香港巴士
.jpg)
_16-04-2019.jpg)
香港嘅巴士係香港主要公共交通工具之一，係目前香港每日載客量最多嘅公共交通系統，每日載客接近650萬人次[1]。
現況
[編輯]香港嘅巴士服務，大致分為3種：專營巴士、非專營巴士同埋公共小巴。
專營巴士服務
[編輯]截至2023年，香港有4間私營公司經營專營巴士服務，有接近700條巴士路線，係全球少數冇公營巴士服務嘅城市之一。
- 九龍巴士（1933）有限公司（九巴）
- 主要服務範圍包括九龍同埋新界區，經營402條九龍及新界區路線同埋過海路線。
- 城巴有限公司（城巴）
- 主要服務範圍係香港島，經營154條路線，包括72條港島區路線、32條北大嶼山同埋機場路線、50條過海路線，另有B3、B3A同埋B3X線來往屯門同埋深圳灣口岸。除此之外，城巴亦經營非專利巴士路線，例如沙田第一城巴士路線。
- 龍運巴士有限公司（龍運）
- 主要服務東涌、迪士尼樂園同埋機場來往新界嘅路線，總共有26條。
- 新大嶼山巴士（1973）有限公司（嶼巴）
- 主要服務大嶼山，經營20條路線，另有B2同埋B2P線，來往元朗/天水圍同埋深圳灣口岸。
香港專營巴士線擁有固定路線、收費、服務時間同埋班次。經營者受政府監管，唔使交汽油稅。市區路線多數以雙層巴行，成為香港嘅特色之一。乘客上車要先畀車錢，而所有專營巴士都接受八達通畀錢。有啲路線例如海底隧道路線、迪士尼樂園路線等會由多過一間巴士公司聯合經營。
非專營巴士服務
[編輯]香港嘅非專營巴士服務由唔同嘅私營巴士公司提供。主要為紓緩市民主要喺繁忙時間對專營巴士同埋專線小巴服務嘅需求，同埋喺一啲專營巴士同埋專線小巴行並唔符合營運效益嘅地區提供服務，應付乘客需求。根據運輸署公佈，截至2021年5月31號，已登記嘅非專營巴士有7,144架[2]。非專營巴士大致分為以下類別：
- 遊覽服務（A01）
- 即係「旅遊巴」，主要接載旅客往返旅遊地點。
- 酒店服務（A02）
- 由酒店開辦或者同巴士公司聯營，接載酒店顧客往返酒店。
- 學生服務（A03）
- 即係「校巴」，由學校開辦或者同巴士公司聯營，接載學生返學放學。
- 僱員服務（A04）
- 由個別機構開辦或者同巴士公司聯營，接載員工返工放工。
- 國際乘客服務（A05）
- 接載旅客往返酒店者或各個口岸。
- 居民服務（A06）
- 即係「邨巴」，主要喺返工放工繁忙時間，提供連接新界新市鎮同市區嘅長途輔助接駁服務；或者由屋苑又或者佢嘅管理公司同埋巴士公司聯營，主要接載乘客由居住屋苑往返主要交通交匯處。
- 複合交通服務（A07）
- 係一個特別類別，雖然喺法例上有定義，但並未有非專營巴士以呢類牌照營運[3]。
- 合約式出租服務（A08）
- 即係「包車」，以合約形式出租，提供巴士服務。
公共小巴
[編輯]香港嘅小巴（公共小型巴士）係載客量16人嘅冷氣載客車輛，作為巴士同埋鐵路嘅輔助同埋接駁交通工具。根據現時法例規定，全香港只有4,350架小巴營運。按服務性質可以細分為2種：紅色公共小巴同埋綠色專線小巴。
其他指定服務以外嘅公共小型巴士服務，例如喺1980年代中期曾經喺香港島學校區出現嘅褓姆車服務，都係非法嘅。
歷史
[編輯]
香港早喺第二次世界大戰前已經有公共巴士行[4]，喺1920年代，香港有多間巴士公司，包括九龍嘅九龍汽車公司（以下簡稱九巴）、啟德汽車公司、中華汽車公司（以下簡稱中巴），香港島嘅香港大酒店、香港仔街坊汽車等等，而香港電車亦曾經經營巴士服務。
戰前嘅香港巴士
[編輯]1933年6月11號，政府實行地區專利權，香港島路線由中巴營運，九龍及新界路線就由九巴營運。
1941年，日本軍隊入侵香港，由於燃油短缺，香港嘅巴士服務喺嗰段時間曾經一度陷入癱瘓。期間唔少巴士都俾日軍破壞或者被徵用，戰後巴士公司惟有用改裝車行。
香港巴士嘅黃金歲月
[編輯].jpg)
