香港宗教

出自維基百科,自由嘅百科全書
跳去: 定向搵嘢

香港宗教相當多元化,宗教自由係香港居民享有嘅基本權利之一,受到《基本法》同有關法例保障。香港並存唔同嘅宗教,例如佛教道教孔教天主教基督教伊斯蘭教印度教錫克教猶太教,都擁有唔少信眾。好多主要宗教團體除咗弘揚教義之外,重會興辦學校同提供衞生福利設施等。

佛教[編輯]

佛教係中國嘅主要宗教之一,佛教主要節日係農曆四月初八嘅佛誕,並且係香港公眾假期之一。香港而家有超過100萬佛教信徒同幾百個佛教團體。佛教徒禮敬釋迦牟尼佛、觀音(大慈大悲觀世音菩薩),同埋其他諸佛菩薩

大嶼山嘅寶蓮寺以起喺戶外嘅青銅天壇大佛著稱。天壇大佛莊嚴宏偉,相信係全球最大嘅青銅坐佛。每逢周末同假期,都有唔少遊人到訪。此外,座落於九龍鑽石山嘅志蓮淨苑,係仿照唐代建築模式興建嘅寺院建築群,亦係香港著名嘅佛教廟宇之一。

香港規模最大嘅佛教團體係香港佛教聯合會,喺1945年成立,除咗以弘揚佛教信仰同文化為宗旨之外,亦積極推動慈善同社會福利事業,包括提供醫療、幼兒照顧、青少年同安老服務。

道教[編輯]

道教係中國土生土長嘅宗教,主張清靜無為,崇尚自然。道教有超過二千年悠久歷史,喺香港嘅信徒達到100萬人,道堂宮觀超過300個,其中大部分都係對外開放。

道教信徒尊太上老君為道祖,佢嘅誕辰係每年農曆二月十五,而每年三月嘅第二個星期日就係「道教日」。

香港原本係漁港,其後發展成為商港,可以話一向依賴海洋為生。因此香港最多人信奉嘅神明,都同海洋同氣候有關,例如天后娘娘係水上人嘅守護神。香港嘅天后廟以大廟灣佛堂門嘅一間歷史最悠久同最出名。著名嘅廟宇重包括位於九龍黃大仙區嘅黃大仙祠、位於新界沙田嘅車公廟,同埋位於港島荷李活道嘅文武廟等。

香港道教聯合會喺1961年成立,由主要道堂宮觀同道教人士組成,經常舉辦宗教文化同社會公益活動,推廣道教信仰。香港嘅道教團體除咗進行宗教文化交流外,都非常重視公益事務,特別係教育、社會服務同慈善事業。

孔教[編輯]

孔教係宣揚以孔子教誨為基礎嘅宗教、倫理同哲學思想。教誨以道德倫常為本,強調傳統同禮制嘅重要作用。孔教儒家思想對中國歷代學術、政治、經濟同社會制度影響深遠。孔教學院1930年喺香港創立,致力推動將孔教思想列入小學、中學同大學嘅課程之內。由孔教學院創辦嘅中小學校,亦將孔教義理列入教學課程之中。而喺教育事業之外,孔教學院亦舉辦唔同嘅社會服務,例如:「長幼融融樂繽紛」等,推廣安老護幼嘅思想。

其他孔教組織有香港孔教總會同孔聖堂等。2014年開始,香港特區政府將每年九月第三個星期日定為「孔聖誕日」,以慶祝孔子嘅誕辰。孔教嘅主要節日係農曆八月廿七嘅孔聖誕辰同農曆四月初二嘅孟子誕。

羅馬天主教[編輯]

羅馬天主教會1841年喺香港設立傳教區,並喺1946年將香港升格為教區。香港大概有37.9萬名天主教徒,為天主教徒服務嘅聖職人員有司鐸、修士同修女。全香港共有52個堂區,包括40間教堂、31間小教堂同26間禮堂。彌撒聖祭以粵語進行,亦有有五分之三嘅堂區亦會用英語,有時亦採用菲律賓語。天主教香港教區設有本身嘅行政組織,並同教宗同埋各地教區保持密切聯繫。

香港嘅天主教學校同幼稚園,辦學工作由天主教教育事務處協助推行。香港明愛係統籌天主教香港教區各項社會福利服務嘅組織,為所有人士,無論係唔係天主教徒,提供各類服務。教會開辦嘅醫療同社會服務機構包括:醫院、診所、社會及家庭服務中心、宿舍、安老院、康復服務中心等,重有多個自助會社同協會。

基督教[編輯]

基督教係香港嘅歷史可以追溯到1841年,現有信徒大概48萬,會堂達到1,450間,大小宗派達到70個。除咗唔少本土宗派之外,大部分主要國際宗派同前傳教機構都喺香港設有基督教組織,包括基督復臨安息日會聖公會浸信會宣道會播道會信義會循道衞理聯合教會五旬節宗同救世軍

