香港島

呢篇文章講嘅係一個叫「香港島」嘅島。想搵香港嘅所有島，睇下【香港嘅島】。

香港島嘅夜景

香港島，簡稱港島，係香港主要嘅島，亦係香港第二大島，面積 78 平方千米。

島南嘅赤柱係香港開埠前嘅政治中心，後尾因為啲鬼佬唔習慣定居起又潮濕又大風嘅海岸，同埋嗰時赤柱一帶啱啱有場疫病，食水有少少污糟唔夠太多人用，土地又少，當地唔鍾意鬼佬風俗嘅華人又多。後尾改設島北域多利城（又叫做女皇城或維多利亞城，英文名Victoria）為英國殖民香港最早發展嘅地方，一直係香港嘅商業同政治中心。來香港嘅英國人同移居香港嘅華人，最初就係住響呢個城。香港島同九龍半島之間隔住個維多利亞港，個港係以前進出香港嘅貿易船隻停泊嘅港口。

島上面最高嘅山係太平山，海拔554米。

行政

香港島喺香港嘅位置（紅色部份）

香港島嘅行政分區有：

• 中西區
• 東區
• 南區（包括鴨脷洲）
• 灣仔區

註：香港島唔屬於離島區。

歷史

1841年1月20號，英國嘅中國商務代表（未獲清廷承認）兼皇家海軍軍官查理義律（Charles Elliot）最先佔領香港島。

地理

香港島係香港第二大島，排喺大嶼山之後。香港島面積約佔全香港面積嘅7%，同維多利亞港對岸嘅九龍半島相隔。

人口

2000年，香港島嘅人口有1,367,900人，約佔全香港人口嘅19%。人口密度每平方公里18,000，高過整體密度（7,000/km²）；加上九龍嘅人口共佔全港人口嘅47%。

交通

港鐵港島綫嘅路綫行港島北岸，來回上環同柴灣。香港電車行港島北岸，堅尼地城到筲箕灣。而島西端同南部交通主要係靠巴士服務。

香港山頂纜車係香港歷史最悠久嘅公共鐵路，來往山頂、半山區同埋中區。

跨海交通方面，香港島有3條海底隧道（東區海底隧道、紅磡海底隧道同西區海底隧道）同3條港鐵路線（東涌綫、荃灣綫同將軍澳綫），重有機場快綫連接香港島同九龍半島及新界。第5條連接嘅鐵路而家計劃緊（沙田至中環綫）。

連接香港島同鴨脷洲嘅鴨脷洲大橋喺1980年落成。

島內亦設有渡輪碼頭，有頻密嘅航班來往九龍同離島（包括馬灣、愉景灣、梅窩、坪洲、長洲同南丫島）。