香港自治運動
提示：呢篇文講嘅唔係香港獨立運動。
香港自治運動（英文：Hong Kong Autonomy Movement），亦稱為香港城邦自治運動（英文：Hong Kong City State Autonomy Movement）係香港城邦派所推動嘅政治運動，理念係基於香港學者陳云根所編著嘅《香港城邦論》，認為香港係「華夏文化圈」中嘅城邦。香港自治運動主張香港喺《基本法》同一國兩制嘅大前提下，應該享有真正嘅自治[1]權利，並唔主張香港獨立[2]；成日以直接行動，舉辦研討會，網上論述，報章投稿等方法來推動本土意識。
香港自治運動曾舉辦十幾次研討會，並編輯實體刊物龍獅報，參與嘅學者、文化人同政界人士包括前灣仔區議員金佩瑋、黃英琦、孔誥烽、陶傑、莫乃光、范國威、毛孟靜、周兆祥、譚得志、台灣台北市長柯文哲嘅競選辦公室主任蕭亞譚等。香港學者陳雲本來係為運動嘅參與者及顧問，但喺2013年6月13號，香港自治運動宣布同陳雲終止合作關係[3]。
目標
[編輯]
- 普選行政長官以及立法會議員。
- 香港政府制定政策時，以香港人需要及長遠利益為依歸。
- 規劃長遠房屋及土地政策，畀香港人安居樂業。
- 重振香港工業，復興香港農業。
- 重新制定移民政策，收回中國大陸移民審批權。
- 檢討基本法行憲以來之得失，完善憲政。
- 捍衞香港城邦。拒絶宜居灣等大陸化政策，以及德育及國民教育科之洗腦教育。
- 制定香港語言政策，捍衛香港文化。
- 檢討貨幣本位與金融政策，鞏固財政主權。
徽號
[編輯]龍獅香港旗係香港自治運動嘅代表旗幟，旗幟構圖帶有英國管治時期嘅香港盾徽，但係去除代表聯合王國嘅米字旗。城邦派好鍾意舉呢面旗幟。
背景
[編輯]
2011年5月底，香港學者陳雲撰文指出六四事件啟動咗香港人對中國嘅驚恐（China Fear），而且泛民主派一直以嚟提出「民主抗共論」，但係五區公投令香港民主運動進程受挫，民主黨因為「大中華情意結」，除咗口頭上支持「建設民主中國」同「平反六四」，行動上就未能夠以香港本土利益為先，等同投向中國共產黨[4]。陳雲話：「中共不會害怕一群向它哀求民主的港人，它現在變得更高傲了，連敷衍也懶得做。」佢認為冇香港自治嘅目標，香港人唔會睇到希望，香港嘅民主運動唔會有持久力，並且話香港要準備好自治嘅決心，鞏固香港嘅政治底盤[4]。5月30號，網民喺社交網站Facebook成立「香港自治運動」專頁。
陳雲話，中港矛盾不斷激化，主要係由於北京不斷開放陸客自由行，喺教育方面企圖推行國民教育，抹殺港英殖民時期嘅歷史同制度，令好多香港人感到一國兩制變質。北京會將以前殖民政府留低嘅文明，或者殖民政府保存到一啲華夏文化，例如廣東話嘅漢音以及正體字，以及良好、文雅嘅公共用語，呢啲慢慢會當係前朝歷史，或者當作殖民地餘孽來掃除。甚至三權分立、司法獨立、人權法呢啲由殖民政府引入香港嘅現代嘢，都會當成外來嘅殖民霸權，逐漸淡忘，承接中國共產黨或者蘇維埃嘅體制。佢話，中共承諾但唔容許港人治港、香港擁有高度自治，因此預期未來中港矛盾將會激化。佢話：如果香港人唔反抗，國際社會唔監察嘅話，香港會走向一國一制，即係走向非法嘅中國殖民統治，呢個要睇香港人能否覺醒同反抗，爭取普選及抗拒中共一切違反《香港基本法》嘅干預，因為香港嘅《基本法》寫得好明確，亦算係相當好嘅一部小憲法、鬥爭或者抗爭嘅基礎其實係存在嘅[5]。
Facebook網頁被攻擊
[編輯]2015年3月4號，香港自治運動嘅原Facebook 網頁「香港自治運動－龍獅香港旗」唔見咗，香港自治運動指係受到攻擊以至「unpublished」，但資料已有士啤[6]；同日並重開新Facebook 網頁「香港自治運動 HKAM」運作。亦有人指出同一段時間內有好幾個同港中矛盾有關嘅Facebook網頁都唔見咗[7]。
評價
[編輯]組織
[編輯]支持人士
[編輯]參考
[編輯]- ↑ 香港自治運動刊物龍獅報：香港民族，命運自決
- ↑ 「HKAM 確係從來都冇正式提(倡)#香港獨立，但亦從來沒有反對香港獨立。」
- ↑ 香港自治運動Facebook專頁公告與陳雲終止合作關係
- ↑ 4.0 4.1 香港自治運動 － 龍獅香港旗Facebook專頁
- ↑ 香港年終回顧: 中港矛盾激化, 美國之音, 2013年02月10日
- ↑ 香港自治運動聲明
- ↑ 「近日多個 fb 專頁被極權 facebook 無理 unpublish 或 remove」/ 「「屯門人屯門事」都出左事」
- ↑ 〈文匯報 - 劉夢熊 - 指點江山：楊甦棣策動「香港自治運動」包藏禍心〉。原著喺2015年9月20號歸檔。喺2014年5月21號搵到。