基督教團體積極參與香港嘅教育、醫療同社會福利工作。基督教團體開辦咗唔少教育機構,亦開辦醫院、診療所同綜合社會福利機構包括社區服務中心、兒童院、老人服務中心、服務弱智、殘疾、吸毒等人士嘅復康中心、醫院院牧事工同營辦營所。香港嘅基督教傳播、影音同藝術事工包括基督教出版社、書室、每星期出版嘅《基督教週報》同《時代論壇》,同埋電視同電台節目。

香港有兩個主要基督教團體,負責促進基督教會之間嘅合作。香港華人基督教聯會嘁1915年成立,而家有屬下教會超過360間。香港基督教協進會喺1954年成立,成員包括各大宗派、各基督教服務機構,同埋香港同東南亞正教會,致力促進香港、內地同海外各教會之間嘅聯繫,並通過輔助機構為廣大市民服務。

伊斯蘭教[編輯]

香港大概有伊斯蘭教徒30萬人,其中五萬人係華人、15萬人係印尼人、三萬人係巴基斯坦人,其餘係來自世界各地嘅教徒,當中包括來自中東各國嘅教徒。伊斯蘭教徒日常前往禱告嘅清真寺主要有五座,分別位於港島中區些利街、灣仔愛群道、柴灣歌連臣角同九龍彌敦道;另有一間清真寺設於赤柱監獄裏面。些利街清真寺係香港最古老嘅清真寺,喺1849年建成,之後喺1915年重建,可以容納會眾400人。九龍清真寺暨伊斯蘭中心可以容納大概3,500名教徒參加禮拜,而愛群道清真寺暨林士德伊斯蘭中心就可以容納會眾700至1,500人。

中華回教博愛社係代表香港華人伊斯蘭教徒嘅主要團體,為華人伊斯蘭教徒舉辦宗教活動同開辦學校。香港回教信託基金總會就負責統籌香港所有伊斯蘭教嘅活動,並管理香港所有清真寺、兩個伊斯蘭教墳場同一間幼稚園,同埋為喺香港供應嘅清真嘢食進行認證。香港嘅伊斯蘭教團體提供各種慈善服務,包括向有需要嘅人士提供經濟援助、醫療同助學等。

印度教[編輯]

香港大概有十萬名印度教徒來自印度尼泊爾新加坡泰國同其他亞洲國家。佢哋嘅宗教社交活動,主要喺跑馬地嘅印度廟舉行。印度廟由香港印度教協會管理,教友可以喺嗰度冥想、靈修、練習瑜伽、參加社群活動同重要節日慶典,例如亮光節同鎮邪節等。每逢星期日上晝,印度廟度都有聚會,內容包括宗教音樂演奏同講道。星期日聚會之後同星期一夜晚,教徒可以免費享用飯餐。

印度教徒嘅訂婚同結婚典禮,可以根據《婚姻條例》喺廟內用印度教嘅風俗禮儀舉行。印度廟提供嘅其他主要服務,重有主持殯殮儀式、安排火化同有關事務。印度廟亦負責管理歌連臣角火葬場嘅印度火葬。

錫克教[編輯]

香港大概有一萬二千名錫克教徒。香港嘅錫克廟位於灣仔皇后大道東,目前被列為二級歷史建築,由註冊慈善機構Khalsa Diwan管理。錫克廟嘅特色,係任何信仰嘅海外旅客,都可喺錫克廟免費用膳同短期居留。

錫克廟每日朝早同傍晚舉行崇拜,而每逢星期日同主要神誕,錫克教始祖納那大師嘅信徒都會喺廟內舉行大型聚會。錫克教最重要嘅節日,包括祖師納那大師同第十位宗教教師高賓星大師嘅誕辰,同埋人日(所有錫克教徒嘅誕辰)。

喺香港揸電單車嘅錫克教徒,可以根據《道路交通(安全裝備)規例》(第374章, 附屬法例F)第3同第10條,因為宗教理由向運輸署申請豁免佩戴電單車頭盔

猶太教[編輯]

香港嘅猶太人社區建立喺19世紀40年代,教徒來自世界各地,喺三個主要嘅猶太教會堂聚會。莉亞堂(傳統派)喺每日、安息日同節期舉行聚會;香港聯合猶太會(改革派)亦喺安息日同節期舉行聚會。呢兩個會堂都係位於港島羅便臣道嘅同一座大廈。位於港島麥當勞道嘅Chabad Lubavitch每日都有聚會。

莉亞堂附近有一座住宅樓宇,裏面設有猶太教社區中心,為三大教派共400個家庭會員提供猶太餐、宴會同文娛康樂設施,中心亦營辦一個猶太食品超級市場,並舉辦各類活動同學習班。中心入面重設有圖書館,專門收藏有關猶太文獻同文物嘅資料。呢間中心已經成為猶太人舉行社交文化活動嘅主要場所。

睇埋[編輯]

出面網頁[編輯]