1949年，九巴將當時新買嘅4架丹拿CVG5（丹拿A型）雙層巴派去行1號線，呢4架巴士成為香港首批雙層巴（其中車牌4961嘅巴士俾九巴保留至今），亦為日後雙層巴嘅普及化打下基礎。
隨住香港人口增長，當時香港2大巴士公司九巴同埋中巴不斷自英國買入雙層巴，喺1960年，往來荃灣市區同埋九龍佐敦道碼頭嘅16B線改用雙層巴行，成為新界首條採用雙層巴嘅路線。1962年，中巴亦都買雙層巴。
但好景不常，1967年，香港發生暴動，巴士公司由於人手唔夠被逼暫停營運旗下路線（部分路線喺六七暴動後冇開返）。
新市鎮開發，提高巴士重要性
[編輯]暴動過後，香港巴士服務喺1968年已大致回復正常。同時，香港兩大衛星城市－－荃灣同埋觀塘亦已發展成熟，有見及此，九巴喺1968年5月9日開辦往來荃灣市區同埋觀塘嘅40號線。
不過，正因為暴動期間巴士服務癱瘓，結果令白牌車（即係日後的綠色專線小巴同埋紅色公共小巴）地位提高。
一人控制同埋過海巴士
[編輯]以往，香港嘅巴士除咗司機之外，一般都設有司閘員同埋售票員，早喺1960年代，九巴已經淘汰司閘員，並為巴士安裝自動閘門[5]。1971年，中巴試行一人控制管理辦法，乘客上車後要將車錢掟落錢箱。
1972年8月，香港首條過海隧道——紅磡海底隧道通車。九巴同埋中巴開辦3條過海隧道巴士路線，佢哋分別係：
由於當時英國出現巴士車廠工潮，香港巴士出現求過於供嘅現象，喺1972年9月1號前，103號線係由九巴獨營。
當時過海巴士收$1，過隧道後收$0.5。而往來荃灣同埋觀塘嘅40號線收費就係全程過海巴士嘅20%（即係$0.2）。
1973年，九巴同埋中巴自英國引入丹拿珍寶雙層巴，呢個係香港第一款全駕駛艙雙層巴。
1973年，喺大嶼山嘅三間巴士公司合併成新大嶼山巴士（1973）有限公司。公司喺1974年4月1號取得經營大嶼山巴士服務嘅專營權，成為香港第3間專利巴士公司。
豪華巴士、三軸巴士同埋冷氣巴嘅興起
[編輯]早喺1970年代，香港已經有豪華巴士，當時豪華巴士服務來往機場同埋市區嘅200同埋201號線，此外巴士公司為鼓勵中產人士搭巴士，更開辦唔少來往大型屋苑同埋市中心嘅巴士路線（例如來往美孚新邨同埋尖沙咀嘅206號線），雖然呢啲豪華巴士冇冷氣，但佢哋有高背座椅，相對於當時流行嘅玻璃纖維座椅，呢啲巴士就顯得非常豪華。
1980至1981年，九巴引入利蘭勝利二型及丹尼士祖比倫冷氣巴各一架，但最後試驗失敗而改裝成冇冷氣。
1981年，九巴同埋中巴分別向英國都城嘉慕威曼巴士廠買12米3軸巴士，佢哋係香港3軸巴士嘅先驅，亦係12米巴士嘅始祖。自此之後，3軸巴士成為香港巴士嘅最大特色。
1984年，當時以經營中港直通巴士為主嘅城巴率先買入12米雙層冷氣巴，呢個就係香港首架後置引擎雙層冷氣巴。
1985年，九巴為取代年事已高嘅豪華巴士，特登買丹尼士獵鷹冷氣巴行豪華巴士路線。
1987年，九巴買入豐田Coaster 24座冷氣小巴，主要行沿途路窄多彎嘅90號線、290線（來往調景嶺同埋彩虹）同埋部份豪華巴士線。
1988年6月，一架九巴雙層冷氣巴（利蘭奧林比安，AL1，車牌DX2437），亦係全球首架以同一引擎推動冷氣系統同埋驅動系統嘅雙層冷氣巴，以試驗形式行走來往美孚新邨同埋尖沙咀嘅6號線，自此之後九巴就開始大量買入雙層冷氣巴。但第一條有雙層冷氣巴行嘅路線並唔係6號線，而係來往中秀茂坪同埋尖沙咀嘅1A線。呢架車行到2005年8月至退役。
1993年9月1號，中巴其中26條路線嘅經營權俾政府收返，路線改由城巴營運。城巴喺1995年9月1號再取得中巴14條路線嘅經營權。
自1995年起，各間巴士公司都唔再買冇冷氣嘅巴士。
低地台巴士普及化同埋中巴時代終結
[編輯]1996年，城巴買入多架富豪B6LE低地台巴士，佢哋係香港首批低地台巴士。同年，九巴買入丹尼士飛鏢單層低地台巴士，並將佢哋派去行60M（來往屯門市中心同埋荃灣地鐵站）、88K（來往火炭駿洋村同埋平田）
