香港節日

出自維基百科,自由嘅百科全書
Jump to navigation Jump to search

香港節日好多都充滿歡樂色彩,熱鬧又精采,傳統節慶活動例如有:舞龍舞獅、飄色巡遊、賽龍舟、舞火龍、神功戲、祈福許願等。

傳統節日[編輯]

農曆新年[編輯]

喺香港過農曆新年,一樣能夠感受到唐式傳統節日嘅喜慶氣氛,可以行年宵花巿、食賀年美食、去廟宇參拜等,亦有國際時尚嘅花車巡遊、光雕匯演,傳統喜氣嘅維港煙花,特色地道嘅許願節、賀歲賽馬等,各式慶典熱鬧上演。

元宵節[編輯]

元宵節(農曆正月十五日)係唐人嘅情人節,香港每年都會喺唔同地區嘅公園或公共休憩用地舉行元宵綵燈晚會。到咗夜晚,唔少家庭或者情侶,都會去花燈會去慶祝,賞花燈、猜燈謎,處處洋溢住濃濃嘅唐人情人節浪漫氣氛。

車公誕[編輯]

車公誕喺每年嘅農曆新年初二或初三,好多善信都會去到沙田車公廟轉風車、拜祭,祈福許願。

相傳,車公係宋朝(公元960至1279年)一位大元帥,曾平定華南一場叛亂。南宋末年,宋帝昺南下避難,車大元帥一直護駕到香港,並駐守西貢。後來獲道教奉為神明,並立廟供奉。

洪聖爺誕[編輯]

洪聖爺誕(農曆二月十三)係紀念洪聖大王嘅節日。相傳洪聖大王係唐朝重臣,姓洪名熙,官至番禺刺吏,通曉天文地理,常幫助商旅漁民;據講,佢死後英靈不滅,屢次拯救人民於災難。為咗紀念佢並祈求庇蔭,沿海漁民起廟祀奉,將佢奉為海神。

洪聖爺誕到新界上水、有逾800年歷史嘅河上鄉去,最能夠體驗香港嘅地道鄉村節慶文化。洪聖誕慶典當日,河上鄉有飄色巡遊匯演、大型盆菜宴、粵劇同埋搶花炮儀式。

清明節[編輯]

拜祭祖先,係東方人幾千年來嘅傳統習俗。喺清明節,孝子賢孫會去到先人嘅墓前拜祭,清除雜草同供奉生果,以表示對先人嘅尊敬。香港大部分墳地墓園都有公共交通連接,清明節當日更有特別加班服務嘅安排。

天后誕[編輯]

內文: 天后誕

天后誕喺農曆三月廿三,香港嘅漁民人數越來越少,但係海上守護神天后娘娘仍然廣受擁戴。每年天后誕,香港各區70幾座天后廟都有慶祝活動,其中以元朗花炮會景巡遊同西貢大廟灣慶典最受矚目。

相傳天后姓林名默,自幼就有預測天氣嘅特殊本領,喺海難中救人無數,過去香港沿海鄉民同漁民都起廟供奉佢,以祈求風調雨順,漁獲豐收。

長洲太平清醮[編輯]

內文: 長洲太平清醮

長洲太平清醮喺農曆四月初五至初九,係香港獨有嘅民間節慶,歡騰又充滿地道色彩。節慶期間,島上居民全情參與,舞龍舞獅鑼鼓喧天,其中「搶包山」比賽同飄色會景巡遊係主要亮點。

由於獨一無二嘅搶包山,長洲太平清醮又叫做「包山節」,「醮」意思係祭祀活動。相傳清朝中葉長洲瘟疫為患,居民向北帝神祈福,並奉北帝神像遊行,疫症至消除。今日,長洲太平清醮唔單只係國家級非物質文化遺產,更獲美國《時代週刊》雜誌網站選為「全球十大古怪節日」之一。

佛誕[編輯]

佛誕喺農曆四月初八,每年佛誕,全香港佛堂寺廟都有禮佛慶典同浴佛法會,其中以大嶼山寶蓮禪寺嘅活動最盛大。佛誕又叫「浴佛節」,相傳佛祖出世嘅時候,天上有九條龍噴下清泉為佢沐浴,所以日後佛誕都有呢個儀式。今日善信會以香湯沐浴佛身,寓意以佛祖嘅智能,洗滌污濁,淨化心靈。同樣蘊藏禪理嘅重有賀誕嘢食蒝荽餅,餅味帶甘苦,寓意人生苦盡甘來。

譚公誕[編輯]

譚公誕喺農曆四月初八,每年譚公誕香港多座譚公廟都有賀誕活動,其中筲箕灣譚公廟嘅慶典,規模最大亦最有睇頭。

譚公係海上嘅守護神,相傳佢係元朝惠東歸善人(而家廣東惠州),12歲得道,能夠呼風喚雨、預測天氣同幫人醫病,所以俾漁民奉為神明。走進譚公廟,會發現譚公嘅塑像竟然係細路嘅樣。相傳係因為佢年少得道,練成長生不老之術,即使年屆80仍然能夠保持孩童嘅容貌。

端午節[編輯]

端午節喺農曆五月初五,端午節唔單止係唐式傳統節慶,重可以係熱鬧嘅體育盛會。

端午節係紀念戰國時期楚國賢臣屈原嘅節日,佢為咗力諫君主而自溺於汨羅江。傳說鄉民喺江上爬龍舟找尋屈原嘅遺體,不斷敲鑼擊鼓嚇走魚群,並且將投入江中,以免魚蝦啄食佢嘅遺體。自此以後,爬龍舟同食糭成為咗端午節嘅習俗。

