提醒返九龍城寨重係大清嘅領土,唔好亂嚟,自此之後港英政府就無再搵人入城寨[5]

由於港英政府唔可以搞,結果當時城寨一直保留住由清朝辛亥革命後嘅狀態,令九龍城寨成為當時好多外國人走去「感受舊中國」嘅旅遊點。

1941年12月至1945年8月期間城寨同埋香港全境都俾日軍佔領。戰後由於香港政府、英國政府同埋中華民國、中共政府都唔理或者理唔到,城寨逐漸成為罪惡溫床。

清拆[編輯]

1980年代,中英兩國處理香港前途問題,亦順手處理埋城寨問題。1987年港府宣佈清拆城寨,引起社會關注,最後落實分三期進行清拆[6][7]。「九龍寨城」拆嗮之後,喺1995年改建成而家嘅九龍寨城公園,而原有嘅九龍巡檢司衙門就保留做法定古蹟畀市民參觀。

舊底啲建築[編輯]

龍津義學[編輯]

龍津義學係喺九龍城寨入面最古老同最出名嘅建築,佢同九龍城寨同一時期完成,即係喺清道光廿七年(1847年)起好。佢起得好似以前啲「貢院」咁,喺門前面有條走廊仔,兩邊有大條石柱,門下面有石刻,刻住由當時新安縣知事王銘鼎寫嘅「龍津義學」四個字,門口兩邊重有門聯,寫住:「其猶龍乎,卜他年鯉化蛟騰,盡洗蠻煙蛋雨;是知津也!愿從此源尋流溯,平分蘇海韓潮。」而義學大樓入面分三個部份,叫做「三進」,分別係:前面叫「前進左壁」、中間係空地,後面叫「後進講堂」。

呢間義學,喺當時重做埋鄉公所,所有九龍司嘅事務,都係喺呢度傾,而喺民國之後重俾一啲九龍城嘅人改建成小學,叫做「九龍城公立高初兩等義學」,據講重係香港第一間學校。

1940年由於城牆冧咗,香港政府於是以衛生理由清拆城寨房屋,當時只有「廣蔭院」同「龍津義學」無拆到,到咗七十年代,開始有地產商喺城寨發展,龍津義學因為咁而改建成「義學大樓」。

龍津石橋[編輯]

龍津石橋其實即係舊底龍津埗頭(九龍城碼頭),當清政府割讓九龍畀英國時,除咗保留九龍城寨,亦保留咗一座碼頭畀九龍城寨居民出入使用,到1930年因為要填海起啟德機場,碼頭被清拆。由於碼頭起喺龍津路,個碼頭又用石做,而且起到好似條橋咁,所以啲人就將個碼頭叫做「龍津石橋」。

喺1867年到1871年期間香港曾經開放賭博,公開招標畀人開賭場,不過到咗1872年又再禁賭,於是好多做開賭場嘅人就將啲賭場搬晒入九龍城寨,由於有個碼頭,於是九龍城寨嘅賭場就成日都有好多外國人入去,而且重係當時遠近知名嘅旅遊景點。

天后廟[編輯]

九龍城寨入面嘅天后廟喺係天后廟街,當然天后廟街因為天后廟而命名,大約就喺老人街南面桂盛樓附近。天后廟其實係三十年代先起,不過入面供奉嘅天后神像,就比九龍城寨重要古老。初初起九龍城寨時,其實有座關帝廟,因為關帝廟係清朝法定建築,所以一定要起,用嚟畀啲武官拜。不過喺三十年代初,關帝廟因為日久失修而倒塌,令九龍城寨入面無晒廟宇,但啱啱出面沙浦村因為政府要填海發展而要清拆,就係咁原本喺沙浦村嘅天后廟就搬咗入去九龍城寨。

不過後期城寨越住越多人,天后廟由於四周圍都畀大廈圍住,而住喺大廈嘅人又鐘意掟垃圾出街,結果搞到間天后廟周圍都係垃圾,後來喺天后廟頂起咗個網,垃圾問題先解決。

原有嘅街道[編輯]

九龍城寨雖然只係得六英畝半面積,但係就有成二三十條街,可算係世界上同面積最多街巷嘅細城。城寨主要街道分南北同東西兩邊行嘅大街大路,係呢兩條大街大路再分好多支線出嚟。

南至北大路[編輯]

龍津路[編輯]

龍津路(Lung Chung Road)分別有六條街:龍津後街、龍津一巷、龍津二巷、龍津三巷、龍津尾巷、龍津橫巷。喺廣東省有好多城市都有龍津路,所有龍津路都有一個特點,就係佢一定對住城門口嘅津樑,因為龍津意思係「聚龍通津」,即係指城門同城門津樑。以前喺九龍城寨真係有一個津樑,重係由風水佬睇過度過定,搵最正個龍氣位而定出嚟。龍津路亦係九龍城寨入面,最古老嘅街道。

