月餅

出自維基百科,自由嘅百科全書
跳去: 定向搵嘢
月餅一個

月餅中秋節主要食品,意謂團圓。月餅起源,民間有唔同講法。一個講法係唐太宗八月十五出征突厥,凱旋而歸,得一圓餅。太宗大喜,指住個笑住講:「應將胡餅邀蟾蜍」。之後就同文武百官一齊食,從此,就有中秋節食月餅嘅習俗。另一講法係唐明皇遊月宮時,食咗嫦娥款待嘅仙餅後,回宮命人製成。另外有傳說,末人民反抗統治,月餅裏面夾紙條傳遞通風報信。

不過文獻記載,月餅最早出現響南宋時候,之不過當時月餅同中秋節一啲關係都冇,只不過係一種蒸餅拎來賣咁。月餅真正同中秋節拉上關係喺明代。當時北京城內出現咗一種以果做餡嘅月餅。之後人人響中秋節呢一日自己整月餅,用來自用同送畀親朋戚友,以表達團圓祝賀之意。嗰陣時月餅大小同形狀個個都好唔同,差別好大,製作名堂多兼得意,好似有專供男人食嘅月牙月餅,只限女人食嘅葫蘆月餅,重有特別為後生仔準備嘅「孫悟空」、「兔兒爺」之類嘅月餅等,名目繁多,不一而足。到咗近代,月餅有人手亦用機器幫手整,品種亦日益豐富。

款式[編輯]

而家嘅月餅係商品,款式好多,例如有冰皮月餅、雙蓮茸奶黃金華火腿五仁咁。不過,最正宗都係蓮子茸。舊時月餅會落好多糖同豬油,近年講求健康,轉用植物油,又落少啲糖。

傳統餅皮月餅[編輯]

傳統餅皮月餅會用麵粉糖漿生油鹼水溝埋搓,為咗令餅皮軟硬度啱,都會將新舊餅皮一齊搓。餅皮之後會包餡,標準大細係直徑三寸二,高一寸六,重四兩,焗出嚟啡黃色。若果餅皮用淨咗,可以整埋豬仔餅

蓮茸月餅[編輯]

蓮茸月餅係最常見嘅傳統月餅,多數都加埋鹹蛋黃,最流行嘅係雙黃,即係「雙黃蓮茸月」。蓮茸又分兩種,傳統係黃蓮茸,蓮子無去衣,用黃糖整;近年興白蓮茸,蓮子有去衣,用白糖整,色水比黃蓮茸淺,蓮子味香啲。

五仁月餅[編輯]

五仁月餅係舊時比較流行嘅傳統月餅,五仁餡通常都係欖仁合桃芝麻瓜子杏仁,再落玫瑰露酒調味。

有啲五仁月餅會用埋金華火腿做餡,舊時亦會用燒雞取代金華火腿。

荳茸月餅[編輯]

荳茸月餅亦係舊時比較流行嘅傳統月餅,多數用綠豆茸溝雞油整餡,價錢比蓮茸月餅平。亦有用紅豆茸做餡,叫荳沙月餅。

奶黃月餅[編輯]

奶黃月餅係近年時興嘅月餅,用傳統餅皮包奶黃餡。不過因為一個餅放得多奶黃餡就好難焗得好,所以奶黃月餅嘅大細要縮細去就,比傳統月餅細個。

冰皮月餅[編輯]

內文: 冰皮月餅

冰皮月餅喺1989年先至出現,餅皮用糯米粉同粘米粉整,唔經焗製。餡就好多時都係綠豆茸、芝麻茸、生果茸,近年重有乳酪朱古力芝士等等。

銷售[編輯]

香港大型餅鋪賣月餅係用月餅咭為主,嚟啲預繳式消費方便工廠統計,預知月餅銷售數量,有利減少死貨。1970年代之前,香港流行供月餅會,提前一年每月供一次款,第二年就可以攞幾盒月餅送禮。

而家嘅月餅多數用透明膠袋獨立包裝,放入方型或圓形鐵罐入面。舊時包裝無咁講究,只係將幾個月餅疊起用玉扣紙捲成一筒,矜貴啲就用紙盒包裝。

睇埋[編輯]