端午節前後,香港多個沿海地區都會奉行傳統習俗,舉行龍舟競渡活動。呢項充滿民間色彩嘅節慶,近年已經發展成為國際化嘅體育運動,令到賽事更具觀賞趣味。

端午節期間,好多香港市民除咗品嚐應節嘅糭,亦會暢泳於碧波之中,泡泡寓意吉祥嘅「龍舟水」,藉此感受節日氣氛。

關帝誕[編輯]

關帝係三國時代(公元220至280年)嘅歷史人物,係正義同忠烈嘅象徵。位於香港荷李活道嘅文武廟,供奉關帝(武帝)同文昌帝(文帝),而每年嘅關帝誕(農曆六月廿四),文武廟都會有相關嘅拜祭儀式。

盂蘭節[編輯]

盂蘭節係唐人傳統祭祖嘅節日之一,香港人俗稱「鬼節」,喺當日啲人通常會祭祀祖先,教育子孫後代要孝敬父母,善待親人。此外,因為傳說農曆七月鬼魂可以來到人間,部分市民會喺路邊焚燒紙錢香燭以超渡遊魂。

喺這個月裡,香港各區嘅公園、廣場或球場多數會舉辦盂蘭勝會,其中以喺銅鑼灣維多利亞公園舉辦嘅潮人盂蘭文化節最為盛大。此外,各區嘅神功戲表演同樣不容錯過。神功係指為神做功德嘅意思,因為慶祝神誕或配合打醮等活動而上演嘅戲曲所以叫做神功戲。一般神功戲會喺臨時搭建嘅竹棚上演,以便人神共樂。

過去潮籍人士由中國內地移居到香港嘅時候帶來咗盂蘭勝會嘅傳統,今日已經有百幾年歷史。佢哋所辦嘅盂蘭勝會,由農曆七月初一舉行,一直到七月底,活動包括祭祀、燒紙錢、派平安米、福物競投、神功戲演出等。2011年,香港潮人盂蘭勝會更被列入第三批《國家級非物質文化遺產名錄》之中。

中秋節[編輯]

中秋節喺農曆八月十五,係圓人團圓嘅佳節,香港人跟親朋好友歡聚、賞花燈之餘,重會品嚐口味多元化嘅月餅。呢啲熱鬧溫馨嘅活動,為不朽嘅傳統添上新意同活力,亦帶來地道嘅中秋色彩。

中秋期間,全香港多處都會舉行中秋綵燈會,畀旅客同市民歡聚同慶佳節。其中以維多利亞公園嘅中秋綵燈會規模最大,豐富節目包括綵燈展覽、傳統技藝表演、遊戲攤位同燈謎競猜等。

香港出產嘅月餅,除咗傳統嘅蓮蓉口味,重有千變萬化嘅口味,有世界首創嘅冰皮月餅,重有充滿地道風味嘅芝麻豆花、香滑奶茶、雪糕月餅、軟心餡料嘅流心月餅、名貴嘅黑松露菌月餅、法國鵝肝月餅等。著重健康飲食嘅,重可以選擇低糖月餅。

重陽節[編輯]

重陽節喺農曆九月初九又叫秋祭,係唐人憑弔先人、敬老尊賢嘅傳統節日。據講,登高呢個習俗源自漢代(公元前202至公元220年),當時有一位相士對鄉民桓景話,喺農曆九月初九,佢一定要帶佢嘅家眷到鄉郊嘅最高處暫避災禍。結果成條鄉村經歷咗一場浩劫,而佢亦因為登山而倖免於難。自此,後人效法登高之舉,成為習俗。

今日,喺重陽節當日,有啲香港人會全家帶住香燭果品同糕點登高掃墓,亦有市民會趁住秋高氣爽之際去登高。

冬至[編輯]

俗話有話:「冬大過年」,對唐人來講,除咗農曆新年,冬至可以話係最重要嘅傳統節日。冬至係二十四節氣之一,起源同東方人嘅陰、陽觀念有關。冬至係一年之中晚間時間最長嘅一日,而唐人相信呢日正喺陰寒本性最強烈嘅時候,但係亦代表「陽」嘅光明同溫暖將逐漸取代「陰」嘅極寒本性,因此,冬至係一個協調同和諧嘅歡樂時刻。

今日,喺冬至當晚,香港市民都會同親友好好食一餐豐富嘅晚飯、食湯丸應節,共聚天倫。

西方節日[編輯]

復活節[編輯]

喺眾多西方節日之中,除咗聖誕節,復活節亦係香港嘅公眾假期。香港市民會趁住呢幾日假期,以唔同嘅方式輕鬆一下。好多餐廳又會推出復活節嘅主題菜單,麵包舖、蛋糕舖更會精心烘製可愛嘅白兔、雞仔造型包點,維妙維肖。

萬聖節[編輯]

每年10月,香港搖身變成「萬聖狂歡之城」。盛大多樣嘅萬聖節活動、熱鬧逗趣嘅節日氣氛、驚喜十足嘅美食。着上奇裝異服,投身蘭桂坊嘅鬼魅派對,一家大細玩轉香港主題樂園,瘋玩節日限定活動,盡情搞怪同樂。

聖誕節[編輯]

十二月聖誕節維港兩岸嘅摩天大樓、大街小巷掛滿創意燈飾,華麗亮眼。重會有旅遊景點嘅節日主題活動、商場嘅減價優惠同餐廳嘅聖誕大餐。

出面網頁[編輯]