想知多啲:龍津路_(廣州)

龍津道[編輯]

龍津道係寨城城牆拆咗之後,城入面嘅居民喺原來城基兩邊起屋,屋同屋同中間就變咗條路,就係龍津道。佢喺1951年形成,以前最盛行跳脫衣舞、開賭、販毒都喺晒呢度,經營呢啲嘢嘅人希望呢條路聚龍通津,所以就叫呢度做龍津道。

呢度以前重有麻雀館牌九檔、番攤館、狗肉檔同煙館。

東至西大路[編輯]

龍城路[編輯]

龍城路(Lung Shing Road)係同九龍城寨界外嘅東正道平行嘅一條路,佢北面路口就係喺正東頭村道南邊嘅行人道度,而南面入口係好隱蔽,因為佢啱啱係龍津道同龍津路之間,又夾住益華樓同東南樓,喺正個三叉口,如果係城寨出面望入去,龍城路就啱啱畀龍津路同龍津道隔住,城寨嘅人就將呢條路叫做龍城路,作為九龍城寨嘅代表,龍城就即係九龍城寨簡稱。

光明街[編輯]

光明街以前兩邊都係石屋同寮屋,由於呢度好多賣白粉(海洛英)嘅檔攤,呢啲檔攤都點好多蠟燭,畀啲道友追龍,所以成條街點晒啲蠟燭,啲人就叫呢條街做光明街,不過啲白粉道友就叫呢度做「電台」,因為啲道友叫食白粉做「上電」,所以啲白粉檔就叫做「電台」。

不過後期呢條街已經無晒啲白粉檔,改為做食品生產,其中最大有幾間造魚蛋嘅工場,另外重有啲做豬紅砵仔糕燒豬燒鴨嘅工場。

老人街[編輯]

老人街(Lo Yan Street)同光明街都係喺龍津道112號同114號之間,條街大概喺五十年代初形成,20年代有基督教團體喺嗰度起咗間老人院,之後啲人圍住間老人院起好多村屋,所以啲人叫呢條街做老人街,不過後期間老人院改咗做青少年活動中心。

由於老人院係由衙門改建,所以老人街有好多古蹟,其中有兩尊嘉慶七年嘅古炮最有代表性,老人院建築風格亦可以睇到有衙門嘅特色。以前呢條老人街亦係城寨入面唯一見到太陽嘅地方。間老人院係1987年政府清拆城寨時唯一保留嘅建築,重列咗做法定古蹟,即係九龍巡檢司衙門[8]

大井街[編輯]

大井街(Tai Chang Street)算係城寨入面其中一條最老嘅街,未有城寨就已經有呢條街。大井街因為有一個大井,所以叫大井街,而呢個井喺舊時係成個城寨最主要嘅食水來源。不過到咗二三十年代,因為霍亂,而又係最多霍亂菌嘅地方,全香港好多井都要封,不過大井街個井就去到五十年代先封,之後開始就改晒水喉供水。

西城路[編輯]

西城路,英文路牌係 West City Road,係城寨入面唯一一個路牌唔係用音譯做英文。顧名思義西城路之所以叫西城,係因為呢度係城寨最西嘅地方。呢度有好多潛建寮屋,好多人去到九龍城寨,第一樣嘢就係見到呢堆建築。

[編輯]

參考[編輯]

  1. 劉細良 (2017年3月4號). 寨文化符號學 - 04/03/17 不館 長版本. 喺2023年1月7號搵到.
  2. 港電台-鏗鏘集-城寨何存. 原著喺2020年8月6號歸檔. 喺2020年7月25號搵到.
  3. . 原著喺2008年1月31號歸檔. 喺2008年1月22號搵到.
  4. 港的道德公廁——"豬籠城寨". 原著喺2008年3月14號歸檔. 喺2008年1月22號搵到.
  5. (PDF). 原先內容歸檔 (PDF)喺2006年2月9號. 喺2008年1月22號搵到.
  6. re/report 8/index.htm 九龍寨城清拆事宜
  7. 浮城上的寨城互聯網檔案館歸檔,歸檔日期2005年2月11號,.)
  8. 九龍巡檢司衙門 互聯網檔案館歸檔,歸檔日期2008年1月31號,.康樂及文化事務署

[編輯]

  • 九龍城寨史話 三聯書店(香港)出版 ISBN 962-04-0682-6
  • 《九龍城寨》 作者:余兒

連出去[編輯]