）等線。
1997年7月，有一架15米Neoplan Megashuttle樣辦車運到香港，睇下15米車可唔可以喺香港行，架車先後畀咗九巴同埋城巴試。不過香港政府唔畀長過12米嘅巴士攞牌，架車喺1999年返咗德國。
1997年11月17號，九巴買嘅第一架丹尼士三叉戟低地台雙層巴投入服務。
1997年，中巴拒絕引入八達通收費模式。
1998年2月17號，政府宣佈唔延續中華汽車有限公司（中巴）嘅專營權，十幾條路線改由城巴接辦，88條路線公開招標；同年3月31號，政府宣佈新世界第一巴士（新巴）投到嗰88條路線。9月1號凌晨，中巴專營權正式結束，城巴同埋新巴順利接棒。
1998年3月24號，城巴將旗下剩低嘅冇冷氣巴士退役，成為第一間轉全冷氣嘅專營巴士公司。
1999年，城巴俾英國Stagecoach Group收購。2003年，新世界第一巴士母公司周大福收購城巴，結束香港島巴士10年嘅競爭。
2002年8月18號，新巴最後兩架冇冷氣巴士退役，成為第二間轉全冷氣嘅專營巴士公司。
2003年7月10號朝早，香港一架行緊來往麗瑤邨同埋天恆邨嘅九龍巴士265M線雙層巴喺屯門公路往落馬洲方向俾貨櫃車推埋路邊，冇幾耐之後跌落幾十米山坡，車長同埋20名乘客死咗，20名乘客受傷，成為香港史上最多人死嘅車禍。（屯門公路雙層巴士失事）
歐盟四型/歐盟五型巴士推出同埋冇冷氣巴士絕跡
[編輯]2006年，九巴引入兩架符合歐盟四型廢氣排放標準嘅新款低地台巴士，分別由瑞典富豪同埋英國亞歷山大丹尼士生產。自2007年起，城巴、新巴、九廣鐵路公司同埋嶼巴相繼買入歐盟四型巴士。2009年初，九巴將2006年引入嘅亞歷山大丹尼士歐盟四型巴士改裝成歐盟五型巴士。
2009至2010年，九巴同埋城巴由亞歷山大丹尼士同埋富豪車廠接收總共五架兩軸雙層巴士，係香港嘅專利巴士公司二十年嚟第一次接收兩軸雙層巴士。其後兩間巴士公司都有加訂亞歷山大丹尼士兩軸雙層巴士。2014年VDL亦提供一架VDL DB300兩軸雙層巴士畀九巴。
隨住九巴剩低嘅冇冷氣巴士車齡越嚟越高，九巴淘汰冇冷氣巴士嘅程序喺2010年代初去到尾聲。2011年底，九巴喺其中一架冇冷氣巴士貼上「再見熱狗巴士（2012）」嘅廣告，隨後亦有幾個巴士迷組織喺第二啲冇冷氣巴士賣形形式式嘅送別廣告。2012年5月9號凌晨九巴最後一班冇冷氣巴士喺16線開出之後，九巴剩低4條有用冇冷氣巴士行嘅巴士線（5A、16、93K、98A）都改晒做全冷氣，自此香港再冇冇冷氣嘅專營巴士行[6]。
2013年初，九巴自中國大陸公司比亞迪汽車引入一架K9A電動單層巴士，係全香港第一架全電動專營巴士，架車喺同年9月開始做運作試驗一個月，年底退返畀車廠。
2014年，香港嘅專利巴士公司引入12.8米長嘅雙層巴士同埋12米長嘅柴油/電力混合動力雙層巴士嚟試驗。2015年2月，九巴落實大量引入12.8米雙層巴士。
參考
[編輯]- ↑ 〈香港便覽—交通〉 (PDF)。原著 (PDF)喺2006年9月3號歸檔。喺2008年5月29號搵到。
- ↑ 〈運輸署 - 非專營巴士〉。www.td.gov.hk。喺2021-06-28搵到。
- ↑ 〈運輸署－非專營巴士介紹〉。原著喺2021-04-21歸檔。喺2010-04-10搵到。
- ↑ 愛港識港從閱讀開始 - 巴士見證香港成長路 互聯網檔案館嘅歸檔，歸檔日期2014年10月18號，.，明報，2013年7月16日
- ↑ 陳志華、李健信 (2011年7月)。《香港巴士90年》 (中文)。香港：香港中華書局。頁 第58頁。ISBN 9789888104512。
{{cite book}}:|access-date=requires|url=(help) - ↑ 服務63年「熱狗巴」駛進歷史 互聯網檔案館嘅歸檔，歸檔日期2020年5月22號，. 《東方日報》 2012年5月7日報導
參閱
[編輯]連出去
[編輯]